Read Isu Matìyò 16 Bible Online

Matìyò 16 - Isu bible

Matìyò 16

¹Aghee Falàsî nə̀ àghè Sadùsî yìy ə zù bù a kə̀lə̀ Yesù kaʼ ani mwàm kòʼ we dzìy nə̀ ù dè bə̀ kə̀tsəe kə kə ŋwô bə̂ an-a-vələ.

²U bə̀lì yə̀ ghu nə̀, “Abu inyikwubì tìy bû nəniy nə̀ byiwuŋ kiy zwe ŋwò, ghǎ dzìy utswû wìy kî dyòʼò ŋwò, aŋwòə byiwuŋ kiy zwe ŋwò.

³Nə̀ bələ̀bə̀lə̀ tìy ghǎ dzìy iwe yiy kî nìàʼà ŋwò, aŋwòə byiwuŋ kiy ləŋ dòʼò ŋwò. Ghà kwu kə ani soŋ kyabi tsə̀ nə̀ i kî dyòʼò aghi, ghà way ani tyi dzày àyiə yə a nîy nəniy bənə kiy nyiə.

⁴Ghà bəbə kə̀tsəe aŋwòə ghà də aghè àbɛbə, ghà liə sòʼò way ani bɛmə! Mə tsəbə dè wày tsəe kə̀liy kiy, tsəe kə mə kî kwuni dê bə̂ awò ghà à də ndzòʼò tsəe kə yiə yə Zə̀kìy kə zəŋi nəniy nə̀ kə fyi nə̀ wè ntwùm ə̀ Kə̀zə̀ toŋə Dzonà.” Yesù ə na sə tsə ghu dyaŋi ŋwò i we yiy.

⁵Abù ghu dâŋ kwùm tsə a ŋgùŋ ìŋwù ìlìy yìy, nə̀ tsə̀təndii tə we tiy mə zə̀ sə ba kiy.

⁶Yesù ə dzày yə̀ â ghu nə̀, “Ghà nîy tsə iyemì, yèmi tsə nənìy nə̀ mbùŋ ə̀ àghè ə Falàsî yə̀ nə̀ àghè ə Sadùsî yìy, aŋwòə ghu də mə̀nə̀ nyi mbe imbè. Ghu də sòʼò ani byɛbi màʼà ghà.”

⁷Ghu ə kaʼ ani dzày anə iwè i ghu nə̀ “Ù ghî dzìy yəə ŋgà də kə̀ nîy nəway ba kiy.”

⁸Yesù ə kwu ayiə yə ghu dzîy nəniy, u bəb yə̀ a ghu nə, “A də kìə̀ ghà dzîy nəniy anə iwè nə̀ ghà kwu way ba kiy ə? Gha kwu liy fə ibɛmə.

⁹Ghà mə nìyzə̀ ayiə yə mə fyi aghê təkaam ità anə ghɛbə tə uba ità, ghà kə byoŋi lwe tsə uŋkhìy ù nê wìy u sə̀ki?

¹⁰Moo ghɛbə tə uba isèmbe tə mə kə fyi nəniy aghe təkaam ikyàʼì, ghà kə byoŋi lwe tsə uŋkhìy ù sə̀ki?

¹¹À də kìə̀ ghà sî də kə̀ zuw kəli nəway nə̀ Mə mə̀ dzìy dzə̀ wày ayiə kəba awò ghà ə? Ghà kwuni nîy tsə iyemì anə mbùŋə̀ Aghè ə Falàsî yə̀ nə̀ Aghè ə Sadùsî yìy, aŋwòə ghu də mə̀nə̀ nyi ìmbe imbè. Ghu də ani byɛbi màʼà ghà.”

¹²Ghu dyaŋi zuw kəli yə̀ nə̀ ù mə̀ dzìy dzə̀ wǎy mbùŋ yə̀ ghu kwe anə kəba, nə̀ ù mə̀ ghî dzìy ndzòʼò ayiə̀ yə̀ Aghè ə Falàsî nə̀ Aghè ə Sadùsî tyi dê nəniy.

¹³Abù Yesù nə̀ tsə̀təndii tə we tiy ghu zû nəniy a mbòʼò Kàsaliyà Filìpî, u bəb yə̀ awò ghu nə̀, “Aghê dzîy nə̀ mə də ndiə?”

¹⁴Ghu bə̀li kə we nə̀ “Aghê àliy yiy dzîy nə̀ wò də̌ Dzwan wə ù nyìə̀ nəniy mwi m-à-zə̀ mìy, aghê àliy yiy dzîy nə̀ wò də̌ Èlaydzà, àliy yiy dzîy wò də Yèlìmiyà, àliy dzîy sòʼò nə̀ wò də̌ wè ntwùm ə̀ Kə̀zə̀ ù wîy ùliy wiy”.

¹⁵Yesù ə bəb tsə aghu nə̀ “A kwuni bû ghà, ghà dzîy nə̀ mə də ndiə?”

¹⁶Saymùn Pità ə bə̀li kə nə̀, “Wò də̌ wù wə̀ Zəkìy suw kyili na nəniy anə kədòŋ, də̌ sòʼo wà Zə̀kə̀ kə muə nəniy anə sòŋə indzə̀m.”

¹⁷Yesù ə dzày yə̀ a we nə, “Zəkìy dyoʼo ŋwò nə̀ wò, a Saymùn wà Dzonà, à kə̀ dzây dzə̂ wù lìy wìy â wò, à dè təli wam wə ù də nəniy an-a-vələ.

¹⁸Mə dzîy bə̀ â wò a Pità, wò də yəə Kəna. Na kə mə kî byiə nəniy ndàw Kə̀zə̀ ate, daʼa kə inaʼ i ipfə yiy kî taw tsìy dzə̀ wày ndàw Kə̀zə̀ ì ghà yə̀.

¹⁹Mə kî nyə̀ tsə gha nə̀ daʼa kiy azoŋə̀ àghù yə̀ ghu də nəniy a lòʼo kə Zə̀kìy saʼa nəniy aghee we yiy ate. Iyiə yə ghà kì twe myiʼà nəniy fə anə mbyi, à ki də ì yuu mə twe na dzə̂ an-a-vələ, iyiə yə ghà bɛmə kə fə anə mbyi, à ki də ì yuu mə bɛmə na dzə̂ an-a-vələ.”

²⁰U dyaŋi sə̀ŋì fyi yə̀ kə̀tswuŋi awò tsə̀təndii we tiy nə̀ kəə ghu nə̀ dzìy fyiə awò wù lìy nə̀ ghe də Wù wə̀ Zə̀kìy sûw kyili na.

²¹Ani kaʼ tsə a sòŋə fə ghà fə̀, Yesù ə kaʼ ani dzày awò tsə̀təndii tə we tiy nə̀, “Mə kwu ani zù anə inaʼ i Yèlusalèm mə ki fii anə ndə̀mə̀ le tə ayiə awò ŋgəd tə inaʼ tiy nə̀ àghè àlwaʼa yiy, nə̀ aghè àtyi dê ulàŋ wìy, ghu kiy wiy maʼà soʼò mìə̀, ani zù kwùm ntsukə inti mə ki zɛmə̀ dzwoŋi bə̂ anə ipfə.”

²²Pità ə nìy kə we, bwa təmi yə̀ nə̀ we, kaʼ ani kwà we nə̀, “A mwe ə̀ mbyi, Zə̀kìy kə bɛmə dzə̀! Ndzòʼò ìyiə yə̀ kə fyi dzə̀ nə̀ wò.”

²³U kwuni kyèmì tsìy yə̀, dzày yə̀ awò Pità a we nə, “Ŋwò adzəmə̀ mìə̀, Satàn! Wò tyàlə̀ myàʼà mìə̀, aŋwòə imôʼ yiə̀ yìy kə̀ ŋwô bə̂ dzə̂ awò Zə̀kìy, i ŋwô bə̀ awò wù mbyi.”

²⁴Yesù ə dyaŋi dzày yə̀ awò tsə̀təndii tə we tiy nə̀, “Abu wù liə nəniy ani dzwùmì bə̀ mìə̀, u kwu ani twe màʼà tsə uwe u we, u bòʼò kə zəd tə fəkàʼ tə we ù dzwùmì bə̀ mìə̀.

²⁵Aŋwòə wù wə̀ ù liə nəniy ani bii fyi ŋwò bə̀ imùə̀ i we, ù kì nìy myìʼà ŋwò. Wù wə̀ ù kì này màʼà nəniy imuə̀ i we yiy â mìə̀ nə̀ awò ntwùm ìdzòŋə̀ yìy, ù kì kyilə ŋwò imuə itsà yìy.

²⁶Wò nyiə fyiə kə kìə̀ abu wò kəli mâ tsə ufyiə udzə̀m fə anə mbyi kwuni này màʼà kə imuə̀ yə̂ ə? Fyiə kə̀liy kiy way dzə wò də ani nyə̀ ani zwe ŋwò dzwoŋi bə̀ imuə̀ yə̂ ate.

²⁷Aŋwòə fəkəmə̀ Wà Wù bù nə̀ ndzòʼò ìmwâ yə̀ təli kwu nəniy, ù bè fwumə nə̀ tsə̀təndii tə a-zə̀ tìy ani bù tsə wù ùmoʼ umòʼ anə fàʼ kə we.

²⁸Mə ndzəmə̀ dzìy bə̀ ŋwò aghê liy də nyiə fə nə̀ ghu kî pfə dzə̀ wày nə̀ ghu kə̀ kôʼ yə̂ Wà Wù nì bè dzwəŋə nəniy ate ani bù saʼ anə uwè u kədòŋ.”