Read Isu Matìyò 17 Bible Online

Matìyò 17 - Isu bible

Matìyò 17

¹Abù ntsukə tsîy tsə ìn tyìfoŋ, Yesù ə nìy kə Pità, nə̀ Dzɛ̂m we nə̀ àzə̀ tyoŋə Dzwan, u kwoʼ yə̀ nə̀ ghu anə ukàʼ ù dabə wiy. Ghu də̀ awote nə̀ noŋə̀ ghu.

²Yəə ghu liay yə̂ nəniy, uwe u Yesù wìy ə ŋwò kwuni kə anə səkə ghu, utwûmusə u we wiy kə mwà fyi bə̀ yəə à də inyi, ndzwu tə we tiy mwà fə̀mə̀ yə̀.

³Tsə̀təndii tə ìti ə kòʼ yə̀ Musîs nə̀ Èlaydzà ghu dzəŋə̀ nəniy nə̀ Yesù.

⁴Pità ə dzày yə̀ â Yesù nə̀, “A mwe ə̀ mbyi, loʼo kə̀ kpe ŋwô yəə a ni muə̀ ate! Abu wò liə mə buk kə umfwùə ùti fəə, kə̀mòʼ â wò, kə̀mòʼ â Mosîs, kə̀mòʼ â Èlaydzà.”

⁵Yəə ù namə dzəŋə̀ nəniy, mbàʼ tə̀ zwe tiy ə bù kəd na tsə ghu, dzə̀ ə foŋ fyi bə̀ anə mbàʼ tə gha tə̀, dzìy nə̀, “À yù də wa nam ù tsukə̀ wìy ù zəŋə miə mə ŋge dyoʼo. Gha si zuw yə awò we.”

⁶Abù tsə̀təndii tə we tiy zuw tsə aghi, ghu ə tu bvə̀ fwo yə̀ ntùmə̀nsə a mbvə̀dintsə nə̀ ghù mə tsəŋ tsìy fyi.

⁷Yesù ə bù mwàm tsə ghu, dzìy a ghu nə, “Ŋwo kə nənà idoŋ, ghà kə tsəŋ dzə̀.”

⁸Abù ghu bâŋ lyay yə̂ nəniy, ghu kə̀ kâm kôʼ nəway wù lìy, a mày kə Yesù nə̀ noŋə̀ we.

⁹Yəə ghu dzwoŋi tswi bə̂ nəniy anə ukàʼ, Yesù ə dzày yə̀ a ghu nə, “Kəə gha nì dzîy fyiə ayiə yə ghà kôʼ awò wù lìy, à nì may kə nə̀ Wà Wù mə zɛ̀mə̀ dzwoŋi bə̀ anə ipfə.”

¹⁰Tsə̀təndii tə we tiy ə bəb yə̀ a we nə, “À də kìə̀ aghê àtyi dee ulàŋ wìy kə dzîy nəniy nə̀ Èlaydzà kwu ani bù dzə̀ isə awò Kə̀litò ani bù ə?”

¹¹Yesù ə bəlì kə ghu nə “I ndzə̂m də̀ ŋwô a ghii nə̀ Èlaydzà kwu ani bù isə tə̀ ù bù byay na tsə ayiə dzə̀m.

¹²Mə kwuni dzây bə̂ â ghà nə̀ Èlaydzà maa khu bù tsìy, ghu kə kə̀ kôʼ kəli nəway we. Ghu kwuni fàʼ ayiə dzə̀m ghu kə liə nəniy ani fàʼ nə̀ we. À də̀ sòʼo ighəd Wà Wù kì fyaʼa soʼò anə wokə ghu.”

¹³Tsə̀təndii tə dyaŋi zuw kəli yə̀ nə̀ ù ghî dzìy Dzwan wə ù kə nyiə̀ nəniy mwi m-à-zə̀ mìy.

¹⁴Abù ghu bû kway bə̂ nəniy ŋwàâ kìy, wù lìy ə bù nyaʼa tsə a kə̀lə̀ Yesù,

¹⁵dzày yə̀ a we nə, “A Mwe ə̀ mbiy, kwoʼ nə̀ mwuli kiy azoŋə̀ wa nam, ù dzàŋə̀ kə̀bvə̀, ù ŋge fyaʼa ŋwò, ù bà ani bvə̀ nyi anə uvə̀lə̀, nyi fə̀ liy fiy, u bvə̀ yə̀ anə mwi.

¹⁶Mə mə̀ nìy bə̀ we awò tsə̀təndii tiə̀ tìy, ghu də̂m kê ani zəŋi taw kə we.”

¹⁷Yesù ə bə̀lì kə nə̀ “Ghà kwu dzə̀ way ibɛmə ìliy yiy! Mə kwu ani dòʼò nə̀ ghà anə ghab kə̀ ghaa kiy ə? Mə kwu ani kwù fòŋ anə ghab kə̀ ghaa kiy nə̀ ghà ə? Ghà nîy bû nə̀ wà ù ŋəmə̀ ù ghè wə̀ asə̀ə̀ mìə̀.”

¹⁸Yesù ə dyaŋi kwà yə̀ ùsìy ùbɛbə wə, u dyaŋi ŋwò fyi tsə azoŋə̀ wa ù ghè wə̀. Wà ù ghè wə̀ ə dyaŋi taw kə a sòŋə fə ghà fə̀.

¹⁹Tsə̀təndii tə nìyòŋì zù bù â Yesù bəbə a we nə, “A mə̀ də kìə̀ ghě mə̀ də̀mə̀ kê nəniy ani dzwùm fyi usîy ùbɛbə wə ə?”

²⁰Yesù ə dzày yə̀ nə̀, “À də nə̀ ghà ndwâm kwu way ibɛmə yiy. Mə dzîy bə̀ àyiə àsoŋə̀ yìy Abu ghà mə̀ kwu nəniy ŋyoŋə fə ibɛmə fiy yəə à də nyoŋə fə sàm ə̀ fə̀kàʼ yə̀ i tɛb tsî fyi nəniy sam tə ufyiə tə tədzə̀m, ghà mə̀ də̀ ŋwô ani dzày tsə awò ukâʼ wìy nə̀, ‘Ŋwo kə fəə zû dòʼo yə̀ fiy’, u ki soŋ tsə soʼò. Iyiə ì liy ki də wày dzə ani taw tsìy fyi ghà.”

²¹Fyiə kə̀liy kiy way dzə ani dzwùm fyi ndzòʼò ùsìy ùbɛbə wə, à mày kə nə̀ wù bam dzə̀ idzwə, gwùŋə̀ sòʼò. [9]

²²Abù ghu zoŋə̀ yə̂ a Galìlî, Yesù ə dzày yə̀ a ghu nə, “Ghu kî nìy nyìə̀ fyiə ŋwò yə̀ Wà Wù awò àghù yə̀

²³ghu kî wiy nəniy we. Ani zù fyi ntsukə inti, ù kî zɛ̀mə̀ dzwoŋi bə̀ anə ipfə.” Iwee yiy kyemi này yə̀ tsə̀təndii anə ayiə ghè yə̀.

²⁴Abù Yesù nə̀ tsə̀təndii tə we tiy zû anə inaʼ i Kàpanùm, aghê a khi ŋwàʼà kə̀tsuwkiy kə də̀ awo a Ndàw Kə̀zə̀, ghu zù bù awò Pità a we nə, “Àtyi dè yiə̀ wə̀ tsuw tsə̀ kə ŋwô ŋwàʼà kə̀tsuw kə a ndàw Kə̀zə̀ ə̀?”

²⁵Pità ə bɛmə yə̀ a ghu nə, “Ìny, ù tsuw tsə̀ ŋwò.” Abù Pità zù nəniy a ndaw, Yesù ə səsə kiy bəb fyi yə̀ a we nə, “A Saymùn, wò nyìə̀ mòʼò nə̀ìndiə? Ùdòŋ wə fə a mbvə̀dintsə nîy tsə̀ ùkhiy u ŋwàʼà kə̀tsuwkiy awò aghè inaʼ ə ghu yiy moo ghu nîy tsə̀ awò aghè tətwùmə̀ yìy ə?”

²⁶Pità ə bə̀lì kə nə̀, “À də̀ tsə̀ â àghě tətwùmə̀.” Yesù ə dzày tsə nə, “Iyiə ìdzoŋì, i dê tsə nə̀ aghè ə inaʼ i ghà yə̀ kwu way ani tsuw dzə̀.”

²⁷Ŋgà kə kwuni zəŋi dzə̀ nə̀ fôŋ tìy ŋə̂m àghù yə̀. U dzày yə̀ â Pità a we nə̀, “Zù anə iŋwù, wò maʼà yə̂ nsaʼ, wò sê fyi kwoʼ bə̂ itsi i səsə yə, wò za fyi kə idzwə i itsi ighè yə̀ wò kî kòʼ tsə ukhiy ate u kpe nəniy yə ŋgà ni dzəŋi tsuw yə̂ ŋwàʼà kə Ndàw Kə̀zə̀ ate. Wò kî nìy kə wò zû tsuw yə̂ itwoʼ i ŋwàʼà kə ŋgàŋ.”