Read Isu Matìyò 19 Bible Online

Matìyò 19 - Isu bible

Matìyò 19

¹Abù Yesù dzày mâ tsə nəniy ayiə ghè yə̀, u ŋwò tsə a Galìlî zù a mbwòʼ ə̀ Dzùdiyà, a ŋgwùŋə̀ Dzwìy Dzudàn ì lìy yə̀.

²Ŋwàâ kə ghù kìy dzwùmì yə̀ we awote, u zəŋi tsə aghû yə̀ àdzə̀m ghu kə dzaŋə̀ nəniy ghu taw kə.

³Aghee Falàsî àliy yiy zù bù ani mwàm kòʼ we nə̀ ù nì bvə̂ tsə lâŋ kìy. Ghu, bəbə a we nə, “Lâŋ kìy bɛmə ŋwô nə̀ ùŋəmə̀ dzwùm fyi wìy we abu ù tsə̀m tsə nəniy ə̀?”

⁴Yesù ə bə̀lì yə̀ ghu nə̀, “Ghà kamə kə̀ twoŋə kôʼ ayiə yə ŋwàʼà k-a-zə̀ kìy dzîy nəniy nə̀ Zəkìy kə bwam tsə wìŋəmə̀ nə̀ wìyəŋi ə̀?

⁵U dzày tsə sòʼò nə̀, ‘Sələ kə iyiə kə̀ də̌ nə̀ ùŋəmə̀ kì na sə tsə təli nə̀ zə̂ ù zù təmdzəŋi yə̀ nə̀ wìy we, ghu ghè yə̀ àbè ghù ki doʼò tsə uwe u mòʼ.’

⁶I dê tsə nə̀ ghu kâm way dzə aghê bè, ghu də uwe u mòʼ. Ì yî dè tsə nə̀, Wù lìy wìy kwu dzə̀ way ani sàlì màʼà fyiə kə Zə̀kìy təm na dzəŋi.”

⁷Aghee Falàsî yə̀ bəbə a we nə, “Ayiə yə i də nəniy ghii, Musîs kə nyə̀ làŋ kə̀ iyî kìə̀ nə̀ ùŋəmə̀ si twaa nyiə yəə ŋwàʼà kə̀ səalə kiy awò wiy tə̀ u dzwùm fyi yə̀ we ə?”

⁸Yesù mee a ghu nə, “Musîs kə ghî twà na lâŋ kə̀ dzwumə fyiə kə wiy kiy, aŋwòə gha kwu ukwəli u təfòŋ. I kwuni wày dzə a ghii ani kaʼ ŋwò bə̀ yəə Zə̀kìy kə zubì bə̂ nəniy mbyi.

⁹Mə ndzəmə̀ dzìy bə̀ nə̀ wù wə̀ ù dzwùm fyi nəniy wìy we, nə̀ à way nə̀ wìy ghà wə̀ lyaŋə ŋwò, ùŋəmə̀ u ghè wə̀ mə̀ zəŋi ayiə tə mwàŋə̀ abu ù nìy yə̂ wìy u ŋwò wìy.”

¹⁰Tsə̀təndii tə we tiy dzày yə̀ a we nə, “Abu i baa də nəniy ghi à dzwàb nə̀ wù kə nîy dzə̀ə wiy.”

¹¹Yesù ə dzày yə̀ a ghu nə, “Iyiə yə̀ zè dzə̀ wày awò aghè ndzə̀m, i zê kə awò aghù yə̀ Zə̀kìy kə zəŋi na nə̀ ghu nîy àghiy.

¹²I də nə̀ ya aghè liy dyoʼò təŋə bə̀ kə ntswù a tsuk ù byikə wiy, à liy dyoʼò bə̀ nə̀ à lwòʼ na aghè liy yiy, à liy dyoʼò yə̀ nə̀ ghu liə ani fàʼ ayiə a kwumə yə̌ nə̀ loʼo kə Zəkìy saʼa nəniy aghê ate. Ghà na tsə kə ghi, wù wə̀ u də dzə ani bɛmə ayiə yə̀ mə tyi dê nəniy, u fàʼà yə̀.”

¹³Aghê liy kə bè nə̀ àwa ghu yiy a kə̀lə̀ Yesù nə̀ ù gaʼ tsə awo anə utuw ghu, ù gwùŋì tsə azoŋə̀ ghu. Tsə̀təndii tə we tiy ke na yə̀ ghu.

¹⁴Yesù ə̀ dzày yə̀ a ghu nə, “Ghà kə twe dzə̀ nə̀ anîsə̂ kə bû a kə̀lə̀ mìə̀, aŋwòə loʼo kə Zə̀kìy saʼa nəniy kə də awò àghù yə̀ ghu na tsə iwee i ghu yiy yəə à də anîsə̂.”

¹⁵U gàʼ yə̀ àwo azoŋə̀ ghu, lwì tsə sòʼò ghu. Abù ù mày kə nəniy, u ŋwò yə̀ iwe yiy.

¹⁶Tsuk ù liy, wù lìy ə zù bù a kə̀lə̀ Yesù bəbə a we nə, “A Àtyi dè, à də̀ iyiə ìdzoŋì ghaa yiy mə də ani zəŋi tə mə kəli imuə̀ itsà ə?”

¹⁷Yesù mee a we nə, “Wò bəbə ìyiə ìdzoŋì ghaa yiy awò mìə̀ ə? À mày kə wù ùmoʼ ù də nəniy wù ù dzòŋə̀ wìy. Abu wò liə nəniy ani kəli imuə̀ itsà, wò kwu ani na ùlàŋ u Kəzə̀ ùdzə̀m.”

¹⁸Wù wə̀ mee a we nə, “Ndzòʼò ù ghaa wiy soʼo?” Yesù ə dzày yə̀ a we nə̀, “Kəə wò nì wiy wù, kəə wù nì bwiy mwàŋ tìy, kəə wù nì tsoŋə, kəə wò nì guw nia nəniy ayiə yiy azoŋə̀ wù lìy wìy.

¹⁹Wò ki nyiə yə ŋkwiʼi miy awò tè nə̀ zwə̂, wò ki liə yə soʼo aghê liy anə yiə yə wò liə nəniy uwe niə̀ wìy.”

²⁰Wà fə̀ghàŋ wə mee a we nə, “Mə mə na mà ulâŋ wə̀, ùdzə̀m mə kâm də̀ ani zəŋi sòʼò mə̀yə?”

²¹Yesù ə dzày yə̀ a we nə, “Abu wò liə nəniy ani ba dòʼò tsə tsitsi anə sə k-a-zə̀, zu fê mâ tsə ufyiə yiə̀ wìy, wò dzâw nyiə̀ yə̂ ukhiy u ghè wə̀ awò aghè laa yiy, wò kî kəli ikwum an-a-vələ. Wò dyaŋi dzwùmì bə̀ mìə̀.”

²²Abù wà fə̀ghàŋ wə̀ zuw tsə i ghà yə̀ ghi, u dyaŋi ŋwò nə̀ ìkòʼ ì bɛbə yiy, aŋwòə ù kə ŋge kwumə ŋwò.

²³Yesù ə dzày yə̀ awò tsə̀təndii tə we tiy nə̀, “Mə ndzəmə̀ dzìy bə̀ ŋwò nə̀ à nì tòʼò ŋge də̀ iyiə ì taw yiy awò wù ù kwùmə wìy ani nìy tswi tsə uwee u we tə̀ Zə̀kìy saʼ.

²⁴Mə nam dzây fwuli bə̂, I ŋge bva ŋwò awò nyàm yə̀ ghu twoŋə nə̀ à də̀ kə kàmêl [11] ani tsìy fyi yə̀ anə bwòʼ kə fənsaʼ, tsìy fyi â wù ù kwumə̀ wìy ani na tsə uwee u we tə̀ Zə̀kìy saʼ.”

²⁵Abù tsə̀təndii tiy zuw tsə ghii, adzwə zwum này yə̀ ghu ate. Ghu bəbə anə iwè nə̀, “Anə̀ ì yuu nyiə ghi, à də̌ ndiə Zə̀kìy də ani bii fyi we?”

²⁶Yesù ə liay kə ghu ghii, dzày tsə nə̀, “Ayiə à liy yiy də ŋwô wù də wày ani zəŋi, Zə̀kìy kwuni də̀ ŋwô ani zəŋi ayiə adzə̀m.”

²⁷Pità ə dyaŋi dzày yə̀ a we nə, “Kòʼo ghè mə na sə tsə ufyiə ghələ udzə̀m ŋwò dzwùmì bə wò, ghè nî kyilə kìə̀?”

²⁸Yesù mee a we nə, “Mə ndzəmə̀ dzìy bə̀ ŋwò â ghà nə̀ ani bu Wà Wù nì bû dòʼò tsə nəniy anə ndàŋ ə̀ kə̀dòŋ ə̀ we ìmwâ yìy anə mbyì ì fyiə̀ yə̀, ghà yə ghà bwîy tsə̂ a dzəmə̀ mìə̀ ghà nî dyòʼò tsìy yə̀ anə̀ ukwe ùnyiə u kədòŋ wìy ani saʼ utuu Islè wə̀ ùvəm nə̀ ù ghe wiy ubè.

²⁹Wù wə̀ soʼo ù na sə tsə nəniy ndàw we, moo àzə̀ ə we, moo tə̀lì we, moo zə̂ moo awa we nə̀ ufyiə u we wiy, bòʼ mìə̀, ù nì kyilə dzwəŋə tsə ani kwoʼ kwùm fəbwaam tsìy fyi tsə yəə ù kə boʼò kwu tsə nəniy, ù nì kəli sòʼò ìmùə̀ itsà.

³⁰Ndə̀mə̀ àghù yə̀ ghu moʼò nəniy nə̀ ghu də aghê àsoŋə̀ nyiə, ghu ni bè dyòʼò ŋgwò mə̀ ghù. Aghû yə̀ ghu moʼò nəniy nə̀ ghu də ŋgwò mə̀ àghù nyiə, ghu nî bè dyòʼò àghè àsoŋə̀.”