Read Isu Matìyò 20 Bible Online

Matìyò 20 - Isu bible

Matìyò 20

¹Yesù dzày tsə fəzə̀zə̌ nə̀, “Loʼo kə Zə̀kìy saʼa nəniy kə də yəə ndzòʼo ayiə yə ghi. Wù lìy kə də ŋwô, u bəd ŋwò kə, kaw tsə aghee kəfàʼ nə̀ ghu zû fâʼ anə uswum u ighe tə̀ ghe ki tsə ghu.

²U byay na tsə ntàŋə̀ ukhiy wə ù kì tsəə ghu ate anə fəntsuk. U dzày yə̀ nə̀ ghu zû kaʼ yə̂ kə ani fàʼ anə uswum.

³U kàm zù kòʼ tsə aghê liy anə fôŋə̀ ìnàʼ, ghu tiy nəniy nə̀ ghu faʼa way fyiə kə̀ liy kiy, nə̀ à sì kwoʼə yə̀ fwatəwùŋ ìbwùkə.

⁴U dzày yə̀ sòʼò a ghu nə, ‘Ghà zû fâʼ anə uswum wam tə̀ mə ki tsə gha nə̀ fyiə kə kə kpe nəniy.’ Ghu zù sòʼò.

⁵U ŋwò fwuli tsə nə̀ fòŋə̀ ntsə̀, ŋwò fəli tsə sòʼò anə fwatəwùŋ ìtii, nam twum zù kə aghù anə uswum.

⁶U kàm zù anə fôŋə̀ ì naʼ, zù kòʼ tsə aghû ghu tiy nəniy nə̀ ghu faʼa wày fyiə kiy, u bəbə a ghu nə, ‘Ghà faʼà kìə̀ fə ghà sî nyàb maʼà kə ntsuk fiy fə kə̀ŋwôŋwò ə?’

⁷Ghu mee a we nə, ‘Wù lìy kamə nyiə̀ dzə̂ ghəd nə fàʼ kìy.’ Ù mee a ghu nə, ‘Zù nənìy anə uswum wam ghà zû fâʼ.’ ”

⁸Abù nə̀ nyinkwubì tìy, mwe kə̀fàʼ ə dzày yə̀ awò wù wə̀ u lya nəniy fàʼ kìy a we nə, “Twoŋə bə̀ àghû yə̀ ghu mə̀ faʼà nəniy anə uswum tə̀ wò tsə ghu. Kaʼ tsə azoŋə̀ àghù yə̀ ghu mə̀ lə̀lə̀ sək nəniy nə̀ nyinkwubì tìy tə̀ wò ki tsə gwùŋì tsə à yuu ghu mə̀ bəd sək nəniy.”

⁹Aghû yə̀ ghu kə sək nəniy fàʼ kìy anə fwatəwùŋ ì tà ghu bù nìy kə ukhiy ivən i fəntsuk.

¹⁰Aghû yə̀ ghu kə sək isə, ghu tòʼò mòʼò kə nə̀ ukhiy u ghu wiy kî dùw tsìy fyiə ŋwò, ghu kwuni nam tsə yə̀ kə ghu ighəd anə ivən ì moʼo yiy anə fəntsuk.

¹¹Ghu nìy kə ukhiy u ghu kaʼ ani ŋwuŋi dzə̀ŋì anə tuw kə mwe ə̀ kə̀fàʼ.

¹²Ghu dzìy a we nə, “Aghû yə̀ ghu lələ̀ sək nəniy fàʼ kìy, wò tsə fwumi yə ghu nə̀ ghə̀d ighəd nə̀ ghu bû fàʼ tsə kə anə ufwaiwuŋ ùmòʼ. Ghè mə loʼo fii zəli an-a-fàʼ anə tsə̂.”

¹³Mwe ə̀ kə̀fàʼ wə̀ ə dzày yə̀ â wù ù mòʼ ate nə, “A àmbwê, mə gha kamə tsɛ̂ dzə̂, ghà mâ bɛmə ntàŋə̀ ùkhiy wə ŋgà mə̀ bya nəniy.

¹⁴Nìy nə ŋkhi məli miy gha ŋwô zû i ghi yiy a ndaw, à tsə̀m tsə miə ani nyə̀ sòʼò ghu nə̀ ndzòʼo ùkhiy wə mə nyiə̀ nəniy â ghà.

¹⁵Ghà moʼò nə̀ mə kwu way daʼa kiy ani zəŋi ayiə yə mə liə ani zəŋi nə̀ ùkhiy wam wiy ə̀? Moo ghà ghoʼò yəə mə bvaa nə̀ wo kə̀ nyiə kiy ə̀?”

¹⁶Yesù ə dzày kəd tsə nə̀, “À də̀ sòʼò ighəd yəə Zə̀kìy nî niamə aghè àliy yiy aghê koʼò nəniy ghu nə̀ ghu də ŋgwò mə̀ àghù fə anə mbyi. Ù ni də kə̀ namə soʼò aghê àlìy yiy aghê koʼò nəniy ghu nə̀ ghu də aghê àsòŋə̀ yìy fə anə mbyi.”

¹⁷Yəə Yesù kwoʼo yə̂ a Yèlusalèm, u nìy kə tsə̀təndii tə we bwa təmi yə̀ nə̀ ghu anə ibwè, u nìyòŋə̀ dzày yə̀ àyiə yə a kî fyiə nəniy nə̀ we.

¹⁸U dzày yə̀ a ghu nə, “Ghà zuw, ŋgà kwoʼo yə̀ a Yèlusalèm, à də̀ awote ghu kî nyiə̀ yə̂ nəniy Wà Wù anə wokə ŋgəd tə aghè àlwaʼa nə̀ àghè àtyi dee ulàŋ wìy. Ghu ki saʼ wiy we, dzìy nə̀ ù kpe ŋwô ani pfə.

¹⁹Ghu nîy nyiə̀ dyaŋi yə̂ we awò àghù yə̀ ghu də wày aghee Dzû, Ghu ki swiʼì we, ghu tsə ntiə anə asə ə we, ghu bwad we nə̀ ìkwò yìy, ghu ba wiy we anə kàʼ fə təzəd. Ani bù ntsukə miy zê ìnti, ù nî kàm zɛ̀mə̀ dzwoŋi bə̀ ani pfə.”

²⁰Wìy Zebedì ə dyaŋi zù bù nə̀ àwa we à bè, nyaʼa tsə a təŋə̀ Yesù dzìy nə̀ ù fày ìghe.

²¹Yesù ə bəb yə̀ a we nə, “Wò liə nə̀ mə fây wò anə kìə̀?” Wìyəŋi wə̀ mee a we nə, “Tɛb bə â mìə̀ nə̀ awa yam yə àbè ghu nî dyòʼò dzəŋə tsə nə̀ wò, ù lìy nə̀ ukwe yiə̀ ù nyiə wiy, ù lìy anə ukwe yiə̀ ù kwuə̀ wìy a ni bu wò saʼa nəniy anə uwè u kədòŋ.”

²²Yesù mee aghu nə, “Ghà kwu dzə̀ way ayiə yə ghà dzìy nəniy, ghà kî də̀ kə ŋwô ani fii ndzòʼò ìfii yə mə kî fyaʼa nəniy ə̀?” Ghu mee a we nə, “Ghè mə bɛmə.”

²³Yesù ə dzày yə̀ a ghu nə, “Gha kî dzə̀mə̀ fyaʼa sòʼò ŋwò ndzòʼò ìfii yə mə kî fyaʼa nəniy. I kwuni də̀ kə nə̀ à kwu way miə daʼa kiy ani byay na tsə nə̀, à kì dyòʼò kày anə ukwe wam ù nyiə wiy, moo anə ukwe ù kwuə̀ wìy. Loʼo tə ghà tə̀ də̀ təŋ awò àghù yə̀ Təli wam sây na nəniy nə̀ ghu doʼò ate.”

²⁴Abù tsə̀təndii tə̀ liy tə ìvəm zuw tsə ayiə ghè yə̀, ghu kaʼ ani ŋə̀m nə̀ fòŋ azoŋə̀ ghu ghè yə̀ àbè.

²⁵Yesù ə twoŋə dzəŋə na bə̀ ghu, dzày yə̀ aghu nə̀, “Ghà kwu ŋwô nə̀ ùdòŋ u ghù yə̀ ghu də wày aghee Dzû, ghu saʼa àghě ghu nə̀ awo àtaw yiy. Aghû yə̀ ghu də nəniy utuw wiy, ghu liə sòʼò ani tsəa lâŋ kìy awò aghù yə̀ ghu də nəniy a təŋə̀ ghu.

²⁶Ghà kwuni kwu dzə̀ way ani dòʼò yəə à də̌ ghu. Wù wə̀ ù kwu ani dòʼò wù ùsòŋə̀ wìy anə uzə ghi à də̌ wù wə̀ ù na tsə nəniy uwe we wiy yəə à də̌ wù kə̀fàʼ. Wù kətuw kwu ani dòʼò tsə wù wə̀ ù fàʼà nəniy â àghè àdzə̀m.

²⁷Bəə wù ùmòʼ anə uzəə ghi dziy doʼò wù kəsə, ù kwu ani dòʼò kə̀kwə̀d awò àghè liy yə.

²⁸Ighəd yəə à də̌ Wà Wù, ù kə kə̀ bû dzə̂ nə̀ aghê fâʼ a təŋə̀ we. Ù kə kwuni bù ani fàʼ awò aghè àdzə̀m nə̀ ani nyiə̀ yə̀ ìmwùə̀ i we ani kùm ŋwò fyi bə̀ ndə̀mə̀ àghù.”

²⁹Yəə Yesù nə̀ tsə̀təndii tə we tiy ŋwô fyiə yə̂ anə inaʼ i Dzèlikò, ŋwaâ kə ghù kiy zè adzəmə̀ we.

³⁰Aghê à liy àbè ghu kə fɛ̂b dòʼò nəniy ghu kə də̀ anə ukɛ̀ u dzəd. Abù ghu zuw tsə nə̀ Yesù tsìy dzəd awote, ghu kaʼ kə ani bvuʼi məmbòŋ nə̀, “A Mwe ə̀ Mbyi, Wà ə̀ Devìd, kwoʼ nə̀ mwuli kiy azòŋə̀ ghə̀d.”

³¹Ŋwaâ kə ghù kə̀ kwà ghu, dzìy a ghu nə, “Dòʼò nənìy moŋ.” Aghû yə bày bwoʼ fyi kə məmbòŋ idoŋ nə̀, “A Mwe ə̀ Mbyi, Wà ə̀ Devìd, kwoʼ nə̀ mwuli kiy azòŋə̀ ghə̀d.”

³²Yesù ə təmi tsə, twoŋə tsə ghu, bəb tsə ghu nə, “Ghà liə nə̀ mə fâʼ nyiə̀ kìə̀ awò ghà ə?”

³³Ghu ə bə̀lì kə̀ we nə, “A Mwe ə̀ mbyi, ghè liə nə̀ wò zəŋi tsə ghəd tə̀ ghè sì koʼo loʼo tiy.”

³⁴Yesù ə kwoʼ tsə nə̀ mwuli kiy azoŋə̀ ghu, mwàm tsə asə ə ghu, ghu dyaŋi kaʼ ani kòʼ tə̀ lòʼo a nyi fə te fiy, ŋwò dzwùmì yə̀ we.