Read Isu Matìyò 21 Bible Online

Matìyò 21 - Isu bible

Matìyò 21

¹Yəə Yesù zè myià nəniy a Yèlusalèm, ghu bù kwùm tsə anə inaʼ i Betfèt anə udoŋ u ŋkàʼ mə̀ Olìf. Yesù ə twum tsə tsə̀təndii ibè nə̀ ghu zû isəə.

²U dzày yə̀ a ghu nə, “Zù nənìy fiiy anə inaʼ yiy isəə, ghà ki dyaŋi kôʼ tsə Kəndzàkâs ghu təŋì na nəniy nə̀ wa. Ghà ki zê tsə ghà bû nə̀ ghe kiy a kə̀lə̀ mìə̀.

³Bəə wè lìy bəb bə̂ iyiə ì liy awò ghà, ghà dzây a we nə̀, ‘Mwe ə̀ mbyi dziy fâʼ tsə ate, ù kî dyaŋi na tsə ghà ki zê bə̂.’ ”

⁴I kə ghî də̀ anə ayiə yə wè ntwùm ə̀ Kə̀zə̀ kə kghu dzây zî na nəniy nə̀,

⁵“Dzày yə awò aghě inaʼ i Zayòn, Ghà kôʼ dòŋ kəli kə kə bê nəniy Ù mə na tswi tsə uwe wiy bè anə Kə̀ndzàkâs wà kə̀ndzàkâs ù ŋəmə wìy.”

⁶Tsə̀təndii tə zù bvami zəŋi yə̀ sòʼò àyiə yə Yesù kə dzày nəniy awò ghu.

⁷Ghu nìy bə̀ Dzàkâd kə̀ nə̀ wà. Ghu zìì yə̀ ndzwu tə ghu ate, Yesù ə nyi kwoʼ kə ate.

⁸Ŋwaâ kə aghù kǐy zə̀ʼà yə̀ tə̀ndzwu anə dzəd, aghê liy gbè bə̀ ùŋkwè u ŋkàʼ zə̀ʼà yə̀ anə dzəd.

⁹Ŋwaâ kə ghù kə̀ kə kə zê nəniy isə nə̀ ŋwàâ kə̀ kə kə bê nəniy ibàm, ghu bvuʼə bə̀ mə̀mbòŋ dzìy tsə nə̀, “Ukali wiy də awò Wà ə̀ Devìd! Zə̀kìy lwîy wù wə̀ ù bè nəniy anə izəd i Mwe ə̀ mbyi! Ukali wiy də awò Zə̀ kə idoŋ kiy!”

¹⁰Abù Yesù zù kwùm tsə nəniy a Yèlusalèm, inaʼ idzə̀m i ŋə̀mə̀ təŋə aghii, Aghee ə bəbə nə̀, “À wə̀ də ndiə?”

¹¹Ŋwaâ kə ghù kə̀ mee a ghu nə, “À də wè ntwùm ə̀ Kə̀zə̀ twoŋə Yesù, ù ŋwò bə̂ nəniy a Nazalèt a mbwòʼ ə̀ Galìlî.”

¹²Yesù ə dyaŋi zù tsìy nyi yə̀ a ndàw Kə̀zə̀, dzwùm fyi ŋwò tsə aghû yə̀ ghu kə fyiə̀ nəniy nə̀ à yuu ghu kə zwe nəniy ufyiə wiy awote. U twùŋì khisəaʼi màʼà ndàŋ tə̀, aghê fyiə yə̀ kə gaʼ na nəniy ufyiə u ghu wiy ate. U twùŋì khisəaʼi màʼà yə̀ sòʼò ndàŋ tə̀ aghê à kwunə ukhiy wiy kə də nəniy ate nə̀ tə aghû yə̀ ghu kə fyiə nəniy ubwubwumə wiy.

¹³U dzày yə̀ a ghu nə, “I twâ dòʼò anə ŋwàʼà k-a-zə̀ nə̀ Zə̀kìy kə dzày tsə nə, ‘Ndaw yam də loʼo kə̀ gwuŋə kiy.’ Ghà kwuni nîy na tsə nə̀ à də̀ loʼo kə aghê tsoŋə nê dyoʼò nəniy ate!”

¹⁴Aghê à fɛbə nə̀ àghù yə̀ ghu zəmə̀ bwîy nəniy ghu zù bù a kə̀lə̀ we a Ndàw Kə̀zə̀, u zəŋi taw kə ghu.

¹⁵Ŋgəd tə àghè àlwaʼa nə̀ àghè tyi dee ulàŋ wìy ə kaʼ yə̀ ani ŋə̀m nə̀ fòŋ tìy anə yiə yə ghu kôʼ nəniy kwab tə̀ ayiə tə ù kə zəŋə nəniy nə̀ yəə anîsə̂ bvuʼə mbòŋ mìy a Ndàw Kə̀zə̀ dzìy tsə nə, “Ukali wiy də awò Wà Devìd.”

¹⁶Ghu bəbə â Yesù a we nə, “Wò zuw yə̀ kə ŋwò yəə ghu dzîy nəniy ə̀?” Yesù mee nə, “Mə zuw ŋwò, ghà kamə twoŋə kôʼ ayiə yə anə ŋwàʼà k-a-zə̀ nə̀, ‘Ghà mə zəŋi anîsə̂ nə̀ awa à bwi ghi yiy, ghu mə kyili dòʼò ani nyə̀ ùkali ùsoŋə̀ wìy.’ ”

¹⁷Yesù ə na sə tsə ghu a Yèlusalèm fyi zù anə inaʼ i Betanì, zù bwuni yə̀ awote.

¹⁸Abù tsutsu wə nə̀ bələ̀bə̀lə̀ tìy, Yesù zè dzwəŋə anə inaʼ, Dzoŋ ə zabə we.

¹⁹U kòʼ tsə kâʼ fə fîk anə ukè u dzəd, u tòʼò koŋə yə̀ a təŋə kàʼ fə ghà fə̀, kə̀ kwuni kôʼ tam kə̀liy kiy ate, a də̀ kə təfəbə̀. U dzày yə̀ awò kàʼ fə̀ nə̀, “Wò nì kàm mu kòʼ way utam wiy!” Kâʼ fə ghè fə̀ ə dyaŋi zwum təŋ tsə a soŋə fə ghè fə̀.

²⁰Abù tsə̀təndii tiy kôʼ aghi, adzwə ŋge zwum yə̀ ghu ate, ghu bəbə nə̀, “Kâʼ fə fîk fə̀ sə̀ màŋ zwum təŋ tsə inyi i mòʼ aghii?”

²¹Yesù ə bə̀lì kə a ghu nə, “Mə ndzəmə̀ dzìy bə̀ ŋwò nə̀ abu ghà kwu nəniy ibɛmə yiy nə̀ ghà səmə̀ kè wày, ghà ki də ani fàʼ àyiə yə mə fâʼ nəniy nə̀ kàʼ fə̀, ghà də ani dzày yə̀ awò ùdoŋ wə̀ nə̀, ‘Ŋwǒ kə fə wò bvə̂ nyi tswi tsə fiiy anə dzwî ì nè nè yìy, u ki zû soʼò.

²²Bəə ghà kwu nəniy ibɛmə yiy, abu ghà ŋwa kə kìə̀ kìy awò Zə̀kìy anə i gwùŋì, ghà kî kyilə ŋwò.’ ”

²³Yesù ə bù tsìy nyi dzwoŋi bə̀ a Ndàw Kə̀zə̀, yəə ù sì tyi dê nəniy ayiə yiy, ŋgəd tə aghè àlwaʼa tiy nə̀ ŋgəd tə inaʼ tə Islàel tìy zù bù bəbə a we nə, “Wò kwu daʼa kə̀ ghaa kiy ani zəŋi ndzòʼò àyiə yə? À nyə̀ ndìə̀ wô nə̀ daʼa kiy ani fàʼ àyiə yə ə?”

²⁴Yesù ə bə̀lì kə ghu nə, “Mə bəbə bə̀ kə gha nə̀ iyiə yiy imòʼ, abu ghà bəlì bə̂ dzə̂ miə, mə ki dzây bə̂ soʼò loʼo kə daʼa kam kiy ŋwô bə̂ nəniy ate ani fàʼ àyiə yə.

²⁵Dzwan kə̂ daʼa kiy nîy bə̀ yə̀ ani nyə̀ mwi m-à-zə̀, à kə də awò Zə̀kìy, moo awò àghě mbyi yiy ə?” Ghu kaʼ yə̀ ani dzày anə iwè nə̀, “Ŋgà nə̀ dzây yə̂ nə̀ indiə? Abu ŋgà dzây tsə nə̀, awò Zəkìy, ù kî bəbə â ŋgàŋ nə̀, ‘À də̌ kìə̀ ghà kə də kə̀ bɛmə nəway awò Dzwan ə?’

²⁶Abu ŋgà kwuni dzây yə̂ nə̀, kə kə ŋwò bə̀ awò àghě mbyi yiy, ŋgà kwu ani tsəŋ tsə ayiə yə aghê də ani zəŋi nə̀ ŋgàŋ, aŋwòə aghê kwu təŋ nə̀ Dzwan kə də wè ntwùm ə̀ Kə̀zə̀.”

²⁷Ghu ba dzày yə̀ awò Yesù a we nə, “Ghè kwu way.” U dzày yə̀ a ghu nə, “Miə soʼo mə dzîy wày loʼo kə daʼa kam kiy ŋwô bə̂ ate ani fàʼ àyiə yə.”

²⁸Yesù bəbə awò ŋgəd tə lwaʼa tiy a ghu nə, ghà moʼò nə̀ indiə nyiə? Wù lìy kə kwu awa we iŋə̀mə̀ à bè, u zù awò ù lìy wìy a we nə, “A wa nam zu fàʼa anə uswum zii.”

²⁹Wà ù ghè wə̀ mee a we nə, Mə zê dzə̀ wày, u kàm dòʼò kwuni kə fòŋ ə̀ we zù.

³⁰Təli zù sòʼò awò ù lìy wə̀ dzày kə ighəd awò we, u bɛmə kə kə ŋwò, dòʼò yə̀ kə̀ zû nəway.

³¹U bəb yə̀ a ghu nə, “À kə fàʼ ndìə̀ ayiə̀ yə təli kə dzây nəniy ə?” Ghu mee a we nə, “À kə də̌ wà ù səsə wə.” Yesù ə dzày yə̀ a ghu nə, “Mə ndzəmə̀ dzìy bə̀ ŋwò â ghà, aghê à khii ŋwàʼà kə̀tsuwkiy nə̀ aghè à lyaŋə, ghu nyiə̀ zə̀ nə̀ Zə̀kìy si saʼa mwuə̀ tə ghu, kàm bàʼ na tsə gha ibàm.”

³²Aŋwòə Dzwan wə ù nyiə mwi m-à-zə̀ miy ù kə bù ŋwò dè bə̀ ghà nə̀ àyiə àdzoŋə̀ yə̀ ghà də ani zəŋi, gha ə twe ani bɛmə awò we. Aghee à khii ŋwàʼà kə̀tsuwkiy nə̀ àghè à lyaŋə yiy ghu maa kwuni bɛmə. Yəə ghà boʼò koʼò yə̂ ndzòʼò ayiə yə ghii, gha kwunə way, byemə dyaŋə wày awò we.

³³Yesù ə̀ dzày yə̀ a ghu nə, “Ghà zuw fəli zə̀zə̌ fə̀liy fiy. Wù lìy kə kwu uswum u we u zu na tsə ŋkàʼ mə̀ utam ate ghu tyoŋə nə̀ à də̀ ‘Vayìn’, u twiy na tsìy yə̀ mbà ate, zəŋi na kə loʼo kə̀ zəŋə kə mənlwù kìy anə mbà i ghà yə̀, byiə na kə sòʼò fə̀ndaw fə̀ kyiŋə fiy awote. U nyə̀ fyi yə̀ awò aghè à liy yiy nə̀ ghu si faʼa ate ghu ki tsəə bə ighe nə̀ ùkhiy wiy. U ŋwò fyi bwìy yə̀ i we yiy anə inaʼ ìŋwô yìy.

³⁴Abù soŋə fiy kpe tsə ani kwà ùtam, u twum tsə aghee kə̀fàʼ nə̀ ghu zû nîy bə̂ itwiʼi utam ighe.

³⁵Aghee uswum yə fə̀d kwi tsə aghě kə̀fàʼ yə̀ bwad tsə umòʼ, wiy màʼà tsə ù lìy, təm wiy ù lìy nə̀ àtay yiy.

³⁶Mwe ə̀ ùswum wə twum fwuli tsə aghee kəfàʼ àliy ghu tsîy fiy tsə a səsə yə. Aghû yə̀ anə uswum ghu nam fàʼ kə ìghəd yə ghu kə fâʼ nə̀ àghě kəfàʼ a səsə yə.

³⁷Mwe ə̀ swum wə baa twum gwùŋì tsə wa dzày tsə anə uwè u we nə̀, ‘Ghu kî nyə̀ ŋwòə ŋkwiʼi miy awò wa nam.’

³⁸Aghû yə̀ ghu kə də anə uswum ghu kòʼ yə̀ wa nə, dzày tsə anə iwè nə̀, ‘À wə̀ ba də wà mwe ə̀ ùswum, bu nənà tə̀ ŋgà wiy maʼà we, a kəli ŋwô ùfyiə wə!’

³⁹Ghu kwiy tsə we anə uswum, màʼà fyi yə̀ we abee anə mbà, wiy màʼà tsə we awote.”

⁴⁰Yesù ə bəb yə̀ a ghu nə, “Ghà moʼò nə̀ mwe ə̀ ùswum wə̀ kì bè zəŋə mə̀yə nə̀ àghè yə̀ ghu kə nîy fyi nəniy uswum wə?”

⁴¹Ghu bə̀lì kə we nə, “Ù kì bè wiy myàʼà tsə aghè bɛbə yə, ù nìy nyə̀ fyi yə̀ ùswum wə awò aghè àŋwô yìy ghu də ani nyə̀ wè nə̀ ùtam ù liy wiy bəə soŋə fiy kpe tsə.”

⁴²Yesù ə bəb yə̀ ghu nə, “Ghà kamə kə̀ twoŋə kôʼ àyiə yə anə ŋwàʼà k-a-zə̀ ə̀? Anə lòʼo kə kə dzîy nəniy nə̀, ‘Itay yə aghê bwamə təndaw yiy twe maʼà nə̀ i dzwabə̀ wày, à kàm də ighe itay ìsoŋə̀ yə̀ i kwi kəli nəniy tsə kə ndaw. À kə fàʼ Mwe ə̀ Mbyi ayiə yə, ŋgà kòʼə tsə nə̀ à də̀ mali kə iyiə.’

⁴³I dê tsə nyiə nə̀ Zə̀kìy kî nìy ŋwò fyi ŋwò gha anə lòʼo kə Zə̀kìy saʼa nəniy aghe we yiy ate, ù nì nìy nyə̀ yə̀ awò aghù yə̀ ghu də ani mu utam wə u kpe doʼò nəniy.”

⁴⁴Wù wə̀ ù kì bvə̀ nəniy anə itay i ghà yə̀, ù kì byèlì ŋwò anə mə̀ mbə̀lə̀ abu itay i ghà yə̀ bvə̀ azoŋə̀ we, i ki gwuə̀ we anə usàd.

⁴⁵Abù ŋgəd tə aghè àlwaʼa tə̀ nə̀ àghě Falàsî yìy zuw tsə zə̀zə̌ fə Yesù fə̀, ghu kəli tsə nə̀ ù ghî dzìy ghu,

⁴⁶Ghu dzìy nə̀ aghê zû kwiy we, ghu kàm tsəŋ sə tsə ŋwaâ kə aghù, aŋwòə aghê kə kwu nə̀ Yesù də wè ntwùm ə̀ Kə̀zə̀.