Read Isu Matìyò 22 Bible Online

Matìyò 22 - Isu bible

Matìyò 22

¹Yesù ə kàm dzày fwuli yə̀ fə̀zə̀zə̌ awò ghu, a ghu nə,

²“Ayiə yə Zə̀kiy saʼa nəniy aghê yìy ate, a də yəə dòŋ kə̀ lìy kiy kə kə byay tsə inyi yiy nə̀ wà we nîy wiy.

³U twum tsə wè kə̀fàʼ ə̀ we nə̀ ù zù twoŋə̀ kyabi bə̀ aghù yə̀ ù kə nâm na nəniy ghu nə̀ ghu ki bû inyi i ghà yə̀, ghu də kə̀ kwuni bû nəway.

⁴U twum fwuli tsə aghee kəfàʼ à lìy nə̀ ghu zû dzây yə̂ nə̀, ‘Mə mə byay na mà inyi yiy. Mə wiy na mbòŋ ì nè nè yìy nə̀ utswaam u təmbòŋ ù ghaʼa wiy. Bù nənà anə inyi ì niiy iwè yə̀.’

⁵Aghû yə̀ ə kə̀ kwuni na nəway isə yiy. Zəŋə yə̀ kə àyiə ghu, ùmòʼ ə sək kə iwe yiy. Ù lìy ə zù iwe yiy a ndaw yə ù zəŋə nəniy bekivən kiy ate,

⁶à liy yiy fə̀d kwi tsə aghee kəfàʼ ə we, bwad ghu, wiy màʼà yə̀ ghu.

⁷Fòŋ ə ŋə̀m này yə̀ Dòŋ kə̀, u twum tsə sǔgôʼ tə we, tə zù wiy màʼà tsə aghû yə̀ ghu kə wiy maʼà aghee kəfàʼ ə we yiy. Sǔgôʼ tə̀ ə pìə̀ màʼà inaʼ i ghù yə̀ ghu kə wiy màʼà nəniy aghee kəfàʼ yə̀.

⁸U twoŋə tsə aghee kəfàʼ ə we dzày yə̀ a ghu nə, ‘Inyi ì niiy iwè yə̀ mə byay dòʼò mà, aghû yə̀ mə kə nâm nəniy ghu, ghu kə̀ kâm kpe dzə̂ ani bù nyi.

⁹Ghà zû anə tədzə̀lə ghà nâm bə̂ ndə̀mə̀ aghù yə̀ ghà kôʼ dzə̂ nəniy.’ ”

¹⁰Aghee kəfàʼ yə̀ ə ŋwò zù sòʼò anə tədzə̀lə zù nàm bə̀ aghù yə̀ ghu kə kôʼ nəniy, aghê àdzoŋə̀ nə̀ aghè àbɛbə yiy. Aghee lwe tsə anə samkpà kə inyi kə̀ iniiy kə iwè kìy.

¹¹“Dòŋ kə tsìy nyi yə̀ ani zù kòʼ àghù yə̀ ghu də nəniy awote, u zù kòʼ yə̀ wù lìy nə̀ ù kə̀ dzəŋì kəli nəway ndzòʼò ndzwu tə ghu dzəŋə̀ nəniy anə inyi ì niiy iwè yiy

¹²Dòŋ kə̀ mee â wù wə̀ a we nə, ‘A àmbwê, Wò tsìy nyi mə̀yə fə nə̀ wò kwu way ndzwu tə inyi ì niy iwè tìy ə?’ Wù wə̀ ə də̀ kə moŋ.

¹³Dòŋ kə dzày yə̀ awò àghè kəfàʼ a ghu nə, ‘Kwi nə wù wə̀ ghà kwû tsə ikwe i we nə̀ ifwe i we yiy, ghà maʼà fyi yə̂ we anə kələm. Ù si diy yə fələ yə̀ sòʼò àsoŋ awote.’”

¹⁴Yesù ə dzày kəd tsə nə, “Zə̀kìy nâm bə̀ ndə̀mə̀ àghù ù kwuni sày kə kə̂ sə fə ghù yə̀ ghu bû nəniy.”

¹⁵Aghě Falə̀sî yìy ə ŋwò tsə, zù byay tsə ayiə yə ghu dziy bê kwiy Yesù ate ani bəb we nə̀ àyiə yiy.

¹⁶Ghu nìy kə aghê liy ghu kə taʼa nə̀ ghu nə̀ aghě liy ghu kə taʼa nə̀ Helòd soʼo, twum yə̀ ghu a kə̀lə̀ Yesù. Ghu zù bəb yə̀ a we nə, “A Àtyi dè, ghè kwu ŋwô nə̀ wò dzìy ìsoŋə̀ yìy. Wò tyi dè ayiə àsoŋə̀ yə̀ Zə̀kìy liə nəniy nə̀ aghè si zəŋə. Wò nia dzə̀ wày isə yiy nə̀ aghê moʼò nə̀ìndiə kwùmə̀ yə̀ nə̀ àyiə yə wò tyi dê nəniy. Wò nia sòʼò wày isə yiy nə̀ wù də̌ ùsòŋə̀ wìy moo ù way ùsòŋə̀.

¹⁷Dzày bə â ghə̀d, wò mòʼò nə̀ indiə? Anə làŋ kə ŋgàŋ, i kpe ŋwô ani tsuw kəŋwàʼà awo Kaʼisà dòŋ kə inaʼ Lûm, moo i kə̀ kpe ə?”

¹⁸Yesù kə kwu mà ŋwô nə̀ ghu kə kwu imôʼ ì bɛbə yiy, u dzày yə̀ a ghu nə, “Ghà də mə̀nə̀ nyi mbe mbè! Ghà mwâmə̀ kòʼò nə̀ìndiə miə ə?

¹⁹Ghà dê bə̂ mìə̀ nə̀ ùkhiy wə ghu tsuw ŋwàʼà kìy ate tə̀ mə kôʼ!” Ghu bù sòʼò nə̀ ùkhiy wiy.

²⁰Yesù ə bəb tsə a ghu nə, “À də̀ utwumusə u ndiə ate nə̀ ìzəd yiy ə?”

²¹Ghu bə̀lì kə nə̀, “À də̀ ù Kaʼisà wìy nə̀ ìzəd i yìy.” Yesù ə dyaŋi bə̀lì kə ghu nə̀, “Nyə yə̀ â Kaʼisà fyiə kə à də nəniy kə Kaʼisà kìy, Ghà nyiə̀ yə̂ soʼò awò Zə̀kìy fyiə kə à də nəniy k-a-zə̀kìy.”

²²Abù ghu zuw tsə ghii, adzwə zwum này yə̀ ghu ate. Ghu ŋwò na sə tsə we, ŋwò ighu yiy.

²³A ntsuk fə ghà fə̀ kə aghee Sadùsî yə̀ ghu kə də kə̀ bɛmə dzə̂ nəway nə̀ aghê nî zɛ̀mə̀ dzwəŋə ŋwò anə ipfə, àliy yiy zù bù a kə̀lə̀ Yesù.

²⁴Ghu mee a we nə, “A àtyi dè, Musîs kə dzày na nə̀ abu wù pfə nə̀ ù wa kamə byi, àzə̀ ə̀ we nyìŋì yə̀ wìy pfə nsə ù ghè wə̀, tə̀ abu ù byi bə̂ nəniy wa, u dòʼò yə̀ anə izəd i wù wə̀ ù kə pfə dzə̂ nəniy.

²⁵Aghê liy kə də̀ tsə̀ kə ŋwô à sèmbe ghu kə də nəniy awizə̂ yìy ghu mùə̀ tsə̀ fəə. Ù səsə wə nìy kə wiy bù pfə nə̀ ù wa kə̀ byi nəway, u na sə tsə wìy mpfə nsə wə awò àzə̀ ə̀ we.

²⁶Ù wə̀ ù dzwùmì yəə we, u nìŋì yə̀ wìy ù te wiy, bù pfə tsə sòʼò nə̀ ù kə̀ byi nəway wa nə̀ we, ù lìy wə̀ ù zəŋə yə̂ aghê àti u nìy yə̀ sòʼò, a də̀ kə ighəd, zəŋi kə ghii tswi kwùm tsə nə̀ ù wə̀ ù zəŋə yə̂ aghê ìsèmbe.

²⁷Wìyəŋi wə bù pfə tsə ibàm.

²⁸Wìyəŋi wə̀ nì dyòʼò wìy ndìə̀ ani bu Zə̀kìy nî zɛ̀mə̀ dzwəŋə bə̂ aghê anə ipfə nə̀ ghu maa nîy kpe tsìy yə̀ we ə?”

²⁹Yesù ə bə̀lì kə ghu nə̀, “Ghà dzîy ŋgwalə ŋwò! À də̀ yəə ghà də kwu way ayiə yə ŋwàʼà k-a-zə̀ kìy dzîy nəniy, kwu dyaŋi sòʼò way yəə daʼa k-a-zə̀ kìy faʼà nəniy ate.

³⁰I də nə̀ ani bu Zə̀kìy nî zɛ̀mə̀ dzwoŋi bə̂ nəniy aghê yìy, ghu nî kàm nìy sòʼò wày iwee yiy. Ghu nî dyòʼò yəə à də tsə̀təndii t-a-zə̀ anə a-vələ.

³¹Kwùmə̀ yə̀ kə nə̀ àghè zɛmə dzwəŋə anə ipfə, ghà kamə twoŋə kôʼ ayiə yə Zə̀kìy kə dzîy nəniy nə̀,

³²‘Mə də Zə̀ kə Ablàhâm, nə̀ Zə̀ kə Ayzìk kìy, nə̀ Zə̀ kə Dzàkôb kìy ə̀? Ù wày dzə Zə̀ kə aghè a pfəə yiy, ù kwuni də Zə̀ kə ghù yə̀ ghu muə nəniy.’ ”

³³Abù ŋwaâ kə ghù kə̀ zuw tsə ghii, adzwə ŋge zwum này yə̀ ghu anə ayiə yə ù tyi dê nəniy.

³⁴Abù Yesù sì də̀d maʼà dzə̂ utuw aghě Sadùsî yìy, aghee Falə̀sî yìy ə zuw tsə, ghu zù dzəŋə bə̀.

³⁵Ùmòʼ ate ù kə tyi dê tsə̂ nəniy ulâŋ wìy, u liə ani bè kwiy Yesù, bəb yə̀ a we nə,

³⁶“A àtyi dè, à də̀ lâŋ kə̀ ghaa kiy kə də lâŋ kə̀soŋə̀ kìy ə̀?”

³⁷Yesù ə bə̀lì kə a we nə, “Liə yə Zə̀ kiə̀ kìy nə̀ fòŋ yiə̀ ìdzə̀m, nə̀ imùə̀ yiə̀ ìdzə̀m, nə̀ imòʼ yiə̀ ìdzə̀m.

³⁸À yù də̀ lâŋ kə səsə kiy kə də nəniy kə̀ soŋə̀ kìy.

³⁹Lâŋ kə̀ kə dzwumì yə̂ nəniy à də̀ nə̀, ‘Liə yə̀ aghê liy anə ayiə yə wò liə nəniy uwee niə̀ wìy ate.’

⁴⁰Ulâŋ u Musîs ùdzə̀m nə̀ àyiə yə ùŋwàʼ u aghee ntwum ə̀ Kə̀zə̀ ù dzə̀m tyi dê nəniy, u zəŋ dòʼò anə̀ ulàŋ wə̀ ghii ùbè.”

⁴¹Abù aghee Falə̀sî yìy dzəŋə bə̂, Yesù ə bəb yə̀ a ghu nə,

⁴²“Ghà moʼò nə̀ìndiə kwùmə̀ yə̀ nə̀ wù wə̀ Zə̀kìy sûw kyili na an-a-dòŋ ə? Ù nì fyiə anə tuu kə ndiə?” Ghu bə̀lì kə a we nə, “Ù nì fyiə anə tuu kə Devìd wə̀ ù kə də Dòŋ kìy.”

⁴³Yesù ə bəb tsə a ghu nə, “A sì də kìə̀ Zwày k-a-zə̀ kìy kə zəŋi tsə Devìd nə̀ ù twoŋə fyi bə̀ we nə̀ a də Mwe ə̀ mbyi ə? Devìd kə dzày tsə nə̀,

⁴⁴Mwe ə̀ mbyi Kəzə̀, ù kə dzày yə̀ awò Mwe ə̀ mbyi wam a wè nə ‘Dòʼo tswi tsə anə ukwe wam ù nyiə wiy zù kwùm soŋə fə mə kî nìy bə̂ aghù yə̀ ghu bâ nəniy wô a təŋə ifwe yiə̀.’

⁴⁵Bəə Devìd kə də ani twoŋə we nə̀ ù də̀ Mwe ə̀ mbyi we, i kwuni də mə̀yə Wù wə̀ Zə̀kìy sûw kyili na an-a-dòŋ nì fyiə bə̀ anə tuu kə Devìd wə̀ ù kə də nəniy Dòŋ kìy ə?”

⁴⁶Ghu ə kə̀ kâm bəlì Yesù. Ani kaʼ ŋwò tsə a ntsuk fə te fiy wù lìy kə kə̀ kâm bəb kôʼ soʼò we nə̀ ìyiə yiy anə uzə u ghu.