Read Isu Matìyò 23 Bible Online

Matìyò 23 - Isu bible

Matìyò 23

¹Yesu ə dzày yə̀ awò ŋwaâ kə ghù kìy nə̀ tsə̀təndii tə we tiy a ghu nə,

²“Aghě Falàsî nə̀ aghè tyi dee ulàŋ yìy də aghû yə̀ ghu kə nyiə̀ na nəniy ghu nə̀ dàʼa kiy ani tyi dè ùlàŋ u Musîs.

³Ghà si zuw yəə ayiə yə àdzə̀m ghu tyi dê nəniy awò ghà, ghà ki faʼa yə, kəə ghǎ nə̀ nìy nəniy mwàmə mə̀ ghu miy, aŋwòə ghu tyi dè àyiə, kwuni fàʼà yə̀ wày àyiə yə ghu tyi dê nəniy.

⁴Ghu nîy kə ùfyiə ù dədlə wiy nə̀ wù wày ani bòʼò, ghu dzìy aghê boʼò, nə̀ ghu boʼò way ani twàm kə wù nə̀ wà kə̀wo.

⁵Ayiə ghu àdzə̀m ghu zəŋə nəniy à də ani dè iwee anə səkə aghù. Kòʼo kə nənìy tata mə̀ gùw nyàm[12] mə̀ nə̀ àyiə Kəzə̀ ate ghu dzəŋə̀ kyilə anə ntwùmə̀nsə nə̀ anə ikwe, à də̌ ìn ghaʼa mìy! Nsaŋə mə ìn də nəniy anə ndzu tə ghu à də̀ ìn dabə mìy.

⁶Ghu toʼò liə kə ani sày yə̀ ùkwe ù soŋə̀ wìy anə lòʼò tə inyi, sìy yə̀ sòʼò loʼo tə̀ dyoʼo tiy isə anə̀ ndaw tə udzəŋə.

⁷Ghu liə nə̀ aghê ki nyə ghu nə̀ ŋkwiʼi miy bəə ghu tyoŋə zuw nəniy ghu anə foŋə̀ ìnaʼ, liə nə̀ aghê ki ŋgwamə tsə ghu nə̀ à də̌ ‘Àtyi dè.’

⁸Ghà kə bɛmə na dzə̀ nə̀ ghu si tyoŋə gha nə̀ à də, ‘Àtyi dè,’ ghà kwu kə Àtyi dè ùmòʼ, ghà də kə yəə à də̀ awizə̂.

⁹Ghà kə toŋə dzə̀ wù lìy fə anə mbyi nə̀ à də̌, ‘Təli,’ aŋwòə ghà kwu kə Təlì umòʼ ù də̀ nəniy an-a-vələ.

¹⁰Ghà kə bɛmə dzə̀ sòʼò nə̀ ghu ki tyoŋə gha nə̀ à də̀, ‘Mwe,’ aŋwòə ghà kwu kə Mwe ùmòʼ à də nəniy Wù wə̀ Zə̀kìy sûw kyili na an-a-dòŋ.

¹¹Wù wə̀ ù də nəniy wù ù sòŋə̀ wìy anə uzə ghi, u kwu ani dòʼò tsə wù kə̀fàʼ ghii.

¹²Wù wə̀ ù nìy kwoʼ kə uwee u we wiy Zə̀kìy ki nîy na tswi tsə we a mbvə̀d, wù wə ù nìy tswi tsə uwee u we wiy a mbvə̀d Zə̀kìy ki nîy na kwoʼ kə we idoŋ.”

¹³Yesù ə kyèmì dzày yə̀ awò aghè àtyi dee ulàŋ wìy nə̀ aghee Falə̀sî yìy a ghu nə, “Gha aghè àtyi dee ulàŋ yìy nə̀ aghee Falə̀sî, ghà də anə mfəm. Ghà də mə̀ nə̀ nyi mbe mbè! Gha fyiə̀ nia yə̀ ufə̀b u loʼo kə Zə̀kìy saʼa nəniy ate nə̀ aghê kə tsîy nyi kwoʼ. Gha soʼo ghà taʼà tsìy nyiə kwoʼo yə̀ wày ate, nyə̀ sòʼò wày bwòʼ kìy nə̀ aghû yə̀ ghu liə nəniy ani nyi kwoʼ awote, ghu tsìy nyi kwoʼ yə̂.

¹⁴Ndzòʼò mfəm yə ì lyimə nəniy gha aghê tyi dee ulàŋ wìy nə̀ àghě Falàsî. Ghà də mə̀ nə̀ nyi ìmbe imbè! Utuw wiy tsəbə də̀lə̀ wày gha ani tsè ise mpfənsə anə ufyiə wə ghu kwu nəniy, lyòʼò àghù dzìy nə̀ ghà də aghê àzwe yiy anə undaŋ u təgwùŋì wə̀ ghà gwuŋə̀ nəniy anə səkə aghù. Zə̀kìy kî nyə̀ ghà nə̀ mfəm bòʼ àyiə yə ghii.[13]

¹⁵Gha aghè àtyi dee ulàŋ yìy nə̀ aghee Falə̀sî yìy, ghà də anə mfəm Ghà də mə̀ nə̀ nyi mbe mbè! Ghà daŋə̀ yə̀ tə̀dzwì, tsìy zəaʼa yə̀ tə̀nàʼà ani zəŋi tsə nə̀ wù bɛmə â ghà, abu ù bɛmə kə nəniy, gha ə kàm zəŋi tsə we ù bɛb mà yə̀ ani zù anə uvə̀lə̀, yəə a də̀ gha.

¹⁶Ghà də anə mfəm! Ghà mə̀ kwu ani tyiə dee yə aghê nə̀ dzələ tə Mwe ə mbyi tiy, ghà kâm fə̀d kə aghê a fɛbə yiy. Gha dziy nə̀, ‘Lâŋ kə̀ liy kiy way dzə kə twee nə̀ wù kə kâ anə izəd i ndàw Kə̀zə̀, kwuni dzìy nə̀ lâŋ kìy də ŋwô â wù ani kà anə ufyiə ùtsəə wə ghu zəŋə ukhiy wiy ate, u də nəniy a ndàw Kə̀zə̀’

¹⁷Ghà lyaʼà ŋwò fə̀b dòʼò sòʼò! À tsìy fyi kìə̀, à də̀ ufyiə ùtsəə wə ghu zəŋə ukhiy wiy ate, moo ndàw Kə̀zə̀ yə̀ ì sùw zwu na nəniy ufyiə ùtsəə wə ghu zəŋə ukhiy wiy ate ə?

¹⁸Ghà tyi dè sòʼo nə̀ ‘Abu wù kà kə anə izəd i tà kə ndàw Kə̀zə̀, banə kə iyiə kə̀liy kiy way dzə ate, kwuni dzìy nə̀ lâŋ kìy də ŋwô abu wù kà kə nəniy anə ufyiə wə ghu gaʼ na yə̂ nəniy anə tà kə̀ ani sà.’

¹⁹Ghà fɛ̂b dòʼò ŋwò! À tsìy fyi kìə̀? À də̌ ufyiə wə ghu gaʼ na ani sà, moo tà kə ghà kə̀ kə zəŋə nəniy ufyiə u ghè wə̀ zwee ə?

²⁰Abu à də kə ndiə ù kà kə nəniy anə izəd I kətà, ù mə kà dyaŋi anə ufyiə wə ùdzə̀m ate u gaʼ doʼò.

²¹Abu wù kà kə̀ soʼò anə izəd i Ndàw Kə̀zə̀, ù ghî kà kə ate kà sòʼò anə izəd i Kəzə̀ kə̀ ù muə nəniy ate.

²²Abu à də kə ndiə ù kà kə nəniy anə izəd i kəvələ, ù ghî kà dzə̀ sòʼo anə ndàŋə̀ kə̀dòŋ ə̀ Kə̀zə̀, kà kə sòʼò anə izəd i Zə̀ kə̀ ù də nəniy ate anə ndàŋ.

²³Ndzòʼò ŋgoʼ yə ì lyimə nəniy gha, aghee à tyi dee ulàŋ wìy nə̀ aghee Falə̀sî yìy. Ghà də mə̀ nə̀ nyi mbe mbè! Ghà nîy kə bə̀lə̀ fə̀mòʼ anə ubə̀d ùvəm anə ufyiə ùlyimə wə ghà nîy bə̂ nəniy anə iswum ghi ghǎ nyə̀ yə̀ awò Zə̀kìy. Ghà kwuni twe màʼà ayiə à soŋə̀ yə̀ a də nəniy anə ulàŋ, ayiə yəə à də̀ isaʼ i tsitsi yiy nə̀ ani kwoʼ nə̀ mwuli kiy, nə̀ ani dè yə̀ ìbɛmə ghi awò Zə̀kìy soʼo. À wə̀ də ayiə̀ yə ghà kwu ani zəŋə nə̀ ghà twe myàʼà wǎy ì liy yiy ate.

²⁴Ghà də aghee fɛbə yiy, kwuni liə ani dòʼò àghě kəsə. Ghà zəà mə̀nlwù nə̀ ghà mə nə̀mə̀mǐy fǐzûzùkə̀ fìy, gha kwuni də yəə ghà nîy mìy yə̀ Zuw.

²⁵Ghà də anə mfəm, gha aghê à tyi dee ulàŋ yìy nə̀ aghee Falə̀sî. Ghà də mə̀ nə̀ nyi mbe mbè! Ghà sûw zwe tsə tə̀bwaam nə̀ ùkaŋ wiy a bee, fôŋ kə̀ də nə̀ ufyiə wə ghà kwuni kyilə bə̂ anə ghaŋə umwìy nə̀ gha dəmə̀ nìy bə̀ sòʼò ŋwo ufyiə u te wiy.

²⁶Aghee Falə̀sî, ghà fɛ̂b dòʼò ŋwò! Ghà kwu ani sùw zwu tsə dzə̀ tə̀bwaam nə̀ ùkaŋ wiy anə fôŋ tə̀ bee kə kî zwu dyaŋi yə̀ sòʼò.

²⁷Ndzòʼò ŋgoʼ yə ì lyimə nəniy gha aghê à tyi dee ulàŋ yìy nə̀ aghee Falàsî. Ghà də mə̀ nə̀ nyi mbe mbè! Ghà də yəə à də̀ sây tə̀ ghu kwaŋi na nəniy. Tə maŋə̀ mwâ kə a bee, kwuni də̌ nə̀ à də̀ kə uvəb ate nə̀ avəən ə aghù à fwii yə̂.

²⁸À yù də̀ yəə ghà də nəniy ate, ghà fwunə àghù yə̀ ghu də nəniy tsitsi anə asə awò ndə̀mə̀ àghù. Abu a nyi yə̂ anə fôŋ tii, ghà ŋwamə zəŋə ŋwò, zəŋə sòʼò ìbɛb.”

²⁹“Ndzòʼò ŋgoʼ yə ì lyimə nəniy gha aghê àtyi dee ulàŋ yìy nə̀ aghee Falàsî. Ghà də mə̀ nə̀ nyi mbe mbè! Ghà toʼò bwamə sày tə aghee ntwùm ə̀ Kə̀zə̀ ghu kə pfə dzə̂ nəniy, kwaŋə nia kə sày tə ghù yə̀ ghu kə zəŋə tsə̂ ayiə a də nəniy tsitsi,

³⁰dzìy sòʼò nə̀, ‘abu ghè kə də nəniy a sòŋə fə nə̀ tě ŋgàŋ a səsə kə wiy maʼà nəniy ghu, ghè kə dzìy kwe way wo kələ kiy ate.’

³¹Ghà dê fyiə təŋə bə̀ ŋwò nə̀ ghà də awa aghù yə̀ ghu kə wiy nəniy aghee ntwùm ə̀ Kə̀zə̀ yìy.

³²Ghà zû kə nə̀ səkiy ani myàlì kə̀ ayiə yə nə̀ tè kə kaʼ na zî bə̂ dzə̂.

³³Təzwə nə̀ awa təzwə yəə̂ ghà, gha də ani tu fyi mə̀yə mfəm yə ani zù anə uvə̀lə̀ ə?

³⁴Mə kî twumə bə̀ ghà nə̀ aghè ntwùm ə̀ Kə̀zə̀ nə̀ àghě twabə yiy, nə̀ nə̀ àtyidè, ghà ni wiy maʼà yə̂ àliy yiy, ghà ba àliy yiy anə kàʼ fə tənzəd, ghà ni bwalə àliy yiy anə ndaw tə udzəŋə ghii, tə̀ ghà ni dzwumə kyabə tsə àliy yiy naʼà tə̀ naʼà.

³⁵À yù də̀ ighe mfəm də nəniy awò àghù yə̀ ghu wiy myaʼà aghû yə̀ ghu də nəniy tsitsi anə sə k-a-zə̀ ani kaʼ bə̀ a zoŋə̀ Ebèl bù kwùm bə̀ a zoŋə̀ Zàkàliyà wà Bàlàkayà, wù wə̀ ghà kə wiy nəniy anə uzə u ndàw Kə̀zə̀ nə̀ tà kìy.

³⁶Mə ndzəmə̀ dzìy bə̀ ŋwò awò ghà, mfəm yə̀ nì tswi tsə anə utuw aghè yə̀ zii anə ŋə̀mə̀ tə̀!”

³⁷Yesù ə dzày yə̀ awò aghě Yèlusalèm aghu nə, “A Yèlusalèm, a Yèlusalèm. Ghà tsəŋə̀ wiy yə̀ kə aghee ntwum ə̀ Kə̀zə̀, tyimə wiy sòʼò aghù yə̀ ghu niʼà nəniy gha nə̀ ayiə yiy! À də nsòŋə in sə̀ki mə dziy kəd na bə̂ awa ghii yəə mbvu nə̀ kələ nia bə̂ nəniy awa we nə̀ ghàw tìy, ghà də kwuni byemə way.

³⁸Yəə i də nəniy ghi, Zə̀kìy kî kàmə̀ nia way isə yiy anə ndàw Kə̀zə̀ ghi, ì kì nyìə̀ dyòʼò kə ìzwum yìy.

³⁹Mə ndzəmə̀ dzìy bə̀ ŋwò awò ghà nə̀, ani kaʼ tsə nyiə zù isə, ghà nî kàm kòʼ sòʼò wày miə zù kwùm soŋə fə ghà nî dzîy fyiə bə̂ nə̀, ‘Zə̀kìy lwîy wù wə̀ ù bè nəniy anə izəd i mwe ə̀ mbyi.’”