Read Isu Matìyò 24 Bible Online

Matìyò 24 - Isu bible

Matìyò 24

¹Abù Yesù ŋwò tsə nəniy a ndàw Kə̀zə̀, tsə̀təndii tə we tiy ə kway yə̀ we, dzày tsə a we nə, “Kòʼo kə ndzòʼò yiə yə ghu kə biə na nəniy Ndàw Kəzə̀ yə̀ ate.”

²Yesù ə bə̀lì kə aghu nə̀, “Mə̀ ndzəmə̀ dzìy bə̀ ìsoŋə̀ yìy â ghà, ayiə yə ghà kòʼo tsə ndaw yə ghii, ì nì byìlə̀ ŋwò. Itay imoʼ nî kàm kwùnì dòʼò dzə̀ wày azoŋə̀ àzə̀.”

³Anə yiə yə Yesù zù dòʼò tsə nəniy anə ukàʼ u ŋkàʼ mə̀ ùtam u Olìf, tsə̀təndii tə we tiy nyòŋì bù a kə̀lə̀ we, bəb yə̀ a we nə̀, “Ayiə yə̀ nì fyiə zəŋi ə? Dzày bə̀ â ghə̀d. Anì fyiə kìə̀ ani dè tsə nə̀ soŋə fiə̀ fə̀ bee fyi mə kpe, nə̀ ani dè tsə sòʼò nə̀ mbyi nyiə̀ dzǐy mày?”

⁴Yesù ə bə̀lì kə a ghu nə̀, “Ghà nîy tsə iyemì, kəə wù lìy nə̀ nɛbə gha.

⁵Ndə̀mə̀ àghè nî bè ŋwò anə izəd yam, ghu ni dziy nə̀, ‘Mə də Wù wə̀ Zə̀kìy sûw kyili na an-a-dòŋ,’ Ghu ni nɛb maʼà kyabi tsə ndə̀mə̀ àghù.

⁶Ghà nî zuw ayiə kwumə̀ yə̀ nə̀ tsam, kwùmə̀ yə̀ sòʼò nə̀ dəm kə tsam kiy, kəə ghǎ nì tsəŋə dzə̂. Ndzòʼo àyiə yə̀ nì kwu ani fyi dzə̀ isə â mbyi ani mày, a nî kwuni dè dzə̀ wày nə̀ mbyi mə mày.

⁷Naʼà tìy ni ŋwaa nə̀ nàʼà tə̀liy tiy, ùdòŋ u tə nàʼà nə̀ sǔgôʼ tə ghu tiy ni ŋwaa nə̀ ùdòŋ u nàʼà tə̀liy tiy nə̀ sǔgôʼ tə ghu tiy. Mbvə̀dinstsə kiy ni səkìy, kə ni bəlì anə ndə̀m ə̀ tə̀lòʼo. Dzoŋ ni də soʼo.

⁸Ayiə yə̀ ni maŋ də nə̀ utswə̂d namə kaʼa bə̀ ŋwò, yəə à də̀ ifwabi yə wiyəŋi zuw tsə̂ nəniy isə abu ù dziy byi.

⁹Ghu ni kwiy tsə gha, ghu nyiə̀ ghà nə̀ mfəm, ghu wiy maʼà sòʼò ghà bòʼ mìə̀. Aghê àdzə̀m anə nàʼà tə̀dzə̀m ni baa gha.

¹⁰Ndə̀mə̀ àghè ni nyəli maʼà tsə ibɛmə i ghu anə soŋə fə ghà fə̀. Aghê ni fyie fyiə awizə̂ yìy, bà sòʼò iwee.

¹¹Ndə̀mə̀ àghě ntwum ə̀ ìgûw yìy ni bû nɛb maʼà kyabi tsə̂ ndə̀mə̀ àghè àliy yiy.

¹²Ayiə àbɛbə yiy ni dûw tsîy tsə, ndə̀mə àghè ni də kàmə̀ dè sòʼò wày i liə i ghu yiy awò àwizə̂ yìy.

¹³À kwuni mày kə wù wə̀ ù nì tyimə taw tsə anə ibɛmə iwe zù kwùm, Zə̀kìy nî də ani bii fyi we.

¹⁴Ntwùmə̀ ìdzòŋə̀ yə̀ ì kwùmə̀ yə̂ nə̀ loʼò kə Zə̀kìy saʼa nəniy ate, ghu kwu ani nàʼà tsìy kpe tsə naʼà tə mbyi tə̀dzə̀m yəə à də̀ kətsəe awò àghè dzə̀m, mbyi nî dyaŋi mày a nyi fə ghà fə̀.”

¹⁵Awò mbyi ani kwuni mày, ghà ni kôʼ fyày fyày kə wû wə̀ wè ntwùm ə̀ Kə̀zə̀ Danìyà kə dzây na nəniy. Ù nì bè tyimə dyòʼò bə̀ a ndàw Kə̀zə̀ ì zwê yə̀. (Iyiə yə̀ də awò wù wə̀ ù tyoŋə nəniy ayiə ghè yə̀ nyiə, ù kwu ani zuw kəli dzwàb tsə imyiŋì yə̀ i də nəniy fə anə ayiə yə!)

¹⁶Aghû yə̀ àdzə̀m ghu muə nəniy a Dzùdiyà anə soŋə fə ghè fə̀, ghu nî kwu ani tu kwoʼ yə̀ anə təkàʼà.

¹⁷Abu wù nì də kə anə tuw kə ndàw, ù kwu dzə̀ way ani nyàb fə̀ soŋə ani tswi zù nìy fyi kə̀fyiə a ndaw.

¹⁸Abu wù də kə anə uswum, ù kwu dzə̀ way ani nyàb fə̀ soŋə dzìy ghe zê dzwəŋə a ndàw we, ani zù nìy ndzwu tə we.

¹⁹Soŋə fə ghà fə̀ nì ŋge fyà ŋwò azòŋə àghù yə̀ ghu nî boŋ doʼò nəniy nə̀, à yu ghu nî kwu awa yiy anə awo.

²⁰Ghà ki gwuŋə yə â Zə̀kìy nə̀ kəə gha nə̀ tee fyiə nəniy anə soŋə fə mbùw ùfəb moo anə ntsuk fə̀ zwaa fiy.

²¹Aŋwòə à nì yù də soŋə fə bə̂bɛbə fiy fə də kamə fyi kôʼ ani nìy ŋwò bə̀ yə mbyi kə kaʼ bə̂ nəniy. Aghê nî kàm kòʼ kòʼ fwuli wày ndzòʼò ìfii i ghè yə̀.

²²Ani bu Zə̀kìy də kə̀ zəŋi tsə nə̀ soŋə fə ghè fə təb tsə, wù lìy ni dòʼò sə dzə̀ wày utaw. Zə̀kìy nî zəŋə tsə nə̀ soŋə fə ghè fə̀ fə təb tsə bòʼ aghè we yə ù sày na nəniy.

²³Ani bu wù dzìy nəniy awò ghà nə̀, “Kòʼo, Kə̀litò wə̀ fəə” moo, “Kòʼo, Kə̀litò wìy fiy” kəə ghǎ nə̀ byemə.

²⁴Mə ghî dzìy aŋwòə nə̀ nə̀ Kə̀litò àguw yiy nə̀ àghě ntwùm ə̀ Kə̀zə̀ àguw yiy nî bè ŋwò ghu ni zəŋə mali təyiə tiy, nə̀ ùtsəe wiy anə ndə̀m ani nɛb màʼà àghè, abu i bòʼò də̀ â ghu ani nɛb sòʼò aghù yə̀ Zə̀kìy sây na nəniy, ghu ki nɛb.

²⁵Ghà toʼò zuw! Mə mə tswù na bə̀ gha nə̀ soŋə fiy kamə kpe â yiə yə ani fyi.

²⁶Abu ghu dzây bə̂ nəniy â ghà nə̀ ù nyìə̀ də̌ anə mbvə̀nə̀ kə̀sisi, kəə ghaa nə̀ zê dzə̂ awò. Abu ghu dzây nəniy â ghà nə̀ ù də anə lòʼò k-a-nù a ndaw, kəə ghaa nə̀ byemə nənìy ayiə ghè yə̀.

²⁷Ibû i Wà Wù yiy nî də yəə à də iwe i mwà tsə nəniy a bə̀d kə̀ inyi fyiə nəniy ate zù kwùm yə̀ a bə̀d kə̀ inyi nimə yə̂ ate.

²⁸Loʼo kə ghà kôʼ dzə̂ udzidzi wiy tsəà nəniy ate, à ghi də̌ nə̀ ivən yiy də awote.

²⁹Abu ntsukə mə̀ ayiə à fyia yə̀ nì tsìy tsə nəniy, “Ləmkiy ni bvə̂ bə̂ anə inyi, ndzoŋ ni də kàmə̀ tu way. Nsìibə̂d mìy ni bvə̂ fyi tswi bə̂ idoŋ, ufyiə u kə daʼa wə u də nəniy idoŋ, u ni soŋ ŋwô tsə anə lòʼo tə u kə̀ də tsə nəniy ate.”

³⁰Tsəe kə Wà Wù dziy bû ate kə ni dê tswi bə̂ ùwee anə kəbyiwuŋ. Idîy yìy ni də anə nàʼà tə̀dzə̀m anə mbyi, abu ghu kôʼ yə̂ nəniy Wà Wù ù bè nəniy anə mbàʼ t-a-vələ nə̀ daʼa kiy nə̀ ŋkwiʼi mə̀ sòŋə̀ miy.

³¹Ghu ni twuŋ tsə isoŋ nə̀ daʼa kiy, ù nî dyaŋi twum fyi yə̀ tsə̀təndii t-a-zə̀ anə kəbyiwuŋ, tə̀ ghu zû anə nàʼà tə mbyi tə tə̀dzə̀m ghu ni nîy bə̂ àghù yə̀ Zə̀kìy sây na nəniy.

³²Ghà zwiʼi kəli kə iyiə anə kàʼ fə fîk. Abu, u ùŋkwè u we wiy kaʼ tsə nəniy ani zùw, fəbə̀ tìy kaʼ tsə nəniy ani fyi ate, ghǎ kəli tsə nə̀ iwe yiy nyiə̀ dzǐy tswi fən.

³³À də̀ sòʼò ighəd, ani bu ghà kôʼ nəniy ayiə yə̀ fyiə, ghà ni kəli tsə nə̀ soŋə fə ghè fə̀ mə swəd â Wà Wù ani bù.

³⁴Mə ndzəmə̀ dzìy bə̀ ŋwò â ghà nə̀ aghû yə̀ ghu muə nəniy nyiə ghu nî pfə myà dzə̀ wày nə̀ ayiə yə̀ kamə fyi nəway.

³⁵Kəbyiwuŋ nə̀ mbvə̀dintsə kiy nî mìy ŋwò, dzə̀ yam nî kwuni mày kòʼ wày.

³⁶Wù lìy kwu dzə̀ way ntsuk fə ghè fə̀ nə̀ soŋə fə ghè fə̀ Wà Kə̀zə̀ nì bè nəniy ate. Tsə̀təndii t-a-zə̀ tìy kwu dyaŋi way, moo Wà ù ghà wə̀ nə̀ ùwee u we wiy bôʼ kwu dyaŋi dzə̀ way, à bvami kwu kə Təli soŋə fə ghè fə̀.

³⁷Ibû i Wà Wù yìy nî də̌ anə yiə yə i kə fyi nəniy anə soŋə fə Nuwà

³⁸Awò mwi ani kwiy nyi ŋwò mbyi idzə̀m, aghê kə nyiə ŋwò, muə sòʼò mə̀nlwù, nìy sòʼò ìwee, zù kwùm anə ntsuk fə Nuwà kə nyi kwoʼ yə̂ an-a-mfə̀n kə̀ nê kiy.

³⁹Ghu kə kwu dzə̀ wày iyiə yə i fyiə nəniy ani zù kwùm soŋə fə mwi kə lwe bə̂ nəniy, bù kwuŋi ŋwò yə̀ aghê àdzə̀m. I nî bvwami dyòʼò sòʼò ighəd ani bû Wà Wù bè nəniy.

⁴⁰Aghê ni də anə uswum àbè, Zə̀kìy ni nîy ŋwô kə umòʼ ù na sə tsə umòʼ awote.

⁴¹Iyəŋi àbè ni də fwumi anə kəgwùə̀, gwùə̀ asaŋ, Zə̀kìy ni bû nìy ŋwò kə ùmòʼ, ù na sə tsə ùmòʼ awote.

⁴²Yəə i də nəniy ghi, ghà si yemə tsə, aŋwòə ghà kwu dzə̀ way soŋə fə Mwe ə̀ mbyi nî bê nəniy ate.

⁴³Ghà kwu ani kəli tsə nə̀ abu mwe ə̀ ndaw kwu nəniy soŋə fə wù tsoŋə̀ wìy də ani bù ate, mwe ə̀ ndaw ù ghè wə̀ kì kwu ani dòʼò idoŋ, ù way dzə ani bɛmə dzə̀ nə̀ wù ù tsoŋə̀ wìy bù bwàlì tsìy nyi bə̀ ndaw we.

⁴⁴Yəə i də nəniy ghii, ghà kwu sòʼò ani byay na təŋ tsə iwe nəli anə nsòŋə indzə̀m, aŋwòə Wà Wù kì bè anə soŋə fə ghà də mòʼò dzə̀ wày nə̀ ù də̀ ŋwô ani bù ate.

⁴⁵À ba də̌ ndiə wè kə̀fàʼ wə̀ ù fàʼà nəniy nə̀ fòŋ ə̀ we idzə̀m, twabə sòʼo? À də̌ we mwe ə̀ kə̀fàʼ də ani na tsə we nə̀ ù ki lia yə aghee kəfàʼ à liy yə, ù si nyiə̀ yə̀ sòʼò ghu nə̀ ùfànyiə wiy anə sòŋə fə ghu kwu nəniy ani nyi ate.

⁴⁶Dwiʼi kiy kî ŋge də̀ ŋwô awò Wè kə̀fàʼ wə̀ mwe ə̀ kə̀fàʼ kî bê kwa nəniy we nə̀ ù fàʼà fàʼ kə ù kwu nəniy ani fàʼ.

⁴⁷Mə ndzəmə̀ dzìy bə̀ ŋwò â ghà, mwe ə kə̀fàʼ ughè wə̀ kì nia tsə we nə̀ ù si lia tsə ufyiə u we wiy ùdzə̀m.

⁴⁸Abu à kwuni də nə̀ wè kə̀fàʼ ùghè wə̀ də̌ ù bɛbə̀ wiy, ù ki dziy anə uwè u we nə̀ mwe ə̀ kə̀fàʼ wam ki kwùlì bù dzə̀ wày nyiə,

⁴⁹ù kaʼ dyaŋi yə̀ kə ani bwad aghê àliy yə̀ ghu faʼà fwumə nəniy nə̀ we, kaʼ yə̀ sòʼò ani nyi ufânyiə, muə mə̀nlwù nə̀ àghù yə̀ ghu kê tsə̂ nəniy.

⁵⁰Abu ù zəŋi aghii, mwe ə̀ kə̀fàʼ nî màŋ fə̀mì bə̀ we a soŋə fə ù də kwu way.

⁵¹Mwe ə̀ kə̀fàʼ wə̀ kî nyə̀ tsə wù kəfàʼ ù ghè wə̀ nə̀ mfəm, ù nìy təmdzəŋə yə̀ we nə̀ àghù yə̀ ghu də nəniy mə̀ nə̀ nyi mbe mbè, ghu də zuw way awò mwe ə̀ kə̀fàʼ ə̀ ghu, ghu ki diiy, fələ àsooŋ.