Read Isu Matìyò 26 Bible Online

Matìyò 26 - Isu bible

Matìyò 26

¹Abù Yesù tyi dê mà tsə nəniy ayiə yiy, u dzày yə̀ awò tsə̀təndii tə we tiy a ghu nə,

²“Ghà mbaŋ kwu ŋwô nə̀ à buw səə kə ntsukə imbè ŋgà nyi inyi ŋkàmə̀tâzaʼà mìy. Ghu kî nìy nyə̀ tsîy yə̀ Wà Wù anə ntsuk fə ghà fə̀ nə̀ ghu ba wiy we anə kàʼ fə tənzəd.”

³Ŋgəd tə aghè àlwaʼa yiy nə̀ ŋgəd tə inaʼ tìy ə zù kwi tsə kədzəŋə anə ntòʼ ə̀ Kaʼifàs wə̀ ù kə də nəniy wù ùlwaʼà ùnè wìy.

⁴Ghu byay tsə ayiə yə ghu də ani nù kwi wiy Yesù ate.

⁵Ghu dzìy nə̀ “ŋgà kə we kwi wiy dzə̀ a sòŋə fə inyi i ŋkàmə̀tâzaʼà mìy, aghê fə̂ ni bû nə̀ ŋgə̀d kìy, ŋgà ki kəli utswə̂d nə̀ àghù yìy.”

⁶Yesù kə də̀ anə inaʼ i Betanì a ndàw Simùn wə̀ ù kə kwu nəniy uŋkə̀m wìy,

⁷wìyəŋì ù lìy wǐy zù bù awote nə̀ sòʼò mbvu mə̀lyimə̀ mìy ghu fyiè nəniy anə ivən ì taw yiy. U bù kwe tsə anə tuw kə Yesù.

⁸Abù tsə̀təndii tə Yesù tìy kôʼ tsə ghi, ghu kaʼ yə̀ ani ŋə̀m nə̀ fòŋ tìy, ghu kaʼ yə̀ ani yɛli dzày àyiə. Ghu dzìy nə̀, “Ù ghî mbvu mə̀ nyàb màʼà anə iyî kìə̀?

⁹A mə̀ kwu ani fè mbvu mə anə ndə̀mə̀ ùkhiy, a nyiə̀ yə̂ â àghè à la yiy.”

¹⁰Yesù kə kwu ŋwô àyiə yə ghu kə moʼò nəniy, u dzày tsə nə̀, “Ghǎ wìyəŋi wə̀ fyimə iyîkìə̀? Ù mə zəŋi kwàb kə iyiə kiy â mìə̀.

¹¹Aghê à la yiy nî mày kòʼ wày anə fwumi kghi, mə kî kwuni dyòʼò dzə̀ wày nə̀ ghà anə nsòŋə indzə̀m.

¹²Ù kwe mbvu mə azoŋə̀ mìə̀ ani byay na tsə miə anə ayiə à kyilə yiy.

¹³Mə ndzəmə̀ dzìy bə̀ ŋwò â ghà nə̀, loʼo tə tə̀dzə̀m ghu nî nìʼà ntwùm ə̀ Kə̀zə̀ ate fə anə mbyi, ghu nî dzìy sòʼò ŋwò ìyiə yə ù zəŋi nəniy, ani myiŋə tsə we ate.”

¹⁴Tsə̀ndii ə̀ Yesù ìlìy yìy anə tsə̀təndii tə we tə ivəm nə̀ ghe tiy bè, ghu kə tyoŋə nəniy we nə̀ à də̀ Dzudàs Ìsə̀kalòt. U ŋwò zù a kə̀lə̀ ŋgəd tə aghè àlwaʼa yiy,

¹⁵zù bəb tsə a ghu nə̀, “Ghà kî liə ani nyə̀ kìə̀ â mìə̀ a ki bu mə fây nəniy gha ani kwi Yesù ə?” Ghu byay tsə, tsə yə̀ we nə̀ kabà tìy mə̀vəm inti.

¹⁶Nìy ŋwò tsə anə sòŋə fə ghà fə̀ Dzudàs ə kaʼ yə̀ ani kaw dzəd ani fè fyi Yesù awò ghu.

¹⁷Anə ntsuk fə səsə fə ghu kə nyiə tsə̂ nəniy ba kə ghu də kə̀ kwe nəway mbùŋ ate, tsə̀təndii tə Yesù tìy ə bù akə̀lə̀ Yesù, bəbə a we nə, “Wò liə nə̀ ghè zû byay na ufânyiə u inyi i ŋkàmə̀tâzaʼà mìy a yiə?”

¹⁸Yesù ə bə̀lì kə a ghu nə, “Ghà nyi yə̂ anə inaʼ, ghà zû a ndàw wù lìy wìy, ghà ki dzây yə̂ a we nə, ‘Àtyi dè dzìy nə̀, Soŋə fə ipfə fam fiy mə swəd. Mə liə ani bù nyi inyi ŋkàmə̀tâzaʼà mìy nə̀ tsə̀təndii tam tiy a ndaw yiə̀.’ ”

¹⁹Tsə̀təndii tə bvami zù fàʼ anə yiə yə Yesù kə dzây â ghu, ghu byay na tsə sòʼò ùfànyiə u inyi i ŋkàmə̀tâzaʼà mìy.

²⁰Abù nə̀ nyinkwubì tìy, Yesù ə də̀ a lòʼo kə̀ nyiə kiy nə̀ tsə̀təndii tə we tiy ìvəm nə̀ ghe tiy ìbè.

²¹Yəə ghu nyiə nəniy Yesù ə dzày tsə nə̀, “Mə ndzəmə̀ dzìy bə̀ ŋwò â ghà nə̀ wù lìy də̀ fəə anə uzə ghəli ù kì fyìè fyiə nəniy miə.”

²²Iyiə i ghè yə̀ ə ŋge fyimi này yə̀ tsə̀təndii tə we ghii, ghu kaʼ ani dzày tsìy ùmoʼ umòʼ nə̀, “A Mwe ə̀ mbyi, mə kwu nə̀ à wày dzə miə!”

²³Yesù ə bə̀lì kə a ghu nə̀, “Wù wə̀ wokə we kiy mə̀ dzəŋi nyi tswi tsə nə̀ kə kam kiy anə kaŋ kə ufànyiə, à də̌ we ù kì fyìè fyiə nəniy miə.

²⁴Wà Wù kì pfə ŋwò anə yiə yə ŋwàʼà k-a-zə̀ kìy dzây nəniy. Àkwuni də̀ kə nə̀ i kî fyà ŋwò â wù wə̀ ù kì fyìè nəniy Wà Wù. I kə ba dzwàb nə̀ ghu kə we bôʼ byi dzə̀.”

²⁵Dzudàs, wù wə̀ ù kə fê nəniy we ə ŋwò dzày fyi kə sòʼò nə̀ “A àtyi dè, mə kwu nə̀ à wày dzə miə!” Yesù ə bə̀lì kə a we nə, “Wò dzày ghii.”

²⁶Abù Yesù nyiə nə̀ tsə̀təndii tə we tiy, Yesù nìy kə kəba boʼ tsə, nyə̀ yə̀ kə̀zòŋə̀ ate awò Zə̀kìy, nyə̀ yə̀ awò tsə̀təndii tə we tiy, dzày tsə nə̀. “Nìy nənìy, à yù də̀ uwe nam.”

²⁷U nìy kə bwàm ə̀ mə̀nlwù, nyə̀ tsə̀ sòʼò kə̀zòŋə̀ ate awò Zə̀kìy, nìy nyə̀ yə̀ â tsə̀təndii tə we tiy, dzày tsə a ghu nə, “Ghà mwu gha dzə̀m,

²⁸à yù də̀ kâŋ tam, mə nyi nəniy ŋkà mə̀ fyiə mìy ate nə̀ Zə̀kìy ani nìyzə̀ àyiə ghi àbɛbə yiy.

²⁹Mə ndzəmə̀ dzìy bə̀ ŋwò â ghà nə̀ mə kî kàm mu dzə̀ way nlwù mə̀, zù kwùm a ntsuk fə mə nî muə nlwù mə̀ fyiə̀ mə̀ nə̀ ghà a lòʼo kə Zə̀kìy saʼa nəniy ate.”

³⁰Abù ù dzày mà tsə nəniy ayiə yə, ghu dyaŋi zɛm tsə ndzàŋ ani fwùlì Kə̀zə̀ dyaŋi ŋwò kwoʼ yə̀ anə ukàʼ ŋkàʼ mə̀ Olìf.

³¹Yesù ə dzày tsə â tsə̀təndii tə we tiy a ghu nə, “Zii nə̀ ntsukə tiy, ghà kî ŋwò yə̀ ŋwò, ghà na sə tsə miə, aŋwòə i twâ dòʼò anə ŋwàʼa k-a-zə̀ nə̀, ‘Ghu nî wiy tsə àbàʼàtə̀ndzù, ndzù tìy ni səaŋì ŋwô tsə.’

³²A ki buu Zə̀kìy zɛmə̀ dzwoŋi kə miə anə ipfə, mə ki zû a Galìlî isəə azoŋə̀ ghà.”

³³Pità ə ŋwò dzày fyi kə nə̀, “Abu aghê tsəb twe maʼà kə nəniy wô àdzə̀m, mə kî twe màʼà kòʼ wày wô!”

³⁴Yesù ə dzày yə̀ â Pità a we nə, “Mə ndzəmə̀ dzìy bə̀ ŋwò â wò nə̀, â mwaʼ kiy ni twuŋ zii nə̀ ntsukə tiy, à ki də nə̀ wò mə dzày na fyi sòŋə inti nə̀ wò kwu dzə̀ way miə.”

³⁵Pità ə bə̀lì kə a we nə, “Bəə mə kwu kə ani pfə dzəŋi nə̀ wò, mə kî twe màʼà dzə̀ wày wô!” Aghê àliy yə à dzə̀m ə dzày kə ì moʼo yiy.

³⁶Yesù ə dyaŋi ŋwò zù nə̀ tsə̀təndii tə we tiy anə lòʼo kə̀ liy kiy ghu tyoŋə nə̀ à də̌ Gèsemanì. Abù ghu zû kwùm tsə nəniy awote, u dzày yə̀ â tsə̀təndii tə we tiy a ghu nə, “Ghà doʼò tsə nənà fəə tə̀ mə zaʼi tsîy gwuŋì bə̂.”

³⁷U zù dzəŋi nə̀ Pità nə̀ àwa Zebedì iŋə̀mə̀ à bè. U kaʼ yə̀ ani ŋge mwe, fòŋ ə fyimə sòʼò we.

³⁸U dzày yə̀ a ghu nə, “Mə ŋge mwe ŋwò anə fôŋ, də̀ sòʼò te mə ni pfə. Dòʼo tsə nənìy fəə nə̀ mìə̀ tə̀ ghà ki lia yəə loʼo tiy.”

³⁹Yesù ə dzə̀ soŋ koŋə yə̀ kə ghii, nyaʼa tswi tsə, kum na tsə utwumusə a mbvə̀d, gwùŋì tsə nə̀, “A təli wam, nǐy ŋwò ifii yə awò mìə̀ bəə dzəd də nəniy ani dòʼò. Zəŋi tsə nə̀ i doʼò anə yiə yə wò liə nəniy, à wày dzə anə yiə mə liə.”

⁴⁰U dyaŋi dzwoŋi bù a kə̀lə̀ tsə̀təndii tə we tə ìti, bù kòʼ bə̀ nə̀ ghu bvənə ŋwò. U dzày yə̀ â Pità â we nə, “Ghà way ani dòʼò tsə kə idoŋ nə̀ mìə̀ anə ufwa i wùŋ ùmòʼ ə̀?

⁴¹Ghà ki lia yəə asə yiy, gwùŋə̀ yə̀ nə̀ abu ghà bvə̂ nyi tswi tsə anə imwàmkòʼ, kəə ghà ə nə̀ zəŋə iyiə ìbɛbə yiy. Ghà liə ŋwô ani fàʼ ìyiə yə i də nəniy tsitsi, à kwuni də̀ kə nə̀ iwè nəli yiy lay ŋwò.”

⁴²Yesù ə zù fəli ani zù gwùŋì, u dzìy tsə nə̀, “A Təli wam, bəə à də nə̀ mfəm yə̀ wày ani tsìy, nə̀ mə kwu kə ani fii, i dòʼò tsə kə anə yiə yə wò liə nəniy.”

⁴³U kàm dzwoŋi fwuli bə̀ bù kòʼ bə̀ tsə̀təndii tə we tiy bvənə. Ghu də bòʼ wày ani dzaʼ liay bə̀, aŋwòə mbwuni tiy kə ŋge də̌ ghu anə asə.

⁴⁴Yesù ə nam na sə fwuli tsə ghu ŋwò zù gwùŋì tsə ani zəŋi yə̀ sòŋi inti. U gwùŋə̀ dzìy kwùnə̀ kə ìyiə ì moʼo yiy.

⁴⁵U kàm dzwoŋi fwuli bə̀ a kə̀lə̀ tsə̀təndii tə we tiy, bəb tsə a ghu nə, “Ghà namə zwà kə ŋwò bvunə sòʼò ə̀? Ghà kôʼ, soŋə fiy mə kpe â ghu ani nyə̀ Wà Wù anə wokə aghè bɛbə.

⁴⁶Ghà ŋwô kə idoŋ ŋgà ŋwô. Kòʼo wù wə̀ ù fè fyi nəniy miə, ù nyìə̀ bè ŋwò!”

⁴⁷Yəə Yesù namə dzəŋə̀ nəniy, Dzudàs wə̀ ù kə də soʼo tsə̀ndii anə tsə̀təndii tə Yesù tə̀ ìvəm nə̀ ghe tiy i bè, u zù bù nə̀ ŋwàâ kə ghù kìy ghu kwu nəniy kwab tə tsam tiy nə̀ mbàŋ tìy. À kə ghu twum bə̀ ŋgəd tə aghè àlwaʼa yiy nə̀ ŋgəd tə inaʼ tiy.

⁴⁸Wù wə̀ ù kə fê Yesù ù kə dè na tsə tsə̀e yə ù kì bè dè nəniy Yesù ate â ghu. U kə dzày na nə̀ “Wù wə̀ mə kî myaŋə kyilə yə̂ nəniy we, à də̌ wù wə̀ ghà kî kwi!”

⁴⁹Dzudàs ə dyaŋi zù a kə̀lə̀ Yesù zù myaŋi kəli yə̀ we, dzày tsə a we nə, “Mə tyoŋə zuw bə̀ wò a àtyi dè.”

⁵⁰Yesù ə bə̀lì kə a we nə̀, “A fwu wam, fàʼa yə̀ iyiə yə wò bù nəniy ani fàʼ. A fwu wam, fàʼa yə̀ ìyiə yə wò bù nəniy ani fàʼ. A fwu wam wò fàʼa kìə̀ fəə?”[14] Aghee ghà yə̌ dyaŋi bù kwi taw tsə Yesù, ŋwò yə̀ nə̀ we.

⁵¹Tsə̀ndii ə̀ Yesù ù lìy wìy ù kə də dzəŋi nə̀ Yesù ə dzə̀ fyi kə kwab, tswa màʼà bə̀ tswuŋi kə wè kə̀fàʼ ə̀ wù ùlwaʼà ùnè wìy ate.

⁵²Yesù ə dzày yə̀ a we nə, “Kwe na dzwoŋi yə kwab yiə̀. Wù wə̀ ù muə nəniy anə kəŋgə̀d, ù nì pfə anə kəŋgə̀d.

⁵³Wò kwu way nə̀ abu Mə mə̀ dzìy yə̂ â təli wam, u mə twum bə̂ mìə̀ nə̀ ùŋwàâ u tsə̀təndii t-a-zə̀ u tsîy fyi nəniy tsə̀təndii tiy təkaam i vəm nə̀ ghe tiy ibè ə̀?

⁵⁴Abu mə kwuni zəŋi nəniy ghii, ayiə yə ŋwàʼà k-a-zə̀ kìy tɛb na nəniy, a ki kwuni bû fyi mə̀yə àsoŋə̀ yìy ə?”

⁵⁵Yesù ə dyaŋi bəb yə̀ â ŋwàâ kə̀, a ghu nə, “Ghà bû nə̀ìndiə nə̀ kwab tiy nə̀ mbàŋ tìy soʼo ani bù kwi miə te mə də wù wə̀ ù zəŋə nəniy ayiə yə lâŋ kìy twe nəniy ə? Mə kə̀ də̀ tsə̀ a ndàw Kə̀zə̀ ntsukə indzə̀m, mə tyi dê nəniy ayiə yiy, ghǎ kə̀ kwi nəway miə.

⁵⁶Ayiə yə̀ ghii fyiə ani zəŋi tsə nə̀ ayiə yə aghee ntwùm ə̀ Kə̀zə̀ kə twâ na nəniy anə ŋwàʼà k-a-zə̀ nə̀ a bû fyi àsoŋə̀ yìy.” Tsə̀təndii tə we tə̀dzə̀m ə na sə tsə we, ŋwò tuu yə̀.

⁵⁷Aghû yə̀ ghu kə kwi nəniy Yesù, ghu nìy zù nə̀ we a ndàw wù ùlwaʼà ùnè wìy ghu kə tyoŋə nəniy we nə̀ à də̀ Kaʼifàs. Aghê à tyi dee u làŋ wìy nə̀ ŋgəd tə inaʼ tiy kə dzəŋə dòʼò awote.

⁵⁸Pità ə kwuni dzwùmə̀ bə̀ ghu nàdii kiy, u bù dòʼò səə tsə anə be kə wù ùlwaʼà ùnè wə̀. U tsìy nyi yə̀, zù dòʼò tsə nə̀ àghè kyiŋə ani zù kòʼ ì yiə yə i kî fyiə.

⁵⁹Ŋgəd tə aghè àlwaʼa tə, nə̀ àghee ndàw ìsaʼà yə̀ ə liə ani wiy màʼà Yesù. Ghu kaw tsə aghê liy yiy nə̀ ghu dzây tsə ayiə à guw yiy azoŋə̀ Yesù.[15]

⁶⁰Ghu kə kə̀ kwuni kəli dzə̂ iyiə ìliy yiy ani dzày azoŋə̀ Yesù. Aghê liy yiy kə tsəm bù dzày kə ŋwò ayiə à guw yiy. Aghê àbè kə bù kə ŋwò,

⁶¹bù dzày tsə nə̀, “Wù wə̀ kə̀ dzìy nə̀, ‘Mə də ŋwô ani bə̀lì màʼà tsə ndàw Kə̀zə̀, mə kâm byiə dzwoŋi kə an-i-bàmi ntsukə inti.’ ”

⁶²Wù ùlwaʼà ùnè wə̀ ə ŋwò bəb yə̀ â Yesù a we nə, “Wò kwu way iyiə ìliy yiy ani dzày anə ayiə yə ghu dzîy nəniy azoŋə̀ wò ə̀?”

⁶³Yesù ə kwuni zuw təŋ kə we moŋ. Wù ùlwaʼà ùnè wə̀ ə nam dzày fəli yə̀ â Yesù a we nə, “Anə izəd i Zə̀ kə idoŋ kiy, wò kwu ani dzày bə̀ àyiə àsoŋə̀ yìy. Wò də̌ Wà Kəzə̀ ə̀, wù wə̀ Zə̀kìy sûw kyili na nə̀ ù dòʼò kə̀dòŋ ə̀?”

⁶⁴Yesù ə bə̀lì kə a we nə, “Wò dzày aghii! Mə kwuni dzìy bə̀ â ghà nə̀ ani kaʼ ŋwò tsə nyiə, ghà kî kòʼò Wà wù ù də nəniy anə ukwe ù nyiə u Zə̀ kə̀ kə kwu nəniy daʼa kə̀ soŋə̀ kìy, ù bè nəniy anə təmbàʼ idoŋ!”

⁶⁵Wù ùlwaʼà ùnè wə̀ ə sa màʼà tsə dzwu tə we anə uwè ŋwò dzày tsə nə̀, “Yesù dzìy àyiə àguw yiy azoŋə̀ Kə̀zə̀! Ŋgà kamə̀ khu dzə̀ way wù lìy wìy nə̀ ù bù dzày bə̀ ayiə kwùmə̀ yə̀ nə̀ Yesù. Ghà mə zuw mà ayiə yə ù dzày nəniy.

⁶⁶Ghà nyiə̀ mòʼò nə̀ìndiə?” Ghu bə̀lì kə a we nə, “Ù kwu ani pfə kwùmə̀ yə̀ nə̀ àyiə yə ù dzày nəniy.”

⁶⁷Ghu dyaŋi tsə màʼà ntyiə anə utwùmusə u Yesù, tswàb sòʼò we nə ŋgwoʼ tiy. Aghê liy bwad we nə̀ ùsali wiy,

⁶⁸dzìy a we nə, “Wò dzìy nə̀ wò də̌ wù wə̀ Zə̀kìy sûw na nəniy nə̀ ù dòʼò kə̀dòŋ, dzay bə wù wə̀ ù tswàb nəniy wô nə̀ ŋgwoʼ fiy!”

⁶⁹Pità ə də̀ kə a bee anə kəbe, wà ùyəŋì ə̀ kə̀fàʼ ə zù bù a we nə, “Wò mə̀ də̀ dzəŋi nə̀ Yesù wè Galìlî.”

⁷⁰Pità ə kwuni twe anə sə kə aghè àdzə̀m nə̀, “Mə kwu way ayiə yə wò dzìy nəniy.”

⁷¹Abù Pità ŋwò fyi yə̂ zù təmi dòʼò tsə anə ufə̀b u mbà, wà ùyəŋì kə̀fàʼ ù lìy wìy ə kòʼ tsə we, ŋwò dzày tsə awò àghè liy yiy awote a ghu nə, “Wù wə̀ kə də̌ nə̀ Yesù, wà ìnaʼ i Nazalèt.”

⁷²Pità ə nam twe, dzìy nə̀, “Anə izəd i Kəzə̀ ŋwô, mə kwu dzə̀ way wù wìy!”

⁷³Ghab kiy kə̀ kâm fyi nəway, aghû yə̀ ghu kə tiy nəniy awote, ghu bù a kə̀lə̀ Pità dzìy a we nə, “Wò kə̀ bwìy tsə̀ sòʼò nə̀ Yesù, aŋwòə wò dzə̀ŋə̀ yəə à də̌ wè Galìlî.”

⁷⁴Pità ə kaʼ kə ani kyày àyiə, tswàmə̀ dyaŋə yə̀ uwe u we ate, dzìy yə̀ a ghu nə, “Mə kwu way wù wìy!” Anə sòŋə̀ fə ghà fə̀, mwaʼ kiy ŋwò twuŋ tsə.

⁷⁵Pità ə dyaŋi ŋwò tà mòʼ tsə nə̀ Yesù mâ dzày na nə̀, “Â mwaʼ kiy ni twuŋ à ki də nə̀ wò mə dzày na fyi sòŋə inti nə̀ wò kwu way miə.” Pità ə ŋwò fyi yə̀ a bee, zù dìy dzwàb tsə awote ghii.