Read Isu Matìyò 27 Bible Online

Matìyò 27 - Isu bible

Matìyò 27

¹Abù yə utsuk wiy zwee nyiə bə̂ nəniy, ŋgəd tə aghè àlwaʼa yiy nə̀ ŋgəd tə inaʼ tiy ə kwi tsə kədzəŋə ani byay na ayiə yə ghu ki wiy nəniy Yesù ate.

²Ghu kwù tsə we anə tə ntsaʼ zù nyə̀ yə̀ we awò Paylèt, yəə ù kə də nəniy tuw kiy anə mbwòʼ ə̀ Dzùdiyà.

³Dzudàs wə̀ ù kə fê nəniy Yesù ù kòʼ tsə nə̀ ghu dziy wiy Yesù, mwuli kiy ŋge kwoʼ we anə ayiə yə ù kə zəŋi nəniy, u zù saʼ nyə̀ ŋwò dzoŋi yə̀ ùkhiy wə awò ŋgəd tə aghè àlwaʼa yə nə̀ ŋgəd tə inaʼ tiy.

⁴U dzày yə̀ a ghu nə, “Mə mə zəŋi bɛb ani fè fyi wù wə̀ nə̀ ù kamə zəŋi ìyiə ìbɛbə yiy nə̀ ghu wiy maʼà we kə̀ŋwôŋwò!” Ghu mee a we nə, “I ghəd lya anə kìə̀, i lya kə wò.”

⁵Dzudàs ə nìy kə ukhiy u ghè wə̀ màʼà yə̀ awò aghě ndàw Kə̀zə̀ ŋwò zù sə̀ŋə̀ pfə kə.

⁶Ŋgəd tə aghè àlwaʼa yiy kwumi kə ukhiy u ghè wə̀, dzìy nə̀, “Lâŋkìy kə̀ bɛmə dzə̂ nə̀ ŋgà kwe na Ukhiy wə̀ anə mbè kə ukhiy kə ndàw Kə̀zə̀ aŋwòə à də̀ ukhiy u təkàŋ.”

⁷Ghu dzəŋi səay tsə nə̀ ghu zû zwe loʼo kə wù lìy ù kə̀ bwamə nəniy ntwà tìy ate anə ukhiy ghà wə̀. Ghu na yə̀ nə̀ à də loʼo kə̀ kyələ kə tətwùmə̀ kìy.

⁸À yù də̀ i ghe ghu namə tyoŋə kə loʼo kə ghà kə̀ nyiə nə̀ à də loʼo kə təkàŋ.

⁹Ayiə yə wè ntwùm ə̀ Kə̀zə̀, Yɛ̀lèmiyà, kə kwuu dzây na nəniy a bù fyi kə ìsoŋə̀ yìy nə̀, “Ghu kə nìy kə tə̀ kabà mə̀vəm inti, aghee Islàel bɛmə kə ani tsə anə tuw kə we,

¹⁰ghu nìy kə ukhiy u ghè wə̀ zwe kə kəloʼo awò wù wə̀ ù kə bwamə nəniy ntwà tìy, ighəd yə Mwe ə̀ mbyi kə dzây na awò mìə̀.”

¹¹Ghu nìy bù nə̀ Yesù akə̀lə̀ Paylèt, wù wə̀ ù kə də nəniy tuw kiy anə mbwòʼ ə̀ Dzùdiyà, Wè kə̀tuw wə̀ kaʼ ani bəb a we nə̀, “Wò də̌ dòŋ kə aghě Dzû ə̀?” Yesù ə dzày yə̀ a we nə̀, “Wò mə dzày ghi.”

¹²Ù kə kə̀ kwuni bəlì iyiə yiy anə ayiə yə aghê àlwaʼa à nê yə̀, nə̀ ŋgəd tə inaʼ tə̀ kə dzîy kwe anə tuw kə we.

¹³Paylèt mee a we nə, “Wò zuw way ndə̀mə̀ ayiə̀ yə ghu dzîy nəniy anə tuw kiə̀ ə̀?”

¹⁴Yesù ə zuw kə we moŋ, idzwə yiy zwum nà yə̀ wè tuw kə mbwoʼ anə ayiə ghè yə̀.

¹⁵Byiə̀ kə inaʼ kiy kə də̀ tsə̀ə nə̀ abu ghu dziy bû nyi inyi i ŋkàmə̀tâzaʼà mìy, Paylèt dzù màʼà fyi bə̀ wù ùmòʼ a ndàw ntsaʼ. Wù wə̀ ne kiy kə bɛmə nəniy.

¹⁶Wìŋəmə̀ ùlìy ù kə də a ndàw ntsaʼ, aghê kə ŋge kwu nəniy we, ghu tyoŋə izəd i we nə̀ à də̌ Yesù Bàlabàs.

¹⁷Abù ghu lwe bə̂, Paylèt mee a ghu nə, “Ghà liə nə̀ mə nyili maʼà ndiə tə̀ ù ŋwò, Bàlabàs, moo Yesù wə̀ ghu dzìy à də Wù wə̀ Zə̀kìy sûw kyili na an-a-dòŋ ə?”

¹⁸Ù kə kwu ŋwô nə̀ à kə də̀ kəghòʼ kə kə zəŋi nə̀ ŋgəd tə aghee Dzû tìy kwiy bû nə̀ Yesù akə̀lə̀ we.

¹⁹Anə yəə Paylèt nam də nəniy anə kwe kə̀ saʼa kiy a ndàw ì saʼà yiy, wìy we ə nàʼà yə̀ a we nə, “Kəə wò nì zəŋə iyiə ìliy nə̀ wù wìy, ù zəŋə àyiə yə a də nəniy tsitsi, aŋwòə Mə mə fii zii anə udzɛ̀mə̀ nə̀ ntsukə tiy kwùmə̀ yə̀ nə̀ Yesù.”

²⁰Ŋgəd tə aghè àlwaʼa yə, nə̀ ŋgəd tə inaʼ tiy ə tsə̀ŋə̀ tyiŋə kə ŋwaâ kə̀ nə̀ ghu dzây yə̂ nə̀ ghu nyili maʼà Bàlabàs ù zù ŋwò, tə̀ ghu wiy maʼà Yesù.

²¹Paylèt ə bəb yə̀ awò ŋwaâ kə̀ a ghu nə, “A kpe ndiə ani nyili màʼà tə̀ ù zù ŋwò ə?” Ghu mee a we nə, “A kpe Bàlabàs.”

²²Paylèt ə bəb yə̀ a ghu nə, “In zəŋi yə̂ mə̀yə nə̀ Yesù wə̀ ghà dziy nə̀ à də Wù wə̀ Zə̀kìy sûw kyili na nəniy anə kədòŋ ə?” Ghu bə̀lì kə ghu dzə̀m a we nə, “Baa wiy we anə kàʼ fə təzəd.”

²³Paylèt ə bəb yə̀ a ghu nə, “Ù byɛbi kìə̀?” Ghu ə ŋwò bvuʼi fyi này kə məmbòŋ idoŋ idòŋ nə̀, “Baa wiy màʼa we anə kàʼ fə təzəd.”

²⁴Abù Paylèt kòʼ tsə nə̀ ghe kâm kwu way iyiə ì zəŋi, u kòʼ nə̀ aghû yə̀ də ani kaʼ bə̀ kə̀ŋgə̀d u nîy bə̀ mwi sùw màʼà tsə awo ə we anə səkə ŋwaâ kə̀, dzìy nə̀, “Wo kam kiy way dzə anə ipfə i wû wə̀, à kwu gha wokiy anə ipfə i we.”

²⁵Ŋwaâ kə̀ ə bə̀lì kə nə̀, “Na ghè kəli yə̂ kə kə̀wo anə ipfə i we nə̀ àwa ghələ yiy.”

²⁶Paylèt ə dyaŋi nyili màʼà yə̀ Bàlabàs nə̀ ù zù ŋwò, u bwad tsə dzə̀ Yesù nə̀ mbàŋ fìy tə̀ ù sì nìy nyiə̀ yə̂ nə̀ ghu zû baa wiy we.

²⁷Sǔgôʼ tə Paylèt tìy ə nìy kə Yesù zù nə̀ we anə be kə wù kə̀tuw ghu zoŋə̀ bə̀ akə̀lə̀ we.

²⁸Ghu tsoʼ ŋwò kə ndzwu tə Yesù, dzə̀ŋì tsə sàŋ ì mwâ yìy a zoŋə̀ we.

²⁹Ghu ə byili kə kəntyàŋì anə təfàb, zəki nyi tsə anə tuw kə we. Ghu nyiə̀ yə̀ we nə̀ mbàŋ anə ukwe ùnyiə wiy, nyaʼa tswi tsə anə sə kə we kaʼ ani swìʼì we nə̀, “Hêy, a Dòŋ kə aghè ə Dzû kìy!”

³⁰Ghu tsə ntiə azoŋə̀ we, nìy kə mbàŋ bwad we ate anə kətuw.

³¹Abù ghu swiʼì kpe tsə dzə̂ we, ghu tsoʼ ŋwò dzwoŋi kə sàŋ ì mwâ yə̀ dzə̀ŋì dzwoŋi tsə ndzwu tə we, nìy zù nə̀ we ani zù baa wiy.

³²Abù ghu fyiə yə̂ nəniy, ghu kpe yə̀ nə̀ wù lìy ù kə ŋwô bə̂ nəniy anə inaʼ i Sìlîn ghu tyoŋə we nə à də Simùn, sǔgôʼ tə̀ ə tyiŋi tsə we nə̀ ù bòʼo kə̀ kâʼ fə təzəd fə Yesù fə̀.

³³Abù ghu bû kwùm tsə a loʼo kə liy kiy ghu tyoŋə nə̀ à də Golgotà, (i myiŋə̀ nəniy nə̀ loʼo kə uvəb u kə utuw).

³⁴Ghu nyə̀ yə̀ Yesù nə̀ nlwù mìy nə̀ ghu mə kwe ufyiə ù ŋwiy wiy ate. Abù ù kwuni mwàm kòʼ tsə nəniy, u twe ani mu.

³⁵Abù ghu baa kə nəniy we anə kàʼ fə təzəd, ghu nìy kə ndzwu tə we dzàw tsə ani iwè nə̀ ghu təm nìy anə bòʼ.

³⁶Ghu dyaŋi doʼò tswi tsə tsə̀ŋə̀ fwə̀dlə̀ kə we.

³⁷Ghu kə twà na kwoʼ kə ayiə idoŋ anə tuw kə we nə̀ “À wə̀ də̀ Yesù, dòŋ kə aghě Dzû.” Ghu kə ghî twà nà ani dè tsə sələ kə iyiə kə ghu kə baa nəniy we ate.

³⁸Ghu kə baa kə sòʼò aghè à tsoŋə abè nə̀ Yesù, ùmòʼ anə ukwe ù we ù nyiə wiy, ù lìy wìy anə ukwe ù kwuə̀ wìy.

³⁹Aghû yə̀ ghu kə tsîy nəniy anə dzəd ghu tòʼò moʼo ùtuw nyàʼà we dzìy tsə nə̀,

⁴⁰“À yù wày wô wə̀ wò kə dziy nə̀ wò kì byìlə̀ myàʼà tsə ndàw Kə̀zə̀, tə̀ wò byiə dzwoŋi kə anə ntsukə inti! Abu wò də nəniy Wà Kə̀zə̀ fây fyi tswi bə ùwee niə̀ fə anə kàʼ fə təzəd.”

⁴¹Ŋgəd tə aghè àlwaʼa yiy nə̀ aghè à tyi dee ulàŋ wìy nə̀ ŋged tə inaʼ tiy kaʼ sòʼò we ani swìʼì dzìy tsə nə̀,

⁴²“Ù kə fìy tsə̀ àghě liy, ù kwuni way ani fày ùwe u we! Ù wa də Dòŋ kə aghě Dzû ə? Ù fày fyi tswi bə̀ ùwe u we anə kàʼ fə təzəd tə̀ a ki bɛmə nyiə̀ awò we.”

⁴³Ù ŋge gaʼ fòŋ azoŋə̀ Kə̀zə̀, kwoʼo sòʼò ùwe nə̀ ghe də Wà Kə̀zə̀, ŋgà tsəb kôʼ nə̀ Zəkìy kî fìy ŋwòə we ə̀!

⁴⁴Aghê tsoŋə yə ghu kə baa na dzəŋə ghu nə̀ we ghu kaʼ ani nyàʼì sòʼò we anə ayiə yə̀ aghê liy yə̀ kə nyaʼà soʼò nəniy we ate.

⁴⁵Ləm kiy kə kəd bə̀ ìnaʼ idzə̀m nə̀ fòŋə̀ ntsə̀, kə dòʼò fwatəwùŋ ìti.

⁴⁶Abù anə fwatəwùŋ ìti, Yesù ə ŋwò dìy fyi kə idoŋ dzìy nə, “Ɛ̀li, Ɛ̀li, lama sàbatani.” I myiŋə̀ nəniy nə̀, “A Zə̀kìy, A Zə̀kìy, wò mìə̀ twumi na anə iyî kyiə̀?”

⁴⁷Aghê liy yiy ghu kə tiy nəniy awote, ghu zuw tsə ghii, ghu dzìy nə̀, “U ghî tyoŋə yə̀ Èlaydzà nə̀ ù bù fày ìghe.”

⁴⁸Wù ùmòʼ ə dyaŋi nyəŋ zù nìy bə̀ ùswaa fwə̀ nyi tsə anə nlwù mə̀ taw mìy, tsuk kə anə mbàŋ, nyə̀ kwoʼ kə nə̀ Yesù mu.

⁴⁹À liy yə kwunə dzìy nə̀, “Təmi, ŋgà kôʼ nə̀ Èlaydzà kì bè bii fyiə kə ŋwò ə we.”

⁵⁰Yesù ə nam ŋwò dìy fyi fwuli kə dyaŋi pfə ŋwò yə̀.

⁵¹Bə̂d kə ndzwu kə ghu kə dî na nəniy a ndàw Kə̀zə̀, kə ŋwò saa tswi yə̀ anə ubə̀d ùbè kaʼ tsə idoŋ tswi kwùm tsə itəŋ. Mbvə̀dintsə kiy màŋ ŋwò sə̀kì yə̀, una wiy səli yə̀ sòʼò anə mə mbə̀lə̀,

⁵²sây tìy ə fwiy kə sòʼò, aghê zwe yə ghu kə bɛmə nəniy Zə̀kìy ghu zɛ̀mə̀ dzwoŋi bə̀ anə ipfə,

⁵³ghu nyili màʼà tsə sây tə ghu. Abù Yesù zɛ̀mə̀ dzwoŋi bə̂ nəniy anə ipfə, ghu ə ŋwò zù dòʼò yə̀ anə inaʼ ì zwe yiy, ndə̀mə̀ aghè ə kòʼ ghu.

⁵⁴Abù wù ùnè tə̀sǔgôʼ wə̀ kòʼ tsə nəniy yəə mbvə̀dintsə kiy səkì yə̂ nəniy nə̀ sǔgôʼ tə̀ liy tə, ghu kòʼ sòʼò ayiə yə à kə fyi nəniy, adzwə ŋge zwum này yə̀ ghu ghii, ghu dzìy nə̀, “Ndzə̀m ndzə̀m, ù kə̀ də ŋwô Wà Kə̀zə̀!”

⁵⁵Ndə̀mə̀ iyəŋi kə təmi dòʼò nàdiikiy ghu lia bə̂ nəniy, nə̀ ghu kə dzwùmə̀ tsə Yesù yəə ghu kə ŋwô bə̂ anə inaʼ i Galìlî, ghu kə twamə̀ tsə̂ nəniy we.

⁵⁶Iyəŋi ghà yə̀ kə də̌, Mə̀li wə ù kə ŋwô bə̂ nəniy anə inaʼ i Makdalà, nə̀ Mə̀li wə ù kə də nəniy zə̂ ə̀ Dzɛ̂m, nə̀ Yùsə̂f, nə̀ wìy Zebedì.

⁵⁷Abù nə̀ ìnyikwubì tìy, wù ù kwumə̀ ùlìy ə zù bù nə à də̌ wè ìnaʼ i Àlimàtiyà, izəd i we kə də̌ nə̀ à də̀ Yùsə̂f, ù kə də̀ sòʼo tsə̀ndi ə̀ Yesù.

⁵⁸U kə zù akə̀lə̀ Paylèt ani zù ŋwa ivən i Yesù. Paylèt ə dzày yə̀ nə̀ ghu nîy nyiə̀ yə̂ ivəən i Yesù awò we.

⁵⁹Yùsə̂f ə nìy kə̀ ivən i Yesù, baŋ kə anə bə̀d kə ndzwu kə̀ fəmə kiy.

⁶⁰U nə̀ŋì na nyi yə̀ ani isày ù kə təm nyi yə̂ anə kəna, u byiŋi bə̀ faŋkwoʼ kə itay fè na bə̀ ìdzwə ìsày yə̀ ate, dyaŋi ŋwò i we yiy.

⁶¹Mə̀li wə ù kə ŋwô bə̂ nəniy a Makdalà nə̀ Mə̀li ù lìy wə̀ ghu kə tiy a bə̀d kə̀ liy kə lya bə̀ ìsày i ghà yə̀.

⁶²Abù tsutsu wə à kə də nəniy utsuk ù zwaa wiy, ŋgəd tə aghè àlwaʼa nə̀ àghě Falə̀sî ə lwe yə̀ akə̀lə̀ Paylèt,

⁶³ghu mee a we nə, “A mwe, ghè moʼò ayiə yə wù ù gûw wə̀ kə dzîy nəniy, anə soŋə fə ù kə də nəniy ùtaw wìy nə̀, ‘An-i-bàm i ntsukə inti mə ki zɛ̀mə̀ dzwoŋi bə̂ anə ipfə.’

⁶⁴Tsə̀ay tsə lâŋ kìy tə ghu kyiŋì isày i we anə məntsukə inti, à wày ghi tsə̀təndii tə we tiy də ani zù tsoŋ bòʼò ŋwò kə ivən iwe ghu ki dziy kyabə tsə awò àghù yìy nə̀, ù mə zɛ̀mə̀ dzwoŋi anə ipfə. Ayiə guw ghà yə̀ ki ba bɛb tsîy fyi tsə iguw i səsə yə ù kə bôʼ dzày nəniy.”

⁶⁵Paylèt ə dzày yə̀ a ghu nə, “Yəə i də nəniy ghi, ghà nîy kə sǔgôʼ tə̀ ghu kî kyìŋə̀ ìsày yə̀ anə ayiə yə̀ ghu kəli kwûm nəniy ate.”

⁶⁶Ghu ŋwò yə̀ zù kwe na tsə kətsəe anə faŋkwoʼ kə itay kə̀ dzìy nə̀ abu wù bù mwâm tsə̀ nəniy ghu də ani bù kòʼ kəli ate, na tsə sòʼò wù ù kyiŋə̀ wìy anə isây i ghè yə̀.