Read Isu Matìyò 28 Bible Online

Matìyò 28 - Isu bible

Matìyò 28

¹Abù tsuk fə aghě Dzû fə̀ zwaa fiy tsîy ŋwò tsə nəniy, nə̀ zwù kə utsuk kiy anə tsuk fə səsə fiy anə ivən, Mə̀li wə ù kə ŋwô bə̂ nəniy a Makdalà nə̀ Mə̀li wə ù kə də nəniy zə̂ Dzɛ̂m nə̀ Yùsə̂f, ghu ŋwò yə̀ ani zù kòʼ ìsày.

²Anə sòŋə fə ghà fə̀, mbvə̀dintsə kiy ŋwò sə̀k tsə nə̀ daʼa kiy, tsə̀ndii ì Mwe ə̀ mbyi fyi tswi bə̀ an-a-vələ bù byiŋi ŋwò tsə itay yə, dòʼò tswi tsə ate.

³Ù kə mwà tsə yəə à də̀ iwe, ndzwu tə we tiy fə̀mə̀ yəə à də̀ kədzək.

⁴Aghû yə̀ ghu kə kyiŋə̀ nəniy, ghu ŋwò tà tsəŋ awò ìtsəŋ yiy bvə̀ dyaŋi yə̀ ambvə̀d, yəə ghu mə pfə.

⁵Tsə̀ndii ə̀ Kə̀zə̀ yə̀ ə dzày yə̀ awò iyəŋi yə a ghu nə, “Ghà kə tsəŋ dzə̀! Mə kwu ŋwô nə̀ ghà khu Yesù wə̀ ghu kə ba nəniy anə kàʼ fə təzəd.

⁶Ù wày dzə fəə! Zə̀kìy mə zɛ̀mə̀ ŋwòə we ani ipfə anə yiə yə ù kə dzây na nəniy. Ghà bû kôʼ loʼo kə ghu kə nəŋì na nəniy ivən i we yiy ate.

⁷Ghà ŋwô yə̂, ghà zaŋì zû dzây yə̂ awò tsə̀təndii tə we tiy a ghu nə, ù mə zɛ̀mə̀ dzwoŋi bə̀ ani ipfə. Ù mə ŋwò isə, ù zè nəniy a Galìlî. Ghà zû nənìy awote, ghà ki kôʼ we. À yù də̀ iyiə yə Mə mə̀ bù nəniy ani bù dzày â ghà.”

⁸Iyəŋi yə zə̀àŋì ŋwò tsə anə isày nə̀ ghu tsəŋə ŋwò, də̀ sòʼo nə̀ dwiʼi kiy. Ghu nyəŋ zù ani zù dzày sòʼò â tsə̀təndii tə we tiy.

⁹Ghab kiy kə̀ kâm fyi nəway, Yesù ə màŋ bù fyi kə kə a kə̀lə̀ ghu, dzày tsə a ghu nə, “Mə tyoŋə zuw bə̀ ghà.” Ghu bù akə̀lə̀ Yesù, bvə̀ kwi yə̀ ifwe i we, fwùlì sòʼò we.

¹⁰Yesù ə dzày yə̀ a ghu nə, “Ghà kə tsəŋ dzə̀. Ghà zû dzây yə̂ awò tsə̀təndii tam tiy nə̀ ghu zû a Galìlî, ghu kî zè kòʼò mìə̀ awote.”

¹¹Abù iyəŋi yə̀ ŋwò yə̂ nəniy, sǔgôʼ tə̀ liy tiy ghu kə kyiŋə̀ nəniy isây yə̀, ghu ŋwò nyi yə̀ anə inaʼ. Ghu zù dzày yə̀ àyiə yə àdzə̀m a kə fyi nəniy awò ŋgəd tə aghè àlwaʼa tiy.

¹²Ŋgəd tə aghè àlwaʼa tə zù səay tsə nə̀ ŋgəd tə inaʼ tiy nə̀ ghu zwuni yə̂ sǔgôʼ tə anə ndə̀mə̀ ùkhiy,

¹³a dzây yə̂ a ghu nə, “Ghà ki dzây tsə nə̀, ‘Tsə̀təndii tə we tiy mâ bù tsoŋ ŋwò ivən i we yiy nə̀ ntsukə tiy nə̀ ghà bvənə ŋwò.’

¹⁴Bəə wù wə̀ ù də nəniy tuw kiy anə mbwòʼ ù zuw tsə nəniy, ghè ki kwe yə̂ fòŋə̀ we a we nə̀ ghà kwu dzə̀ way wokiy ate, ghà ki də ndòʼò kwu way ani fyimi fôŋ təli anə iyiə ìliy yiy.”

¹⁵Sǔgôʼ tə̀ ə nìy yə̀ ukhiy u ghè wə̀, bvami fàʼ sòʼò àyiə yə aghû yə̀ kə dzây nəniy â ghu. Aghee Dzû namə dzìy tsə kə ŋwò ayiə ghè yə̀ bù fyi bə̀ zì nə̀ tsə̀təndii tə Yesù tìy kə tsoŋ ŋwò kə ivəən i Yesù.

¹⁶A tsuk fə̀ liy fiy, tsə̀təndii tə Yesù ivəm nə̀ tsə̀ndii imòʼ ə ŋwò zù anə ukàʼ u Galìlî, nə̀ Yesù maa dzày na nə̀ ghu ni zû awote.

¹⁷Abù ghu zû kòʼ tsə nəniy Yesù, ghu fwùlì we. Aghê liy anə uzə u tsə̀təndii tə̀, ghu kə kamə byɛmə dzə̂ wày nə̀ à də̀ Yesù.

¹⁸Yesù ə soŋ koŋə yə̀ akə̀lə̀ ghu, dzày tsə a ghu nə, “Zə̀kìy mə nyə̀ miə nə̀ daʼa kiy an-a-vələ, nə̀ an-a-mbvə̀dintsə.

¹⁹Ghà zû anə nàʼà tə̀dzə̀m, ghà zəŋi tsə nə̀ aghê doʼò tsə tsə̀təndii tam. Ghà nyiə̀ tsə ghu nə̀ mwi m-à-zə̀ mìy anə izəd i Təli, anə izəd i Wa, nə̀ anə izəd i Zwàykə̀zwekiy.

²⁰Ghà tyi dê yə̂ â ghu nə̀ ghu kwu ani zəŋə ayiə yə àdzə̀m mə dzây na nəniy â ghà. Mə kî də̀ ŋwô nə̀ ghà anə sòŋə indzə̀m zù kwùm ntsuk fə mbyi nî bè mìì nəniy ate.”