Read Isu Matìyò 3 Bible Online

Matìyò 3 - Isu bible

Matìyò 3

¹A sòŋə fə ghà fə̀, Dzwan wə ù kə nyiə̀ nəniy mwi m-à-zə̀ mìy ə zù bù a mbvə̀n ə̀ kə̀sisi a mbwòʼ ə̀ Dzùdiyà, kaʼ yə̀ ani nàʼà ntwùm ə̀ Kə̀zə̀,

²dzìy yə̀ awò àghù yìy a ghu nə, “Ghà kyemì ŋwô bə̂ anə bɛb təli, aŋwòə fəkəmə̀ Zə̀kìy bû kaʼ ani saʼ aghee we.”

³Dzwan kə də̌ wè ntwùm ə̀ Kə̀zə̀ wə̀, Ìzayà, kə dzîy nəniy a sòŋə fə ù kə dzây tsə nə̀, “Wè lìy bwoʼo kə̀bòŋ a mbvə̀n ə̀ kə̀sisi, dzìy tsə nə̀, ‘Byay na tsə nə dzəd awò Mwe ə̀ Mbyi, Zəŋi tsə nə̀ dzə̀d ə̀ we doʼo tsə tsitsi.’ ”

⁴Dzwan kə dzə̀ŋì kəli təndzwu ghu kə zəŋi nəniy anə ŋwù tə nyàm ìlìy yìy ghu tyoŋə nə̀ à də̀ kəkàmêl.[2] U də̌ nə̀ kwò fìy anə isəd ghu zəŋi nəniy anə gùw nyàm. Ufânyiə uwe wiy kə də̀ təbe nə̀ zuw tiy.

⁵Aghee bù a kə̀lə̀ Dzwan nə̀ ghu ŋwô bə̀ a Yèlusalèm, nə̀ a mbwòʼ ə̀ Dzùdiyà ìdzə̀m, nə̀ anə lòʼo tə̀ liy tə tə̀dzə̀m akə̀lə̀ Dzwìy Dzudàn.

⁶Ghu dìy dzày yə̀ bɛb tə ghu, Dzwan ə nyə̀ ghu nə̀ mwi m-à-zə̀ mìy anə dzwì Dzudàn.

⁷Abù Dzwan kôʼ tsə nə̀ ndə̀mə̀ àghě Falàsî nə̀ àghě Sadùsî yìy nyiə̀ lwe bə̀ ŋwò ani bù nìy mwi a lòʼo kə ù kə nyiə̀ nəniy mwi m-à-zə̀ mìy ate, u dzày yə̀ a ghu nə, “Gha yə ghà bəbə yə à də̀ zwə tə̀ bɛbə tiy,[3] à tswù ndìə̀ gha nə̀ ghà tu ŋwô fyi anə fòŋə̀ Kə̀zə̀ ìŋəmə̀ yìy ə?

⁸Ghà ki zəŋə yə ayiə yə a dê nəniy nə̀ ghà mə kyèmì ŋwò bə̀ anə bɛb təli.

⁹Ghà kə môʼ dzə̀ nə̀ ghà də ŋwô ani tu ŋwò fyi anə mfəm, yəə ghà dzîy nə̀ ghà də awi Ablàhâm. Mə ndzəmə̀ dzìy bə̀ ŋwò â ghà nə̀, Zə̀kìy də ani bwad fə̀d kə atay yə anə awi Ablàhâm.

¹⁰Ifuw yiy mə dòʼò təŋ bə̀ ani fòŋ màʼà ŋkàʼ anə təghàŋə. Abu à də kə kâʼ fə̀ ghaa fiy fə də muə way utam ùdzoŋə̀ wìy ghu kî fòŋə̀ myàʼà ŋwò kâʼ fə ghà fə̀ ghu piə̀ maʼà kə anə uvə̀lə̀.

¹¹Mə nyiə̀ ghà nə̀ mwi m-à-zə̀ mìy ani dè tsə nə̀ ghà mə kyèmì fyi ŋwò bə̀ anə bɛb təli, Wù lìy wìy kwuni bè ŋwò adzəmə̀ mìə̀, ù mə miə tsîy fyi. Mə kə̀ bôʼ kwoʼ kpe nəway ani bòʼò gùw tə we. Ù kì kwunə zəŋə tsə nə̀ Zwàykə̀zwekiy bû azoŋə̀ ghà, ù saʼ aghě bɛbə yə, ù nyə̀ sòʼò ghu nə̀ mfəm anə uvə̀lə̀.

¹²Ù bè təŋə nə̀ nəli kə we kiy ani bù fyɛbi màʼà fyi kə zwiy tə asaŋ anə asaŋ. Ù kî nìy na yə̀ àsaŋ ə we anə uta, ù kwuni nìy pìə̀ màʼà kə zwiy tə anə uvə̀lə̀ wə̀ u də nimə kòʼò dzə̀ wày.”

¹³Yesù ə dyaŋi ŋwò tsə a Galìlî bù akə̀lə̀ Dzwan anə dzwì Dzudàn nə̀ Dzwan nyiə̀ we nə̀ mwi m-à-zə̀ mìy.

¹⁴Dzwan ə kaʼ ani kwuni twe dzìy nə̀, “À mə̀ kpe wô ani nyə̀ mìə̀ nə̀ mwi m-à-zə̀ mìy, wò kàmə̀ bè akə̀lə̀ mìə̀ iyîkìə̀?”

¹⁵Yesù ə bə̀lì yə̀ we nə̀, “I kwu ani dòʼò aghii nyiə, â ŋgàŋ ani zəŋi mà təŋ tsə ayiə àdzə̀m a də nəniy tsitsi anə sə k-a-zə̀.” Dzwan ə dyaŋi bɛmə kə ani nyə̀ we nə̀ mwi m-à-zə̀ mìy.

¹⁶Abù Dzwan nyiə̀ tsə Yesù nə̀ mwi m-à-zə̀ mìy, Yesù ə ŋwò fyi kwoʼ kə anə mwi, u kòʼ byiwuŋ kiy ŋwô fwiy tsə nəniy, Zwày k-a-zə̀ kìy ə tswi bə̀ yəə à də̀ kəbubumə, bù ma tsə azoŋə̀ we.

¹⁷Dzə̀ ə foŋ fyi tswi bə̀ an-a-vələ dzày tsə nə̀, “À wə̀ də̌ wa nam ù tsukə̀ wìy, ù zəŋə fòŋ yam ŋgee dzwabə̀ nəniy.”