Read Isu Matìyò 4 Bible Online

Matìyò 4 - Isu bible

Matìyò 4

¹Zwàykə̀zwekiy dyaŋi nìy zù nə̀ Yesù a mbvə̀nə̀ kə̀sisi â Satàn ani mwàm kòʼ we.

²Abù ù dòʼò koŋə dzə̂ nəniy awote ntsukə mə̀vəm in kyàʼì nə̀ ù bamə kə idzwə nə̀ ntsukə nə̀ ntsə̀, dzoŋə kaʼ yə̀ ani zab we.

³Satàn ə dyaŋi bù dzày yə̀ a we nə, “Abu wò də nəniy Wà Kə̀zə̀, zəŋi tsə nə̀ atay yə̀ fə̀d kə kəba.”

⁴Yesù ə bə̀lì yə̀ we nə̀, “I twâ dòʼò anə ŋwàʼà k-a-zə̀ nə̀, ‘À kaʼi wày təŋ dzə kəba kə zəŋə wù nə̀ ù ki muə, ayiə yə Zə̀kìy dzîy nəniy àdzə̀m à zəŋə àghe wù nə̀ ù ki muə.’ ”

⁵Satàn ə dyaŋi nìy zù nə̀ Yesù a Yèlusalèm, inaʼ ì zwe yiy, nìy na fyi kwoʼ kə we anə lòʼo kə kə dâb tsìy fyi nəniy a ndàw Kə̀zə̀,

⁶Dzày yə̀ a we nə, “Abu wò ndzə̀m də Wà Kə̀zə̀ tǎ fyi tswi yə̀ a mbvə̀d, aŋwòə i twâ dòʼò anə ŋwàʼà k-a-zə̀ nə̀, ‘Zə̀kìy ki twum bə̂ tsə̀təndii tə we, ghu ki fam kwi kə wô, tə̀ wò ki də kə̀ tswâb byɛbi awuu yiə̀ yìy anə itay.’ ”

⁷Yesù ə bə̀lì kə a we nə̀, “I twâ dòʼò sòʼò anə ŋwàʼà k-a-zə̀ nə̀, ‘Kə̀ mwâm kòʼ dzə̀ Mwe ə̀ mbyi Zə̀ kiə̀ kìy.’ ”

⁸Satàn ə nìy kwoʼ yə̀ nə̀ Yesù anə ukàʼ ù dabə wiy, dè yə̀ nàʼà tə mbyi tə tə̀dzə̀m â Yesù nə̀ kwab tə ufyiə tə tə də nəniy ate.

⁹Satàn ə dzày yə̀ â Yesù a we nə, “Abu wò nyaʼa tsəə nəniy fwùlì tsə miə, mə ki nyiə̀ wò nə̀ ùfyiə wə ùdzə̀m.”

¹⁰Yesù ə bə̀lì kə a we nə, “Satàn! Ŋwòə a sə̀ ə̀ mìə̀. I twâ dòʼò anə ŋwàʼà k-a-zə̀ nə̀, ‘Ghà kwu ani fwùlì yə̀ kə Mwe ə̀ mbyi Zə̀ kəli, fàʼà yə̀ sòʼò â we kə.’”

¹¹Yəə Yesù dzày dzə̂ aghii, Satàn ə nyəli màʼà tsə we, tsə̀təndii t-a-zə̀ tǐy bù nìy ìyèmì azoŋə̀ we.

¹²Abù Yesù zuw tsə nə̀ ghu mə kwe Dzwan a ndàw ntsaʼ, u ŋwò zù a Galìlî.

¹³Ù kə kə̀ doʼò dzə̂ a Nazalèt, ù kə zù mùə̀ dòʼò yə̀ a Kàpanùm, a kə̀lə̀ ìŋwù yə̀ i kə də nəniy anə inaʼ i Zebulùn nə̀ ìnaʼi Naptalì yìy.

¹⁴I bvami bù fyi kə kə anə ayiə yə wè ntwùm ə̀ Kə̀zə̀, Ìzayà kə dzây na zî bə̂ nəniy nə̀,

¹⁵“Mə dzəŋə̀ bə̀ nə̀ ghà, aghû yə̀ ghu muə nəniy a Zebulùn, nə̀ Naptalì, bə̂d kə inaʼ kəli kiy də anə dzəd yə ì zè nəniy anə iŋwù, a ŋgwùŋə̀ Dzwìy Dzudàn, nə̀ Galìlî, loʼo kə aghù yə̀ ghu də wày aghee Dzû

¹⁶Aghû yə̀ ghu muə an-a-ləm, ghu mə kòʼ kaʼì tə̀ soŋə̀ tìy, Aghû yə̀ ghu swəd dzə̂ anə ayiə̀ pfə yiy, ghu mə kəli imuə̀ itsà yìy.”

¹⁷Nìy ŋwò tsə a sòŋə̀ fə ghà fə̀, Yesù ə kaʼ yə̀ ani nàʼà nə̀, “Ghà kyemì ŋwô bə̂ anə bɛb təli, aŋwòə fəkəmə̀ Zə̀kìy bû kaʼ ani saʼ aghee we.”

¹⁸Yəə Yesù bwìy tsìy yə̂ nəniy anə iŋgwùŋə i ŋwù i Galìlî, u kòʼ tsə aghê àbè ghu kə də awizə̂ yìy, Simùn ghu kə tyoŋə we nə̀ à də̀ Pità, we nə̀ àzə̀ ə̀ we ghu kə tyoŋə we nə̀ à də̀ Andùlù, ghu kwi nəniy tsitiy anə təwè anə iŋwù. Fàʼ kə ghu kiy kə də̀ tsə̀ ani kwi tətsi.

¹⁹Yesù ə dzày yə̀ a ghu nə, “Dzwùmi bə̀ nənìy miə, tə̀ mə ki tyi dê bə̂ ghà nə̀ àyiə yə ghà də ani zəŋi tə̀ aghê dzwumì bə̂ Kə̀zə̀.”

²⁰Ghu dyaŋi nasə tsə wee tə ghu, ŋwò dzwùmì yə̀ Yesù.

²¹Abù ù kàm soŋ fəli yə̂ isə, u kòʼ tsə aghê liy àbè ghu kə də awizə̂, Dzɛ̂m nə̀ Dzwan awa Zebedì, ghu də nəniy an-a-mfə̀n, ghu zwubə̀ wee tiy. Yesù ə toŋə tsə sòʼò ghu.

²²Ghu dyaŋi nasə tsə sòʼò tè ghu an-a-mfə̀n ŋwò dzwùmì yə̀ we.

²³Yesù ə bwìy tsìy yə̀ mbwòʼ ə̀ Galìlî ì dzə̀m, tyi dè yə̀ àyiə, anə ndaw tə udzəŋə tə aghě Dzû, nìʼà yə̀ sòʼò ntwùm ìdzòŋə̀ yìy kwùmə̀ yə̀ nə̀ yəə Zəkìy kî saʼa aghê ate. U zəŋi tsə sòʼò aghù yə̀ ghu kə dzaŋə̀ le tə tədzàŋ tìy, ghu taw dòʼò bə̀.

²⁴Ùzòŋ u we wiy foŋ tsìy yə̀ bwòʼò Silìyà ì dzə̀m, aghee màŋə̀ nyəŋə bə̀ nə̀ le tə ghè dzaŋə tiy awò Yesù, u zəŋə tsə, ghu taw kə. À yuu ghu zəə nəniy, nə̀ à yuu ghu fwabə nəniy, nə̀ à yuu nsìy mə̀bɛbə̀ mìy kə fyimə nəniy ghu, nə̀ à yuu ghu kə bvwə̂ nəniy bvwə̀kìy, nə̀ à yuu ghu pfə doʼò nə̀ ìkwe yiy, nə̀ à yuu ghu kə pfə doʼò nə̀ ìfwe yiy, Yesù ə zəŋi tsə ghu taw mà kə àdzə̀m.

²⁵Ŋwàâ kə ghù kìy ə màŋə̀ kwùə̀ kyabə tsə̀ adzəmə̀ we. À yuu ghu fyi kə a Galìlî, nə̀ à yuu ghu ŋwô bə̂ anə nàʼà tə̀ ìvəm tə doʼò dàŋ fyi yə̂ a ŋgùŋə̀ Galìlî ì lìy yìy, nə̀ à yuu ghu ŋwô bə̂ nəniy a Yèlusalèm, nə̀ àghě Dzùdiyà, nə̀ àghě ŋgùŋə̀ Dzwìy Dzudàn ì lìy yə̀.