Read Isu Mâk 10 Bible Online

Mâk 10 - Isu bible

Mâk 10

¹Yesù ə ŋwò tsə a Kàpanùm zù a mbwòʼ ə̀ Dzùdiyà, zù dàŋ fyi yə̀ dzwì Dzudàn. Ŋwàâ kə aghû kìy ə lwe fəli bə̀ asə̀ə̀ we. U namə tyiə dè yə̀ kə ghu nə̀ ayiə an-a-tə̀ŋ.

²Aghee Falàsî àliy yiy zù bù ani mwàm kòʼ we nə̀ ù nì bvə̂ tsə lâŋ kìy. Ghu, bəbə a we nə, “Lâŋ kìy bɛmə ŋwô nə̀ wù dzwùm fyi wìy we ə?”

³Yesù ə bəb dzwoŋi yə̀ aghu nə, “Musîs kə nyə̀ làŋ kə̀ ghaa kiy â ghà ə?”

⁴Ghu mee a we nə “Musîs kə dzày na nə̀ abu wù twà nyə̀ yə̂ dzə wìy we nə̀ ŋwàʼà kə̀ səalə kiy ù də̀ ŋwô ani dzwùm fyi we.”

⁵Yesù ə dzày yə̀ a ghu nə, “Musîs kə twà na ulâŋ wə̀ â ghà, aŋwòə ghà kə ŋge kwu ukwəli u təfòŋ

⁶Yəə mbyi kə kaʼ tsə nəniy Zə̀kìy kə bwam bə̀ wìŋəmə̀ nə̀ wìyəŋi.

⁷‘À yù də ighe wìŋəmə̀ kwu nəniy ani nyəli màʼà tsə tè we nə̀ zə̂ we, ù təm dòʼò dzəŋi yə̀ nə̀ wiy we.

⁸Utuw ghu ghè wə̀ ə bù dòʼò bə̀ ùwee u mòʼ.’ Ghu kâm way dzə aghê àbè, ghu də uwe umòʼ.

⁹Ì yî dè tsə nə̀ Wù lìy wìy kwu dzə̀ way ani sàlì màʼà fyiə kə Zə̀kìy təm na dzəŋi.”

¹⁰Abù Yesù zû dzwoŋi nəniy a ndaw nə̀ tsə̀təndii tə we tiy, tsə̀təndii tə we tiy ə bəb tsə iyiə i ghè yə̀ ù kə dzîy.

¹¹Yesù ə dzày yə̀ aghu nə “Wù wə̀ ù dzwùm fyi nəniy wìy we nìy yə̀ wìyəŋi ù ŋwò wìy, ù mə zəŋi ayiə ə təmwàŋ ə̀.

¹²I də ighəd abu wìyəŋi salì tsə nə̀ ŋə̀mə̀ we nìy yə̀ ŋə̀m ù ŋwò wìy ù də̌ wìyəŋi ù lyaŋə̀ wìy.”

¹³Aghê liy kə bè nə̀ àwa ghu yiy nə̀ Yesù gaʼ tsə awo azoŋə̀ ghu ani lwì tsə ghu. Tsə̀təndii tə we tiy ke na yə̀ ghu.

¹⁴Abù Yesù kòʼ tsə ghii, fòŋ ə ŋə̀m we, u dzày yə̀ â tsə̀təndii tə a ghu nə, “Ghà kə twe dzə̀ nə̀ anîsə̂ kə bû a kə̀lə̀ mìə̀, aŋwòə Loʼo kə Zə̀kìy saʼa nəniy ate kə də awò àghù yə̀ ghu na tsə iwee i ghu yiy yəə à də anîsə̂.

¹⁵Mə ndzəmə̀ dzìy bə̀ ŋwò â ghà nə̀ aghê kwu ani dòʼò yəə à də̀ anîsə̂ yə̀ â ghu ani zù a loʼo kə Zə̀kìy saʼa nəniy ate.”

¹⁶Yesù ə myaŋi kəli yə̀ ànìsə̂, gàʼ yə̀ awo we anə utuw ghu lwì tsə ghu.

¹⁷Abù Yesù ŋwò tsə zè a Yèlusalèm, wù lìy wìy ə nyəŋ bù nyaʼa bə̀ a təŋə̀ we, bəbə we nə “A àtyi dè ù dzòŋə̀ wìy, Mə də ani zəŋi mə̀yə tə̀ mə kəli imuə itsà ə?”

¹⁸Yesù bəb yə̀ a we nə, “Wò twoŋə nə̀ìndiə miə nə̀ à də̌ wù ùdzòŋə̀ wìy ə? Wù lìy wày dzə ù dzwàbə̀ nəniy, À mày təŋ kə Kəzə̀ kə dzwabə̀ nəniy.

¹⁹Wò mgbaŋ kwu ŋwô àyiə yə lâŋ kìy dzîy nə̀, kəə wù nì wiy wù, kəə wù nì bwiy mwàŋ tìy, kəə wù nì tsoŋə, kəə wù nì guw nia nəniy ayiə yiy azoŋə̀ wù lìy wìy, kəə wù nì tsê nəniy wù lìy wìy, i zuw yəə awò tè nə̀ zwə̂.”

²⁰Wù wə̀ ə dzày tsə nə̀, “A àtyi dè, mə maa kwu kaʼ bə̀ ani na ulâŋ wə̀ anə nìsə̂.”

²¹Yesù ə lia kə we ghii. U liə we dzày yə̀ a we nə, “Iyiə imòʼ ì də ŋwô wò də kamə zəŋi, zu fèe ŋwò ufyiə yiə̀ wìy wò nîy ukhiy u te wiy wò nyiə̀ yə̂ awò ghè la yiy. Abu wò zəŋi dzə̂ aghi, wò kî dòʼò wù ù kumə̀ wìy an-a-vələ; wò dyaŋi bû dzwumì bə̂ mìə̀.”

²²Abù wù wə̀ zuw tsə ayiə yə Yesù dzày nəniy u mwe dòʼò yə̀ dyaŋi ŋwò yə̀ nə̀ ù mə ndzwəd na utwumusə wiy, aŋwòə ù kə ŋge kumə ŋwò.

²³Yesù ə liay tsìy yə̀ tsə̀təndii tə we dzày yə̀ aghu nə, À tòʼò ŋge də̀ iyiə ì taw yiy awò wù ù kwùmə wiy ani nìy tswi tsə uwee u we tə̀ Zə̀kìy saʼ.

²⁴Adzwə ŋge zwum yə̀ tsə̀təndii tə we anə yiə ghà yə̀, Yesù ə nam dzày fəli yə̀ a ghu nə, “Awizə̂ yamə, À tòʼò ŋge də̀ iyiə ì taw yiy awò wù ù kwùmə wiy ani nìy tswi tsə uwee u we tə̀ Zə̀kìy saʼ.

²⁵I ŋge bva ŋwò awò nyàm yə̀ ghu twoŋə nə̀ à də̀ kə kàmêl ani tsìy fyi yə̀ anə bwòʼ kə fənsaʼ, tsìy fyi â wù ùkumə̀ wìy ani na tsə uwee u we tə̀ Zə̀kìy saʼ.”

²⁶Adzwə kàm zwum này yə̀ tsə̀təndii tə, ghu dzày tsə anə iwè ighu nə̀, “Anə̀ ì yuu nyiə ghi, à də̌ ndiə Zə̀kìy də ani bii fyi we?”

²⁷Yesù ə liay kə ghu ghii, dzày tsə nə̀, “Ayiə àliy yiy də ŋwô wù də wày ani zəŋi, Zə̀kìy kwuni də̀ ŋwô ani zəŋi ayiə adzə̀m.”

²⁸Pità ə dyaŋi dzày fyi bə̀ nə̀, “Kòʼo, ghè mə nyili màʼà àyiə adzə̀m, dzwùmì bə̀ wò.”

²⁹Yesù ə bə̀lì kə nə̀, “Mə ndzəmə̀ dzìy ŋwò, wù wə̀ u tsəb na sə tsə be kə we kiy, moo awizə̂, moo zə̂, moo təli, moo awa, moo uswum bòʼ mìə̀ nə̀ bòʼ ntwùm ìdzòŋə̀ yìy.

³⁰Zə̀kìy kî nyə̀ we nə̀ ndə̀mə̀ ufyiə, a fəə anə mbyi, u kwoʼ kûm tsə anə mənsòŋə fəbwaam anə ufyiə wə ù kə̀ bòʼ kwu tsə nəniy, nə̀ ù kə kwu tsə̀ kəbe, moo awizə̂, moo zə̂, moo awa, moo uswum, nə̀ ntswə̀d mìy yəə. Ani bu mbyì ìfyiə̀ yə̀ bù nəniy, ù nî kəli itsâ.

³¹Ndə̀mə̀ aghè àliy yiy aghê koʼò nəniy nyiə nə̀ à də̀ aghê àsoŋə yìy nî kàmə̀ bè dyòʼò ŋgwò mə̀ŋghù, à yuu aghê koʼò nəniy nə̀ ghu də ŋgwò mə̀ŋghù, ghu ni kâm bû dòʼò àghè àsoŋə̀ yìy.”

³²Abù Yesù nə̀ tsə̀təndii tə we tiy kwoʼo yə̂ a Yèlusalèm, u zè anə səkə ghu. A də̌ nə̀ adzwə ə mə ŋge zwum tsìy fyi tsə̀təndii tə we tiy. Aghû yə̀ ghu kə dzwumə̀ bə̂ nəniy ibàm ə də̀ ani itsəŋ. U kàm nìy fəli kə tsə̀təndii tə bwa təmi yə̀ nə̀ ghu, kaʼ yə̀ ani dzày ayiə yə a kî fyiə nə̀ we.

³³U dzày yə̀ a ghu nə, “Ghà zuw, ŋgà kwoʼo yə̀ a Yèlusalèm, à də̀ awote ghu kî nyiə̀ yə̂ nəniy Wà Wù anə wokə ŋgəd tə aghè àlwaʼa nə̀ àghè àtyi dee ulàŋ wìy. Ghu ki saʼ wiy we, ghu ki dziy nə̀ ù kpe ŋwô ani pfə. Ghu nîy nyiə̀ dyaŋi yə̂ we awò àghù yə̀ ghu də wày aghee Dzû,

³⁴Ghu ki swiʼì we, ghu tsə ntiə anə asə ə we, ghu bwad we nə̀ ìkwò yìy, ghu ba wiy we anə kàʼ fə təzəd. Ani bù ntsukə miy zê ìnti, ù nî kàm zɛ̀mə̀ dzwoŋi bə̀ ani pfə.”

³⁵Dzɛ̂m nə̀ Dzwan awa Zebedì ghu bù təmi kə asə̀ ə̀ Yesù, dzày yə̀ a we nə, “A àtyi dè, fày ghə̀d fə anə iyiə ìliy yiy.”

³⁶Yesù bəb yə̀ a ghu nə, “Mə gha fîy kə anə kìə̀ ə̀.”

³⁷Ghu mee nə, “Ghè liə nə̀ ani bu wò nì dòʼò tsə anə ndàŋ ə̀ kə̀dòŋ yiə̀, ghè ni doʼò fwumi tsə nə̀ wò, wù lìy wìy anə ukwe yiə̀ ùnyiə wiy, wù lìy wìy anə ukwe yiə̀ ùkwô wìy, a lòʼo kə wò saʼa nəniy ate.”

³⁸Yesù dzày yə̀ a ghu nə, “Ghà kwu dzə̀ way ayiə yə ghà bəbə nəniy. Ghà kî də̀ kə ŋwô ani fii ndzòʼò ìfii yə mə kî fyaʼa nəniy ə̀, moo ghà kî də kə ŋwô nìy sòʼò ndzòʼò mwi m-à-zə̀ mə̀ mə kî kwu ani nìy ə̀?”

³⁹Ghu mee a we nə, “Ghè tsəb bɛmə ŋwô.” Yesù ə dzày yə̀ a ghu nə, ghà kî ndzə̀mə̀ kòʼò ŋwò utswə̂d wìy, ghà ki kôʼ soʼò ŋgoʼ ani nìy mwi m-à-zə̀ anə yiə yə mə kî kòʼò nəniy.

⁴⁰A kwuni kwu dzə̀ way miə daʼa kiy ani byay na tsə nə̀ à kì dyòʼò ndiə anə ukwe wam u nyiə wiy, moo ukwe ùkwuə̀ wìy ə. Zə̀kìy mə byay na təŋ loʼo tə ghà tə̀ awò àghu yə̀ u sày na nəniy ghu.

⁴¹Abù tsə̀təndii tə̀ liy tə ìvəm zuw tsə ayiə ghè yə̀, ghu kaʼ ani ŋə̀m nə̀ fòŋ tìy azoŋə̀ Dzɛ̂m nə̀ Dzwan.

⁴²Yesù ə twoŋə dzəŋə na bə̀ ghu akə̀lə̀ we, dzày yə̀ a ghu nə, “Ghà kwu ŋwô nə̀ aghû yə̀ ghu də nəniy ùdòŋ u ghù yə̀ ghu də wày aghee Dzû, ghu saʼa àghě ghu nə̀ awo àtaw yiy. Aghû yə̀ ghu də nəniy utuw wiy, ghu liə sòʼò ani tsəa lâŋ kìy awò aghù yə̀ ghu də nəniy a təŋə̀ ghu.

⁴³Ghà kwuni kwu dzə̀ way ani dòʼò yəə à də̌ ghu. Wù wə̀ ù kwu ani dòʼò wù ùsòŋə̀ wìy anə uzə ghi à də̌ wù wə̀ ù na tsə nəniy uwe we wiy yəə à də̌ wù kə̀fàʼ. Wù kətuw kwu ani dòʼò tsə wù wə̀ ù fàʼà nəniy â àghè àdzə̀m,

⁴⁴Bəə wù ùmòʼ anə uzəə ghi dziy doʼò wù kəsə, ù kwu ani dòʼò kə̀kwə̀d awò àghè àdzə̀m;

⁴⁵Aŋwòə Wà Wù kə̀ bû dzə̂ nə̀ aghê fâʼ nyiə̀ â we, ù kə kwuni bù ani fàʼ nyə̀ awò àghè. Ù bù nə̀ ghe nyiə̀ yə̂ imùə̀ iwe ani kùm fyi ndə̀mə̀ aghè.”

⁴⁶Yesù nə̀ tsə̀təndii tə we tiy ə zù kwùm tsə anə inaʼ i Dzèlikò, Abù ghu ŋwò fyiə yə̂, ŋwàâ kə ghù kiy dzwùmə̀ yə̀ ghu, wù ù fɛbə̀ ùlìy wìy ù kə taw ŋwaa tsə̂ nəniy ufyiə wiy, ghu kə twoŋə izədi nə̀ à də̌ Bàtimùs (wà Timùs), u də̀ awote anə ukè udzəd.

⁴⁷Abù Bàtimùs tsəb zuw yə̂ nə̀ Yesù, wà ìnaʼ i Nazalèt mə swəd mà bə̀, u kaʼ tsə mbòŋ mə̀ bvəʼə̀ mìy dzìy nə̀, “A Yesù, wà Devìd kwoʼ nə̀ mulikiy azoŋə̀ mìə̀.”

⁴⁸Ndə̀mə̀ aghù ə kwà yə̀ we, a we nə, doʼò moŋ, u kwuni bày bwoʼ fyi kə kəbôŋ nə̀, “Yesù wà Devìd, kwoʼ nə̀ mulikiy azoŋə̀ mìə̀.”

⁴⁹Abù Yesù zuw tsə bôŋ kə we kiy, u təmi tsə dzày yə̀ nə̀, “Ghà twoŋə nyiə̀ tsə we, ghu twoŋə̀ tsə wù ù fəbə̀ wə̀, dzày yə̀ â we nə, dòʼo yə̀ moŋ nyiə, ŋwòə kə idoŋ, ù twoŋə wò.”

⁵⁰Bàtimùs ə dyiaŋi tsoʼ wuli màʼà fyi kə sàŋ anə uwè, tà fyi kə idoŋ, koŋə yə̀ akə̀lə̀ Yesù.

⁵¹Yesù ə bəb yə̀ â we nə̀, “Wò liə nə̀ mə zəŋi nyiə̀ kìə̀ â wò ə?” Wù ù fəbə̀ wə̀ ə dzìy a we nə̀, “A àtyi dè wam, mə liə ani kàm koʼ tə̀loʼo.”

⁵²Yesù ə dyaŋi dzày yə̀ a we nə, “Zùu ŋwòə, ibɛmə yiə̀ yìy mə zəŋi wò mə taw.” U dyaŋi kaʼ ani koʼ tə̀loʼo, dyaŋi ŋwò dzwumì yə̀ Yesù.