Read Isu Mâk 11 Bible Online

Mâk 11 - Isu bible

Mâk 11

¹Abù Yesù nə̀ tsə̀təndii tə we tiy zê myâ nəniy a inaʼ i Yèlusalèm, ghu zù kwùm tsə anə inaʼ i Betfèt nə̀ ìnaʼi Betanì anə udoŋ u ŋkàʼ mə̀ Olìf, Yesù ə twum yə̀ tsə̀təndii tə we tə̀liy tiy isə ìbè,

²dzày yə̀ a ghu nə, “Zù nənìy anə nàʼà fə̀ fə də nəniy isə, A ki buu ghà nyiə kwoʼo yə̂ nəniy, ghà ki kôʼ tsə lwəd kə kəndzàkâs ghu təŋì naa nəniy nə̀ wù lìy kamə nyi kwoʼ kôʼ ate. Ghà ki zê tsə, tə̀ ghà bû nə̀ ghe kiy ghà bû nyiə̀ bə̂ â mìə̀.”

³Abu wè lìy bəb tsə nə̀ ghà kîy zəŋə kìə̀, gha ki dzày yə̂ a we nə “Mwe ə̀ Mbyi dziy fâʼ tsə ate tə̀ ù kì twum dzwoŋi bə̀ anə fəkə̀mə̀.”

⁴Ghu zù kòʼ tsə sòʼò lwəd kə kəndzàkâs kə̀ ghu təŋì na nəniy anə dzəd akə̀lə̀ ufə̀b u ndaw. Yəə ghu kaʼ tsə ani zè lwəd kə kəndzàkâs kə̀,

⁵aghê liy ghu kə tiy nəniy awote, ghu bəb tsə nə̀ ghà kî zəŋə kìə̀ anə yiə yə ghà zê nəniy lwəd kə kəndzàkâs kiy yə?

⁶Ghu bə̀lì kə anə yiə yə Yesù mə̀ dzây yə̂ nəniy â ghu, aghê ghà yə ə na yə̀ kə ghu nə̀ ghu ŋwô yə̂ nə̀ ghe kiy.

⁷Ghu nìy bə̀ lwəd kə kəndzàkâs kə̀ awò Yesù, ghu zìì yə̀ ndzwu tə ghu ate, Yesù ə nyi kwoʼ kə ate.

⁸Ndə̀mə̀ aghè ə zə̀àʼà yə̀ ndzwu tə ghu anə dzəd, àliy yiy zə̀àʼà yə̀ ùbìy u swam ghu kə gbû fyi bə̂ anə iswum.

⁹Aghû yə̀ ghu zê nəniy isə nə̀ à yuu ghu kə bê nəniy ibàm ghu bvuʼo bə̀ mə̀mbòŋ dzìy tsə nə̀, “Ukali awò Zə̀kìy, lwì kìy də awò wù wə̀ ù bù nəniy anə izəd i Mwe ə̀ Mbyi!

¹⁰Zə̀kìy lwîy isaʼ i tè ŋgàŋ Devìd yə̀ i bê nəniy isə! Ukali wiy də awò Zə̀ kə̀ kə də nəniy an-a-vələ!”

¹¹Yesù ə nyi kwoʼ yə̀ a Yèlusalèm zù a ndàw Kə̀zə̀, liay kyabi yə̀ ufyiə udzə̀m u kə də nəniy awo. Yəə à kə də nəniy nə̀ soŋə fiy mə tsìy, u ŋwò zù dyaŋi a Betanì nə̀ tsə̀təndii tə we tiy ìvəm nə̀ ghe tiy ìbè.

¹²Tswutswu wə, yə ghu ŋwô bə̂ nəniy a Betanì, dzoŋə zabə Yesù.

¹³U kòʼ yə̀ kàʼ fə utam fə̀liy fiy nàdiikiy, ghu tyoŋə nə̀ à dè kâʼ fə fîk. Fə kə kwu ndə̀mə̀ tə̀fə̀bə̀. U zù ani zù kòʼ nə̀ fə kwu ŋwô utam wiy yə̀, u zù kòʼ tsə nə̀ utam wiy way dzə ate nə̀ à də̀ kə təfəbə̀, aŋwòə à kə wày dzə soŋə fə utam.

¹⁴U dzày yə̀ â kàʼ fə̀ nə̀ wə̀ nì kàm mu kòʼ dzə̀ wày utam wiy. Tsə̀təndii tə we tiy zuw yə̀ yəə ù dzìy nəniy.

¹⁵Yəə ghu kwûm yə̂ nəniy a Yèlusalèm, Yesù ə nyi kwoʼ yə̀ a ndàw Kə̀zə̀, kaʼ tsə ani dzwùm fyi aghû yə̀ ghu kə zwe nəniy ufyiə wiy nə̀ à yuu ghu kə fyê sòʼò ufyiə wiy awote. U twùŋì khisəaʼi màʼà ndàŋ tə̀, aghê fyiə yə̀ ghu kə gaʼ na nəniy ufyiə u ghu wiy ate. U twùŋì khisəaʼi màʼà yə̀ sòʼò ndàŋ tə̀ aghê à kwunə ukhiy wiy kə də nəniy ate nə̀ tə aghû yə̀ ghu kə fyiə nəniy ubwubwumə wiy.

¹⁶U twe na tsə, nə̀ wù lìy kə boʼò tsìy dzə̀ nə̀ ufyiə wiy awote a ndàw Kə̀zə̀.

¹⁷U dyaŋi tyi dè yə̀ â ghu nə̀, “I twâ dòʼò anə ŋwàʼà k-a-zə̀ nə̀ Zə̀kìy kə dzày tsə nə, ‘Ndaw yam də loʼo kə̀ gwuŋə kiy awò àghě nàʼà tə̀dzə̀m.’ Ghà kwuni nîy na tsə nə̀ à də̀ loʼo kə aghê tsoŋə nê dyoʼò nəniy ate!”

¹⁸Abù ŋgəd tə aghè àlwaʼa yiy nə̀ àghè tyi dee ulàŋ yìy zuw tsə nəniy ayiə yə Yesù zəŋə nəniy, ghu kaʼ ani kaw dzəd ani wiy màʼà we. Ghu kwunə tsəŋə ŋwaâ kə, aŋwòə adzwə kə zwumə ndə̀mə̀ àghù anə yiə ù kə tyi dê nəniy ayiə yiy ate.

¹⁹Abù nə̀ inyinkwùbì tìy bû nəniy, Yesù ə ŋwò fyi yə̀ anə inaʼ i ghè yə̀ nə̀ tsə̀təndii tə we tiy.

²⁰Abù nə̀ bələ̀bə̀lə̀ tìy, yəə ghu zè dzwəŋə nəniy, ghu zù kòʼ yə̀ nə̀ kâʼ fə fîk fə̀ mə zwum tswi kwùm anə aghàŋə.

²¹Pità ə dyaŋi tàmyìŋì bə̀ ayiə yə a fyi nəniy, u dzày yə̀ awò Yesù a we nə, “A àtyi dè! Kâʼ fə fîk fə̀ wò kə̀ tiə na nəniy fə mə zwum.”

²²Yesù ə bə̀lì kə we nə, “Kəli tsə ibɛmə yiy awò Zə̀kìy.”

²³Mə ndzəmə̀ dzìy bə̀ ŋwò â ghà nə̀ àyiə àsoŋə̀ yìy nə̀ abu wù dzày yə̂ awò ùkàʼ wə̀ nə̀ ŋwòə nyi tswi yə̀ fiiy anə dzwî ìnè nè yìy, nə̀ wù kə̀ dwâm sə̂m kê anə fôŋ, nə̀ wù kwu anə fôŋ ə̀ we idzə̀m nə̀ ayiə yə ghe dzîy fyiə bə̂, a kî fyiə ŋwò anə yiə yə ghe dzày nəniy, ayiə ghè yə̀ kì ndzə̀mə̀ fyiə ŋwò.

²⁴Mə dzîy bə̀ ŋwò â ghà nə̀ abu wò ŋwa kə kìə̀ kìy awò Zə̀kìy anə i gwùŋì, bɛmə kə nə̀ fòŋ yiə̀ idzə̀m nə̀ wò kì kəli ŋwò, Zə̀kìy kî zəŋə ŋwò nə̀ wò kəli.

²⁵Abu wò dziy gwuŋì, wò səsə kiy nîyzə̀ ə̀ yə̀ dzə̀ ayiə àbɛbə yə aghê liy zəŋi nəniy azoŋə̀ wò, tə̀ təli yiə̀ wə̀ ù də nəniy an-a-vələ kî nìyzə̀ sòʼò ayiə àbɛbə yə wò zəŋə nəniy. [9]

²⁷Yesù nə̀ tsə̀təndii tə we tiy ə zù fwuli a Yèlusalèm, anə yiə yə Yesù bwìy kyabə tsə̂ nəniy a ndàw Kə̀zə̀, ŋgəd tə aghè àlwaʼa tiy, nə̀ àghè tyi dê ulàŋ wìy, nə̀ ŋgəd tə inaʼ tiy, ghu zù bù a kə̀lə̀ we.

²⁸Ghu bəb yə̀ â Yesù a we nə, “Wò kwu daʼa kə̀ ghaa kiy ani zəŋi ndzòʼò àyiə yə? À nyə̀ ndìə̀ wô nə̀ daʼa kiy ani fàʼ àyiə yə ə?”

²⁹Yesù ə bə̀lì kə ghu nə, “Mə bəbə bə̀ kə gha nə̀ iyiə yiy imòʼ, abu ghà bəlì bə̂ dzə̂ miə, mə ki dzây bə̂ soʼò loʼo kə daʼa kam kiy ŋwô bə̂ nəniy ate ani fàʼ àyiə yə.

³⁰Ghà bəlì bə̂ mìə̀, Dzwan kə̂ daʼa kiy nîy bə̀ yə̀ ani nyə̀ mwi m-à-zə̀, à kə də awò Zə̀kìy, moo awò àghě mbyi yiy ə?”

³¹Ghu kaʼ yə̀ ani dzày anə iwè nə̀, “Ŋgà ni dzây yə̂ nə̀ìndiə? Abu ŋgà dzây tsə ‘Awò Zəkìy’, ù kî bəbə â ŋgàŋ nə̀, ‘À də̌ kìə̀ ghà kə də kə̀ bɛmə nəway awò Dzwan ə?’

³²Abu ŋgà kwuni dzây yə̂ nə̀, kə kə ŋwò bə̀ awò àghě mbyi yiy” (Ghu tsəŋ te sə yə̀ àghù, aŋwòə aghê kə kwu ŋwô nə̀ Dzwan kə də̌ wè ntwùm ə̀ Kə̀zə̀.)

³³Ghu ba dzày yə̀ a we nə, “Ghè kwu way.” Yesù ə dzày yə̀ a ghu nə, “Miə soʼo mə dzîy wày loʼo kə daʼa kam kiy ŋwô bə̂ ate ani fàʼ àyiə yə.”