Read Isu Mâk 13 Bible Online

Mâk 13 - Isu bible

Mâk 13

¹Abù Yesù ŋwò fyiə yə̂ a ndàw Kə̀zə̀, tsə̀ndii we imòʼ ə dzày tsə a we nə, “A àtyidè, kòʼo kə dzwàbə̀ dzwàb tə atay tə ghu biə nəniy ndàw ìsòŋə̀ yə̀ ate.”

²Yesù ə bə̀lì kə nə̀, “Ghà koʼò kə ŋwòə ndàw tə̀ soŋə̀ tə̀ ə̀? Tə kî byìlə̀ ŋwò. Itay imòʼ kî kàm kwùnì dòʼò dzə̀ wày azoŋə̀ àzə̀.”

³Abù Yesù zù dòʼò tsə anə ukàʼ u ŋkàʼ mə̀ ùtam u Olìf, lia dàŋə̀ bə̀ ndàw Kə̀zə̀, Pità, nə̀ Dzɛ̂m, nə̀ Dzwan, nə̀ Andùlù ə nyad bəb yə̀ a we nə,

⁴“Ayiə yə̀ nì fyiə zəŋi ə? Dzày bə̀ â ghə̀d. Anì dè tsə ndzòʼò tsəe kə̀ ghaa kiy nə̀ ayiə ghà yə̀ nyìə̀ dzǐy fyi ə?”

⁵Yesù ə bə̀lì kə ghu nə̀, “Ghà nîy tsə iyemì, kəə wù lìy nə̀ nɛbə gha.

⁶Ndə̀mə̀ àghè nî bè ŋwò anə izəd yam, ghu ni dziy nə̀, ‘Mə də Wù wə̀ Zə̀kìy sûw kyili na an-a-dòŋ,’ Ghu ni nɛb maʼà kyabi tsə ndə̀mə̀ aghù.

⁷Ghà nî zuw ayiə kwumə̀ yə̀ nə̀ tsam, kwùmə̀ yə̀ sòʼò nə̀ dəm kə tsam kiy, kəə ghǎ nì tsəŋə dzə̂. Ndzòʼo àyiə yə̀ nì kwu ani fyi dzə̀ isə â mbyi ani mày, a nî kwuni dè dzə̀ wày nə̀ mbyi mə mày.

⁸Naʼà tìy ni ŋwaa nə̀ nàʼà tə̀liy tiy, ùdòŋ u tənàʼà nə̀ sǔgôʼ tə ghu tiy ni ŋwaa nə̀ ùdòŋ u nàʼà tə̀liy tiy nə̀ sǔgôʼ tə ghu tiy. Mbvə̀dinstsə kiy ni səkìy, kə bəlì anə ndə̀m ə̀ tə̀lòʼo. Dzoŋ ni də soʼo. Ayiə yə̀ ni maŋ də utswə̂d u kaʼa bə̂ nəniy yəə à də̀ ifwabi yə wiyəŋi zuw tsə̂ nəniy isə abu ù dziy byi.

⁹Ghà nîy tsə iyemì. Ghu nî kwiy zè nə̀ ghà a kə̀lə̀ àghè à saʼa tə saʼ yiy, ghu ni bwad gha anə təkwə̀ a ndaw tə udzəŋə tə ghě Dzû. Ghu ni nîy bû ghà akə̀lə̀ àghè ə utuw anə tənàʼa, nə̀ ùdòŋ wìy bòʼ ìyiə yam, ghà ni naʼà ntwùm ìdzòŋə̀ yə̀ â ghu.

¹⁰Awò mbyi ani bù mày, à ni də nə̀ ghà mə nàʼà tsìy kpe ntwùm ìdzòŋə̀ yə̀ anə nàʼà tə̀dzə̀m.

¹¹Abu ghu kwi zû nə̀ wù lìy a ndàw ìsaʼà yìy, ikwu ù nì nia isə yiy nə̀ ghe kî sì dzìy yə̀ nə̀ìndiə. Zwàykə̀zwekiy ki nyə̀ bə̀ we nə̀ àyiə yə ù kwu nəniy ani dzày, abu soŋə fə ghè fə̀ kpe tsə. À kì kwuni dzìy dzə̀ wày gha ayiə te yiy.

¹²Aghê ni fyè fyiə awizə̂ nə̀ ghu zû wiy maʼà ghu, nə̀ təli ni fê fyi awa ghu nə̀ ghu zû wiy maʼà ghu, awa ni ŋwaa kwùnə nə̀ nə̀ təli ghu yiy, nə̀ nə̀ zəə ghu yiy ani wiy màʼà ghu.

¹³Aghê àdzə̀m ni dzwə nə̀ ghà bòʼ mìə̀. À mày kə wù wə̀ ù nì tyimə taw tsə anə ibɛmə iwe zù kwùm, Zə̀kìy ni bû bii fyi we.”

¹⁴Soŋə fiy nî bè ŋwò, ghà ni kôʼ Fyày fyày kə Wû ù də nəniy anə lòʼo kə ù də kwu way ani dòʼò ate. (Wù wə̀ ù tyoŋə nəniy ayiə yə, ù kwu ani zuw kəli tsə!) Aghû yə̀ àdzə̀m ghu muə nəniy a Dzùdiyà anə sòŋə fə ghè fə̀ ghu nî kwu ani tu kwoʼ yə̀ anə təkàʼà.

¹⁵Abu wù nì də kə anə tuw kə ndàw, ù kwu dzə̀ way ani nyàb fə̀ soŋə ani tswi zù nìy fyi kə̀fyiə a ndaw ani ŋwò nə̀ ghe kiy.

¹⁶Wù wə̀ ù də nəniy anə uswum, ù kwu dzə̀ way ani nyàb fə̀ soŋə dzìy ghe zê ndaw ani zù nìy sàŋ ə̀ we.

¹⁷Soŋə fə ghà fə̀ nì ŋge fyà ŋwò azòŋə àghù yə̀ ghu nî boŋ doʼò nəniy nə̀ à yu ghu nî kwu awa yiy anə awo.

¹⁸Ghà ki gwuŋə yə â Zə̀kìy nə̀ ntswə̀d mə̀ kə bû fyi dzə̀ anə mbùw ùfəb.

¹⁹À ni də soŋə fə ifii fə̀ bɛbə fiy. Ndzòʼò ìfii yə, à də̀ ifii yə aghê də kamə kôʼ kôʼ wokə Zə̀kìy kə zəŋi bə̂ mbyi. Aghê nî kàm kòʼ kòʼ fwuli way ndzòʼò ìfii i ghè yə̀.

²⁰Ani bu Mwe ə̀ mbyi də kə̀ zəŋi tsə nə̀ soŋə fə ghè fə̀ təb tsə, wè lìy nì dòʼò dzə̀ wày ùtaw. Zə̀kìy nî kwuni kyàʼà myàʼà tsə ŋwò soŋə fə ghà fə bòʼ àghè ə we yə ù sày na nəniy.

²¹Ani bu wù dzìy nəniy awò ghà nə̀, “Kòʼo, Kə̀litò wə̀ fəə, moo Kòʼo, Kə̀litò wìy fiy” kəə ghǎ nə̀ byemə

²²Mə ghî dzìy aŋwòə nə̀ nə̀ Kə̀litò àguw yiy nə̀ àghě ntwùm ə̀ Kə̀zə̀ àguw yiy nî bè ŋwò ghu ni zəŋə mali təyiə tiy, nə̀ ùtsəe wiy anə ndə̀m ani nɛb màʼà àghè, abu i bòʼò də̀ â ghu ani nɛb sòʼò àghù yə̀ Zə̀kìy sây na nəniy, ghu ki nɛb.

²³Ghà yemì tsə, Mə mə tswù na bə̀ gha anə ayiə àdzə̀m nə̀ soŋə fiy kamə kpe â ayiə yə ani fyi.

²⁴Ani bu soŋə fə̀ bɛbə fə ghè fə̀ nì tsìy ŋwô tsə, ləmkiy ni bvə̂ bə̂ anə inyi, ndzoŋ ni də kàmə̀ tu way.

²⁵Nsìibə̂d mìy ni bvə̂ fyi tswi bə̂ idoŋ, ufyiə u kə daʼa wə u də nəniy idoŋ, u ni soŋ ŋwô tsə anə lòʼo tə u kə də tsə nəniy ate.

²⁶Aghê ni dyaŋi kôʼ Wà Wù ù bè nəniy anə təmbàʼ nə̀ daʼa kə̀ soŋə̀ kìy, nə̀ ìmwày ìsòŋə̀ yìy.

²⁷Ù nî dyaŋi twum fyi yə̀ tsə̀təndii t-a-zə̀ anə ubə̀d u mbyi udzə̀m. Tə̀ ghu nîy bə̂ àghù yə̀ Zə̀kìy sây na nəniy anə naʼà tə̀dzə̀m fə an-a-mbvə̀dintsə.

²⁸Ghà zwiʼi kəli kə iyiə anə kàʼ fə fîk. Abu, ùŋkwè u we wiy kaʼ tsə nəniy ani zùw, fəbə̀ tìy kaʼ tsə nəniy ani fyi ate, ghǎ kəli tsə nə̀ iwe yiy nyiə dziy tswi fən.

²⁹À də̀ sòʼò ighəd, ani bu ghà kòʼ nəniy ayiə yə̀ fyiə, ghà ni kəli tsə nə̀ soŋə fə ghè fə̀ mə swəd â Wà Wù ani bù.

³⁰Mə ndzəmə̀ dzìy bə̀ ŋwò â ghà nə̀ aghû yə̀ ghu muə nəniy nyiə ghu nî pfə myà dzə̀ wày nə̀ ayiə yə̀ kamə fyi nəway.

³¹Kəbyiwuŋ nə̀ mbvə̀dintsə kiy nî mìy ŋwò, dzə̀ yam nî kwuni mày kòʼ wày.

³²Wù lìy kwu dzə̀ way ntsuk fə ghè fə̀ moo soŋə fə ghè fə̀ Wà Kə̀zə̀ nì bè nəniy ate. Tsə̀təndii t-a-zə̀ tìy kwu dyaŋi way, moo Wà ù ghè wə̀ nə̀ ùwee u we wiy, à bvami kwu kə Təli soŋə fə ghè fə̀.

³³Ghà nîy tsə iyemì, ghà byay na tsə iwe nəli, aŋwòə ghà kwu dzə̀ way soŋə fə ayiə yə̀ nì fyiə ate.

³⁴I də yəə wù nì ŋwò fyiə tsə a ndàw we anə kə̀mə̀ fə fəsòŋə, nàʼà na tsə nə̀ aghee kə̀fàʼ a we ki lia tsə ufyiə udzə̀m. Dzày na yə̀ fyiə kə wù ùmoʼ umòʼ kwu ani zəŋə, dzày na tsə nə̀ wù ù kyiŋə̀ wìy ki toʼo lia kə asə ə.

³⁵Yəə i də nəniy ghii, byay na tsə nənìy iwe nəli yiy, aŋwòə ghà kwu way soŋə fə mwe ə̀ ndaw kî dzwəŋə bə̂ ate. Ù də̌ ani bù nə̀ nyinkubì tìy, moo nə̀ fòŋə̀ ntsukə, moo nə̀ ùmwaʼ ù twuŋə wiy, moo nə̀ tsuk ù zwe wiy.

³⁶Abu ù màŋ bvùŋì bù nəniy, kəə ù nì bè kòʼo nə̀ ghà bvənə tsə̀ ŋwò.

³⁷Ayiə yə mə dzîy awò ghà, mə dzîy â ghè adzə̀m. Ghà byay na tsə nənìy iwee yiy.