Read Isu Mâk 16 Bible Online

Mâk 16 - Isu bible

Mâk 16

¹Abù utsuk ù zwaa wiy tsîy tsə nəniy, Mə̀li wə ù kə ŋwô bə̂ nəniy a Magdalà, nə̀ Mə̀li zə̂ Dzɛ̂m, nə̀ Sàlumè, ghu zwe kə ufyiə ùlymə wiy ani zù kyili anə ivə̀n i Yesù.

²A ntsuk fə səsə fiy anə ivən, ghu bəd ŋwò zù anə isày i Yesù nə̀ ìnyi yiy nyiə̀ fyiə kwoʼo bə̀ ŋwò.

³Abù Iyəŋi yə̀ zè nəniy anə dzəd, ghu bəbə anə iwè ighu nə̀, “À kì sì byiŋə ŋwò tsə ndìə̀ itay yə anə idzwə isày ə?”

⁴Abù ghu kâm fwə̀d yə̂ nəniy, ghu kòʼ yə̀ nə̀ ghu mə byiŋi ŋwò faŋkwoʼ kə itay kə ghà kə̀.

⁵Abù ghu tsîy nyi kwoʼ yə̂ awo anə isày, ghu kòʼ Wà fə̀ghàŋ, ù də nəniy anə ukwe ùnyiə wiy, nə̀ sàŋ ì fəmə̀ yìy anə uwè. Ghu tàtsəŋ.

⁶Wà fə̀ghàŋ wə̀ mee a ghu nə, “Ghà kə tsəŋ dzə̀, mə kwu ŋwô nə̀ ghà khu bə̀ Yesù wè ìnaʼ i Nazalèt wə̀ ghu kə baa nəniy anə kàʼ fə təzəd. Ù kàm wày dzə fəə ù mə zɛ̀mə̀ ŋwò dzwoŋi! Kòʼo yə̀ nənìy, à kìy də̀ loʼo kə ghu kə nəŋì na nyi yə we ate.

⁷Zù nənìy, ghà zû dzây yə̂ awò tsə̀təndii tə we tiy.” Ba dzay yə̀ â Pità, a ghu nə, “Yesù mə ŋwò yə̀ isə, ù zè anə inaʼ i Galìlî. Ghà kî kòʼò kə we awote, anə yiə yə ù kə tɛb na â ghà.”

⁸Iyəŋi yə ŋwò fyi yə̀ anə isày yə̀ nə̀ ghu nyəŋə ŋwò, ghu tsəŋə təŋə nə̀ fôŋ tìy mə ghu fyi. Ghu ə kə̀ dzây ìyiə ìliy yiy â wù lìy wìy aŋwòə ghu kə ndzə̀mə̀ ŋge tsəŋə sòʼo ŋwò.

⁹Abù Yesù zɛmə̀ dzwoŋi bə̂ anə ipfə nə̀ bələ̀bə̀lə̀ tìy a ntsuk fə səsə fiy anə ivən, u zù dè yə̀ uwe isə â Mə̀li wə u kə ŋwô bə̂ anə inaʼ i Magdalà, Yesù kə dzwûm fyi nəniy nsìy mə̀bɛbə̀ mìy ìnsèmbe azoŋə̀ we.

¹⁰Mə̀li zù dzày yə̀ awò àghù yə̀ ghu kə də tsə nəniy nə̀ Yesù. A də̌ nə̀ ghu namə mwe ŋwò, dìy sòʼò.

¹¹Abù ghu zuw tsə nə̀ Yesù də̌ ùtaw wìy nə̀ Mə̀li mə̂ we kôʼ, ghu kə̀ ndwâm bɛmə nəway.

¹²Yesù ə kàm dè sòʼò uwe anə dzə̀d ìlìy yìy â tsə̀təndii tə we tə̀liy tiy ìbè, nə̀ ghu ŋwô fyiə yə̀ anə inaʼ.

¹³Ghu ŋwò dzwoŋi bə̀ bù dzày bə̀ â àghè liy yə. Ghu ə kə̀ nam bɛmə dzə̂ soʼò.

¹⁴Yesù ə kàm bù dè uwe â tsə̀təndii tə we ìvəm nə̀ tsə̀ndii imòʼ nə̀ ghu nyiə ŋwò. U kwà ghu aŋwòə ghu kə kwu way ibɛmə yiy nə̀ yiə yə ghu kə twe myaʼà təŋə dzə̂ tə aghù yə̀ ghu kə kôʼ nəniy we nə̀ ù mə zɛ̀mə̀ dzwoŋi ani pfə.

¹⁵U dzày yə̀ a ghu nə, “Ghà zû anə mbyi idzə̀m, ghà naʼà yə̂ ntwùm ìdzòŋə̀ yə̀ awò àghè àdzə̀m.

¹⁶Wù wə̀ ù bɛmə dzə̂ nəniy â mìə̀, nìy sòʼò mwi m-à-zə̀, Zə̀kìy ki bii fyi we. Wù wə̀ ù də kə̀ kwuni bɛmə, Zə̀kìy kî saʼa wiy ŋwòə we.

¹⁷Aghû yə̀ ghu bɛmə nəniy â mìə̀, ghu ki də ani zəŋi mali tə yiə. Ghu ki dzwûm fyi nsìy mə̀bɛbə̀ mìy anə izəd yam, ghu dzəŋì soʼò dzə̀ŋì tə̀ fyiə tiy.

¹⁸Abu ghu kumi kə zwə tiy anə awo, moo ghu nyi kə nɛb, ì kì wày ani zəŋi dzə̀ ghu nə̀ ìyiə ìliy yiy. Ghu ki gaʼa yəə awo ghu yiy azoŋə̀ àghè àdzaŋə yiy, ghu si taw.”

¹⁹Abù Mwe ə̀ Mbyi Yesù dzə̀ŋì mà tsə nə̀ ghu, Zə̀kìy ə zəŋi tsə u ŋwò kwoʼ kə idoŋ. U zù dòʼò tsə anə ukwe u Kəzə̀ ù nyiə wiy.

²⁰Tsə̀təndii tə̀ ŋwò fyì zù nàʼà yə̀ ŋwo ntwùm ə̀ ìdzòŋə̀ yə̀ loʼo tədzə̀m. Mwe ə̀ Mbyi ə də̌ nə̀ ghu, u nyə̀ ghu nə̀ daʼa kiy nə̀ ghu fâʼ mali tə yiə ani dè tsə nə̀ ntwùm ə̀ ghu kə də ìsòŋə̀ yìy.

²¹[13] Iyəŋə yə̀ zù akə̀lə̀ Pità nə̀ àfələ we yiy, zù dzày ayiə yə àdzə̀m ghu kə dzây â ghu

²²Abù ayiə yə̀ fyi tsîy dzə̂, Yesù nə̀ uwee u we wiy twum fyi yə̀ tsə̀təndii tə we anə mbyi idzə̀m nə̀ ghu naʼa yə̂ ntwùm ìdzòŋə̀ yìy. Ntwùm ìdzòŋə̀ yə̀ zwe ŋwò, kwunə sòʼò wày. À də̌ ntwùm ə̀ ìdzòŋì kwùmə̀ yə̀ nə̀ ìmùə̀ yə̀ i doʼò təŋ nəniy.