Read Isu Mâk 5 Bible Online

Mâk 5 - Isu bible

Mâk 5

¹Yesù ə dàŋ fyi yə̀ ìŋwù i Galìlî nə̀ tsə̀təndii tə we tiy, ghu zù a mbwòʼ ə̀ Gèlasà.

²Anə yiə yə Yesù fyi tsə anə kəmfə̀n, wù lìy wìy dyaŋi ŋwò bə̀ anə adzwə təsày, kway bə̀ we. Wù ghè wə̀ kə kwu usîy ùbɛbə wiy anə uwè.

³Ù kə mùə̀ təŋ tsə̀ anə adzwə təsày. Wù lìy kə wày yiə ù ni kwi kwû na tsə we. Ghu kə bwòʼò wày dyaŋi dzə ani kwi kwù na tsə dzə̀ we anə təntsaʼ,

⁴Aŋwòə ghu kə kwè nia tsə ikwe i we nə̀ ifwe iwe yiy anə ndə̀mə̀ nsòŋə, u tyilə myàʼà ntsaʼ tə ghà tə̀, dyè kyemə myàʼà yə̀ sòʼò ufyiə ù tsəə wə anə ifwe i we a mbvə̀dintsə, wù lìy kə kwu dzə̀ way daʼa kiy yiə ù ni kwi tsə we ù kwù tsə.

⁵U bwìy dyòʼò tsə̀ anə adzwə təsày nə̀ anə tədoŋə nə̀ ntsukə nə̀ ntsə̀, bwoʼo tsə̀ mə̀mbòŋ, kyàʼà tsə̀ ùwe anə atay.

⁶Abù ù kòʼ yə̂ Yesù nàdiikiy, u nyəŋ zù nyaʼa tswi tsə anə sə kə we.

⁷U bwoʼ fyi kə kəbôŋ nə̀, “A Yesù, Wà Zə̀ kə̀ kə tsîy fyi ufyiə udzə̀m, mə kwu iyiə ì ghaa yiy nə̀ wò ə? Kə̀lə̀ â wò, anə izəd i Kəzə̀ kə̀ nyiə̀ dzə̀ miə nə̀ mfəm.”

⁸Ù kə yî dzày aŋwòə Yesù kə dzày tsə nə̀, “Nsìy mə̀bɛbə̀ mə̀, ŋwòə fyi azòŋə̀ we.”

⁹Yesù ə bəb yə̀ a we nə, “Izəd yə̂ yìy tyoŋə nə̀ à də̌ ndiə ə?” U bə̀lì kə nə̀ “Izəd yam yiy tyoŋə nə̀ à də̌ ndə̀m, aŋwòə ghè dûw ŋwò.”

¹⁰U kaʼ tsə ani bwoʼ Yesù nə̀ wokiy nə̀ Yesù kə dzwûm ŋwò fyi dzə̀ nsìy mə̀bɛbə̀ mə̀ ghè mə̀ anə mbwòʼ i ghè yə̀.

¹¹Saʼ kə umfə̀libyiə kiy kə kwùli də̀ awote anə ŋgìàŋì fə udoŋ u kə nyiə nəniy.

¹²U bwoʼ yə̀ Yesù nə̀ wokiy nə̀, “Twum yə̀ ghəd anə saʼ kə ùmfə̀libyiə kə tə̀ ghè nyi yə̂ azoŋə ghu.”

¹³Yesù ə bɛmə kə nə̀ ghu nyi yə̂. Nsìy mə̀bɛbə̀ mə̀ ə dyaŋi fyi ŋwò bə̀ azoŋə wù wə̀ zù nyi yə̀ azoŋə̀ ùmfə̀libyiə wə. Ùmfə̀libiə wə ŋwò nyəŋ tswi dyaŋi yə̀ ùdoŋ u ghè wə̀, zù bvwə̀ nyi tswi yə̀ anə mbə̀lì kə iŋwù, mwu pfə yə̀ mwi awote. Saʼ kə umfə̀libyiə kə ghà kə̀ kə də̀ yəə à də̀ təkam ibè.

¹⁴Aghû yə̀ ghu kə yemə̀ nəniy anə umfə̀libyiə wə ə dyaŋi nyəŋ zù dzày yə̀ â àghù yiy anə inaʼ, zù dzày dyaŋi yə̀ anə iswum. Aghee dyaŋi tə̀ŋì fyi bə̀ ani bù kòʼ ayiə yə a kə fyi nəniy.

¹⁵Yəə ghu bû nəniy akə̀lə̀ Yesù, ghu ə bù kòʼ bə̀ wù ghè wə̀ saʼ kə nsìy mə̀bɛbə̀ mìy kə də nəniy azòŋə̀ we. U kə də̀ awote nə̀ ù mə dzə̀ŋì kəli ndzwu tə we tiy anə uwè nə̀ tuw kə we kiy kpe dzwàbə̀ ŋwò, nə̀ ùtwab u we wiy mə bù dzwoŋi, aghû yə̀ ə tsəŋ.

¹⁶Aghû yə̀ ghu kə kôʼ ayiə ghè yə̀, ghu zù dzày yə̀ àyiə ghà yə̀ awò àghè liy yiy, ayiə yə a fyi nəniy nə̀ wù wə̀ ù kə kwu nsìy mə̀bɛbə̀ mə, nə̀ ayiə yə a fyi nəniy nə̀ ùmfə̀libyiə wiy.

¹⁷Aghû yə̀ ə kaʼ yə̀ ani bwoʼ Yesù nə̀ wokiy nə̀ ù ŋwò fyi anə Tsə kəə ghu.

¹⁸Abù Yesù nyi kwoʼ kə anə kəmfə̀n wù wə̀ nsìy mə̀bɛbə̀ mə̀ kə ŋwô fyi tsə azoŋə̀ we, u bwoʼ yə̀ Yesù nə̀ wokiy ani dzwùmì yə̀ we.

¹⁹Yesù ə twe yə̀ â we. U kwuni dzày yə̀ â we nə̀ “Zùu dzwoŋi a kə̀lə̀ à ghu yə̂, wò dzây yə̂ â ghu ayiə yə Mwe ə̀ Mbyi zəŋi â wò, yəə ù kwoʼ nə̀ mulikiy azoŋə̀ wò.”

²⁰Wù ù ghè wə̀ ə ŋwò yə̀ nàʼà tsìy kpe tsə ayiə yə Yesù zəŋi â we anə tə nàʼà ivəm, Aghê àdzə̀m ghu kə zuw ayiə yə ù dzày nəniy, adzwə zwum ghu.

²¹Abù Yesù nyi kə anə kəmfə̀n kàm dàŋ fyi fəli yə̀ a bə̀d kə iŋwù kə̀liy kə, ŋwaâ kə àghù kə lwe bə̀ dzɛ̀mì na kə we anə iŋgwùŋə iŋwù.

²²Wù kə̀tuw ùlìy wìy awote a ndaw dzəŋə kə ghě Dzû, izəd i we i kə də nə̀ à də̀ Dzalùs ə zù bù awo. Yəə ù kòʼ yə̂ nəniy Yesù u zù nyaʼa yə̀ a təŋə̀ we

²³Bwoʼ we nə̀ wokiy ghii, dzìy tsə nə̀, “Wa nam ùyəŋi dzaŋə̀ ŋwò, ù də̀ anə ayiə à pfə yiy. Kə̀lə̀ â wò, bu gaʼ tsə wo kiə̀ kìy azoŋə̀ we tə̀ ù taw kə, ù si muə.”

²⁴Yəsù ə ŋwò fwumi yə̀ nə̀ we. Ndə̀mə̀ aghù ə ŋwò kwò yə̀ a dzə̀mə we, gwòʼò yə̀ iwee azoŋə̀ we.

²⁵Wìyəŋi ùlìy wìy ə də̀ anə ŋwàâ kə̀ nə̀ ù kə tsə̀ŋə̀ fyiə tsə̀ kə ŋwò anə təŋə̀mə̀ ìvəm nə̀ ghe tiy ìbè.

²⁶A də nə̀ ù mə bwìy tsə ndaw tə məntyiə tiy anə ndə̀m, sə̀àŋì tsə ukhiy we udzə̀m, u kyilə way ibvay yiy, idzâŋ iwe yiy fə̀dlə̀ dùw fyiə yə̀.

²⁷A də̌ nə̀ ù maa zuw ayiə kwùmə̀ yə̀ nə̀ Yesù. U ŋwò yə̀ kə anə uzəə u ndə̀mə̀ àghù yə̀, bwòʼ tsìy nyi yə̀ uzə u ghu adzəmə̀ Yesù, zù mwàm tsə we anə təndzwu.

²⁸Aŋwòə u kə dzày tsə anə foŋə̀ we nə̀ “Abu mə də̀ ani mwàm tsə kə we anə təndzwu, mə kî taw ŋwò.”

²⁹Anə yiə yə ù dyaŋi mwâm tsə nəniy Yesù anə təndzwu, ifyi yə u kə fyiə nəniy, i dyaŋi mày yə̀. U mwàm kòʼ tsə uwe u we kòʼ tsə nə̀ ghe mə taw anə utswə̀d uwe.

³⁰Yesù ə dyaŋi kəli tsə nə̀ daʼa kiy mə fyi ŋwò azòŋə̀ ìghe. U dyaŋi kyèmì tsìy bə̀ bəb tsə â ŋwàâ kə aghù kə̀ nə̀, “À ndzwu tam tiy mwâm ndìə̀?”

³¹Tsə̀təndii tə Yesù tìy ə dzày yə̀ a we nə̀ “Wò mbaŋə kòʼò àghù ghu gwoʼò tsə̂ ìwe yiy azoŋə̀ wò, wò kàmə̀ bəbə nə̀ à mìə̀ mwâm ndìə̀?”

³²Yesù ə kwuni kyèmì tsìy bə̀, lia kyabə tsə̀ kə ŋwò ani kòʼ wù wə̀ ù mwàm nəniy we.

³³Wìyəŋi wə̀ kə kwuni kwu ŋwò fyiə kə̀ kə kə fyi azòŋə we. U bù nyaʼa tsə a təŋə̀ Yesù, mwaʼa təŋə ghi awò itsəŋ yiy, dzày yə̀ àyiə àsoŋə̀ yə̀ ù zəŋi nəniy â Yesù.

³⁴Yesù ə dzày yə̀ awò wìyəŋi wə nə̀, “A wa nam, ibɛmə yiə̀ yìy mə zəŋi nə̀ wò taw. Zu ŋwò anə ibvay, fəm kiə̀ kìy mə mày.”

³⁵Abù Yesù namə dzəŋə̀ nəniy, aghee àliy yiy ŋwò bə̀ a ndàw wù kə̀tuw wə ghu tyoŋə nə̀ à də̀ Dzalùs, ghu dzày yə̀ â we nə̀ “Wa niə̀ ùyəŋi wə̀, mə pfə! Wò kàmə fyimi àtyi dè iyîkìə̀”

³⁶Yesù kə kə̀ na dzə̂ ìsə yiy anə ayiə yə ghu dzîy nəniy. Yesù ə kwuni dzày yə̀ awò Dzalùs a we nə̀, “Kə̀ tsəŋ dzə̀, kəli tsə ibɛmə yiy!”

³⁷Yesù ə twe nə̀ wù lìy kə dzwùmì dzə̀ ighe à mày kə Pità nə̀ Dzɛ̂m, we nə̀ àzə̀, ghu kə tyoŋə nə̀ à də̌ Dzwan.

³⁸Abù ghu bû kwùm tsə a ndàw Dzalùs, Yesù ə kòʼ yə̀ aghù yə̀ awo ghu dîy nəniy, bvoʼə mə̀mbòŋ.

³⁹Yesù ə dyaŋi nyi kwoʼ yə̀, zù bəb tsə a ghu nə, “À də̌ kìə̀ ghà dîy nəniy? Wa nə̀ kamə kə̀ pfə dzə̂, ù màŋə̀ bvunə ŋwò.”

⁴⁰Ghu fə̀d kaʼ yə̀ ani tsoʼ we. U dzày yə̀ nə̀ aghê àdzə̀mə̀ fyi yə̂ a bee tə̀ à doʼò səə tsə kə ìghe nə̀ zə̂ wà, nə̀ tè wà, nə̀ tsə̀təndii tə ighe tiy ì ti. Ghu tsìy nyi yə̀ a lòʼo kə wà ùyəŋi wə̀ kə nəŋ nəniy ate.

⁴¹Yesù ə kwi tsə wa nə anə ukwe, dzày tsə a we nə, “Tàlìtà kûm,” i myiŋə̀ nəniy nə̀, “A yəŋi fə, mə dzîy nə̀ wò ŋwô kə idoŋ.”

⁴²Wà ù yəŋi ùghè wə̀ ə dyaŋi ŋwò kə idoŋ, bwìy tsìy kyabi yə̀. (Ù kə də̀ təŋəmə̀ ìvəm nə̀ ghe tiy ibè). Abù aghê kôʼ tsə ayiə yə a fyi nəniy, adzwə zwum này yə̀ ghu ate ghi.

⁴³Yesù ə sə̀ŋì fyi yə̀ kə̀tswuŋi â ghu nə̀ ikwu gha nì dzìy ayiə yə a fyi nəniy â wù lìy wìy. U dzày yə̀ sòʼò nə̀ ghu nyiə̀ yə̂ wà ùyəŋi wə nə̀ fyiə kə̀ nyiə kiy.