Read Isu Mâk 6 Bible Online

Mâk 6 - Isu bible

Mâk 6

¹Yesù ə ŋwò tsə awote zù anə inaʼ i we nə̀ tsə̀təndii tə we tiy.

²Abù utsuk ù zwaa wiy bû, u zù kaʼ tsə ani tyi dè ayiə a ndàw dzəŋə kə ghě Dzû, adzwə nge zwum ndə̀mə̀ àghù yə̀ ghu kə zuw nəniy ayiə we ù tyi dê nəniy, ghu kaʼ ani bəb nə̀, “Wù wə̀ ndzòʼò àyiə yə̀ nìy bə̀ yə̀? Ù ba nìy bə̀ yə̀ utwab u nê wìy nə̀ daʼa kiy, ù zəŋə bə̂ mali tə yiə tiy ə?

³À wə̀ wǎy kwàmə̀ ŋkàʼ wə̀ ə̀? À yù we gbaŋ də̌ wà Mə̀li yə? A we gbaŋ dəə àzə̀ nə̀ Dzɛ̂m nə̀ Yùsə̂f, nə̀ Dzudàs nə̀ Simùn yə? Awizə̂ ə we iyəŋi we gbaŋ mùə̀ sòʼò fəə nə̀ ŋgàŋ ə?” Fôŋ tiy fə̀d ŋə̀m yə̀ ghu azoŋə̀ we, ghu twe ani bɛmə kə ayiə we à dziiy yiy.

⁴Yesù mee a ghu nə, “Aghê nyiə̀ mə̀ŋkwiʼi loʼo tədzə̀m awò wè ntwùm ə̀ Kə̀zə̀, à mày kə anə inaʼ i we nə̀ tɛmə̀ tə we tiy, nə̀ ìsəd i ndaw i we yiy ghu də nyə̀ way we nə̀ ŋkwiʼi miy.”

⁵Ayiə yə zəŋi tsə nə̀ ù kə fâʼ dzə̀ mali kə iyiə kə̀liy kiy awote, a mày kə yiə yə ù kə gaʼ yə̂ àwo a zoŋə̀ səfə aghè àdzaŋə yiy zəŋi taw kə ghu.

⁶Ifəd yiy fyi we anə yiə yə aghee ghà yə̀ kə də kwu way ibɛmə yiy. Yesù ə ŋwò tsə awote bwìy yə̀ naʼà tə̀ naʼà, tyiə dè kyabə yə̀ ayiə awò aghè.

⁷U twoŋə dzəŋə na bə̀ tsə̀təndii tə we ivəm nə̀ ghe tiy ibè, u twumə myaŋə yə̀ ghu àbe abè, nyiə̀ tsə ghu nə̀ daʼa kiy ani dzwùm fyi nsìy mə̀bɛbə̀ mìy.

⁸U mee a ghu nə, “Wù də̀ ani nìy kə kə mbàŋ ì nyilə̀ yìy, ikwu wù nə̀ nîy dzə̂ fyiə kə̀liy kiy yəə à də̀ ufânyiə moo, kəwab, moo ukhiy.

⁹Ghà də ani dzə̀ŋì kə sòʼò tə̀gùw ikwu wù nì kwunə nîy gbaʼa kə ndzwu tə̀liy tiy.”

¹⁰U dzày tsə ghu nə, “Ndaw yə ghu ŋgwam na nəniy gha ate, mùə yə̀ nənìy a ndàw ì ghà yə̀ ani zù kwùm a ntsuk fə ghà dziy ŋwô fyi ate

¹¹Loʼo kə ghu də kə̀ ŋgwam na nəway gha ate, moo ani zwuli awò ghà, ghǎ, bwoʼ maʼà tsə bvwû kə̀ anə awù ghi ani dè tsə nə̀ ntiə kə kə bê nəniy kə dòʼò nə̀ ghu.”

¹²Ghu ŋwò zù kaʼ yə̀ kə ani nàʼà kyabi ntwùm ìdzòŋə̀ yìy dzìy nə̀, aghê kyemì ŋwô bə̂ anə bɛb tə ghu.

¹³Ghu dzwùm fyi ndə̀mə̀ nsìy mə̀bɛbə̀ mìy a zoŋə̀ àghù, ghu byaŋi kə aghû, kyili sòʼò mbvu mə̀ Olìf a zoŋə̀ ndə̀mə̀ aghè à dzaŋə, ghu taw kə.

¹⁴Ùzòŋ u izəd i Yesù wìy ə foŋ tsìy kpe yə̀ loʼo tədzə̀m, zù kwùm dyaŋi sòʼò anə tswùŋì kə kədòŋ. Izəd i we yiy kə də nə̀ à də̀ Helòd. Aghê àliy kə dzìy nə̀, “Yesù də̌ Dzwan wə ù nyə̀ nəniy mwi m-à-zə̀ mìy u zɛ̀mə̀ dzwoŋi bə̂ ani ipfə! À də̀ ighe ù kwu nəniy daʼa kiy ani fàʼ mali tə yiə.”

¹⁵Aghê àliy yiy dzìy nə̀ “Ù də̌ Èlaydzà, àliy yiy dzìy nə̀ ù də̌ wè ntwùm ə̀ Kə̀zə̀, yəə à də̀ aghee ntwùm ə̀ Kə̀zə̀ a səsə yə.”

¹⁶Abù Helòd zuw tsə, ù mee Dzwan wə mə kə gbû ŋwô tuw kə we kiy. Ù mə zɛ̀mə̀ dzwoŋi bə̀ ani ipfə!

¹⁷Helòd kə nìy kə Hèlodìàs, twoŋə wìy àzə̀ ə̀ we Filîp. A də̌ nə̀ Dzwan maa dzày a we nə̀, “I dzwabə̀ dzə̀ wày â wò ani nìy wìy a zə̀ yiə̀!” Abù Helòd liə nəniy ani zəŋi tsə tə̀ fòŋ ə̀ Hèlodìàs dzwàb tsə, u dzày nə̀ ghu kwi kwû tsə Dzwan ghu kwe yə̀ a ndaw ntsaʼ.

¹⁸

¹⁹À yù də̀ ighe Hèlodìàs kə kwu nəniy nyikəfiy azoŋə̀ Dzwan, u khu tsə̀ tə̀dzələ nə̀ ghu wiy màʼà we. U kwunə də̀mə̀ kè

²⁰Helòd kə kwu itsəŋ anə fôŋ, aŋwòə ù kə kwu ŋwô nə̀ Dzwan də̌ wù ù zwê wìy ù zəŋə nəniy ayiə tsitsi, u yèmə̀ kə azoŋə̀ we. Helòd ə liə yə̀ kə ani zwələ ayiə Dzwan à dziiy, anə yiə yə i kə boʼò fyimə kə we abu ù zwələ yə̂ nəniy.

²¹Hèlodìàs ə bù kəli kə kəbôʼ a ntsuk fə̀liy fiy, Helòd kə dyoʼo nəniy ntsuk fə we fə̀ byikə fiy, u nàm bə̀ ŋgəd tə inaʼ i we, nə̀ ŋgəd tə təsǔgôʼ tìy, nə̀ àghè soŋə̀ yə̀ a mbwòʼ ə̀ Galìlî.

²²Abù wà Hèlodìàs ùyəŋi bû fyi bən nəniy ibən iwe yiy, i nge dzwàb a sə̀ə̀ Hèlod nə̀ àghù yə̀ ù kə nâm bə̀ ghu. Helòd mee â wa we nə, “Dzay bə̀ fyiə kə mə dziy fîy wò ate.”

²³U tsə̀ŋ tɛb dyaŋi yə̀ sòʼò a we nə, “Abu wò dzày kə kìə̀ mə kî nyìə̀ ŋwò â wò, abu à də kə ani dzàw nyi yə̀ Tsə kam, mə kî dzù ŋwò.”

²⁴Wa nə fyi bəb yə̀ awò zə̂ a we nə, “Mə nə dzây yə̂ kìə̀?” Zə̂ ə bə̀lì kə a we nə, “Dzay yə̀ nə̀ wò liə tuw kə Dzwan wə ù nyìə̀ nəniy mwi m-à-zə̀ mìy.”

²⁵Wa nə dyaŋi swày nyi yə̀ ùwee akə̀lə̀ kə̀dòŋ, dzày yə̀ a we nə, “Mə liə nə̀ wò nyiə̀ bə̂ tuw kə Dzwan wə ù nyìə̀ nəniy mwi m-à-zə̀ mìy nyiə fəə anə kənəli.”

²⁶Iyiə yə ŋge fyimi yə̀ dòŋ kə̀ aghi anə fôŋ, ù kə kwuni wày dzə ani twe màʼà bòʼ nə̀ ù maa nyi bɛb ŋkà mìy anə səkə ghù.

²⁷Dòŋ kə̀ ə dyaŋi twum tsə wù u kyiŋə̀ wìy nə̀ ù zù a ndàw ntsaʼ, ù gbù bə̀ tuw kə Dzwan. Wù wə̀ ə zù a ndaw ntsaʼ gbwù kə tuw kə Dzwan.

²⁸Wù wə̀ ə kwe tsə tuw kə Dzwan anə kənəli, bù nyə̀ yə̀ â wa nə. Wa nə nìy nyə̀ ndùŋì yə̀ awò zə̂ ə̀ we.

²⁹Abù tsə̀təndii tə Dzwan tiy zuw tsə ghi, ghu zù nìy kə ivən i Dzwan zù kələ yə̀ anə isày.

³⁰Aghee ntwùm ə̀ Yesù ə dzwoŋi bə̀ a kə̀lə̀ Yesù, ghu dyaŋi dè bə̀ ayiə yə ghu kə fâʼ nəniy ate nə̀ àyiə yə ghu kə tyi de ayiə â ghù yìy.

³¹Abù yə ndə̀mə̀ aghè bee nəniy, Yesù nə̀ tsə̀təndii tə we tiy ghu tàʼà kə̀ kəli nəway soŋə fiy ani bòʼ nyi. Anə yiə yə i kə də ghi, Yesù ə dzày tsə a ghu nə, “Ŋgà zû doʼò yə̂ a lòʼo k-a-nù tə̀ ghà zwây tsə.”

³²Ghu ŋwò tsə an-a-mfə̀n nə̀ noŋə̀ ghu ani zù dòʼò yə̀ a lòʼò k-a-nù.

³³Yəə ndə̀mə̀ aghè kôʼ twab dzə ghi, ghu ŋwò yə̀ nə̀ ìnyəŋ yiy, tsìy zəaʼa yə̀ ndə̀mə̀ tə̀ nàʼà zù ləmə zìì yə̀ ghu a lòʼò kə ghà kə̀.

³⁴Abù Yesù fyiə tsə nəniy an-a-mfə̀n, u kòʼ yə̀ ŋwàâ kə ghu kə̀, mwuli kiy ŋge kwoʼ we azoŋə̀ ghu aŋwòə ghu kə də̀ yəə à də̀ ndzù tə̀ tə də kwu way wù ù baʼà wìy. Ù kaʼ yə̀ ani tyi dè ghu nə̀ ndə̀mə̀ tə yiə tiy.

³⁵Yəə inyi yiy nimə tswi yə̂ nəniy, tsə̀təndii tə we tiy mee a we nə̀ “Ŋgà fə̂ nam də̀ a mbvən, soŋə fiy mə ŋgee zù sòʼò.

³⁶Sàli màʼà aghù yə̀ àdzə̀m tə ghu nə̀ zê zwe nyiə fyiə kiy anə nàʼà tə̀ tə kwulì də̀ nəniy fə.”

³⁷Yesù mee a ghu nə “Ghà nyiə̀ ghu nə̀ ùfànyiə wiy” Ghu mee â Yesù nə̀ “U ŋwò bə̂ yə ə? Aŋwòə ukhiy wə ani zwe ufânyiə ate, tə̀ a nyiə̀ awò àghù yə̀, wù də ani fàʼ anə ndə̀mə̀ tə̀ ndzoŋə.”

³⁸Ù mee a ghu nə, “Zu kòʼò nənìy nə̀ à də̀ ghɛbə tə uba isə̀ki?” Abù ghu liay tsîy yə̂, ghu bù dzày bə̀ a we nə “À də̀ ghɛbə tə uba ità nə tsiy tiy ibe.”

³⁹Yesù mee a ghu nə “Gha byay na kyabi yə̂ àghè àdzə̀m tə̀ ghu bvuki dòʼò tsîy yə̂ ukaʼ ukaʼ anə uzù.”

⁴⁰Aghû yə̀ ə bvuki dòʼò yə̀ anə ukaʼ. Ukaʼ ùliy dòʼò yə̀ àghè mə̀mbwàm, ukaʼ ùliy wiy dòʼò yə̀ àghè mə̀vəm intà.

⁴¹Yesù ə nìy kə ghɛbə tə uba tə ìtà nə̀ tsi tə ìbè, liay kwoʼ kə anə kəvələ, nyə̀ yə̀ zòŋə̀ k-a-zə̀ byiʼi fyi yə̀ ghɛbə tə uba tə, nyə̀ tsìy yə̀ â tsə̀təndii tə we tiy, nə̀ ghu dzâw tsîy yə̂ awò àghè àdzə̀m. U nìy dzàw tsìy yə̀ sòʼò tsi tə ìbè â ghu, ghu bvami dzàw tsìy yə̀ sòʼò awò àghè àdzə̀m.

⁴²Aghê àdzə̀m ə nyi kwu dzwàb tsə ghu adzə̀m.

⁴³Tsə̀təndii tə Yesù tìy ə kwumi tsìy yə̀ mbòʼò mə̀mbà nə̀ tsi tiy, kwumi lwe tsə anə uŋkhìy ùvəm nə̀ ghe wiy ubè.

⁴⁴Ntàŋ ə̀ iŋə̀mə̀ yə̀ ghu kə nyi nəniy, ghu kə də̀ təkam ità.

⁴⁵Yesù ə dyaŋi dzày yə̀ awò tsə̀təndii tə we tiy nə̀ ghu nyi kə an-a-mfə̀n, tə̀ ghu zû isə anə inaʼ i Bètsaydà, u kwuni dòʼò səə tsə ibàm ani kòʼ tsə ayiə yə ŋwàâ kə̀ dziy salì yə̂ ate.

⁴⁶Abù ù sàlì màʼà tsə ŋwàâ kə̀, u ŋwò tsə awote, u kwoʼ yə̀ anə udoŋ ani zù gwùŋì.

⁴⁷Utsuk u dzəə bə̀, nə̀ mfə̀n kìy mə nyi kwùm anə fôŋ ə̀ ìŋwù, Yesù ə tiy kə anə iŋgwùŋə nə̀ noŋə we.

⁴⁸U kòʼ yə̀ ghu nə̀ ghu dəmə̀ nə̀ zoŋ anə fôŋ ə̀ ìŋwù, ani zù kwùm nə̀ ùmwaʼ ù twuŋə wiy, u ŋwò dwùmì yə̀ ghu nə̀ ù bwìy yə̀ anə tuw kə mwi anə dzwî.

⁴⁹Abù tsə̀təndii tə we tiy kôʼ yə̂ nəniy we yəə ù bè nəniy anə tuw kə mwi, ghu kaʼ kə ani bvəʼi məmbòŋ nə̀ ìtsəŋ yiy dzìy tsə nə, “A dəə àmbvə̂ntsə!”

⁵⁰Fôŋ tiy fyi ghu àdzə̀m anə yiə yə ghu kə kôʼ yə̂ nəniy we. U dzày yə̀ a ghu nə, “Kə̀ nə̀ tsəŋ dzə̀ à də̀ miə Yesù! Ghà kəli tsə kə tə̀fòŋ.”

⁵¹U nyi kwoʼ kə an-a-mfə̀n, zoŋ yə bwi dòʼò dyaŋi yə̀. Adzwə ŋge zwum tsə̀təndii tə we ate.

⁵²Ghu kə kə̀ boʼò zuw kəli ayiə u ghɛbə tə uba tə, aŋwòə ghu kə kwu ukwəli təfòŋ.

⁵³Yesù nə̀ tsə̀təndii tə we tiy ə dàŋ fyi yə̀ a ŋgwùŋə̀ ìnaʼ i Gènesalèt, ghu tə̀ŋì na tsə kəmfə̀n awote.

⁵⁴Yəə ghu fyi tswi mâ tsə an-a-mfə̀n, aghee dyaŋi kòʼ kəli tsə Yesù.

⁵⁵Ghu ə nyəŋ bòʼò kyabi bə̀ àghè dzaŋə anə mbwòʼ ì ghà yə̀ ìdzə̀m. Ghu ə bòʼò bə̀ anə umbuŋ, ghu zèè nə̀ ghu a lòʼo kə ghu zuw tsə nə̀ Yesù də awo.

⁵⁶Anə lòʼo tə tə̀dzə̀m Yesù kə zê nəniy yəə, anə nàʼà tə̀ sə̂ tìy, moo tə̀ nə̂ tìy, moo anə iswum, aghee ghà yə̀ ə bòʼò zè nə̀ àghè dzaŋə yiy akə̀lə̀ we, a lòʼo tə aghê kə ŋgee lwe dyoʼò ate. Bwoʼo we nə̀ wokiy nə̀ aghê à dzaŋə ki lyebə mwamə tsə we anə təndzwu ghu nə̀ taw kə nəniy. Aghê àdzə̀m ghu kə mwâm nəniy ndzwu tə we tiy ghu maa taw mà àdzə̀m.