Read Isu Mâk 8 Bible Online

Mâk 8 - Isu bible

Mâk 8

¹Anə ntsukə mə̀ ghà mə̀, ŋwàâ kə ghù kə̀liy kiy dzəŋə fəli bə̀. Ghu kə kwu way fyiə kə̀ nyiə kiy. Yesù ə twoŋə tsə tsə̀təndii tə we dzày yə̀ a ghu nə,

²“Mwuli kiy kwoʼə miə azoŋə̀ àghù yə̀, aŋwòə ghu mə dòʼò fəə nə̀ mìə̀ mə̀ntsukə inti. Ghu kâm kwu way fyiə kə̀ nyiə kiy nyiə.”

³Abu mə salì màʼà tsə ghu, ghu ki zû bvû bə̂ awò dzoŋ anə dzəd aŋwòə ndə̀mə̀ ghu ŋwô bə̀ anə dzə̀lə tə̀ dyiə̀ tìy.

⁴Tsə̀təndii tə bəb yə̀ awe nə, “A də ani kəli yiə ndə̀mə̀ ufânyiə wiy ani fyi aghû yə̀ ate ə, nə̀ ŋgà də fə ambvən ə̀ kə̀sisi ə?”

⁵Yesù ə bəb yə̀ aghu nə, “Ghà kwu ghɛbə tə uba i sə̀ki ə?” Ghu bə̀li kə we nə̀, “Tə də ìsèmbe.”

⁶U dzày yə̀ nə̀ ŋwàâ kə̀ doʼò tsîy yə̂ ambvə̀d. Abù ù nìy kə uba wə ù sèmbe, u nyə̀ tsə kəzòŋə̀ awò Zə̀kiy, u byiʼi tsə nyə̀ yə̀ awò tsə̀təndii tə we tiy nə̀ ghu dzâw nyiə̀ yə̂ awò àghè, ghu dzàw nyə̀ yə̀ sòʼò â ŋwàâ kə ghù kə̀.

⁷Ghu kə kwu sòʼo nyòŋə mə̀ tə̀ tsi, Yesù ə nyə̀ tsə sòʼò kə̀zòŋə̀ ate, nyə̀ yə̀ sòʼò â tsə̀təndii tə we tiy nə̀ ghu dzâw yə̂ awò aghè yə̀.

⁸Aghee ghà yə̀ ə nyi kwu tsə. Abù ghu nyi mâ kə nəniy, tsə̀təndii tə Yesù tìy ə nam byoŋi lwe tsə mbòʼò mə̀ uba anə ùŋkhìy ù sèmbe, ŋwàâ kə ghù kə̀ kə kwoʼ kwùm ŋwò kaam tiy kyàʼì. Abù ghu nyi kə, Yesù ə sàlì màʼà tsə ŋwàâ kə ghù kə̀,

¹⁰u dyaŋi nyi kə an-a-mfə̀n nə̀ tsə̀təndii tə we tiy ŋwò zù a mbwòʼ ə̀ Dàmanutà.

¹¹Aghee Falàsî yìy ə zù bù kaʼ ani bə̀d ayiə awò Yesù, khu dzəd ani bè kwiy we, dzìy nə̀ ù dè bə̀ kətsəe kə ŋwô bə̂ an-a-vələ.

¹²Yesù ŋwò də̀m zwày kə nə̀ ìsə̀ŋì, bəb tsə nə̀ “À də kìə̀ aghû yə̀ nyiə anə sòŋə fə̀ liə nə̀ mə dê bə̂ kə̀tsəe kə ŋwô bə̂ an-a-vələ ə? Ndzə̀m ndzə̀m, mə dê dzə̀ wày tsee kiy awò àghù yə̀!”

¹³U dyaŋi nasə tsə ghu, nyi kə an-a-mfə̀n dàŋ fiy yə̀ a ŋgwùŋ ìŋwù ìliy yìy.

¹⁴A də̌ nə̀ tsə̀təndii tə Yesù tìy mə zə̀ ani maŋ kə uba, ghu kə kwu kə ba kə̀mòʼ an-a-mfə̀n.

¹⁵Yesù kwà tsə ghu nə̀ “Ghà nîy tsə iyemì, yèmi tsə nənìy nə̀ mbùŋ ə̀ àghè ə̀ Falàsî yə̀ nə̀ mbùŋə̀ àghě Helòd yə̀.”

¹⁶Ghu ə kaʼ ani dzày anə iwè i ghu nə̀ “Ù ghî dzìy yəə ŋgà də kwu way bakiy.”

¹⁷Yesù ə kwu ayiə yə ghu kə dzîy nəniy, u bəb yə̀ a ghu nə, “Ghà dzîy nə̀ìndiə nə̀ ghǎ laʼà kə̀ba ə? Ghà kamə nam kəli moo zuw kəli soʼò ə̀? Ghà kwu ukwəli u təfòŋ ə̀?”

¹⁸Ghà mbaŋ kwu asə, ghà koʼò wày ə̀? Mbaŋ kwu utswuŋi, ghà zuw way ə̀? Ghà tsəmə mòʼò wày ə̀?

¹⁹“Ghà mə nìyzə̀ ayiə yə mə fyi aghê təkaam ità anə ghɛbə tə uba ità, ghà kə byoŋi lwe tsə mbòʼò mə̀ ùba anə ùŋkhìy ù sə̀ki?” Ghu bə̀lì kə nə̀ “Ùŋkhìy ùvəm nə̀ ùŋghìy wìy ùbè.”

²⁰U dzày fəli tsə nə̀, “Abù mə byiʼi tsə ghɛbə tə uba isèmbe, awò àghù yə̀ təkaam ikyàʼì, mbòʼò mə̀ ghà kə byoŋi lwe tsə uŋkhìy ù sə̀ki?” Ghu bə̀lì kə nə̀ “Ùŋkhìy ùsembe.”

²¹U bəb yə aghu nə “Ghà nam kamə kə̀ zuw kəli ə̀?”

²²Yesù nə̀ tsə̀təndii tə we tiy ə bù a Bètsaydà, aghê àliy yiy ə tàlì bù nə̀ wù ù fɛbə̀ wìy awote bwoʼ Yesù nə̀ wokiy nə̀ Yesù lyebi mwàm tsə kə we nə wokiy ani zəŋi tsə nə̀ ù taw kə.

²³Yesù kwi tsə wù ù fɛbə̀ wə̀ anə ukwe tàlì ŋwò fyi yə̀ nə̀ we anə inaʼ. U tsə yə̀ ntiə anə asə ə wù wə̀, mwàm tsə we nə̀ wokiy bəb yə̀ a we nə̀, “Wò kòʼò ŋwò fyiə kəlikiy ə̀?”

²⁴Wù ù fɛbə̀ wə̀ ə liay kwoʼ kə idoŋ dzày tsə nə, “Mə koʼò yə̀ aghù, ghu funə ŋkàʼ, ìn bwìy tsîy nəniy.”

²⁵Yesù ə mwàm fəli tsə asə we nə̀ wokiy, wù wə̀ ə kàm twòʼ zwumi tsə asə ə we, kaʼa ani kòʼ dzwàb ufyiə.

²⁶Yesù ə dzày nə̀ wù ù te wiy zû a ndaw we kwà yə̀ we nə̀ “Kəə wò nì zè dzwəŋə anə inaʼ i ghè yə̀.”

²⁷Yesù ŋwò tsə nə̀ tsə̀təndii tə we tiy zù a nàʼà mə̀ ì də nəniy a mbòʼò Kèseleya Filìpî. Abù ghu zê anə dzəd, Yesù ə bəb yə̀ awò tsə̀təndii tə we tiy nə̀, “Aghê dzîy nə̀ mə də ndiə?”

²⁸Ghu bə̀li kə we nə̀ “Aghê àliy yiy dzîy nə̀ wò də̌ Dzwan wə ù nyìə̀ nəniy mwi m-à-zə̀ mìy, aghê àliy yiy dzîy nə̀ wò də̌ Èlaydzà, àliy yiy dzîy sòʼò nə̀ wò də̌ wè ntwùm ə̀ Kə̀zə̀ ùwîy ùlìy wìy.”

²⁹Yesù ə bəb tsə aghu nə̀ “Akwuni bû ghà, ghà dzîy nə̀ mə də ndiə?” Pità ə bə̀li kə nə̀, “Wò də̌ Kə̀litò.”[6]

³⁰Yesù ə ke na yə̀ ghu nə̀ “Kəə ghǎ nì dzîy awò wù lìy wìy kumə̀ yə̀ wù wə̀ mə də nəniy we.”

³¹Yesù ə kaʼ tsə ani tyi dè ayiə awò tsə̀təndii tə we tiy nə̀ “Wà Wù kì kwu ani fii anə ndə̀mə̀ àyiə. Ŋgəd tə inaʼ nə̀ ŋgəd tə aghè àlwaʼa yiy, nə̀ àghè tyi dee ulàŋə̀ nî twe myìʼà sòʼò ŋwò ə we. Ghu ki wiy maʼà we. Abu ntsukə miy tsîy tsə nəniy ìnti ù nî zɛ̀mə̀ dzwoŋi bə̀ anə ipfə.”

³²U dzày te fyi bə̀ â ghu. Pità ə nìy kə we bwa təmi yə̀ nə̀ we, kaʼ ani kwà we.

³³Abù Yesù bàŋ liay yə tsə̀təndii tə we tiy, u kwà tsə Pità nə̀, “Ŋwò adzəmə̀ mìə̀, Satàn. Imôʼ yiə̀ yə̀ kə̀ ŋwô bə̂ dzə̂ awò Zə̀kìy, i ŋwô bə̀ awò wù mbyi.”

³⁴Yesù ə dyaŋi twoŋə bə̀ ŋwàâ kə ghù kə̀ nə̀ tsə̀təndii tə we tiy dzày yə̀ aghu nə, “Abu wù liə nəniy ani dzwùmì mìə̀, ù kwu ani twe màʼà tsə uwe u we, u bòʼò kə zəd tə fəkàʼ tə we ù dzwùmì bə̀ mìə̀.”

³⁵Aŋwòə wù wə̀ ù liə nəniy ani fày ŋwò fyi bə̀ imùə̀ i we, ù kì nìy myìʼà ŋwò. Wù wə̀ ù kì này màʼà nəniy imuə̀ i we yiy â mìə̀ nə̀ awò ntwùm ìdzòŋì, ù kì fày fyi imuə̀ i we.

³⁶Wò nyiə fyiə kə kiə abu wò kəli mâ kə ufyiə udzə̀m fə anə mbyi kwuni này màʼà kə imuə̀ yə̂ ə?

³⁷Fyiə kəliy kiy way dzə wò də ani nyə̀ ani zwe ŋwò dzwoŋi bə̀ imuə̀ yə̂ ate.

³⁸Abu wò də̀lə nə̀ tuw kiy bòʼ ayiə yam moo bòʼ àyiə yə mə tyi dê nəniy anə mbyi yə zii, aghê də kwu way Zə̀kìy, bɛbə sòʼò, Wà Wù kì də̀dlə̀ sòʼò ŋwò nə̀ tuw kiy azoŋə̀ wò abu ù dzwoŋi bə̂ nəniy anə ŋkwiʼi mə̀ tè we nə̀ tsə̀təndii t-a-zə̀ tə̀ zwe tiy.