Read Isu Lukâs 14 Bible Online

Lukâs 14 - Isu bible

Lukâs 14

¹A ntsuk ù zwaa ù liy, Yesù ə zù ani zù nyi a ndàw wè kə̀sə aghee Falàsî, aghê tsə̀ŋə̀ fwə̀dlə̀ kə we.

²Wù lìy wìy ə zù bù a kə̀lə̀ Yesù nə̀ ifwe i we yiy mə mwù dòʼò nə̀ ìkwe i we yiy.

³Yesù ə bəb yə̀ awò àghè àtyi dee ulàŋ wìy nə̀ aghee Falàsî yìy a ghu nə, “Lâŋ kìy bɛmə ŋwô nə̀ a zəŋi taw wù a tsuk ù zwaa wiy, moo kə kə̀ bɛmə?”

⁴Ghu kə̀ bəlì nəway we. Yesù ə zəŋi taw kə wù wə̀, dzày yə̀ nə̀ ù zù ŋwò.

⁵U bəb yə̀ a ghu nə̀, “A də ndiə anə uzəə ghi ù də way ani fàʼ a ntsuk fə̀ zwaa fiy, abu wà niə̀, moo mbòŋ yə̂ bvə̂ nyi tsə nəniy an-a-fà. Wò kì nyəŋə zè sè ŋwò fyiə kwoʼə kə ŋwò ə?”

⁶Ghu kə kə̀ nam kâm kəli iyiə ì liy ani dzày â we.

⁷Yesù ə kòʼ yə̀ àghù ghu khu kyabə tsə̂ ùkwe ù soŋə̀ wìy ani dòʼò ate anə lòʼo k-a-dzəŋə, u dzày yə̀ fə̀zə̀zə̌ awò àghè dzə̀m nə̀,

⁸“Abu wù lìy nàm tsə gha anə lòʼo k-a-dzəŋə, ikhu gha nə̀ sî yə̂ dzə̂ ukwe ù soŋə̀ wìy ani dòʼò ate. Nyî liy à ki də nə̀ ù mə nàm sòʼo wù lìy ù tsìy fyi nəniy wô.

⁹Wù wə̀ ù nàm bə̂ nəniy gha ù də̀ ani bù dzày tsə â wò nə̀, ŋwô kə fə wù ù soŋə̀ wə̀ dòʼò tsə, tuw kə̀ dədlə kiy ki də â wò, wò kî kàm ŋwò kə wò doʼò yə̂ anə kwe kə̀ sə̂ kìy.

¹⁰I ba dzwàbə̀ abu ghu nâm bə̂ nəniy wô, wò zù dòʼò tsə anə kwe kə̀ sə̂ kìy, tə̀ wù wò ù nàm bə̂ nəniy wô ù də ani dzày bə̀ â wô nə̀ ŋwòə kə wò zû doʼò anə kwe kə̀ soŋə̀ kìy a fwu wam. Ì yû kì zəŋə nə̀ wò kəli məŋkwiʼi anə fwumi kə aghè dzə̀m.

¹¹Aghû yə̀ adzə̀m ghu kwoʼo nəniy iwe yiy Zə̀kìy kî nìy tswi tsə ŋwò ghu, a kwuni bû à yu ghu nîy tswi tsə iwe i ghu yiy, Zə̀kìy kî nìy kwoʼo kə ŋwòə ghu.”

¹²Yesù ə dzày yə̀ awò wù wə̀ ù nàm bə̂ nəniy aghû yìy a we nə, “Abu wò dziy nâm àghù anə inyi, ikhu dzə wò nə̀ dziy nâm àfwu yiə̀, nə̀ àwizwə̂ yiə̀ yìy, nə̀ tɛ̀mə̀ tyiə̀ tìy, moo aghê à kumə yə wò kwu nəniy. Aŋwòə ghu kî nàmə̀ dzwəŋə bə̀ wò, ì yû ki də ani tsə dzwoŋi bə̀ wò anə yiə yə wò kə zəŋi nə̀ ghu.

¹³Abu wò kwu nəniy inyi yiy, kwuni nàmə tsə aghê à la yiy, nə̀ aghee uŋkyoŋi, nə̀ àghù yə̀ ghu pfə doʼò bə̂dkə̀bə̂d, nə̀ àghè à fɛbə.

¹⁴Tə̀ Zə̀kìy ki lwî wò, aŋwòə ndzòʼò àghù yə̀ wày dzə ani tsə dzwoŋi dzə̀ wò. Zə̀kìy ni tsə wô abu ù nì tsəə nəniy aghû yə̀ ghu də tsitsi, abu aghê nî zɛ̀mə̀ kə.”

¹⁵Abù wù lìy wìy ù kə də awo nyiə sòʼò, u dzày yə̀ â Yesù nə̀, “Dwiʼi kiy də awò àghù yə̀ ghu nî zè dyòʼo a loʼo kə inyi anə loʼo kə Zə̀kìy Saʼa nəniy ate.”

¹⁶Yesù ə dzày yə̀ a we nə, “Wù ù lìy kə byay tsə inyi, nàm bə̀ ndə̀mə̀ àghù nə̀ ghu ki bû nyi.”

¹⁷Abù soŋə fiy kpe tsə nəniy, u twum tsə wè kə̀fàʼ nə̀ ù zù twoŋə bə̀ aghù yə̀ dzày yə̀ a ghu nə, “Ghà bû Mə mə byay mà ayiə à nyiə yiy.”

¹⁸Ghu dzə̀m ə kaʼ kə ani yieli kyabi tsə̀ fə̀moʼ fəmòʼ. Ù səsə wə dzìy a we nə, “Mə ŋwumi zwe tsə ibii, mə dziy zû kôʼ, kə̀lə â wə̀ nyə tsə miə nə̀ bwòʼ kìy.”

¹⁹Wù ù lìy wìy dzìy a we nə, “Mə ŋwumi zwe kə mbòŋ tə̀ vələ tiy nyiə, ìvəm,[7] Mə dziy zû mwâm kôʼ ghu. Kə̀lə̀ â wò nyìə̀ tsə miə nə̀ bwòʼ kiy.”

²⁰Wè ù lìy mee nə, “Mə ŋwumi nìy kə wiy, Mə kî bù dzə̀ wày.”

²¹Wè kə̀fàʼ wə̀ ə zù dzày dzwoŋi yə̀ àyiə yə awò mwe ə̀ kə̀fàʼ ə̀ we. Fòŋ ə ŋge ŋə̀m mwe ə̀ kə̀fàʼ wə̀, u dzày yə̀ a we nə, “Zə̀àŋi nyəŋ zù anə inaʼ idzə̀m, wò bwoʼ yə̂ kə̀bòŋ. Wò nâm bə̂ aghè à laa yiy, nə̀ àghù yə̀ ghu lyaŋə̀ nəniy ambvə̀d, nə̀ aghè yə̀ ghu fɛ̂b doʼò nəniy, nə̀ aghù yə̀ ghu pfə doʼò bə̂dkə̀bə̂d.”

²²Ani khì tsòŋì tsə, Wè kə̀fàʼ wə̀ ə bù dzày bə̀ a we nə, “A mwe, Mə mə fàʼ anə àyiə wò mə̀ dziy nə̀ mə fâʼ, a kwuni də̀ kə nə̀ ndaw kamə lwe awò àghù yìy.”

²³Mwe ə̀ kə̀fàʼ ə dzày yə̀ â wù kə̀fàʼ a we nə̀, “Zù anə inaʼ idzə̀m nə̀ anə təkɛ̀, wò zəŋi tsə nə̀ aghê bû, tə̀ ndaw lwe tsə.”

²⁴Mə dzìy bə̀ â wò nə̀, “Wù ù mòʼ anə aghè a səsə yə mə kə nâm bə̂, ù kì mwàm kòʼ dzə̀ wày fyiə kə̀ liy kiy anə inyi yə.”

²⁵Abù kə soŋə fə̀ liy fiy, ŋwàâ kìy bwìy fwumə nə̀ Yesù, u kyèmì tsiy yə̀, dzày yə̀ a ghu nə,

²⁶“Wù way ani dòʼò dzə̀ tsə̀ndii wam nə̀ ù liə way miə tsìy fyi tè we, moo zə̂ we, moo wìy we, moo awa we, moo awizə̂ we, nə̀ ùwee u we wiy.

²⁷Wù wə̀ ù də kə̀ boʼò kə nəway kâʼ fə təzəd fə we fiy, dzwùmi bə̀ mìə̀, ù way dzə ani dòʼò tsə̀ndii yam.”

²⁸Abu wù lìy anə uzə ghii dziy byiə ndàw ì sòŋə̀ yìy, ù we dyòʼò tsə ŋwò ani liay tsə nə̀ ghe kwu ntàŋə̀ ùkhiy səkiy, nə̀ ukhiy wə̀ kì kpe kə ŋwò anə fàʼ kə̀, moo u kì kpe way ə?

²⁹Abu ù də kə̀ zəŋi nəway ghii, ù fwukə tsə tsə kə ndaw kiy tàʼà kə̀ mây, aghê ki kôʼ, ghu kaʼ we ani lwuni.

³⁰Ghu ki dziy tsə nə̀, “Kòʼo kə nənìy wù wə̀ ù kaʼ tsə ndaw ani byiə kə̀ mây.”

³¹Moo à də dòŋ kə̀ ghaa kiy kə dziy sək tsam nə̀ dòŋ kə̀ liy kiy, nə̀ kə kə̀ doʼò tsə nəway ani kòʼ tsə nə̀ sǔgôʼ tə ighe tə təkam ivəm tə də kə ŋwô ani ŋwày suùgôʼ tə dòŋ kə̀ liy kə təkam wuuwûə̀?

³²Abu ù də way ani ŋwày sǔgôʼ tə̀ təkam wuuwû, ù də ani kway twum yə̀ àghù nə̀ ghu zû kway yə̂ dòŋ kə̀ liy kə nə̀ ghu nam də̌ nàdiikiy, tə̀ ghu byay tsə ayiə anə ibvay.

³³Yesù ə dzày kəd tsə nə̀, “A də ighəd, wù way ani dòʼò dzə̀ tsə̀ndii yam abu ù də kə̀ twe na tsə ufyiə wə ù kwu nəniy ùdzə̀m.”

³⁴“Ntsòʼ mìy dzwabə̀ ŋwò, abu ìn kwuni kwuŋ fyi tsə nəniy, kàmə̀ twabə way, ghu də ani zəŋi mə̀yiə tə̀ ìn kàm twab ə?

³⁵Ìn mbòʼò dzwàbə̀ wày ani fə̀lì màʼà a mbvə̀dintsə, moo ani fàʼ yəə à də̀ udzə. Aghê maŋə̀ myìʼà yə̀ a bee. Wù wə̀ ù kwu nəniy utswuŋi wiy, u zuw ayiə yə mə dzây!”