Read Isu Lukâs 15 Bible Online

Lukâs 15 - Isu bible

Lukâs 15

¹A tsuk ù liy wiy, aghû yə̀ ghu khii nəniy ŋwàʼà kə̀tsuwkiy nə̀ àghù yə̀ ghu zəŋə ayiə àbɛbə yiy, ghu bù ani bù zuw ayiə yə Yesù dzìy nəniy.

²Aghee Falàsî nə̀ ghè tyi dee ulàŋ wìy ə kaʼ yə̀ ani ŋwuŋi dzə̀ŋì, dzìy tsə nə̀, “Wù wə̀ ŋgwamə nia àghè bɛbə, nyiə dzəŋə sòʼò nə̀ ghu.”

³Yesù ə dzày tsə zə̀zə̌ fə awò ghu. U kaʼ tsə̀ nə̀

⁴“Abu wù kwu nəniy ndzwù tìy fəbwaam, ìmòʼ này tsə nəniy, u zəŋi mə̀yə? Ù we nia səə tsə tə̀ liy tə mə̀vəm imbwùkə nə̀ ghe tiy ibwùkə, tə də nəniy a lòʼo kə ufànyiə, ù ŋwò zù kaw ì yù ìmòʼ ì mə̀ nây nəniy zù kwùm a sòŋə fə ù kì kòʼò nəniy ate.

⁵Abù ù kòʼ tsə nəniy, u ŋge dwiʼi, ù bòʼò kə anə mbòʼ

⁶ù zù nə̀ ìghe yiy a ndaw. U dyaŋi toŋə na dzəŋi bə̀ àfwu ə we nə̀ àghù yə̀ ghu muə nəniy a kə̀lə̀ we, ù dzày yə̀ a ghu nə, ‘Mə ŋge dyoʼo ŋwò anə yiə yə mə kôʼ nəniy ndzwù yam yə ì kə nây nəniy.’ Bù nənìy ŋgà dzəŋi dwiʼi.”

⁷Mə dzîy bə̀ â ghà nə̀, à də̀ sòʼò ighəd an-a-vələ. Aghû yə̀ ghu də nəniy idoŋ ghu nî ŋge dyoʼo ŋwò abu wù ùmòʼ ù kə zəŋə tsə̂ ayiə àbɛbə yiy ù kyèmì bə̂ anə ibɛb iwe. Dwiʼi kə ghà kə̀ tsìy fyi ŋwô kə aghù yə̀ mə̀vəm ibwùkə nə̀ ghè bukə, ghu də nəniy tsitsi, nə̀ ghu maa kyèmì ŋwò fyi bə̀ anə bɛb tə ghu.

⁸Ì liy yiy nam də soʼo nəniy nə̀, abu wìyəŋi kwu nəniy twələ tiy ìvəm, abu ìmòʼ này tsə nəniy, ù kì we dà tsə tə̀kàʼì, ù zə̀d fyi bə̀ ndaw, ù nìy kə fəsoŋə ani kaw zù kwùm soŋə fə ù kì kòʼò nəniy ate.

⁹Abù ù kòʼ tsə nəniy, u toŋə na dzəŋi bə̀ àfwu ə we nə̀ aghù yə̀ ghu muə nəniy a kə̀lə̀ we, ù dzày yə̀ a ghu nə, “Mə ŋge dyoʼo ŋwò anə yiə yə mə kôʼ nəniy twələ yam yə ì kə nây nəniy, bu dwiʼi nənìy nə̀ mìə̀.

¹⁰Mə dzîy bə̀ â ghà nə̀ à də̀ sòʼò ighəd an-a-vələ. Tsə̀təndii t-a-zə̀ tìy ŋge dyoʼo nəniy abu wù ùmòʼ kyèmì ŋwò fyi bə̂ anə ibɛb i we.”

¹¹Yesù ə kàm dzày fəli tsə zə̀zə̌ fə̀ liy fiy nə̀, “Wù lìy wìy kə də̀ tsə̀ kə ŋwô, u kwu awa we àbè.

¹²Wà ùsə̀ ə̀ wə̀ ə dzày yə̀ awe nə, ‘A tà, nyə̀ə bə̀ ìtwoʼ ufyiə wam wiy nyiə.’ Wù te wiy dzàw nyə̀ yə̀ ufyiə wə ù kə kwu nəniy awò àwa we yə àbè.

¹³Tsukə miy tsìy tsə kə ìnsə̀ki kə ghii, wà ùsə̀ ə̀ wə̀ ə fè ŋwò tsə itwoʼ i ufyiə u we, ŋwò yə̀ nə̀ ùkhiy u te wiy. U ŋwò này yə̀ anə inaʼ ìliy yiy, zù sə̀àŋì màʼà tsə ukhiy wə anə imùə̀ ìbɛbə yiy.

¹⁴Abu ù sə̀àŋì mà tsə nəniy ufyiə wə ùdzə̀m ù kə kwu nəniy, dzoŋ nyi yə̀ awote anə inaʼ i ghè yə̀, nə̀ ù kàm kwu way fyiə kə̀ liy kiy ani nyi.

¹⁵U zù ani zù dòʼò wè kə̀fàʼ awò wè inaʼi ghà yə̀. Wù ghè wə̀ ə nìy na yə̀ we nə̀ ù si yemə anə umfə̀libyiə u we.

¹⁶U dìy nə̀ ghe mə si lyebi nyi ufânyiə wə ùmfə̀libyiə wiy nyiə, wù lìy wìy ə kə nyə̀ dzə̀ way we nə̀ fyiə kə̀liy kiy.

¹⁷Abù utwab u we wiy bû dzwoŋi nəniy, u dzày tsə anə fôŋə̀ we nə̀, ‘Aghee kəfàʼ a təli wam yiy kwu ndə̀mə̀ ùfyiə ani nyi, mə də fəə yəə mə ni pfə awò dzoŋ.’

¹⁸Mə kî ŋwò zè ŋwò asə̀ə̀ təli wam, mə zû dzây yə̂ a we nə, ‘A tà, Mə mə zəŋi bɛb anə sə k-a-zə̀, nə̀ anə sə kiə̀.

¹⁹Mə kə̀ kâm kwoʼ kpe dzə̂ yəə ghu ni toŋə miə nə̀ mə də wa niə̀. Na tsə miə yəə à də̌ wè kə̀fàʼ yiə̀ ùlìy wìy.’ ”

²⁰U ŋwò zù dzwoŋi sòʼò a sə̀ə̀ tè we. Abù tè we kôʼ yə̂ nəniy we nə̀ ù nam də̌ nàdii kiy ani zù kwùm a ndaw, mwuli kiy kwoʼ we azoŋə̀ wa nə. U nyəŋ zù akə̀lə̀ wa nə, zù myaŋi kəli yə̀ we.

²¹Wa nə dzày yə̀ awò tè we nə̀, “A tà Mə mə zəŋi bɛb anə sə k-a-zə̀, nə̀ anə sə kiə̀. Mə kə̀ kâm kpe dzə̂ yə ghu ni toŋə miə nə̀ à də̌ wa niə̀.”

²²Tè wa nə kwuni dzày yə̀ awò àghě kəfàʼ a ghu nə, “Ghà zəaŋì nîy bə̂ sàŋ ghà dzəŋì tsə azoŋə̀ we, nə̀ ntee fiy anə wà ə̀ kəwo ə̀ we, nə̀ gùw tìy anə awèe we.

²³Ghà zû nî bə̂ tswaam kə mbòŋ kə̀ nê kə̀ a wiy tsə tə̀ ŋgà fwu a dwiʼi,

²⁴aŋwòə wa nam wə̀ maa pfə, ù mə kàm zɛ̀mə̀ dzwoŋi. Ù maa này, a mə kàm kòʼ dzwoŋi we nyiə.” Ghu dyaŋi kaʼ yə̀ ani nyi, dyoʼo.

²⁵A sòŋə fə ghà fə̀, wà ù nɛmə wə̀ kə də̀ a mbvən. Abu ù fənə dzwəŋə bə̂ nəniy, yəə ù bè mià nəniy a ndaw, u zuw bə̀ dəm kə ufyiə ù bənə wiy.

²⁶U toŋə tsə wè kə̀fàʼ ùmòʼ bəb yə̀ a we nə, à kwùm kìə̀?

²⁷Wè kə̀fàʼ wə̀ ə bə̀lì yə̀ a we nə, “Àzə̀ yə̂ mə bù dzwoŋi, təli yə̂ mə wiy tswaam kə mbòŋ kə̀ nê kə̀, aŋwòə ù bù dzwoŋi nə̀ ù taw dzwàbə̀ ŋwò.”

²⁸Wà ù nɛmə ù ghè wə̀ ə ŋə̀m này yə̀ nə̀ fòŋ aghii, twe ani tsìy nyi a ndaw. Tè we tsìy fyi bə̀ bwoʼ yə̀ kə̀wo a we nə̀ ù nyi kwoʼ bə̀ a ndaw.

²⁹U dzày yə̀ â tə̀li a we nə, “Kòʼo, Mə mə fàʼ â wò anə ŋə̀mə̀ tə̀ tə̀dzə̀m te à də̀ kəkwə̂d, mə kamə kə̀ ke maʼà kôʼ nəway dzə̀ yə̂. Wò nyə̀ kòʼ dzə̀ kìə̀ awò mìə̀ ə? Wò kamə bôʼ nyiə̀ dyaŋi wà byi nə̀ mə fwu nə̀ àfwu yamə.

³⁰Wa niə̀ wə̀ mə zù sə̀àŋi màʼà ùfyiə yiə̀ wìy nə̀ ùkpàlə̀ wìy, ù bù dzwoŋi a ndaw, wò wiy yə̂ tswaam kə mbòŋ kə̀ nê kìy awò we!”

³¹Tè we dzày yə̀ a we nə, “A wa nam, wò də̀ dzəŋi kə fəə nə̀ mìə̀ anə nsòŋə indzə̀m, ufyiə udzə̀m mə kwu nəniy à də̀ u yə̂ wìy.

³²Ŋgà kwu ani nyi ŋgà si dyoʼo, aŋwòə àzə̀ yə̂ wə̀ maa pfə, ù mə kàm zɛ̀mə̀ dzwoŋi, ù kə này ŋwò, a mə kàm kòʼ dzwoŋi we.”