Read Isu Lukâs 18 Bible Online

Lukâs 18 - Isu bible

Lukâs 18

¹Yesù ə dzày yə̀ fə̀zə̀zə̌ awò tsə̀təndii tə we tiy, ani zəŋi tsə ghu tə̀ ghu ki tsəŋ kwu kə ani gwùŋì, nə̀ ghu bwiy te səə way.

²U dzày yə̀ a ghu nə, “Inaʼ ìliy yiy kə də̀ ŋwô, wù ù saʼà tə̀nsaʼ ù lìy kə də̀ awote nə̀ ù tsəŋə way Zə̀kìy, tsəŋə sòʼò wày aghû yìy.

³Wìyəŋə̀ mpfənsə ù lìy kə də̀ sòʼò awò anə inaʼ i ghè yə̀, u tsə̀ŋə̀ bè tsə̀ kə a kə̀lə̀ wù tə̀nsaʼ wə a we nə, ‘Fày miə fə anə nsaʼ yam, nə̀ wù wə̀ ù fyimə nəniy miə!’

⁴Ghab kiy ndəŋə fyiə kyoŋə yə̀ nə̀ wù ù saʼà tə̀nsaʼ wə̀ bàŋə̀ kòʼò yə̀ dzə̀ wày wìyəŋi wə. U kwuni kàm dzày tsə anə uwè u we nə̀, anə yiə yə Mə boʼò də tsəŋə kə way Zə̀kìy, nyə̀ sòʼò wày ə ŋkwiʼi miy â àghù yìy,

⁵I də nə̀ yəŋə̀ mpfənsə wə̀ mə miə ŋge fyimi tsìy fyi, Mə kwu ani fày we aŋwòə abu Mə də kə̀ zəŋi ghi, Mə kî zwày dzə̀ wày anə yiə yə wìyəŋi wə̀ fyimə nəniy miə.”

⁶Mwe ə̀ Mbyi ə dzày yə̀ a ghu nə, “Zuw nənìy ayiə yə ŋgwali kə wù ù saʼà tə̀nsaʼ wə̀ kə dzây nəniy.

⁷Ghà moʼò nə̀, Zə̀kìy way ani saʼ nyə̀ nsàʼ àghě we yə ù sày na nəniy, abu ghu dîy yə̂ awò we nə̀ ù fày ghu nə̀ ntsə̀ tìy moo nə̀ ntsukə tiy ə̀? Ù də ŋwô ani bòʼò fə̀d ikwe ə̀?

⁸In dzây bə̂ â ghà, u kì zə̀àŋə fììy təŋə ghu mbab mbab. Wà Wù nì bè kòʼò kə ŋwô aghû yìy ghu kwu nəniy ibɛmə yiy fə anə mbyi ani bu ù bù dzwoŋi nəniy ə̀?”

⁹Yesù ə dzày yə̀ sòʼò fə̀zə̀zə̌ awò ghù yə̀, ghu moʼò nəniy nə̀ ghu zəŋə àyiə àdzoŋə̀ yìy akə̀lə̀ Kə̀zə̀, kwuni kòʼò àghè liy yiy nə̀ ghu way dzə fyiə kə̀liy kiy akə̀lə̀ Kə̀zə̀.

¹⁰Yesù kə dzày tsə a ghu nə, “Aghê àbè kə tsìy nyi yə̀ a ndàw Kə̀zə̀ ani zù gwùŋì, wè Falàsî nə̀ wù ù khii ŋwàʼà kə̀tsuw kiy.”

¹¹Wè Falàsî wə̀ ə təmi kə nə̀ uwe ù we wiy kaʼ tsə ani gwùŋì dzìy tsə nə̀, “Mə nyiə̀ kə̀zòŋə̀ â Zə̀kìy aŋwòə Mə way dzə yəə à də̀ aghee à liy yə ghu tsoŋə nəniy, tsè tsə̀ àghù, lyaŋə tsə̀ sòʼò, moo yəə à də̌ wù wə̀ ù khii ŋwàʼà kə̀tsuw kiy ù də nəniy fiy.

¹²Mə nìy kə ntsukə imbè anə ivən ani bam idzwə, gwùŋə̀, Mə nìy kə sòʼò fyiə kəmòʼ anə ufyiə wam wə̀ uvəm mə kyilə nəniy mə nyə̀ yə̀ â Zə̀kìy.”

¹³Wù ù khii ŋwàʼà kə̀tsuw kiy kwuni təmi này fyi yə̀ nə̀ u mə byìŋì kè tsə uwe u we wiy nə̀ ghe kə̀ boʼò kwoʼ kpwe ani lia kwoʼ yə̀ an-a-vələ, u gàʼ na tsə kə àwo anə ikiykiy kaʼ tsə ani gwùŋì dzìy tsə nə̀, “A Zə̀kìy, kwo nə̀ mwuli kiy a zòŋə̀ mìə̀, aŋwòə Mə də wù ù bɛbə̀ wìy.”

¹⁴Yesù ə dzày yə a ghu nə, “In dzây bə̂ â ghà, wù ù khii ŋwàʼa kə̀tsuw kiy kə zù dzwoŋi a ndaw nə̀ fòŋ ìzwe yìy nə̀ Zə̀kìy mə nìyzə̀ ayiə we àbɛbə yiy, tsìy fyi wè Falàsî wə̀, aŋwòə aghû yə̀ adzə̀m ghu kwoʼo nəniy iwe yiy Zə̀kìy kî nìy tswi tsə ŋwò ghu, a kwuni bû à yu ghu nîy tswi tsə iwe i ghu yiy, Zə̀kìy kî nìy kwoʼo kə ŋwòə ghu.”

¹⁵Aghê liy kə bè nə̀ ànìsə̂ ə ghu yiy awò Yesù nə̀ ù gaʼ tsə awo azoŋə̀ ghu ani lwì tsə ghu. Abù tsə̀təndii tə we tiy kôʼ àyiə ghè yə̀ ghi, ghu kwà yə̀ aghě ghà yə̀.

¹⁶Yesù ə kwuni twoŋə koŋə bə̀ ànìsə̂ yə̀ akə̀lə̀ we, dzày tsə nə̀, “Ghà kə twe dzə̀ nə̀ anîsə̂ kə bû akə̀lə̀ mìə̀, aŋwòə Zə̀kìy saʼa anə mùə̀ tə ghù yə̀ ghu na tsə iwee i ghu yiy yəə à də anîsə̂.

¹⁷Mə ndzəmə̀ dzìy bə̀ ŋwò â ghà nə̀, ìsoŋì ìsoŋì, wù wə̀ ù də kə̀ nìy tswi tsə uwe u we wiy yəə à də̀ anîsə̂ yə̀, ù way dzə ani kəli yə Zə̀kìy saʼa nəniy aghee we ate.”

¹⁸Wè Dzû ù lìy kə də ŋwô ù kə də nəniy tuw kiy. U bù kaʼ ani bəb awò Yesù a we nə, “A àtyi dè ù dzòŋə̀ wìy, Mə də ani zəŋi mə̀yə tə̀ mə kəli imuə̀ itsà ə?”

¹⁹Yesù bəb yə̀ a we nə, “Wò twoŋə nə̀ìndiə miə nə̀ à də̌ wù ù dzòŋə̀ wìy ə? Wù lìy wày dzə ù dzwàbə̀ nəniy, À mày təŋ kə Kəzə̀ kə dzwabə̀ nəniy.

²⁰Wò mgbaŋ kwu ŋwô àyiə yə lâŋ kìy dzîy nə̀, kəə wù nì wiy wù, kəə wù nì bwiy mwàŋ tìy, kəə wù nì tsoŋə, kəə wù nì guw nia nəniy ayiə yiy azoŋə̀ wù lìy wìy, i zuw yəə awò tè nə̀ zwə̂.”

²¹Wù wə̀ dzày yə̀ a we nə, “Wokə mə kə kaʼ bə̂ ani na ulâŋ wə̀ ùdzə̀m nə̀ mə nam də nìsə̀.”

²²Abù Yesù zuw tsə nəniy ayiə yə ù dzày tsə nəniy, Yesù ə dzày yə̀ a we nə, “Iyiə ìliy nam dòʼò səə ŋwô wò nam kwu nəniy ani zəŋi, zu fèe màa tsə ufyiə yə̂ wə̀ tə̀ wò nyiə̀ ukhiy u ghè wə̀ awò àghè la yiy, wò nî kəli ikwum an-a-vələ, wò dyaŋi dzwumì bə̂ mìə̀.”

²³Abù wù wə̀ zuw tsə ndzòʼò ayiə yə ghii, u mwe dòʼò bə̀ yəə ù ni dîy, aŋwòə ù kə ŋge kwumə ŋwò.

²⁴Yesù ə lia kə we ghii dzày tsə nə, “À tòʼò ŋge də̀ iyiə ì taw yiy awò wù ù kwùmə wiy ani nìy tswi tsə uwee u we nə̀ Zə̀kìy saʼ.

²⁵I ŋge bva ŋwò awò nyàm yə̀ ghu twoŋə nə̀ à də̀ kə kàmêl ani tsìy fyi yə̀ anə bwòʼ kə fənsaʼ, tsìy fyi â wù ùkumə̀ wìy ani na tsə uwee u we nə̀ Zə̀kìy saʼ.”

²⁶Aghû yə̀ ghu kə zuw yə̂ ayiə yə, ghu bəbə a we nə, “Anə̀ ì yuu nyiə ghi, à də̌ ndiə Zə̀kìy də ani bii fyi we?”

²⁷Yesù ə bə̀lì kə ghu nə̀, “Ayiə yə aghee mbyi də wày ani zəŋi, Zə̀kìy də ŋwô ani zəŋi.”

²⁸Pità ə dzày yə̀ a we nə, “Kòʼo tsə! Ghè mə na sə tsə ndaw tələ tiy ani dzwùmì wò.”

²⁹Yesù ə dzày yə̀ a we nə, “À də̌ ì soŋə̀ yìy, Mə dzîy bə̀ nə̀ ghà kəli tsə nə̀, wù lìy wày dzə ù də ani na səə tsə ndàw we, moo tè we nə̀ zə̂, moo awizə̂, moo wìy we, moo awa ə we ani bwìy nàʼà kyabi tsə̀ àyiə yə Zə̀kiy saʼa nəniy aghê we yiy ate, nə̀ ù kə kəli dzwoŋi nəway.

³⁰Ù ki kàmə̀ kyilə dzwəŋə tsə anə ndə̀m fə anə mbyi yə, ù kəli sòʼò itsà anə mbyì ì fyiə̀ yə̀ ì bè nəniy.”

³¹Yesù ə nìy kə tsə̀təndii tə we ìvəm nə ghe tiy ibè, təmi yə̀ nə̀ ghu anə ukɛ̀, dzày yə̀ a ghu nə, “Ghà zuw, ŋgà kwoʼo yə̀ a Yèlusalèm, ayiə àdzə̀m aghee ntwùm ə̀ Kə̀zə̀ kə twâ na kwùmə yə̀ nə̀ Wà Wù a kwu ani fyi dòʼò ìsoŋə̀ yìy awote.

³²I də aŋwòə ghu ki nîy kə we ghu nyiə̀ dyaŋi yə̂ we awò àghù yə̀ ghu də wày aghee Dzû, ghu ki nìy yə̂ we, ghu swiʼì we, ghu nyaʼì we, ghu tsə ntiə anə asə ə we,

³³ghu bwad we nə̀ ìkwò yìy, ghu ba wiy we anə kàʼ fə təzəd. Ani bù ntsukə miy zê ìnti, ù nî kàm zɛ̀mə̀ dzwoŋi bə̀ ani pfə.”

³⁴Tsə̀təndii tə kə kwunə zuw kyilə way iyiə i mòʼ anə ayiə ghè yə̀; ghu kə bòʼò kwu dyaŋi way ayiə yə ù dzìy nəniy aŋwòə imyiŋì i ghè maa nù dòʼò awò ghu.

³⁵Soŋə fə̀ liy fiy kə də̀ ŋwô Yesù kə zê nəniy a Dzèlikò, anə yiə yə ù zè mià nəniy a Dzèlikò, wù lìy kə də awo anə dzəd ù kə fɛ̂b doʼò nəniy ŋwaa tsə̀ ufyiə.

³⁶Abù ù zuw tsə yiə aghê kə laŋə bə̂ nəniy, u bəb tsə nə̀ “À kwùm kìə̀?”

³⁷Ghu dzày yə̀ a we nə, “Yesù wè ìnaʼ i Nazalèt wìy tsìy nəniy.”

³⁸U twoŋə fyi bə̀ nə̀ dzə̀ ì tâw yìy nə̀, “A Yesù, Wà Devìd, kwoʼ nə̀ mwuli kiy azoŋə̀ mìə̀!”

³⁹Aghû yə̀ ghu kə də nəniy isə ghu kwà we dzìy a we nə, dòʼò moŋ, u kwuni fə̀d twoŋə fyi này kə kəbôŋ nə̀, “A Wà Devìd, kwoʼ nə̀ mwuli kiy azoŋə̀ mìə̀!”

⁴⁰Yesù fìy təmi tsə ŋwô dzày yə̀ nə̀ ghu nîy bə̂ wù ù fɛbə̀ wə̀ ù bù a kə̀lə̀ miə. Abù wù u fɛbə̀ wə̀ koŋə yə̂ a kə̀lə̀ Yesù, Yesù ə bəb yə̀ a we nə,

⁴¹Wò liə nə̀ mə zəŋi nyiə̀ kìə̀ â wò ə? Wù wə̀ dzày yə̀ nə̀ “A Mwe ə̀ mbyi, Mə liə ani kàm kòʼ tə̀ loʼo.”

⁴²Yesù mee a we nə, “Kòʼò loʼo tiy, Ibɛmə yiə̀ yìy mə zəŋi wô wò taw.”

⁴³Wù wə̀ dyaŋi kaʼ tsə ani kòʼ tə̀loʼo ŋwò dzwùmì yə̀ Yesù, nyə̀ yə̀ mə̀ŋkwiʼi awò Zə̀kìy, Aghû yə̀ adzə̀m ghu kə kôʼ nəniy ayiə ghè yə̀, ghu nyə̀ sòʼò ukali awò Zə̀kìy.