Read Isu Lukâs 20 Bible Online

Lukâs 20 - Isu bible

Lukâs 20

¹Abù kə ntsuk ù liy, Yesù ə tyi dè ayiə, a ndàw Kə̀zə̀, nìʼà sòʼò ntwùm ì dzòŋə̀ yìy, Ŋgəd tə aghè àlwaʼa nə̀ àghè tyi de ulàŋ yìy, nə̀ ŋgəd tə inaʼ tiy, ghu zù bù a we nə,

²“Dzàay bə̀ â ghə̀d, wò kwu daʼa kə̀ ghaa kiy ani zəŋi ndzòʼò àyiə yə? À nyə̀ ndìə̀ wô nə̀ daʼa kiy ani fàʼ àyiə yə ə?”

³Yesù ə bə̀lì kə a ghu nə, “Mə dziy bəb sòʼò ìyiə ìliy yiy â ghà. Ghà ndzə̂m bə̀lì bə̂ sòʼò mìə̀,

⁴Dzwan kə̂ daʼa kiy nîy bə̀ yə̀ ani nyə̀ mwi m-à-zə̀, à kə də awò Zə̀kìy, moo awò àghě mbyi yiy ə?”

⁵Ghu kaʼ yə̀ ani dzày anə iwè nə̀, “Ŋgà nə dzây yə̂ nə̀ indiə? Abu ŋgà dzây tsə ‘awò Zəkìy,’ ù kî bəbə â ŋgàŋ nə̀, ‘À də̌ kìə̀ ghà kə də kə̀ bɛmə nəway awò Dzwan ə?’

⁶Abu ŋgà kwuni dzây yə̂ nə̀, ‘Dzwan kə̂ daʼa kiy nî bə̀ â àghě mbyi yiy,’ aghû yə̀ àdzə̀m, ghu ki təm wiy ŋgaŋ nə̀ àtay yiy, aŋwòə ghu kwu ŋwô nə̀ Dzwan kə də̌ wè ntwùm ə̀ Kə̀zə̀.”

⁷Ghu ba dzày yə̀ a we nə, “Ghè kwu way loʼo kə daʼa kə Dzwan kiy kə ŋwô bə̂ ate.”

⁸Yesù ə dzày yə̀ a ghu nə, “Miə soʼo mə dzîy wày loʼo kə daʼa kam kiy ŋwô bə̂ ate ani fàʼ àyiə yə.”

⁹Yesù ə kaʼ tsə ani dzày zə̀zə̌ fə â àghě ghè yə̀ aghu nə, “Wù lìy kə kwu uswum u we, u zu na tsə ŋkà mə̀ ùtam ate ghu tyoŋə nə̀ à də̀ ‘Vayìn’, nìy nyə̀ fyi yə̀ awò àghě kəfàʼà. U ŋwò fyi bwìy zù này anə inaʼ ìliy yiy anə ndaŋ k-a-ghab.

¹⁰Abù soŋə fiy kpe tsə ani kwà ùtam, u twum tsə wè kə̀fàʼ ə̀ we nə̀ ù zù nìy bə̀ itwiʼi utam u we awò àghě uswum yə. Aghee uswum yə fə̀d kwi tsə we, bwad we, dzwùm ŋwò we, u ŋwò nə̀ awo àzwumə yiy.

¹¹U twum fwuli tsə wè kə̀fàʼ ù lìy, ghu ə nam bwad kə we an-a-tə̀ŋ, nyàʼì sòʼò we nyəli màʼà dzwoŋi yə̀ we nə̀ àwo à zwumə.

¹²U nam kàm twum fwuli tsə wè kə̀fàʼ ù lìy ani zəŋi yə̀ aghè àti, aghě kəfàʼ yə̀ bwad kwe yə̀ àfoŋ anə uwè dzwùm fyi ŋwò we.

¹³Mwe ə̀ ùswum wə ŋwò dzày tsə nə̀, Mə nə ba zəŋi mə̀yə? Mə kî baa twumə yə̀ wa nam ù tsukə̀ wìy, nyi fə̀ liy fiy ghu ki də ani nyaŋ tsəŋ tsə we.”

¹⁴Abù aghee kəfàʼ yə̀ kwuni kòʼ tsə wa nə, ghu ə dzày tsə anə iwè nə̀, “À wə̀ də wà mwe ə̀ ùswum, bu nənìy tə̀ ŋgà wiy maʼà we, a kəli ŋwô ùfyiə wə!”

¹⁵Ghu màʼà fyi yə̀ we a bee anə uswum, wiy màʼà tsə we. Gha moʼò nə̀ mwe ə̀ ùswum wə də̀ ani zəŋi mə̀yə nə̀ aghě kəfàʼ yə̀ ù kə nyiə̀ fyi nəniy uswum wə â ghu ə?

¹⁶U kì bvwami bè kə ani bù wiy màʼà ghu tə̀ ù nìy nyə̀ fyi yə̀ ùswum wə â àghe à ŋwô yìy. Abù aghù yə̀ Yesù kə dzîy nəniy ayiə yə â ghu, ghu zuw tsə ghi, ghu dzày tsə nə̀, “Zə̀kìy kə bɛmə dzə̀ nə̀ ndzòʼò àyiə yə̀ fyi kòʼ!”

¹⁷Yesù ə soʼ lia kə ghu ghii, bəb yə̀ a ghu nə̀, “Ayiə yə a twâ doʼò anə ŋwàʼà k-a-zə̀ a myiŋə kìə̀ nə̀, Itay yə aghê bwamə təndaw yiy twe maʼà nə̀ i dzwabə̀ wày, à kàm də ighe itay ìsoŋə̀ yə̀ i kwi kəli nəniy tsə kə ndaw kiy.

¹⁸Wù wə̀ ù kì bvə̀ nəniy anə itay i ghà yə̀, ù kì byèlì ŋwò anə mə̀ mbə̀lə̀ abu itay i ghà yə̀ bvwə̂ azoŋə̀ we, i ki gwuə̀ we anə usàd.”

¹⁹Ŋgəd tə aghè àlwaʼa nə̀ àghè tyi de ulàŋ wìy ə də̀mə̀ kə nə̀ ghu kwi təŋ kə Yesù a soŋə fə ghè fə̀, ghu ə kàm tsəŋ sə kə aghû, aŋwòə ghu maa mòʼ kəli nə̀ zə̀zə̌ fə̀ kə də̀ azoŋə̀ ghu.

²⁰Ghu ə kyìŋə̀ tsə̀ we, twum tsə sòʼò àghù nə̀ ghu ki ŋwamə dziy nə̀ ghu də aghê àdzoŋə̀. Ghu dzày yə̀ nə̀ ghu zû swiʼì kôʼ we anə ayiə à bəbə yiy tə̀ a ki bu ù bə̀lìy bɛb tsə nəniy iyiə ìliy yiy, ghu ki kwi zû nyiə̀ we awò wù ù də nəniy tuw kiy anə bwòʼ tə̀ ù saʼ we.

²¹Ghu bəbə a we nə, “A àtyi dè, ghè kwu ŋwô nə̀ ayiə yə wò dzìy nəniy nə̀ à yuu wò tyi dê nəniy a də tsitsi, wò tsəŋə sòʼò wày asəə aghù yìy, wò kwuni ndzə̀mə̀ tyi dè dzəd ə̀ Kə̀zə̀ awò aghè adzə̀m.

²²Ghè dziy bəbə̂ â wò nə̀, anə yiə yə lâŋ kə ŋgàŋ kìy dzîy, ŋgà kwu ŋwô ani tsuw kəŋwàʼà awò Kàʼisà, moo a kwu way ə?”

²³Yesù ə kwuni kəli təŋ kə utwab u ghu wə̀ ghu mòʼò nəniy u dzày yə̀ a ghu nə,

²⁴“Ghà dê bə̂ mìə̀ nə̀ ùkhiy ù liy fəə, u bəb tsə a ghu nə, ghu fə̂ zəŋi na utwumusə u ndiə nə̀ ìzəd ate ə?” Ghu mee a we nə, “À də̀ u Kaʼisà wìy.”

²⁵U dzày yə̀ a ghu nə, “Nyə̀ə yə̀ nənìy fyiə kə kə də kə Kaʼisà kìy â Kaʼisà, ghà nyiə̀ yə̂ soʼò fyiə kə à də k-a-zə̀kìy â Zə̀kiy.”

²⁶Aghû yə̀ ghu kə dziy kwi we anə ayiə yə ù kì byilə̀ bɛbə tsə iyiə yiy, ghu də̀m kɛ̀ kə iyiə yə ghu dziy ba kwi we ate anə səkə aghù. Adzwə maa ŋge zwum ghu anə yiə yə ù bə̀lìy ghu ate, ghu dòʼò dyaŋi yə̀ moŋ.

²⁷Aghee Sadùsî à liy yə ghu kə dzîy nəniy nə̀ aghê pfə zɛ̀mə̀ tsə̀ dzə̀ wày, ghu zù bù ani bù bəb ayiə awò Yesù.

²⁸Ghu bəbə a we nə, “A àtyi dè, Musîs kə twà na â ghə̀d nə̀, ‘Abu wù pfə na sə tsə wìy we nə̀ ù kə̀ byi nəway wa, àzə̀ ə̀ we nìŋì yə̀ wìy ù te wiy, wà ù səsə wə ghu byi bə̂ nəniy, u dòʼò yə̀ anə̀ izəd i àzə̀ ù pfə̂ wə̀.

²⁹Aghê àliy kə də̀ ŋwô, utuw ghu isèmbe ghu kə də nəniy awizə̂. Ù səsə wə nìy kə wiy bu pfə nə̀ ù wa kə̀ byi nəway.

³⁰Ù wə̀ ù dzwùmì yəə we, u nìŋì yə̀ wìy ù te wiy, bù pfə sòʼò nə̀ ù kə̀ byi nəway wa nə̀ we.

³¹Àzə̀ ù lìy wə̀ ù zəŋə yə̂ aghê àti u nìy yə̀ sòʼò wìyəŋi wə, a də̀ kə iyiə ìmoʼo yiy. Ghu ghè yə̀ àsèmbe ə pfə mà tsə nə̀ ghu kə̀ byi wa nə̀ we.

³²Wìyəŋi ù ghè wə̀ ə bu pfə tsə sòʼò ibàm.

³³Ani bu Zə̀kìy zɛmə̀ dzwoŋi bə̂ aghê ani ipfə, wìyəŋi wə̀ nì dyòʼò wìy ndìə̀ ate anə uzə u ghù yə̀ àsèmbe ghu kə nîy nəniy we ə?’ ”

³⁴Yesù ə bə̀lì kə ghu nə̀, “Aghû yə̀ fə anə mbyi, ghu nìy ìwee.

³⁵A kwuni bû aghù yə̀ anə soŋə fə Zə̀kìy nî zɛ̀mə̀ kə ghu anə ipfə. Ghu nî nìy dzə̀ wày iwee yiy

³⁶ghà kwu ani kəli tsə nə̀ ghu nî kàm pfə dzə̀ wày. Ghu nî dyòʼò yə̀ ighəd nə̀ tsə̀təndii tə a-zə̀ tìy, ghu ni də soʼo awa Kəzə̀ yìy, aŋwòə ghu də awa yə ù zɛ̀mə̀ dzwoŋi bə̂ nəniy anə ipfə

³⁷Musîs maa dè mà nə̀ aghê nî zɛ̀mə̀ dzwəŋə ŋwò anə ipfə, anə ayiə yə Zə̀kìy kə dê â we a lòʼo kə uvələ u kə byaʼa anə fəkàʼ.” U dzìy nə̀ “Mwe ə̀ mbyi də Zə̀ kə Ablàhâm də̀ sòʼo Zə̀ kə Ayzìk, nə̀ Zə̀ kə Dzàkôb kìy.

³⁸Mwe ə̀ mbyi way dzə Zə̀ kə aghu yə̀ ghu pfə dyoʼò təŋə nəniy, ù kwuni də Zə̀ kə aghù yə̀ ghu də nəniy à taw yiy, aŋwòə awò Zə̀kìy, aghee ghà yə̀ àdzə̀m ghu muə ŋwô.”

³⁹Aghee tyi de ulàŋ u Musîs ə bə̀lì yə̀ we nə̀, “A àtyi dè, wò mə bə̀lì dzwàb!”

⁴⁰Ghu kə dzày aghi aŋwòə wù lìy kə kàm kwu fəli way ayiə à bəbə yiy â we.

⁴¹Yesù ə bəb tsə nə̀, “A də kìə̀ aghê sî dziy nə̀ Wù wə̀ Zə̀kìy sûw kyili na nəniy nə̀ ù də̌ wà Devìd ə?”

⁴²Devìd kə dzày tsə sòʼò anə ŋwàʼà kə ndzàŋə tə we nə̀, “Mwe ə̀ Mbyi kə dzày yə̀ awò Mwe ə̀ mbyi wam a we nə, ‘Dòʼo tswi tsə anə ukwe wam ù nyiə wiy.

⁴³Tə̀ Mə ki nîy mâ bə̂ àghù yə̀ ghu bâ nəniy wô in na bə̂ a təŋə ifwe yə̂.’ ”

⁴⁴Devìd kə twoŋə we nə̀ ù də̀ Mwe ə̀ mbyi we, i kwuni də mə̀yə Wù wə̀ Zə̀kìy sûw kyili na an-a-dòŋ nì fyiə anə tuu kə Devìd wə̀ ù kə də nəniy Dòŋ kìy ə?

⁴⁵Anə yiə aghê àdzə̀m ə zwulə yə̂ awò Yesù, u dzày fyi yə̀ awò tsə̀təndii tə we tiy nə̀,

⁴⁶“Ghà nîy ìyèmì nə̀ àghè tyi de ulàŋ wìy, ghu liə ani bwìy tsə̀ nə̀ ùbalaŋ wiy, liə sòʼò nə̀ aghê si tyoŋə zuw ghu anə bekəivən. Ghu liə kə ani dòʼò anə ukwe ù nê wìy anə ndaw tə udzəŋə tə ghě Dzû, nə̀ loʼò tə̀ soŋə̀ tìy anə loʼo tə̀ inyi.

⁴⁷Ghu koʼò kè ise ə mpfənsə, bii ŋwò ndaw tə ghu, liə tsə kə ani gwùŋì gwùŋì tə̀ dabə tiy ani dè ìwe. Ghu nî kyilə mfəm ìsòŋə̀ yìy.”