Read Isu Lukâs 21 Bible Online

Lukâs 21 - Isu bible

Lukâs 21

¹Yesù ə fwə̀dlə̀ kə yəə aghê kwumə kwoʼo kwe nəniy ukhi wiy a ndàw Kə̀zə̀.

²U kòʼ sòʼo yəŋə̀ mpfənsə kwoʼ kwe nəniy ntwolə miy imbè.

³U dzày tsə nə̀, “Mə dzìy bə̀ ìsoŋə̀ yìy â ghà, wìyəŋi mpfənsə ù lâ wə̀ mə nyə̀ tsìy aghê liy yə àdzə̀m.

⁴I ghi də̀ aŋwòə aghê liy yə̀ kə nyə̀ ùfyiə nə̀ ghu dzə̂ fyiə kə anə ndə̀mə̀ ùfyiə wə ghu twìʼi na nəniy anə ikwum i ghu. A kwuni bû wìyəŋi wə̀, yəə ù tsəmə la kə ghi ù mə nyə̀ mà yə̀ fyiə kə ù kə kwu nəniy ani nyi koŋə.”

⁵Tsə̀təndii tə Yesù tə̀liy tiy dzìy ayiə kwùmə̀ nə̀ àtay à dzòŋə yə̀ ghu biə nəniy ndàw Kə̀zə̀ ate. Ghu dzìy sòʼò ayiə kwùmə̀ yə̀ nə̀ ufyiə wə̀ aghê nyiə̀ nəniy zòŋə̀ kìy ate â Zə̀kìy.

⁶Yesù ə kwuni dzày yə̀ a ghu nə̀, “Fyiə kə ghà koʼò nəniy nyiə, soŋə fiy kî kpe tsə ŋwò ghà kî kàm kòʼ dzə̀ wày ìtay ìliy yiy i gaʼ dòʼò azoŋə̀ àzə̀, Atay ghè yə̀ ghu kî sàʼà myìʼà fyiə tswi bə̀ ŋwò àdzə̀m.”

⁷Aghê kə bəb tsə â Yesù nə̀, “A àtyi dè, ayiə yə̀ wò tyi dê nəniy, a nî fyiə zəŋi, à nì dè tsə sòʼò kìə̀ nə̀ a nyiə̀ dzìy fyi yə?”

⁸Yesù ə bə̀lì kə a ghu nə̀, “Ghà nîy tsə iyemì, kəə wù lìy nə̀ nɛbə gha. Ndə̀mə̀ àghè nî bè ŋwò anə izəd yam, ghu ni dziy nə̀, ‘Mə də we’, Dzìy sòʼò nə̀ soŋə̀ fə ghà fə̀ mə kpe, Ikghu ghà ə nə̀ dzwùmə̀ dzə̂ ghu.”

⁹Abu ghà nî zuw ayiə yiy kwùmə̀ yə̀ tsam, kwùmə̀ yə̀ sòʼò nə̀ ìdə̀m yə̀ i də nəniy ani bù nə̀ ŋgə̀d kìy anə inaʼ, kəə ghà ə nə̀ tsəŋə. Ayiə yə àdzə̀m nî fyiə kə dzə̀ isə, a nî kwunə dè dzə̀ wày nə̀ mbyi mə mày.

¹⁰U tsìy yə̀ kə nə̀ sə kiy ani dzày nə̀ “Naʼà tìy ni ŋwaa nə̀ nàʼà tə̀liy tiy, ùdòŋ u tənàʼà nə̀ sǔgôʼ tə ghu tiy ni ŋwaa nə̀ ùdòŋ u nàʼà tə̀liy tiy nə̀ sǔgôʼ tə ghu tiy.

¹¹Mbvə̀dinstsə kiy ni səkìy, kə bəlì anə ndə̀m ə̀ tə̀lòʼo. Dzoŋ ni də soʼo. Ndə̀mə̀ tədzàŋə̀ ni də sòʼò. Ndə̀mə̀ àyiə àfyia yiy nî fyiə ŋwò ani zəŋə nə̀ aghê si tsəŋə.

¹²Â àyiə yə àdzə̀m ani fyi, ghu ni kwi tsə gha ghu zəŋi tsə ghà fii, ghu nîy zû nə̀ ghà a ndaw tə udzəŋə tə ghě Dzû, ani saʼ gha, ghu kwe soʼò ghà a ndàw ntsaʼ. Ghà kəli tsə nə̀ ghu nî nìy zè ghà akə̀lə̀ ùdòŋ nə̀ àghù yə̀ ghu də nəniy utuw wiy anə təmbwòʼ bòʼ mìə̀.

¹³Ì yû ki nyə̀ ŋwò gha nə̀ bwòʼ kìy ani nàʼà ntwùmə ìdzòŋə̀ yìy.

¹⁴Ikhu gha ə nì fyimə fôŋ təli tiy nə̀ ghě ki sì dzìy yə̀ nə̀ìndiə ani bàʼ mbàŋ anə utuw ghələ ə?

¹⁵Mə ki nyə̀ ŋwò gha nə ùtwab wiy ani kəli tsə iyiə yə ghà kî dzîy nəniy. Wù ùmòʼanə aghù yə̀ ghu bâ nəniy gha, kî wày dzə ani twe màʼà àyiə ghi à dziy yiy, moo səay ayiə ghi à dziy yiy.

¹⁶Nə̀ təli ghi, nə̀ nə̀ zə̂ ghi, nə̀ àwizə̂ ghi, nə̀ tɛmə̀ təli tiy, nə̀ àfwu ghi yiy nî fyê ŋwô fyi yə̂ ghà. Ghu ni wiy màʼà sòʼò gha àliy yiy.

¹⁷Aghê dzə̀mə̀ ni dzwə nə̀ ghà bòʼ mìə̀.

¹⁸Ghu nî kwuni wày dzə ani khìy ŋwò kə bə̂d kə ùwè kəli kə̀liy kiy.

¹⁹Ghà ə təmi dòʼò taw tsə, tə̀ ghà ni nyi itsâ.”

²⁰Ani bu ghà kôʼ nəniy sǔgôʼ tìy lwe bə̂ a Yèlusalèm, ghà ni kəli tsə nə̀ ghu nyiə̀ dziy byɛbi maʼà ìnaʼi Yèlusalèm.

²¹Aghû yə̀ ghu də nəniy a Dzùdiyà ghu kwu ani tu kwoʼ anə təkàʼà, aghû yə̀ ghu də nəniy anə inaʼi Yèlusalèm, ghu kwu ani ŋwò fyi awote. Aghû yə̀ ghu də wày awote anə inaʼ, ikhu ghu nə̀ dziy kàm ndwâm nyi yə̂ awote.

²²Aŋwòə ntsukə mə̀ kə̀ fəm mə ŋwàʼà k-a-zə̀kìy tɛb na nəniy ìm mə ùwee wiy dê bə̀.

²³Soŋə fə ghà fə̀ nì ŋge fyà ŋwò azòŋə àghù yə̀ ghu nî boŋ doʼò nəniy, nə̀ à yu ghu nî kwu awa yiy anə awo. Fəm kiy nî ŋgee də̀ an-a-mbvə̀dintsə, Zə̀kìy nî nyiə̀ mfəm awò àghù yə̀.

²⁴Ghu ni wiy maʼà àliy yiy anə təkwab, ghu ni fê na àliy yiy a ndàw ntsaʼ anə nàʼà tə̀liy tiy. Aghû yə̀ ghu də wày aghee Dzû, ghu ni fyiki tsə Yèlusalèm nə̀ àwee yiy à ni may kə nə̀ sòŋə fə Zə̀kìy byay na nə̀ inaʼ i Yèlusalèm nî saʼà ate nə̀ fə mə bù tsìy ŋwò yə̀.

²⁵“Ayiə àfyiə yiy nî fyiə ŋwò anə inyi, nə̀ anə ndzoŋ, nə̀ anə mə̀nsǐbə̂d. Ndə̀mə̀ àghù anə nàʼà tə̀dzə̀m an-a-mbvə̀dintsə nî tsəŋə bòʼ mbuw kə dzwì ì nè yə̀ kə tsîy nəniy nə̀ yəə kə kwô bə̂ soʼò.

²⁶Aghê ni tsəŋ, fôŋ tə ghu tiy ni tu fyi sòʼò bòʼ àyiə yə a nî fyiə nəniy anə mbyi. Ufyiə wə u kwu nəniy daʼa kiy an-a-vələ u ni sə̀kì tsə.

²⁷Anə sòŋə fə ghà fə, ghu ni kòʼ Wà Wù bè nəniy anə təmbàʼ nə̀ daʼa kiy nə̀ ìmwày ìsoŋə yìy.

²⁸Ani bu ayiə yə̀ fyiə nəniy, təmi taw tsə nəniy, kəə ghǎ nì tsəŋə, gha tyili na fyi kə utuw idoŋ, aŋwòə soŋə fə ghu dziy kûm ŋwô fyi gha ate fə mə swəd.”

²⁹Yesù ə dzày zə̀zə̌ fə â ghu nə̀, “Ghà ə liay tsə kâʼ fə̀ utam u fîk, nə̀ ŋkàʼ mə̀lìy mə̀.

³⁰Abu ùŋkwè u ghu wiy kaʼ tsə ani zùw, kəli na tsə nənìy nə̀ iwe yiy nyiə̀ dziy bû.

³¹À də̀ sòʼò ighəd, ani bu ghà kòʼ nəniy ayiə yə̀ fyiə, ghà ni kəli tsə nə̀ ayiə yə Zə̀kiy saʼa nəniy aghee we yiy ate a mə swəd.”

³²Mə ndzəmə̀ dzìy bə̀ ŋwò â ghà nə̀ “Aghû yə̀ ghu muə nəniy nyiə ghu nî pfə mà tsə dzə̀ wày nə̀ àyiə yə̀ kamə fyi nəway.

³³Kəbyiwuŋ nə̀ mbvə̀dintsə kiy nî mìy ŋwò, dzə̀ yam nî kwuni mày kòʼ wày.

³⁴Kəə gha ə nə̀ nyàbə̀ soŋə fəli fiy nə̀ ghà moʼò ani nyiə muə mə̀nlwù, moo ghà si fyimə fòŋ tii tiy kwùmə̀ yə̀ nə̀ ùfyiə u mbyi wiy. Abu à də wày aghii, ntsuk fə isaʼ fiy ni bû nə̀ ghǎ kə̀ kəli na nəway.

³⁵I bû yam yiy nî də̀ tàfə̀mì kə iyiə awò àghù yə̀ ghu muə nəniy fə an-a-mbvə̀dintsə, aŋwòə Mə nî bè kə ghi nə̀ ghu kə̀ kəli na.

³⁶Ghà ə yemì tsə, ghà si tsəŋ kwu kə ani gwùŋì tə̀ Zə̀kìy ki nyiə̀ ghà nə̀ daʼa kiy ani tsìy anə ayiə yə, tə̀ ghà ki də ani zù təmi yə̀ akə̀lə̀ Wà Wù.”

³⁷Ntsukə mə̀ ghè mə̀ ìndzə̀m, Yesù ə tyiə dê zələ yə̀ ayiə a ndàw Kə̀zə̀ â ghu, abù inyinkwùbì tìy bû nəniy, u ŋwò zù anə udoŋ u ŋkàʼ mə̀ Olìf ani zù gwùŋì

³⁸Ndə̀mə̀ àghù ə bələ lwe bə̀ a ndàw Kə̀zə̀ ani bù zwəli ayiə yə ù dziy tyi dê.