Read Isu Lukâs 22 Bible Online

Lukâs 22 - Isu bible

Lukâs 22

¹À kə də̌ nə̀ soŋə fə inyi ba kə ghu də kə̀ kwe mbwùŋ ate, ghu tyoŋə nə̀ à də̀ inyi ì ŋkàmə̀tâzaʼà mìy nyiə̀ kpe kyoŋə mìà bə̀ ŋwò,

²Ŋgəd tə aghè àlwaʼa tiy nə̀ àghù yə̀ ghu tyi dê nəniy ulaŋ u Musîs wìy ghu ə khu tsə̀ dzəd ani kwi wiy Yesù ghu kwuni tsəŋə ìyiə yə ŋwàâ kə aghù kə̀ də ani zəŋi nə̀ ghu.

³Satàn ə dyaŋi nyi tsə anə fòŋ ə̀ wè ntwùm ə Yesù ùmòʼ ghu kə tyoŋə nə̀ à də̀ Dzudàs Ìsə̀kalòt.

⁴Dzudàs ə ŋwò tsə zù a ndàw Kə̀zə̀ zù byay na tsə ayiə nə̀ Ŋgəd tə aghè àlwaʼa yiy nə̀ àghè nê yə̀ ghu də nəniy awo, yəə ghu kî kwii nəniy Yesù ate

⁵Ghu dwiʼi này yə̀ ghi, tɛb na yə̀ ani nyə̀ Dzudàs nə̀ ùkhiy wiy.

⁶U bɛmə kə ani nìy ndzòʼò ùkhiy ughè wə̀, dyaŋi kaʼ yə̀ ani kaw dzə̀d ì dzòŋə̀ yìy ani fè fyi Yesù â ghu nə̀ ŋwàâ kə̀ kə kəli fyi dzə̂.

⁷Ntsuk fə inyi fə bakə ghu kə də kə̀ kwe nəway mbùŋ ate ə kpe tsə. Soŋə fə̀ wiy fə Wà ndzwù yə̀ ghu dziy sâ ani nyi inyi ì ŋkàmə̀tâzaʼà mìy ə kpe tsə sòʼò.

⁸Yesù ə dzày tsə â Pità nə̀ Dzwan a ghu nə̀, “Zù nənìy ghà zù byay na tsə loʼo kə ŋgà kî nyiə nəniy inyi ì ŋkàmə̀tâzaʼà mìy ate.”

⁹Ghu bə̀lì kə awe nə̀, “Wə̀ liə nə̀ ghě zû byay na tsə anə lòʼo kə̀ ghaa kiy ə.”

¹⁰Yesù ə bə̀lì kə ghu nə̀, “Yəə ghà bvwami nyiə yə̂ nəniy anə inaʼ i ghè yə̀, ghà ki kpe yə̂ nə̀ wù lìy wìy ù bòʼò kəli nəniy ntwà ə mwi. Ghà ki dzwumì yə̂ we. Ndàw yə ù kì tsîy nyiə yə̂ ate, ghà ki dzwumì nyi kwoʼ yə̂ we awote

¹¹ghà bəb tsə â mwe ndàw ùghè wə̀ nə̀, ‘Àtyi dè bəbə nə̀, idzwə i ndaw yə mə kwu ani nyi inyi i ŋkàmə̀tâzaʼà mìy ate nə̀ tsə̀təndii tam tiy də yə?’

¹²Mwe ə̀ ndaw ù ghè wə̀ kî zù dè bə̀ ghà nə̀ idzwə i ndaw ì nê yìy anə ndàw ì kwoʼò dyaŋə̀ yìy ghu toʼò byay na nəniy. Ghà ki byay na tsə inyi ighè yə̀ awo.”

¹³Ghu ŋwò yə̀ bvwami zù kòʼ yə̀ àyiə adzə̀m anə yiə yə Yesù dzày nəniy â ghu. Ghu bvwami byay na tsə sòʼò ìnyi ì ŋkàmə̀tâzaʼà mìy awote.

¹⁴Abù soŋə fiy kpe tsə â Yesù ani nyi nə̀ àghě ntwùm ə̀ we yiy, Yesù ə dòʼò tsə akə̀lə̀ ndàŋ ìnyiə̀ yìy nə̀ àghě ntwùm ə̀ we yiy

¹⁵u dzày tsə a ghu nə, Mə ŋge liə ŋwò ani nyi inyi ŋkàmə̀tâzaʼà mə̀ nə̀ ghà â mìə̀ ani fii.

¹⁶Mə ndzəmə̀ dzìy bə̀ ŋwò â ghà nə̀, “Mə ni kàm nyi dzə̀ wày inyi yə àni mày kə nə̀ aghû yə̀ Zə̀kiy saʼa nəniy muə̀ tə ghu tiy nə̀ ghu mə zuw kəli imyiŋi ghà yə̀.”

¹⁷Yesù ə dyaŋi nìy yə̀ bwam ə̀ mə̀nlwù, nyə̀ tsə kəzòŋə̀ ate â Zə̀kiy nìy nyə̀ yə̀ â àghě ntwùm ə̀ we yiy, dzày tsə ate nə̀, “Nìy nənìy nlwù mə̀ ghà ə muəʼ tyili yə̂.”

¹⁸Mə dzîy bə̀ â ghà nə̀ Mə kî kàm mu way nlwù mìy zù kwùm soŋə fə aghû yə̀ zə̀kìy saʼa nəniy muə̀ tə ghu tiy nə̀ ghu mə kəli imyiŋi ghà yə.

¹⁹Yesù ə nìy kə sòʼò kə̀ba nyə̀ tsə kəzòŋə̀ ate â Zə̀kìy. U byiʼi tsə nyə̀ yə̀ â ghu, dzày tsə a ghu nə, “Àyu də̀ uwe nam Mə nyiə̀ bə̂ nəniy â ghà. Ghà nîy ghà nyi. À yu də̌ dzəd yə ghà kwu ani myiŋə miə ate.”

²⁰Abù ghu nyi mâ kə nəniy ba kə, u nìy kə sòʼò bwàmə̀ mə̀nlwù anə ayiə à moʼo yə ù kə̀ nîy kə nəniy bakiy ate, dzày tsə nə̀, “À yù də̀ kâŋ tam, tə də ŋkà mə̀ fyiə̀ mə̀ Zə̀kiy nyi dzəŋi nə̀ ghà.

²¹Wù wə̀ ù fyiè fyiə nəniy miə, ù də̀ fə, nyiə fyiə fwumə kə nə̀ mìə̀ anə kaŋ kə̀mòʼ

²²Wà Wù kì pfə ŋwò anə yiə yə̀ Zə̀kìy tsə̂m dzə̂ nəniy. I kî kwuni fyà ŋwò azòŋə wù wə̀ ù kì fè fyi nəniy we.”

²³Tsə̀təndii tə Yesù tìy kaʼ ani bəb anə i wè nə̀ à sì də̀ ndiə u zəŋə nəniy ayiə yə̀?

²⁴Tsə̀təndii tə Yesù tìy ə kaʼ tsə ani dyimi dzə̀ŋì anə iwè kwùmə̀ yə̀ nə̀ wù wə̀ ù tsìy fyi nəniy.

²⁵Yesù ə dzày yə̀ aghu nə̀, “Ùdòŋ u ghù yə̀ ghu də wày aghee Dzû ghu saʼa àghě ghu nə̀ awo àtaw yiy. Ùdòŋ ùghà wə̀ namə tyoŋə ìwe ighu nə̀ ghu də afələ aghè àdzə̀m.

²⁶Ghà kə kwuni dòʼò dzə̀ te ghu zəŋə. Wù wə̀ ù kwu ani dòʼò wù ù sòŋə̀ wìy anə uzə ghi à də̌ wù wə̀ ù na tsə nəniy uwe we wiy yəə à də̌ ànìsə̀. Wù kətuw kwu ani dòʼò tsə wù wə̀ ù fàʼà nəniy â àghù yìy.

²⁷À ba də̀ ndiə wù ù sòŋə̀ wìy yə? À də wù wə ù dòʼò tswi tsə nyiə, moo à də wù wə̀ ù dzù nəniy ufânyiə wiy yə?

²⁸Ghà mə dòʼò fwumi nə̀ miə̀ anə ntswə̀d mə̀ ìndzə̀m ìn kə kwi nəniy miə

²⁹Anə yiə ghè yə̀ ghi, Mə kwu ani nyə̀ ghà nə̀ daʼa kiy ani doʼò bə̀ ùdòŋ, ghà ki saʼa aghù yiy. Ighəd anə yiə yə̀ təli wam kə nyiə̀ nəniy miə nə̀ daʼa kiy nə̀ Mə dòʼò kə̀dòŋ ani saʼa gha.

³⁰Ghà ni nyi fwumi nə̀ miə, ghà ə mu fwumi sòʼò mə̀nlwù nə̀ miə̀ anə lòʼò kam kə̀ saʼa kiy. Ghà ki doʼò tsə sòʼò anə ndàŋ tə ùdòŋ ani saʼa utu Islàel ùvəm nə̀ ghe wiy ibè.”

³¹Yesù ə dzày tsə nə̀, “A Simùn, Satàn mə ŋwa bwôʼ kîy â Zə̀kiy ani mwàm kòʼ ghà adzə̀m, ù liə nə̀ ghà fii, kəə ghà ə nə̀ kyilə ibɛmə yiy awò mìə̀ yəə ghu nə̀ tsaʼà ŋwò fyiə kə asaŋə anə təzwìy.

³²Mə mə kwùni gwùŋì anə tuw kiə a Simùn nə̀ ibɛmə yiə̀ yìy kə bvə̂ màʼà dzə̀ wô. Abu wò bù dzwoŋi dzə a kə̀lə̀ mìə̀, wò kî fày kə awizwə̂.”

³³Pità ə bə̀lì kə nə̀, “A Mwe ə̀ mbyi, Mə mə bɛmə ani kwoʼ dzəŋi ndàw ntsaʼ nə̀ wò, Mə pfə soʼò nə̀ wò.”

³⁴Yesù ə dzày yə̀ a we nə, “A Pità, Mə dzîy bə̀ â wò nə̀ awò mwaʼ kiy ani tuŋ nə̀ zwù kə utsuk kiy, a ki də nə̀ wò mə twe nsòŋi inti dzìy nə̀ wò kwu way miə.”

³⁵Yesù ə bəb yə̀ â tsə̀təndii tə we tiy nə̀ “Soŋə fə mə kə twum fyi nəniy gha nə̀ ghà kwu way ùmbè ukhiy wiy nə̀ ùwab wiy, nə̀ gùw tiy, gha kə làʼ ŋwò fyiə kə̀ liy kiy yə?” Ghu mee a we nə, “Hàay yiy.”

³⁶Yesù ə dzày yə̀ a ghu nə, “A kwuni bû nyiə, abu ghà kwu nəniy umbè ukhiy wiy, nə̀ ùwab wiy, ghà nîy kə, abu gha də kwu way kwab, fè nənìy ndzwu təli tə̀liy tiy ani zwe kwab ate.

³⁷Mə dzîy bə̀ ŋwò â ghà nə̀, aghee ntùm ə̀ Kə̀zə kə twà na anə uŋwàʼa u ghu nə̀ ‘Ghu kə tswə̀d dzəŋi we nə̀ àghè àbɛbə,’ ayiə yə a twâ doʼò anə ŋwàʼà k-a-zə̀ kwùmə̀ bə̀ nə̀ miə̀, a kwu ani fyi dòʼò ìsoŋə̀ yìy.”

³⁸Tsə̀təndii tə we tiy dzày yə̀ a we nə, “Kòʼo, kwab tə ìbè a Mwe ə̀ mbyi!” U dzày yə̀ a ghu nə, “Tə kpe ŋwô.”

³⁹Yesù ə nyəli tsə inaʼ ŋwò fyi yə̀, anə yiə yə ù kə boʼò zəŋə tsə̂ nəniy, u kwoʼ yə̀ anə udoŋ u Olìf, tsə̀təndii tə we tiy dzwùmì kwoʼ yə̀ we.

⁴⁰Abù ù zù kwùm tsə nəniy a lòʼo kə ghà kə̀, u dzày yə̀ a ghu nə, “Ghà gwuŋì, tə̀ Zə̀kìy fày ghà abu imwâkòʼ ìliy yiy bû nəniy.”

⁴¹U na sə tsə ghu dzə̀ koŋə fwuli yə̀ kə ghi, nyaʼa yə̀ a mbvə̀d, kaʼ tsə ani gwùŋì nə̀,

⁴²“A təli wam, abu wò liə nəniy niy ŋwò mfə̀mə̀ ùtswə̀d wə̀ anə tuw kam, i kə doʼò dzə̀ anə itsə̀m yam, i doʼò tsə anə yiə wò tsə̀m nəniy.”

⁴³Tsə̀ndii ə̀ Kə̀zə̀ ə ŋwò bə an-a-vələ bù fyi kə akə̀lə̀ we, nyə̀ tsə we nə̀ daʼa kiy.

⁴⁴U gwùŋə̀ yə̀ nə̀ fòŋ ŋge byòŋə̀ we, u tsə̀ŋə gwùŋə̀ yə̀ kə ŋwò nə̀ ù zuw ìfwabi anə fôŋ. Zwugi kə we kiy fyiə bə̀ yəə à də̀ təkâŋ, tsəɛmə yə̀ a mbvə̀d.

⁴⁵Abù ù ŋwò kə anə yiə yə̀ ù mə̀ gwùŋə̀ nəniy, u bù kway bə̀ nə̀ tsə̀təndii tə we tiy bvwunə ŋwò, ghu maa bwi tsìy awô ìmwe yiy anə təfòŋ.

⁴⁶U bəb yə̀ a ghu nə, “Ghà bvunə kìə̀? Ghà zɛmə̀ kə, tə̀ gha gwuŋì tə̀ Zə̀kìy fày ghà kəə gha nə̀ bvə̂ abu imwâkòʼ yìy bû nəniy.”

⁴⁷Abù Yesù sì namə dzəŋə̀ nəniy, Dzudàs, twoŋə tsə̀ndii we ù lìy ə zù tə̀ŋə̀ bə̀ nə̀ ŋwàâ kìy dè bə̀ dzəd awò ghu. U bù mà akə̀lə̀ Yesù ani bù myaŋi kəli we.

⁴⁸Yesù ə kwuni bəb yə̀ a we nə, “A Dzudàs, wò Wà Wù dziy fê fyi nə̀ wò myaŋə kyilə bə̀ we ə̀?”

⁴⁹Abù tsə̀təndii tə tə kə də fwumi nə̀ Yesù, ghu kôʼ nə̀ ayiə nyiə̀ taw kwoʼo bə̀ ŋwò, ghu mee nə, “A Mwe ə̀ mbyi a fyalì ghu nə̀ kwab tiy yə̀?”

⁵⁰Tsə̀ndii ìmòʼ ə dyaŋi sòŋ fyi kə kwab tswa màʼà bə̀ tswuŋi kə ukwe ù nyiə u wè kə̀fàʼ ə̀ wù ùlwaʼà ùnè wìy, kə tswaʼi bə̀ amvbə̀d fə̀b.

⁵¹Yesù ə kwuni dzày yə̀ nə̀, “Bwi na ayiə yiy nyiə̀!” U kàm nìy zòŋ dzwoŋi kə tswuŋi kə wû ù ghè wə̀.

⁵²Yesù ə dzày yə awò ŋgəd tə inaʼ nə̀ àghè lwaʼa yiy, nə̀ aghè a kyiŋə a ndàw Kə̀zə̀ yìy, ghu kə bû nəniy ani bù kwi we, a ghu nə̀, “Ghà dziy bû kwi miə Mə də wù ù tsoŋə̀ wìy yə̀, ghà sî bê nəniy nə̀ kwab tiy nə̀ ùfyiə u ntwab wiy ə?

⁵³Soŋə fə Mə kə də tsə nəniy nə̀ ghà a ndàw Kə̀zə̀ ntsuk i ndzə̀m, ghà kə way ani kwi miə, a kwuni bû nyiə̀, à kpe soŋə fə Zə̀kìy bɛmə dzə̂ nə̀ Satàn fàʼ àyiə təŋə kələm ə we.”

⁵⁴Ghu kwi kə Yesù nìy ŋwò zù nə̀ we a ndàw wù ùlwaʼà ùnè wìy. Pità ə màŋə̀ dzwùmə yə̀ n-à-diikiy,

⁵⁵Aghê liy kə zwùbì kə uvələ anə ntoʼ, ghu dòʼò tsìy yə̀ ghu zwaa nəniy, Pità ə̀ zù dòʼò fwumi yə̀ nə̀ ghu awote.

⁵⁶Abù wà ùyəŋi ù lìy ù kə faʼa nəniy, u kòʼ tsə we awote ù də nəniy, u kaʼ ani sòʼ dè we dzìy nə̀, “Wù wə̀ kə də tsə̀ sòʼo nə̀ we.”

⁵⁷Pità ə kwuni twe màʼà dzày tsə nə, “A niə̀ wə̀, Mə boʼò kwu way we.”

⁵⁸I kə̀ tswôŋì nəway, wù ù lìy ə kòʼ tsə sòʼò we dzày yə̀ a we nə, “Wò kə̀ də̀ tsə̀ sòʼo anə uzə u ghu.” Pità ə kwuni bə̀lì kə we nə, “A mwâbe, Mə kə̀ wày dzə anə uzə u ghu.”

⁵⁹Abu ufwa iwùŋ ù mòʼ u tsìy tsə nəniy, wù ù liy tsə̀ŋə̀ dzìy kwùnə̀ kə nə̀, “Ndzə̀m ndzə̀m, wù wə̀ kə̀ də̀ tsə̀ sòʼo nə̀ we, aŋwòə ù də wè Galìlî.”

⁶⁰Pità ə kwuni dzày yə̀ a we nə, “A mwâbe, Mə boʼò kwu dyaŋi dzə̀ way ayiə yə wò dzìy nəniy.” Mwaʼ kiy ə dyaŋi twuŋ fyi bə̀ nə̀ ù namə dzə̀ŋə̀ ŋwò.

⁶¹Mwe ə̀ mbyi ə kyèmì tsìy bə̀ liay yə̀ Pità, Pità ə dyaŋi tà myìŋì bə̀ àyiə yə Mwe ə̀ mbyi kə̀ dzây na awò we nə̀, “Â mwaʼkiy ani tuŋ nə̀ zwù kə utsuk kiy à ki də nə̀ wò mə twe màʼa miə nsòŋ inti.”

⁶²U bvwami tsìy fyi yə̀ a bee zɛ̀b fyi bə̀ bòŋ kə̀ diy kiy.

⁶³Aghû yə̀ ghu kə kwi nəniy Yesù, ghu kaʼ ani tsoʼ we, bwad sòʼo we.

⁶⁴Ghu ə bwàm na tsə asə ə we dzìy a we nə, “Soŋ kòʼo! À wò bwad ndiə?”

⁶⁵Ghu ə dzày sòʼò ndə̀mə̀ àyiə à ŋəmə fôŋ ə̀ awò we.

⁶⁶Abù utsuk u zwu tsə nəniy, ŋgəd tə ghè à saʼa tənsaʼ yiy dzəŋə bə̀ nə̀ ŋgəd tə aghè à lwaʼa yiy nə̀ àghè tyi dee ulàŋ wìy, ghu nìy tyili bə̀ Yesù anə səkə aghù.

⁶⁷Ghu mee a we nə, “Abu wò ndzə̀m də nəniy Wù wə̀ Zə̀kìy sûw kyili na nəniy nə̀ ù dòʼò kə̀dòŋ, wò dzày bə̀ â ghə̀d.” Yesù ə kwuni bə̀lì kə ghu nə̀, “Abu Mə dzây bə̂, ghà kî bɛmə dzə̀ wày miə.

⁶⁸Abu mə bəb bə̂ soʼò gha nə̀ ayiə yiy ghà kî bə̀lì sòʼò wày miə.

⁶⁹Ani kwuni kaʼ ŋwò tsə nyiə̀ zù isə, Wà Wù kì zè dyòʼò tswi tsə anə ukwe u nyiə wiy akə̀lə̀ Zə̀ kə̀ kə kwu nəniy daʼa kiy kə tsîy fyi nəniy ufyiə u dzə̀m.”

⁷⁰Ghu dzə̀m ə kwò bəb fyi bə̀ a we nə, “Wò də Wà Kə̀zə̀ yə?” U bə̀lìy kə a ghu nə, “Ghà mə dzày nə̀ mə də we.”

⁷¹Ghu dzìy nə̀, “Ŋgà ndoʼò kàmə̀ khu zələ ndzòʼò ìyiə ì ghaa yiy, ù sì dzây dzə̂ nə̀ ìdzwə i we yiy ə?”