Read Isu Lukâs 24 Bible Online

Lukâs 24 - Isu bible

Lukâs 24

¹Nə̀ bələ̀bə̀lə̀ tìy anə ntsuk fə səsə fiy anə ivən, iyəŋi kə nìy kə uzuu ùlyimə wiy ghu kə byay na nəniy, ghu bòʼò zù nə̀ ù ghe wiy anə isày.

²Ghu zù kòʼ yə̀ nə̀ faŋkwoʼ kə itay kə mə byiŋi ŋwò anə idzwə isày,

³ghu tsìy nyi yə̀, ghu kə̀ kwuni kôʼ nəway ivən i Mwe ə̀ mbyi Yesù yìy.

⁴Ghu təmi yə̀ àtaʼ nə̀ ghu kâm kwu way iyiə yə ghu dziy zəŋi, aghê àliy yiy àbè ə màŋ bù fyi kə akə̀lə̀ ghu nə̀ ndzwu tə̀ mwaa tiy anə iwè.

⁵Iyəŋi yə ŋwò tàtsəŋ kə tu bvwə̀ fwo yə̀ ntwùmə̀sə ambvə̀d. Aghû yə̀ àbè ə kwuni dzày yə̀ a ghu nə, “A də̌ kìə̀ ghà khu nəniy aghê à taw yiy a lòʼo kə aghè pfə yiy də nəniy ate ə?”

⁶Yesù way dzə fəə, ù mə zɛ̀mə̀ dzwoŋi anə ipfə, ghà myiŋì tsə ayiə yə ù kə dzîy nəniy awò ghà yəə ù kə də nə̀ ghà anə inaʼ i Galìlî nə̀,

⁷“Wà Wù kwu ani zù anə wokə aghè àbɛbə, ghu ni baa we anə kàʼ fə təzəd, ani zù kwùm mə̀ ntsukə inti, ù nî zɛ̀mə̀ dzwoŋi bə̀.”

⁸Ghu ə tàmòʼ bə̀ àyiə yə Yesù kə dzîy nəniy awò ghu.

⁹Abù ghu ŋwô tsə nəniy anə isày zù dzwoŋi, ghu ə dzày yə̀ àyiə ghè yə̀ awò tsə̀təndii tə̀ liy tə ivəm nə̀ ghe yiy imòʼ dzày yə̀ sòʼò awò àghè liy yə àdzə̀m.

¹⁰Iyəŋi yə̀ kə də̌ Mə̀li wə ù kə ŋwô bə̂ a Magdalà, nə̀ Dzòwanà, nə̀ Mə̀li zə̂ ə̀ Dzɛ̂m, nə̀ iyəŋi àliy yə ghu kə zû dzəŋi nə̀ ghu anə isày, ghu kə zù dzày yə̀ àyiə yə awò àghě ntwùm ə̀ Yesù yìy.

¹¹Aghee ntwùm ə̀ Yesù ə kwunə mòʼò kə̀ nə̀ ghu nɛbə àyiə, ghu ə twe ani bɛmə nyə̀ awò ghu.

¹²Pità ə kwuni ghàʼ ŋwò kə idoŋ, ù wìy ù nyəŋə zê akə̀lə̀ isày, ù zòʼ tsə liay nyi yə̀, kòʼ tsə kə bə̂d kə ndzwu kə kə kyɛli doʼò kə̀ zwum kiy, u ŋwò dzwoŋi yə̀, idzwə i zwum we nə̀ à sì fyi kìə̀.

¹³A ntsuk fə ghè fə̀ kə, tsə̀təndii tə we tə̀liy tiy kə zè anə nàʼà fə̀ liy fiy ghu tyoŋə nə̀ à də Ɛmayùs, fə kə də yəə wù nə bwîy fwatəwùŋ ìbè ani ŋwò tsə a Yèlusalèm.

¹⁴Ghu dzìy yə̀ àyiə yə a fyi nəniy anə iwè.

¹⁵Yəə ghu sî dzîy nəniy, dzìy kwùnə̀ ayiə a ghè yə̀ anə iwè, Yesù ə kway bə̀ ghu, u bwìy dzəŋə yə̀ nə̀ ghu.

¹⁶Ghu dzə̀ŋə̀ zè kə̀ ŋwò nə̀ ghu koʼò kyilə way we.

¹⁷U bəb yə̀ a ghu nə, “Ghà boʼò bwìy, dzìy yə̀ nə̀ìndiə anə iwè?” Ghu ŋwò təmi dòʼò bə̀ àtaʼ, nə̀ ghu mə mwe dòʼò dyaŋi.

¹⁸Wù ù mòʼ anə uzə u ghu twoŋə Klèopàs u bəb yə̀ a we nə, “I ghii də̌ nə̀ à mày kə wô wò bwìy nyi bə̂ nəniy fə anə inaʼ i Yèlusalèm ə̀, wò sì də kwu way ayiə yə a fyi nəniy fə anə inaʼ ə̀?”

¹⁹Yesù ə bəb tsə nə̀, “À də̀ iyiə ì kìə̀?” Ghu ə dzìy a we nə, “Ayiə yə kwùmə̀ yə̀ nə̀ Yesù wù ìnaʼ i Nazalèt, ù kə də tsə nəniy wè ntwùm ə̀ Kə̀zə̀. U zəŋə kwab tə ayiə dzìy sòʼò àyiə asoŋə̀ yìy anə səkə k-a-zə̀ nə̀ anə sə kə ghù.

²⁰Ŋgəd tə aghè àlwaʼa yiy nə̀ ŋgəd tə inaʼ tələ tiy kə̀ kwi kə we, nìy nyə̀ yə̀ nə̀ ghu ba wiy we anə kàʼ fə təzəd.

²¹Ghè kə kwu kə nə̀ ù də̌ wù wə̀ ù kì bè bii ŋwô fyiə nəniy aghee Islàel yìy anə wokə aghě Lûm. À bòʼò kaʼi way dzə ì yiy, i də nə̀ à nyə̀ zè mə̀ ntsukə inti ate anə ayiə ghè yə̀.

²²Ì yu i kâm də nəniy, iyəŋi àliy yiy mə bəd zù awo anə isày bù dzày bə̀ ghə̀d nə̀ àyiə à zwumə idzwə yiy,

²³ghu zû kaw kɛ̀ ŋwò ivən i we yiy, ghu bû dzày bə̂ awò ghə̀d nə̀ ghu kôʼ àyiə yə Zə̀kiy dê bə̂ â ghu, tsə̀təndii t-a-zə̀ tìy dziy a ghu nə ù də̌ ù tâw wìy.

²⁴Aghû yə̀ ghè faʼà dzəŋə nə̀ ghu àliy yiy zû awo anə isày, zù bvwami kòʼ yə̀ kə ighəd anə yiə yə iyəŋi yə̀ bù dzày nəniy, ghu kə̀ kôʼ soʼò nəway we.”

²⁵Yesù ə dyaŋi dzày yə̀ a ghu nə, “Ghà boʼò lyàʼà mə̀yə, ghà sî sè kɛ̀ nə̀ìndiə ifwe yiy ani bɛmə kə ayiə yə aghee ntwùm ə̀ Kə̀zə̀ kə dzây na nəniy ə?

²⁶Ghu kə kə̀ dzây na nə̀ Wù wə̀ Zə̀kìy sûw kyili na nə̀ ù kwu ani fii anə ndə̀mə̀ ndə̀mə̀ tə ayiə, ani zù nyi kwoʼ yə̀ a n-a-vələ tə̀ ù ki kwu ŋkwiʼi miy awo ə̀?”

²⁷U nìy bə̀ àyiə yə ghu kə twâ na nəniy kwùmə̀ yə̀ a zoŋə̀ we ani kaʼ bə̀ anə uŋwàʼà u Musîs nə̀ ùŋwàʼà u aghee ntwùm ə̀ Kə̀zə̀ àdzə̀m, u tyi dzày yə̀ awò ghu.

²⁸Abù aghû yə̀ àbè zê nəniy ani zù kwùm mà anə inaʼ yə ghu kə zê nəniy ate, Yesù zəŋi tsə yəə ù dziy tuu na sə tsə ghu.

²⁹Ghu mee a we nə, “Ba bwuni tsə fə nə̀ ghə̀d, aŋwòə soŋə fiy mə zù inyi nyiə̀ nimə yə̀ ŋwò.” Yesù ə zù dòʼò yə̀ sòʼò nə̀ ghu a ndaw.

³⁰Abù Yesù dòʼò bə̂ nəniy ani nyi nə̀ ghu, u nìy kə kəba lwì tsə boʼ fyi yə̀ nyə̀ yə̀ awò ghu.

³¹Asə ə ghu dyaŋi ŋwò fwiy kə, ghu ə kòʼ kəli yə̀ we, u ŋwò saŋ tsə anə səkə ghu.

³²Ghu kaʼ ani dzày anə iwè nə̀, “Fôŋ tə ŋgàŋ tǐy mə̀ zwə̀ə̀ bə̀ wày anə dzəd anə yiə yə ù mə̀ dzìy bə̂ ayiə yə a də nəniy anə ŋwàʼà k-a-zə̀ awò ŋgàŋ ə̀?”

³³Ghu ə dyaŋi ŋwò təŋ tsə a nyi ghè yə̀ dzwoŋi zù a Yèlusalèm, kaw yə̀ loʼo kə tsə̀təndii tə ìvəm nə̀ ghe yiy mòʼ kə dzəŋə doʼò ate nə̀ aghè liy yiy,

³⁴ghu dzîy nəniy nə̀, “Mwe ə̀ mbyi mə ndzə̀m zɛ̀mə̀, ù mə dè sòʼò uwee wiy awò Simùn!”

³⁵Aghû yə̀ àbè ghu dzày yə̀ sòʼò ayiə yə ghu kə bwîy dzəŋə nə̀ we anə dzəd, nə̀ ayiə yə ghu kə kôʼ kəli we a soŋə fə u boʼ fyi yə̂ bakiy.

³⁶Yee aghû yə̀ àbè namə dzîy nəniy ayiə yə ghii, Yesù nə̀ ùwee u we wiy ə maŋ fyi kə kə anə uzə u ghu, dzìy a ghu nə, “Ibvay də nə̀ ghà.”

³⁷Ghu ə kwuni ŋwò tà tsəŋ kə, kaʼ ani tsəŋi mòʼò kə nə̀ ghu mə kòʼ àmbvə̂ntsə.

³⁸Yesù ə bəb yə̀ a ghu nə, “Ghà tsəŋə kìə̀? Fôŋ təli tiy sî twe myàʼà ani bɛmə iyîkìə̀?

³⁹Kòʼò nənìy awo yamə nə̀ àwuu yamə nə̀ à ndzə̀m də̀ miə nə̀ ùwe nam wiy, ghà mwâm bə̂ mìə̀, tə̀ ghà ki kəli tsə, aŋwòə àmbvə̂ntsə kwu way nyâm tə uwè tìy, nə̀ uvəb wiy.”

⁴⁰Abù Yesù dzày mâ tsə nəniy ayiə yə, u dè yə̀ awo we, nə̀ awee a we yiy awò ghu.

⁴¹Dwiʼi kiy kwoʼ fyi bə̀ ghu, tsə̀təndii tə kə̀ nam bɛmə way, adzwə zwum sòʼò ghu. U bəb yə̀ a ghu nə, “Ghà kwu kìə̀ fəə ani nyi ə?”

⁴²Ghu ə nyìə̀ yə̀ we nə̀ ìtsi ì kwee yiy,

⁴³u nìy fwu yə̀ anə səkə ghu.

⁴⁴U dzày yə̀ a ghu nə, “À yù də ayiə yə mə kə dzìy awò ghà yəə mə kə nam də nə̀ ghà. Mə kə dzìy nə̀, ayiə adzə̀m ghu kə twâ na nəniy kwùmə̀ bə̀ nə̀ mìə̀, a kwu ani bù fyi àsoŋə yìy. Ani kaʼ ŋwò bə̀ uŋwàʼà ulàŋ wə̀ Musîs kə twâ nə̀ aghee ntwùm ə̀ Kə̀zə̀ nə̀ uŋwàʼà u təndzàŋə u Devìd.”

⁴⁵U zəŋi tsə nə̀ ghu zuw kəli tsə ŋwàʼà k-a-zə̀.

⁴⁶U dzày tsə a ghu nə, “I twâ dòʼò anə ŋwàʼà k-a-zə̀ nə̀, ‘Wù wə̀ Zə̀kìy sûw kyili na nə̀ ù dòʼò kə̀dòŋ, ù kwu ani fii. Ù kwu sòʼò ani zɛ̀mə̀ dzwoŋi bə̀ anə ipfə anə ibàmi ntsukə inti.’ ”

⁴⁷Ghu kə twà na sòʼò nə̀, “Ghu nî nìʼà ntwùm ə̀ Kə̀zə̀ anə izəd yam nə̀ aghê kyemì ŋwô bə̂ anə ayiə ghu àbɛbə yiy, tə̀ Zə̀kìy nîyzə̂ àyiə ghu àbɛbə yiy anə nàʼà tə̀dzə̀m, nə̀ ì kaʼ bə̀ kə a Yèlusalèm.

⁴⁸Ghà kwu ani dzày yə̀ àyiə yə a fyi nəniy àdzə̀m.

⁴⁹Mə kî twumə bə̀ Ghà nə̀ wù wə̀ Təli wam kə tɛb naa. Ghà kwuni kwu ani ləmə tsə anə inaʼ zù kwùm sòŋə fə daʼa kiy kî ŋwò tswi bə̂ ate idoŋ kə bû azoŋə̀ ghà.”

⁵⁰Yesù ə nìy ŋwò fyi yə̀ nə̀ tsə̀təndii tə we zù nə̀ ghu a Betanì, yəə ghu zû kûm tsə awo, ù nìy fyi kə awo we, lwì tsə ghu.

⁵¹Abù ù lwì tsə nəniy ghu, Zə̀kìy nìy ŋwò kwoʼ kə we idoŋ anə sə kə ghu.

⁵²Tsə̀təndii tə we tiy dyaŋi kwum tsə utuw, fwùlì tsə we ŋwò zù dzwoŋi a Yèlusalèm nə̀ ghu ŋge dyoʼò ŋwò.

⁵³Ghu də̌ a ndàw Kə̀zə̀ nsoŋə indzə̀m nyiə̀ ùkali â Zə̀kìy.