Read Isu Lukâs 5 Bible Online

Lukâs 5 - Isu bible

Lukâs 5

¹Abù kə ntsuk ùliy wiy Yesù ə təmi dòʼò a ŋgùŋə̀ ìŋwù i Gènesalèt, aghee lwe dòʼò yə̀ awo ani bù zwuli ayiə yə ù tyiə dê nəniy ntwùm ə̀ Kə̀zə̀ ate.

²U kòʼ tsə umfə̀n ùbè awo ghu təŋì na nəniy nə̀ nə̀ mwe mə zù ani zù sùw wee tə ghu.

³Yesù ə nyi dòʼò kə anə mfə̀n kə̀liy kiy. À kə kwu Simùn, u dzày yə̀ nə̀ ù soŋ nyi yə̀ nə̀ ghe kiy anə dzwî, Simùn ə soŋ na nyi yə̀ sòʼò. U dòʼò tswi tsə ate, kaʼ ani tyi dè ayiə awò ŋwàâ kə aghù kə̀ kə kə də̀ nəniy anə iŋgwùŋə.

⁴Abù ù tyii dê mâ tsə ayiə yiy, u dzày yə̀ awò Simùn a we nə, “Soŋ nyi fwuli yə nə̀ mfə̀n kə̀ anə lòʼo kə̀ myilə kiy tə̀ ghà maʼà nyi tsə təwee ghà ki kwi tətsi.”

⁵Simùn mee a we nə, “A Mwe ə̀ Mbyi, ghè mə tswàb bwuni iwee yiy nə̀ ntsukə tiy nə̀ ghě kə̀ kwi fə̀nɛ̀bəwà fìy. Yəə à sì dzày bə̂ dzə̂ wô, ghee myaʼà yə̀ kə ŋwò wee tələ tiy.”

⁶Ghu ə màʼà nyi tswi yə̀ tə̀wee, zù bòʼò fyi kwoʼ bə̀ ndə̀mə̀ ndə̀mə̀ tə̀tsi, yəə tə nə bən saa maʼà wee tə.

⁷Ghu ŋwò bvuʼi fyi kə mə̀mbòŋ ani twoŋə bə̀ àghě umfə̀n àliy yə nə̀ ghu bû fây kə ghu, aghû yə̀ ə bù təmdzəŋə tsə sè fyi kə tsi tə, kwe tsə anə umfə̀n ù bè u lwe kə kaʼ dyaŋi yə̀ ani mələ.

⁸Abù Simùn Pità kòʼ tsə nəniy ayiə yə a fyi nəniy, u nyaʼa yə̀ a təŋə̀ Yesù dzày yə̀ a we nə, “A Mwe ə̀ Mbyi kə̀ koŋə bə̀ dzə̀ a kələ̀ mìə̀, Mə də wù ù bɛbə̀ wìy!”

⁹Ù kə dzày fyi bə̀ aghi, aŋwòə idzwə yiy maa ŋge zwum we, nə̀ àghè àdzə̀m anə yiə yə ghu kə kwi nəniy tsi tiy ate.

¹⁰Aghû yə̀ ghu kə faʼà dzəŋə nə̀ Pità, twoŋə Dzɛ̂m nə̀ Dzwan awa Zebedì adzwə maa ŋge zwum sòʼo ghu ate anə yiə ghà yə̀. Yesù ə dzày yə̀ awò Simùn a we nə, “Kə tsəŋ dzə̀ ani kaʼ tsə nyiə zù isəə wò kì nyìə̀ kwi bə̀ aghù.”

¹¹Abù Ghu sî na koŋə bə̂ nəniy ùmfə̀n wə̀ a kìingûŋ, ghu na sə tsə ufyiə udzə̀m, dyaŋi ŋwò dzwùmì yə̀ Yesù.

¹²Yesù ə zù kə ntsuk fə̀liy fiy anə nàʼà fə̀liy fiy, u kòʼ tsə wù ù lìy nə̀ ùŋkə̀m wìy ŋge də azoŋə we awote, abù ù kòʼ yə̂ nəniy Yesù, u bvə̀ fwuə yə̀ ùtwùmusə a mbvə̀d bwoʼ Yesù nə̀ wokiy ghii dzìy tsə nə̀, “A Mwe ə̀ mbyi, abu wò liə nəniy wò də̀ ŋwô ani zəŋi taw kə miə.”

¹³Yesù ə nìày fyi yə̀ ùkwe mwàm tsə we, dzày tsə a we nə, “Mə liə ŋwô, taw kə. Ùŋkə̀m wə̀ ə dyaŋi mày fyi ŋwò tsə a zoŋə̀ wù wə̀.”

¹⁴Yesù ə sə̀ŋì fyi yə̀ kətswuŋi awò wù wə̀ a we nə, “Kəə wò nì dzìy iyiə yə awò wù lìy, kwuni zu dě yə̀ uwe niə̀ wìy awò wù ùlwaʼà wìy, tə̀ ù fwə̀d kòʼ tsə̀ nə̀ wə̀ mə taw ə̀. Wə̀ sâ yə̂ ùfyiə wə Musîs kə twâ na an-a-làŋ ani dè yə̀ awò àghè nə̀ wò mə taw.”

¹⁵Ùzòŋ u Yesù wìy ə foŋ tsìy kyabi yə̀, ndə̀mə̀ àghè ə ba tə̀ŋì fyi bə̀ ani bù zuw ayiə yə ù nìʼà nəniy, nə̀ u zəŋi taw bə̂ soʼò àghû anə dzàŋ tə ghu.

¹⁶Yesù ə kwuni ŋwò zù a lòʼo k-a-nù ani zù gwùŋì.

¹⁷Abù kə tsuk ù liy, Yesù sì tyii dê nəniy ayiə yiy, aghee Falàsî à liy nə̀ àghè tyi dee ulàŋ u Musîs wìy kə də̀ awo zwulə àyiə yə ù dzìy nəniy. Ghu kə ŋwò bə̀ anə nàʼà mə̀ ìndzə̀m anə mbwòʼ ə̀ Galìlî, nə̀ a mbwòʼ ə̀ Dzùdiyà nə̀ inaʼ i Yèlusalèm. À kə də̌ nə̀ Zə̀kìy mə nyə̀ tsə Yesù nə̀ daʼa kiy ani zəŋi taw dzâŋ tə̀dzə̀m.

¹⁸Aghê àliy yiy zù bòʼò bə̀ wù lìy nə̀ ù mə pfə dòʼò bə̂dkə̀bə̂d. Ghu ə bòʼò bə̀ we anə kəmbuŋ. Ghu kə liə ani bòʼò na yə̀ we a təŋə̀ Yesù.

¹⁹Ghu ə kwuni də̀m kè ani nìy nyi yə̀ we aŋwòə aghê maa ŋge lwe tsìy, ghu kwoʼ kə anə tuw kə ndaw bwòʼ nyi tsə kəbwôʼ, ghu nyoʼo nyili nyi tswi tsə wù ù dzaŋə̀ wə̀ anə səkə ghù anə fòʼ yə̀ Yesù də nəniy ate.

²⁰Abù Yesù kòʼ tsə ndzòʼò ìbɛmə yə ghu kwu nəniy, u dzày yə̀ â wù ù dzaŋə̀ wə̀ a we nə, “A fwu wam, Mə mə nìyzə̀ bɛb tiə̀ tìy.”

²¹Aghee Falàsî nə̀ àghè tyi dee ulàŋ wìy ə kaʼ ani ŋwuŋi dzə̀ŋì anə iwè dzìy tsə nə, “À yù də̌ ndiə, ù nyàʼà nəniy Zəkìy ə̀? Àmày kə Kəzə̀ kə də ani nìyzə̀ ibɛb i wû.”

²²Yesù ə kwu ayiə yə ghu moʼò nəniy, u bəb yə̀ a ghu nə, “Ghà moʼò nə̀ìndiə ndzòʼò ayiə yiy ə?

²³À bvay tsìy fyi ìghaa yiy? Ani dzày tsə â wù wə̀ a we nə, Mə mə nìyzə̀ ibɛb yiə̀ yìy moo ani dzày yə̀ a we nə, ŋwòə kə idoŋ wò kaʼ yə̂ ani bwìy ə?”

²⁴Mə ki kwuni dê bə̂ â ghà nə̀, “Wà Wù kwu ŋwô daʼa kiy fə anə mbyi ani nìyzə̀ ìbɛb.” U dyaŋi kyèmì dzày yə̀ awò wù wə̀ ù pfə doʼò bə̂dkə̀bə̂d a we nə, “Ŋwòə kə idoŋ wò nîy kə mbuŋ kiə̀ wò ŋwô zû a ndaw.”

²⁵Wù wə̀ ə dyaŋi ghàʼ ŋwò kə anə səkə aghè àdzə̀m. U nìy kə mbuŋ kə we, ŋwò zù a ndaw kyalə yə̀ Kəzə̀.

²⁶Adzwə aghè àdzə̀m ə zwum. Ghu tsəŋ sòʼò, nyə̀ ùkali awò Zə̀kìy, tsə̀ŋə̀ dzìy kwùnə̀ kə anə iwè nə̀, “A mə kòʼ kwab təyiə tiy zii a də kamə kôʼkôʼ.”

²⁷Abù ì yû tsìy ŋwò tsə, Yesù ə nyili màʼà tsə inaʼ i ghà yə̀, zù kòʼ tsə wù lìy ù khii nəniy ŋwàʼà kə̀tsuw kiy ghu tyoŋə nəniy we nə̀ a də Levì. Ù kə də̀ a ndàw ì khii ŋwàʼà kə̀tsuw kiy, Yesù ə dzày yə̀ a we nə, “Dzwùmi bə̀ miə.”

²⁸Levì ə na sə tsə ufyiə udzə̀m ŋwò dzwùmì yə̀ sòʼò we.

²⁹Levì ə zù nə̀ Yesù a ndàw we, zù zəŋi tsə inyi ì nê yìy awò Yesù. Ndə̀mə̀ àghè à khii ŋwàʼà kə̀tsuw kiy kə lwe dòʼò awote ndaw nə̀ ndə̀mə̀ tə ghè àliy.

³⁰Aghee Falàsî àliy yiy nə̀ àghè à tyi dee ulàŋ àliy yiy kə də̀ sòʼo awote, ghu ə kaʼ ani ŋwuŋi dzə̀ŋì, bəbə â tsə̀təndii tə Yesù a ghu nə, “A də̌ kìə̀ ghǎ nyiə fwumə nə̀ aghè khii ŋwàʼà kə̀tsuw kiy nə̀ aghè bɛbə àliy yiy ə?”

³¹Yesù ə bèlì kə a ghu nə, “À kwu dzə̀ way aghê à taw yiy ani zù tə̀ wù ùtiə byaŋi ghu, à kwuni kwu aghê dzaŋə ani zù tə̀ wù ùtiə byaŋi ghu.

³²Mə kə̀ bû dzə̂ ani bù toŋə àghù yə̀ ghu də nəniy tsitsi anə sə k-a-zə̀, mə kwuni bù ani bù toŋə aghê àbɛbə yiy nə̀ ghu kyemì ŋwô fyi bə̂ anə bɛb tə ghu.”

³³Ghu dzày yə̀ a we nə, “Tsə̀təndii tə Dzwan tiy nə̀ tə ghee Falàsî tìy bâ tsə̀ ani bam adzwə gwùŋə̀, tə tiə̀ tìy kwunə nyiə mwuə sòʼò mə̀nlwù ə.”

³⁴Yesù ə bəb yə̀ a ghu nə, “Aghee də ŋwô ani bù bam adzwə a loʼo kə inyi kə̀ niiy kə iwè kìy, nə̀ ŋə̀mə̀ wìyəŋi nam də fwumi nə̀ ghu ə?

³⁵Soŋə fiy kî kwunə kpe bə̀ ŋwò ghu kî nîy ŋwô kə nə̀ ŋə̀mə̀ wìyəŋi wə awò ghu, ghu ki bamə yə adzwə a nyi ghà yə̀.”

³⁶Yesù ə dzày yə̀ ghu nə̀ zə̀zə̌ fiy a ghu nə, wù lìy way ani khìy kə dzə̀ bə̀d kəndzwu kə̀ fyiə kiy ani tàŋì fè tsə bwôʼ kə ndzwu tə̀ wiy tiy ate. Abu ù zəŋi aghi, ndzwu tə̀ fyiə tə̀ kìy kəli tsə kəbwôʼ, bə̂d kə̀ fyiə kə ki də zè dzəŋə way nə̀ ndzwu tə̀ wiy tə.

³⁷Wù lìy wày dzə ani nìy kə sòʼò nlwù mə̀ fyiə̀ mìy, ù kwe tsə anə tsəd kə gùw nyàm kə̀ wiy kiy. Abu ù kwe tsə nəniy, nlwù mə̀ kî saa màʼà kə tsəd kə gùw nyàm kə ghà kə̀, nlwù mə̀ nə̀ tsəd kə gûw nyàm kə̀ kî này yə̀ an-a-nsə̀àŋì.

³⁸Ghu kwu ani kwe nlwù mə̀ fyiə̀ mìy anə tsəd kə gùw nyàm kə̀ fyiə kiy soʼo.

³⁹Wù lìy way dzə abu ù mu kyili bə̂ dzə̂ nlwù mə̀ tâw mìy, ù də nəniy ani dzày tsə nə̀ ghe nyiə̀ liə ani mu nsòŋə̀ ùlwù. Ghu taw dzìy tsə̀ kə nə̀, “À tòʼò kyòŋə̀ nlwù mə̀ wîy mə̀.”