Read Isu Lukâs 9 Bible Online

Lukâs 9 - Isu bible

Lukâs 9

¹A ntsuk ùliy wiy, Yesù ə toŋə na dzəŋə bə̀ tsə̀təndii tə we, nyə̀ tsə ghu nə̀ daʼa kiy ani dzwùm fyi nsìy mə̀bɛbə̀ mìy ìndzə̀m nə̀ ani byaŋi tədzaŋə̀.

²U dyaŋi twum fyi yə̀ ghu nə̀ ghu zû naʼà ntwum kwùmə̀ yə̀ nə̀ ayiə yə Zə̀kìy saʼa nəniy muə̀ tə aghè ə we tiy ate, ghu byaŋi soʼò àghè dzaŋə

³Yesù ə dzày yə̀ a ghu nə, “Ghà kə nîy dzə̀ fyiə kə̀liy kiy yəə à də̌ mbàŋ ìnyilì, moo kəwab, moo ufyânyiə, moo ukhiy, moo tə̀ndzwu ani kwuni kə.

⁴Ndaw yə ghu ŋgwam na nəniy gha ate, mùə yə̀ nənìy a ndàw ì ghà yə̀ ani zù kwùm a ntsuk fə ghà nî ŋwò fyiə anə inaʼ i ghè yə̀.

⁵Loʼo kə ghu də kə̀ ŋgwam na gha ate, ghà kwu ani ŋwò fyi awote anə inaʼ i ghè yə̀. Ghà ki bwoʼ maʼà tsə bvə̂ kə̀ kə də nəniy anə wù ghi ani dè tsə̀ nə̀ abu ntiə kiy kwiy ghu, wo kəli kiy way ate.”

⁶Tsə̀təndii tə ŋwò tsə bwìy tsìy yə̀ nàʼà tə̀dzə̀m, nìʼà tsìy yə̀ ntwùm ìdzòŋə̀ yə̀, zəŋə taw sòʼò aghè dzaŋə yiy anə loʼo tə tə̀dzə̀m ghu kə bwîy zù nəniy ate.

⁷Abù Helòd, dòŋ kə Galilî zuw tsə nəniy ayiə yə àdzə̀m Yesù kə zəŋi nəniy, u fwəd kə, aŋwòə aghê liy kə dzìy nə̀ Dzwan wə ù kə nyə̀ aghê nə̀ mwi m-à-zə̀ mìy, ù mə kàm zɛ̀mə̀ dzwoŋi bə̀ anə ipfə.

⁸Aghê à liy yiy mee Yesù də̌ Èlaydzà ù zɛmə dzwoŋi bə anə ipfə, àliy yiy dzìy nə̀ ù də̌ wè ntùm ə̀ Kə̀zə̀ ù wî wìy ù zɛ̀mə̀ dzwoŋi bə̂ ani ipfə.

⁹Helòd mee mə̀ kə mbaŋ gbû ŋwô dzə̂ tuw kə Dzwan ki, wù ù ghè wə̀ kwuni də̀ ndiə mə̀ tsəŋə̀ zuw kə uzòŋ u we wiy yə? Helòd ə khu kə dzəd ani kòʼ Yesù.

¹⁰Abù aghê ntwum ə̀ Yesù yìy bù dzwoŋi nəniy, ghu bù dzày yə̀ àyiə yə ghu fâʼ nəniy adzə̀m. U kwuni ŋwò tsə nə̀ ghu zù anə lòʼò k-a-nù anə inaʼi Bètsaydà.

¹¹Abù ŋwàâ kə̀ kaw kəli fyi kə lòʼò kə ghu zê nəniy ate, ghu ŋwò dzwùmì yə̀ we. U ŋgwam na tsə ghu, kaʼ yə kə ani tyi dee ghu nə̀ ayiə yiy kwùmə yə nə̀ àyiə yə Zə̀kìy saʼa aghee we yiy ate, zəŋi taw kə sòʼò àghè dzaŋə.

¹²Abù inyi yiy sî zè nəniy ani zù nəmə, tsə̀təndii tə Yesù tìy ə bù ìvəm nə̀ ìghe tiy ibè dzày yə̀ a we nə̀, “Nyəli màʼà aghû yə̀, ghu zû anə nàʼà mə̀, nə̀ ìswum yə i kwulì də nəniy fəə tə̀ ghu zû kaw ufânyiə nə̀ loʼo tə̀ bvənə tiy, aŋwòə ŋgà fə̂ də̀ anə ukè.”

¹³Yesù ə dzày tsə â ghu nə̀, “À kwu gha ani nyə̀ ghu nə̀ fyiə kə̀ nyiə kiy.” Ghu mee a we nə, “Ghè fə̂ kwu kə ghɛbə tə uba ìtà nə̀ tsi tiy ìbè. Wò liə nə̀ ghè zû zwe bə̂ ùfànyiə awò ŋwàâ kə̀ kə̀dzə̀m ə̀?

¹⁴Ŋwàâ kə ghù kə̀ kə nyiə kwoʼo yə̀ ŋwò kaam tiy ità.” Yesù dzày yə̀ â tsə̀təndii tə we tə nə̀, “Ghà zəŋi tsə nə̀ aghû yə̀ dòʼò tswi tsə anə ukaʼ, ghu kiy dyoʼo yə vəm miy intà anə kaʼ kəmòʼ.”

¹⁵Abù tsə̀təndii tə̀ zəŋi tsə aghû yə̀ dòʼò tswi mâ tsə nəniy ambvə̀d,

¹⁶Yesù ə nìy yə̀ ghɛbə tə uba tə ìtà nə̀ tsi tə ìbè. U lia kwoʼ kə idoŋ, nyə̀ tsə kəzòŋə̀ â Zə̀kìy. U byiʼi fyi yə̀ nyə̀ yə̀ ùba wə â tsə̀təndii tə we tə, nə̀ ghu dzâw tsî yə̂ awò àghè dzə̀m.

¹⁷Ghu ə dzə̀m nyi kwu dzwàb tsə, nasə yə̀ ùfànyiə ùliy wiy. Tsə̀təndii tə Yesù tìy ə kwumi tsìy yə̀ mbòʼò mə̀mbà mə̀ kwumi lwe tsə uŋkhìy ùvəm nə̀ ùghe wiy ubè anə ufànyiə wə ghu kə də kə̀ nyi mâ.

¹⁸Abù kə ntsuk ùliy Yesù kə də nə̀ tsə̀təndii tə we tiy anə lòʼo k-a-nù ani zù gwùŋì. U bəb yə̀ â ghu nə̀, “Aghê dzîy kyabə tsə̀ nə̀ mə də ndiə?”

¹⁹Ghu bə̀lì kə we nə̀, “À liy dziy nə̀ wò də̌ Dzwan wə ù nyə̀ nəniy mwi m-à-zə̀ mìy, àliy dziy wò də Èlaydzà, àliy yiy dziy wò də̌ wè ntwùm ə̀ Kə̀zə̀ ù wîy ùlìy wìy ù zɛ̀mə̀ dzwoŋi bə̂ anə ipfə.”

²⁰U kàm bəb tsə a ghu nə, “Ghà kwunə dzìy nə̀ mə də ndiə?” Pità ə bə̀lìy kə a we nə, “Wò də̌ wù wə̀ Zə̀kìy sûw kyili na nəniy.”

²¹Yesù ə sə̀ŋì fyi yə̀ kətswuŋi awò ghu nə̀ kəə ghu nə̀ dzîy nyiə̀ fyiə â wù lìy.

²²U dzày tsə nə̀, “Wà Wù kwu ani fii anə ndə̀mə̀ ndə̀mə̀ tə yiə, ŋgəd tə inaʼ nə̀ ŋgəd tə aghè àlwaʼa, nə̀ àghè tyi dee ulàŋ wìy ki twe maʼà we, ghu wiy maʼa soʼò we, a ki bu ntsukə miy tsîy tsə ìnti, ù kì zɛ̀mə̀ dzwoŋi bə̀ anə ipfə.”

²³U dzày yə̀ awò aghè àdzə̀m nə̀, “Abu wù dziy dzwùmì mìə̀, u twe màʼà tsə uwee u we, ù bòʼò kə kâʼ fə təzəd fə we ntsuk ə indzə̀m, dzwùmə̀ bə̀ mìə̀.

²⁴Aŋwòə wù wə̀ ù liə nəniy ani fày ŋwò fyi bə̀ ìmùə̀ i we, ù kì nìì myàʼà ŋwò. Wù wə̀ u kì nìì myaʼà nəniy imuə̀ i we yiy â mìə̀, ù kì kyilə dzwəŋə ŋwò imuə̀ i we yiy.

²⁵Wò kì nyiə fyiə kə kìə̀ abu wò kəli mâ kə ufyiə udzə̀m fə anə mbyi kwuni này màʼà yə̀ ìmùə̀ yə̂ ə?

²⁶Abu wò də̀lə nə̀ tuw kiy azoŋə̀ mìə̀ nə̀ ntwum yam, Wà Wù nì də̀lə̀ sòʼò ŋwò nə̀ tuw kiy azoŋə̀ wò abu ù dzwoŋi bə̂ nəniy nə̀ ŋkwiʼi mə̀ tè we nə̀ tsə̀təndii t-a-zə̀ tə̀ zwe tiy.

²⁷Mə ndzəmə̀ dzìy bə̀ ŋwò nə̀, aghê liy yiy də fəə nə̀ ghu kî pfə dzə̀ wày nə̀ ghu kə̀ kôʼ yəə Zə̀kìy saʼa nəniy aghê we yiy ate nə̀ daʼa kiy.”

²⁸Abù ntsukə miy tsîy tsə ìnfamə, Yesù ə nìy kə Pità nə̀ Dzwan nə̀ Dzɛ̂m kwoʼ yə̀ nə̀ ghu anə ukàʼ ani zù gwùŋì.

²⁹Abù ù gwùŋə̀ nəniy, utwumusə u we wiy ŋwò kwuni kə, ndzwu tə we tiy ŋge ŋwò mwày fyi bə̀,

³⁰Aghê liy yiy àbè ə màŋ bù fyi kə awote. Aghê ghè yə̀ kə də̀ Musîs nə̀ Èlaydzà.

³¹Ghu dzìy yə̀ àyiə yə ipfə i we yiy zəŋi tə̀ ayiə bû doʼò asoŋə̀ yìy, anə inaʼ i Yèlusalèm anə yiə yə Zə̀kìy tsə̂m nəniy.

³²A də̌ nə̀ nə̀ Pità bvənə ŋwò, ghu ŋwò tà zɛ̀mə̀ bə̀ dyaŋi kòʼ yə̀ yəə Yesù mwà nəniy ate nə̀ aghè yə̀ àbè ghu kə tiy dzəŋi nə̀ we.

³³Anə yiə yə Musîs nə̀ Èlaydzà ŋwò tsə nəniy akə̀lə̀ Yesù, dzwoŋi yə̀, Pità ə dzày yə̀ awò we nə̀, “A mwe, loʼo kə̀ kpe ŋwô yəə a ni muə̀ ate. Ghèe buk kə umfwùə ùti, kə̀mòʼ â wò, kə̀mòʼ awò Musîs, kə̀mòʼ awò Èlaydzà.” Nə̀ ù bòʼò kwu dyaŋi way ayiə yə ù dzìy nəniy.

³⁴Anə yiə yə ù namə dzəŋə̀ yə̂, mbàʼ tìy ə tswi bù kəd na tsə ghu, ghu tsəŋ yəə mbàʼ tìy kəd naa nəniy ghu.

³⁵Dzə̀ ə dyaŋi fyi bə̀ ate anə təmbàʼ dzày tsə nə̀, “A wə̀ də̌ wa nam mə sây kə, ghà si zuw yə awò we”

³⁶Anə yiə yə dzə̀ yə̀ dzə̀ŋì mà tsə nəniy, Yesù ə dòʼò səə tsə kə nə̀noŋə̀ we awote. Ghu kə kə̀ dzây fyi dzə̂ àyiə yə ghu kôʼ nəniy awò wù lìy wìy.

³⁷Abù tsutsu wə ghu ŋwò fyi tswi bə̀ anə ukàʼ, ŋwàâ kə ghù kə̀ ə kway yə̀ Yesù.

³⁸Wù ùmòʼ anə ŋwàâ kə̀ ə twoŋə fyi bə̀ we nə̀, “A àtyi dè, mə bwoʼ wô nə̀ wokiy kòʼo kə kə̀lə̀ fə wa nam fə̀mòʼ.

³⁹Usîy ùbɛbə wiy bâ anə kwi we, u wuli màʼà bə̀ we ambvə̀d u bvoʼə mə̀mbòŋ, u tsəŋə, ntsəbə tiy fyiə we anə idzwə, usîy wə̀ twe təŋə sòʼò ani nyəli màʼà we.

⁴⁰Mə mə̀ bwoʼ tsə̀təndii tiə̀ nə̀ wokiy nə̀ ghu dzwûm fyi, ghu də̂m kê nəniy.”

⁴¹Yesù ə dzày yə̀ a ghu nə, “Ghà kwu dzə̀ way ibɛmə ìliy yiy! Mə kwu ani dòʼò nə̀ ghà anə ghab kə̀ ghaa kiy ə? Mə kwu ani kwù fòŋ anə ghab kə̀ ghaa kiy nə̀ ghà ə?” U dyaŋi dzày yə̀ â wù wə̀ a we nə, “Niy bə wa niə̀ wə̀ fəə.”

⁴²Abù yə wa nə̀ sì bè nəniy usîy wə̀ dyaŋi kwi tsə we wuli màʼà bə̀ we ambvə̀d nə̀ fwàʼ kìy, u tìì dòʼò yə̀. Yesù ə dyaŋi tsày kə̀làŋ nə̀ usîy wə̀ fyi ŋwò, u zəŋi taw kə wa nə, nìy nyə̀ yə̀ we awò təli.

⁴³Adzwə ə zwum aghê àdzə̀m, anə yiə yə ghu kôʼ kwab tə yiə tə daʼa k-a-zə̀kìy faʼà nəniy ate. Yəə aghû yə̀ nam də kə nə̀ àdzwə àzwumə, anə yiə yə Yesù zəŋi nəniy.Yesù ə dzày yə̀ awò tsə̀təndii tə we tiy nə̀,

⁴⁴“Kəə ghà ə nə̀ nìyzə̂ ayiə yə mə dziy dzây bə̂ awò ghà nyiə. Wà Wù kì zè nyiə anə wokə aghè bɛbə.”

⁴⁵Tsə̀təndi tə we tiy kə kə̀ kwuni zuw kəli ayiə yə u dzày, ghu kə kwu way iyiə yə ù myìŋə̀ nəniy, ghu tsəŋ səə sòʼò ani bəb yə̀ â we nə̀ i myiŋə̀ nə̀ìndiə.

⁴⁶Tsə̀təndii tə Yesù tìy ə kaʼ tsə ani dyimi dzə̀ŋì anə iwè kwùmə̀ yə̀ nə̀ wù wə̀ ù kì dyoʼò nəniy tuw kiy anə uzə u ghu.

⁴⁷Yesù ə kwu ayiə yə ghu moʼò, u nìy bə̀ ànìsə̀ akə̀lə̀ we.

⁴⁸U dyaŋi dzày yə̀ a ghu nə, “Wù wə̀ ù tsəb ŋgwam naa nəniy ànìsə̀ yəə à də̌ ù wə̀ anə izəd yam u yî ŋgwam na miə, wù wə̀ ù ŋgwam nəniy miə, ù mìə̀ kə̀ kaʼi ŋgwam na dzə̂, ù ŋgwam na sòʼò wù wə̀ ù twum bə̂ miə. Wù wə̀ ù gwò də anə uzə ghi a də̌ we wù ù sòŋə̀ wìy.”

⁴⁹Dzwan ə dzày yə̀ awò Yesù a we nə, “A Mwe Ghee mə̀ kòʼ wù lìy ù dzwùmə̀ fyiə nəniy nsìy mə̀bɛbə̀ mìy anə izəd yiə̀, ghè dzây yə̂ a we nə ù bwi na aŋwòə ù wày dzə anə uzə u ŋgàŋ.”

⁵⁰Yesù mee a we nə, “Kə̀ nə we bwi na, aŋwòə wù wə̀ ù də dzwə way nə̀ ŋgàŋ à də̌ wù wə̀ ù taʼa nə̀ ŋgàŋ.”

⁵¹Abù soŋə fiy kpe bə̂ â Yesù ani ŋwò kwoʼ an-a-vələ, u tsə̀m tsə ani zù anə naʼ i Yèlusalèm.

⁵²U twum yə̀ àghù isə anə nàʼà fə̀liy fiy a mbwòʼ ə̀ Sàmaliyà, nə̀ ghu zû byay na tsə kəloʼo awò ìghe ani zù suki ate.

⁵³Abù ù zù kwum tsə nəniy awote, aghee inaʼ i ghè yə̀ ə kwuni twe ani ŋgwam na we aŋwòə ù kə zè dyaŋə a Yèlusalèm.

⁵⁴Abù Dzɛ̂m nə̀ Dzwan kôʼ nəniy ndzòʼò àyiə yə ghi, ghu bəb yə̀ a we nə, “A Mwe ə̀ Mbyi, a twoŋə tswi bə̂ ùvələ tə̀ u bû fwu maʼà àghù yə̀ anə yiə yə Èlaydzà kə zəŋi nəniy kwukwu ə̀?”

⁵⁵Yesù ə kwuni kwà na yə̀ ghu,

⁵⁶Yesù ə nìy kə tsə̀təndii tə we zù anə inaʼ ì ŋwô yìy.

⁵⁷Ayiə ghu sî zê nəniy anə dzəd, wù lìy ə dzày yə̀ â Yesù nə̀, “Mə dzwumə̀ bè ŋwò wô abu wò zè kə yə.”

⁵⁸Yesù ə dzày yə̀ a we nə, “Ŋkəŋə miy kwu ubwôʼ u ghu in muə nəniy ate, ŋwùni kwu soʼo ndaw tiy ani mùə̀ ate, Wà Wù kwuni kwu way loʼo kə̀ gaʼa k-a-tuw kiy.”

⁵⁹U dzày yə̀ â wù ù lìy a we nə, “Bù, dzwùmi bə̀ miə,” Wù wə̀ ə bɛmə kə dzày yə̀ a we nə̀, “A mwe ə̀ mbyi, təmi tsə mə zû kələ bə̂ dzə̂ təli wam.”

⁶⁰Yesù ə kwuni dzày yə̀ a we nə, “Na tə̀ aghû yə̀ ghu pfə doʼò ghu kələ yə̂ àghè pfə yiy, fàʼ kiə̀ kì də ani nàʼa kyabi ntwum yə ì kwùmə̀ yə̂ nə̀ loʼo kə Zəkìy saʼa nəniy ate.”

⁶¹Wè lìy wìy sòʼò, u dzày yə̀ â we nə̀, “A Mwe ə̀ Mbyi, Mə liə ani dzwùmi sòʼò wò. Kwuni ləmə tsə mə zû dzay yə̂ dzə̂ awò aghù yamə nə̀ ghu doʼò kədzôŋ.”

⁶²Yesù ə dzày yə̀ a we nə, “Wu wə̀ ù tsəb kwiy tsə dzə̂ dzòŋ kìy, kàmə̀ bàŋə̀ lia yə̀ ibàm, ù kə̀ dwâm kwoʼ kpe dzə̂ a lòʼo kə Zə̀kìy saʼa nəniy ate.”