Read Isu Dzwan 10 Bible Online

Dzwan 10 - Isu bible

Dzwan 10

¹Yesù kə dzày tsə awò àghě Falàsî yìy a ghu nə, “Mə ndzɛ̀mə̀ dzìy bə̀ àyiə àsoŋə̀ yìy â ghà nə̀ wù wə̀ ù ghab tsîy nyi nəniy anə mbà tə̀ndzù, nə̀ ù kə̀ tsîy nəway anə ufə̀b u mbà, ù də̌ wù ù tsoŋə̀ wìy, ù də̀ sòʼò wù wə̀ ù də̀mə̀ nìy nəniy ufyiə u ghù wìy.

²A kwuni bû wù wə̀ ù tsìy nyi yə̂ nəniy anə ufə̀b u mbà tə̀ ndzù nə̀ ù kə̀ ghab nyi kwoʼ kə dzə̂ nəway, à də̌ we àbàʼàtə̀ndzù.

³Wù wə̀ ù kyìŋə̀ nəniy ufə̂b u mbà tə̀ndzù wìy, ù fwukə tsə ùfə̀b u mbà, àbàʼàtə̀ndzù tsìy nyi kwoʼ yə̀ awote anə mbà. Ndzù tə we tiy zuw kyilə ŋwǒ dzə̀ we. Ù twoŋə tsə ndzù tə we anə azəd, u bàʼ tsìy fyi yə̀ ghu abee.

⁴Abù ù bàʼ tsìy fyi yə̂ dzə̂ nəniy ndzù tə we tiy anə mbà, u təmi yə̀ isəə, twoŋə tsə ndzù tə we, tə dzwùmə̀ yə̀ we aŋwòə ghu zuw kyilə ŋwòə dzə̀ we.

⁵Ndzù tə ghè tə̀ kwuni wày dzə ani dzwùmì wù wə̀ ghu də kwu way. Ghu kî fə̀lə̀ ŋwò tsə ŋwò aŋwòə ghu zuw kyilə dzə̀ way dzə̀ ə̀ we.”

⁶Yesù kə dzày yə̀ zə̀zə̌ fə â ghu, ghu də kə̀ kwuni zuw kəli dzə̂ ayiə yə ù kə myiŋə̀ nəniy ani dzày zə̀zə̌ fə.

⁷Yesù ə kàm dzày fwuli tsə a ghu nə, “Mə dzîy bə̀ àyiə àsoŋə̀ yìy awò ghà nə̀ mə də ufə̂b u mbà u təndzù.

⁸Aghû yə̀ àdzə̀m ghu kə bû nəniy isə azoŋə̀ mìə̀, lyòʼò bə̀ àghù nə̀ ghu də nə̀ àbàʼàtə̀ndzù, ghu kə də̀ aghê tsoŋə yiy, də sòʼò aghû yə̀ ghu də̀mə̀ zəŋə àyiə, ndzù tìy kə kə̀ kwuni zuw kəli nəway ghu.

⁹Mə də ufə̂b u mbà, aghû yə̀ ghu tsîy nyi nəniy anə mbà abidzɛ̀mə̀ mìə̀, Zə̀kìy kî bii fyiə ŋwò ghu. Ghu ki tsiiy fyiə zè nyiə bee dzwəŋə bə̀ anə mbà.

¹⁰Wù ù tsoŋə wìy bè tsə̀ kə ani bù tsoŋ, nə̀ ani bù wiy, nə̀ ani bù byɛbi màʼà sòʼò. Mə kwuni bù nə̀ ghǎ nì də ani kəli imùə̀ itsà. Imùə̀ yə̀ i kpe doʼò nəniy.

¹¹Mə də àbàʼàtə̀ndzù ù dzòŋə̀ wə̀ ù də nəniy ani pfə nyə̀ àsə ə ndzù tə we.

¹²Wù wə̀ ghu mâŋ nìy bə̂ nəniy we nə̀ ù bù fàʼ anə təndzù, ani kəli ukhiy, də̀ ghii nə̀ ù wày dzə àbàʼàtə̀ndzù, nə̀ ù wày soʼo mwe ə̀ tə̀ndzù, bəə ù kòʼ tsə nəniy kəŋ kiy bê nəniy ani bù kwi təndzù, u ŋwò, tuu na sə tsə təndzù. Kəŋ kiy bù kwi tsə ndzù, ndzù tə sàlì tuu yə̀.

¹³Wù ù ghè wə̀ ŋwò tee aŋwòə ghu we mâŋ nìy bə̀ ŋwò, ù nia dzə̀ wày isə yiy anə fyiə kə kə fyiə nəniy nə̀ ndzù tə ghè tə̀.

¹⁴Mə də àbàʼàtə̀ndzù ùdzòŋə̀ wìy. Anə yiə Tà kwu nəniy miə, mə kwu soʼo nəniy Tà, à də̀ ighəd anə yiə yə mə kwu nəniy ndzù tam tiy, ndzù tam tiy kwu soʼo miə. Mə liə ŋwò ani pfə anə utuw ndzù tam.

¹⁶Ndzù tam tə̀liy tiy də ŋwô tə də wày dzə anə mbà tə̀ndzù yə̀. Mə kwu ani zù nìy bə̀ sòʼò ghu, ghu ki zuw kəli tsə soʼò dzə̀ yam. Mə ki təm na fwumi yə̂ ghu nə̀ ndzù tə̀liy tə. Saʼ kə təndzù kìy ki doʼò tsə kə̀mòʼ nə̀ àbàʼàtə̀ndzù ùmòʼ soʼo.

¹⁷Təli wam liə ŋwò miə aŋwòə mə liə ŋwô ani pfə tə̀ mə ki kâm doʼò dzwoŋi bə̂ utaw.

¹⁸Wù lìy wày dzə ani zəŋi nə̀ mə pfə. À tsə̀m tsə miə ani pfə. Mə kwu ŋwô daʼa kiy ani nyə̀ imuə̀ yam, mə kwu sòʼò ŋwô daʼa kiy ani nìy ŋwò dzwoŋi imuə̀ yam. À də̀ yəə təli wam dzây nəniy nə̀ mə zəŋi.”

¹⁹Aghee Dzû yə̀ ghu kə zuw nəniy ayiə yə ghii, ghu dzàw dòʼò yə̀ anə iwè.

²⁰Ndə̀mə̀ ghě Dzû aliy yiy dzìy nə̀, “Ù kwu nsìy mə̀bɛbə̀ mìy anə uwè! Ù nyə̀ zəə ŋwò! Ghà kə zuw dzə̀ ayiə yə ù dzìy nəniy.”

²¹Aghê liy yiy kwuni dzìy nə̀, “Wù wə̀ ù kwu nəniy usîy ù bɛbə wiy, ù wày dzə ani dzə̀ŋì ndzòʼò àyiə yə. Usîy ù bɛbə wiy də mə̀yə ani zəŋi nə̀ wù ù fɛbə̀ wìy kaʼ ani kòʼ tə̀loʼo ə?”

²²Inyi i lwaʼa i ndàw Kə̀zə̀ yìy kə də̀ a Yèlusalèm anə sòŋə fə ufəb.

²³Yesù kə bwìy tsìy yə̀ anə bə̀d kə ndàw Kə̀zə̀ kə̀ Solomùn kə biə nəniy ghu kə twoŋə nə̀ à də̌ Pòtikò [6]

²⁴Ŋgəd tə ghě Dzû yə̀ ghu kə də nəniy awote, ghu bù dzɛ̀mə̀ na kə Yəsù, bɛbə a we nə, “Wò kì byìlə̀ bə̀ zəŋi ghəd ə? Dzǎy bə ghəd nə̀ ayiə soŋə̀. Wò də̌ wù wə̀ Zə̀kìy zuw kyili na nəniy yə̀?”

²⁵Yesù bə̀lì kə a ghu nə, “Mə mâ dzày â ghà, ghà də kə̀ kwuni bɛmə nəway â mìə. Ayiə yiə yə mə zəŋə nəniy anə daʼa kə Təli wam a dê bə̀ ŋwòə ndzòʼò wù wə̀ mə də nəniy we.

²⁶Ghà ə kə̀ kwuni bɛmə nəway â mìə̀ aŋwòə ghà way dzə ndzù tam.

²⁷Ndzù tam tiy zuw kyilə ŋwòə dzə̀ yam. Mə kwu sòʼò ŋwô ghu. Ghu dzwùmə̀ bə̀ mìə̀,

²⁸mə nyiə̀ ghu nə̀ ìmuə̀ itsà yìy. Ghu nî pfə kòʼ wày. Fyiə kə̀liy kiy way ani nìy ŋwò ghu awò mìə̀.

²⁹Fyiə kə Təli wam nyiə̀ na nəniy awò mìə̀, kə tsîy fyi ŋwô ùfyiə udzə̀m. Fyiə kə̀li kiy way dzə ani nìy ŋwò fyi dzə̀ ghu anə wo kə Tà.

³⁰Mə də anə fyiə kəmòʼ nə̀ Təli wam.”

³¹Aghee ghè yə̀ kàm tswi kwumi fwuli kə atay ani təm wiy we ate.

³²Yesù ə dzày tsə a ghu nə, “Mə mə zəŋi ndə̀mə̀ ndə̀mə tə yiə àdzoŋə̀ tə̀ Təli wam kə nyiə̀ nəniy nə̀ mə bû zəŋi anə sə kəli. Ghà liə ani təm wiy maʼà mìə̀ anə iyiə ìghaa yiy?”

³³Ghu bə̀lə̀ kə a we nə, “Ghè liə dzə̀ wày ani təm wiy wô nə̀ atay yiy bòʼ àyiə dzoŋə̀ yə̀ wò zəŋi nəniy. Ghè liə ani təm wiy wô aŋwòə wò nyàʼà Kə̀zə̀. Wò mbaŋ də̌ wù kwuni də̀mə̀ ani dzày nə̀ wò də̀ Kəzə̀.”

³⁴Yesù ə bə̀lì kə ghu nə̀, “I kə̀ twâ dòʼò nəway anə ulàŋ ghi nə̀ ‘Ghà də uzə̀ ə?’

³⁵Ghà kwu ŋwô nə̀ ayiə yə ŋwàʼà k-a-zə̀ kìy dzîy nəniy à də̀ ayiə àsoŋə̀ yìy. Zə̀kìy kə twoŋə àghù yə̀ ù kə nyiə̀ nəniy ntwum yə â ghu nə̀ ghu də̀ uzə̀.

³⁶Tà kə sày kə miə, twum bə̀ mìə̀ anə mbyi. Ghà də mə̀yə ani dzày nə̀ mə nyaʼà Kə̀zə̀ bòʼ ìyiə yə mə dzây tsə nəniy nə̀ mə də Wà Kə̀zə̀ ə?

³⁷Abu mə də zəŋə way ayiə yə Təli wam twum bə̂ nəniy miə nə̀ mə bû zəŋi, kəə ghà ə nə̀ byemə dzə̂ ayiə yam à dziy yiy.

³⁸Abu mə kwuni zəŋə nəniy ayiə yə ù twum bə̂ miə̀ nə̀ mə bû zəŋi, ghà boʼ twe kə ani bɛmə kə awò mìə̀, ghà lyiɛbi bɛmə kə ayiə yə mə zəŋə nəniy. Tə̀ ghà nə̀ kyilə təŋ tsə nə̀ Təli də azoŋə̀ mìə̀, mə də soʼo azoŋə̀ Təli.”

³⁹Ghu nam liə ani kwi fwuli tsə Yesù, Yesù ə kwuni fày fyi tsə tuu ŋwò dyaŋi.

⁴⁰Yesù ə dàŋ dzwoŋi yə̀ a ŋgwùŋə̀ dzwì Dzudàn anə lòʼo kə Dzwan kə nyiə̀ nəniy aghê yìy ate nə̀ mwi m-à-zə̀ mìy, zù dòʼò yə̀ awote.

⁴¹Ndə̀mə̀ àghù ə bù akə̀lə̀ we, dzày tsə nə̀ “Dzwan kə kə̀ zəŋi dzə̂ nəway mali kə iyiə kə̀li kiy, ayiə yə àdzə̀m ù kə kwuni dzây nəniy kwùmə̀ yə̀ nə̀ wù wə̀ à kə də̌ àsoŋə̀ yìy.”

⁴²Ndə̀mə̀ àghù yə̀ ghu kə də nəniy awote ə bɛmə â we.