Read Isu Dzwan 11 Bible Online

Dzwan 11 - Isu bible

Dzwan 11

¹Wù liy kə də̀ tsə̀ kə ŋwô, ghu kə twoŋə nəniy we nə̀ à də̀ Lazalùs, ù kə muə̀ a Betanì, u kaʼ tsə ani dzàŋ. Betanì kə də̀ inaʼ yə Mə̀li nə̀ àzə̀ we Matà ghu kə muə nəniy ate.

²(Mə̀li də wìyəŋi wə̀ ù kə kyili nəniy mbvu mə̀ lyimə̀ mìy anə awèe Mwe ə̀ mbyi, Yesù, zə̀d maʼà kə anə ŋwù t-a-tuw tə we. Lazalùs wə̀ ù kə dzàŋə̀ nəniy, ù kə də̌ àzə̀ we.)

³Awizə̂ ə Lazalùs iyəŋi nàʼà yə̀ â Yesù a we nə, “A Mwe ə̀ mbyi, fwu yiə̀ wə̀, wò ŋge liə nəniy we, ù dzàŋə̀ ŋwò.”

⁴Abù Yesù zuw tsə nəniy ayiə ghè yə̀ ghii, u dzày tsə nə̀, “Idzâŋ yə̀ kì wiy màʼà dzə̀ wày Lazalùs. I dzâŋ yə̀ də̀ ani zəŋi tsə nə̀ aghê kəli tsə nə̀ Zə̀kìy də wù ùsòŋə̀ wìy. À də̀ sòʼo dzəd yə aghê kî kyilə nəniy ndzòʼò daʼa kə Wà Kə̀zə̀ kwu nəniy.”

⁵Yesù kə ŋge liə Matà, nə̀ àzə̀ ə̀ we ùyəŋi nə̀ Lazalùs.

⁶Yəə Yesù zuw tsə nəniy nə̀ Lazalùs dzàŋə̀ ŋwò, ù nam dòʼò tsə ntsukə imbè awote anə lòʼo kə ù kə də nəniy ate.

⁷U dyaŋi dzày tsə awò tsə̀təndii tə we tiy a ghu nə, “Ŋgà ə zû dzwoŋi a Dzùdiyà.”

⁸Tsə̀təndii tə we tiy dzày yə̀ a we nə, “Sa kiy kamə bvu tsə dzə̂ anə yiə yə aghee ghè yə̀ awote kə liə nəniy ani təm wiy màʼà wò nə̀ àtay yiy, wò nam liə kə ani zù dzwoŋi awote ə?”

⁹Yesù ə bə̀lì kə ghu nə̀, “Ghab kə asə ə̀ zwe kiy we kwu fwa tə iwùŋ ìvəm nə̀ ghe tiy ibè ə? Aghù yə̀ ghu bwîy nəniy anə soŋə fə asə ə̀ zwe gha yə̀, ghu way dzə ani tyàŋì bvə̀, aŋwòə ghu koʼò ŋwò yə asə yiy zwee nəniy ate.

¹⁰Abu aghê kwuni bwîy nəniy nə̀ ntsukə tiy, ghu kiy tyaŋì bvə̂, aŋwòə asə ə zwe way dzə.”

¹¹Yesù ə dzày tsə ayiə yə ghii, kwe fwuli tsə ate nə̀, “Wè fə̀lə̀ ŋgàŋ Lazalùs màŋə̀ bvunə ŋwò, mə kwu ani zù zɛ̀m ŋwò kə we idoŋ.”

¹²Tsə̀təndii tə Yesù tiy bə̀lì kə a we nə, “A Mwe ə̀ mbyi, abu à də nə̀ ù bvunə ŋwò, i dê tsə nə̀ ù ki taw ŋwò.”

¹³Mbwuni tə Yesù kə dzîy nəniy nə̀ Lazalùs bvunə ŋwò u kə ba dzìy nə̀ Lazalùs mə pfə, tsə̀təndii tə we tiy kwuni mòʼò kə nə̀ ù dzìy ndzə̀m ndzə̀m kə təmbwuni.

¹⁴Yesù ə dzày yə̀ a ghu nə̀, “Lazalùs mə pfə,

¹⁵mə kwuni dyoʼo ŋwò yə mə kə̀ də̀ wày awote aŋwòə ipfə i we yiy kî zəŋə ŋwò nə̀ ghà ə bɛmə kə â mìə̀. Ghà bû, a ŋwô zû kôʼ we.”

¹⁶Tomàs wə̀ izəd i we ìliy yiy kə də nə̀ à də̌ Ŋgòŋ, u dzày tsə â tsə̀təndii tə Yesù tə̀liy tə, a ghu nə̀, “Ghà bû ŋgà zû dzəŋi nə̀ àtyi dè, tə̀ ŋgà ə nə̀ də ani pfə dzəŋi nə̀ we bəə à də nə̀ à də̀ ipfə.”

¹⁷Abù Yesù bù kwùm tsə nəniy a Betanì, u bù kaw kəli fyi kə nə̀ Lazalùs mə dòʼo ntsukə miy inkyàʼì anə isày yəə ghu kə kələ nəniy we.

¹⁸Wù kə də̀ ani nìy fwa tə iwùŋ ìbè ani ŋwò tsə a Yèlusalèm, bwìy zù kwùm a Betanì.

¹⁹A də̌ nə̀ ndə̀mə̀ àghě Dzû yìy mə bù awote ani bù kòʼ Matà we nə̀ Mə̀li, ghu kyimi tsə fôŋ tə ghu anə ipfə i àzə̀.

²⁰Abù Matà zuw tsə nəniy nə̀ Yesù nyìə̀ bè ŋwò, u tsìy fyi yə̀ a bee ani zù kpe nìy bə̀ Yesù. Mə̀li kwuni dòʼò tsə kə a ndaw.

²¹Matà ə dzày yə̀ awò Yesù a we nə, “A Mwe ə̀ mbyi, abu wò kə də nəniy fə, àzə̀ wam kə dzǐy pfə dzə̀ wày!

²²Mə kwuni kwu ŋwô nə̀ abu à də kə kiə̀ wò ŋwa yə̂ nəniy nyiə̀ awò Zə̀kìy, Zə̀kìy kî nyə̀ ŋwò â wò.”

²³Yesù ə dzày yə̀ a we nə, “Àzə̀ yiə̀ kì zɛ̀mə̀ dzwəŋə bə̀ ŋwò anə ipfə.”

²⁴Matà bə̀lì kə a we nə, “Mə kwu ŋwô nə̀ ù nì zɛ̀mə̀ dzwəŋə bə̀ ŋwò anə ipfə, à ni də soʼo a tsuk fə isaʼ anə sòŋə̀ fə aghê pfə yiy nî zɛ̀mə̀ bə̂ nəniy ate.”

²⁵Yesù ə bə̀lì kə a we nə, “Mə də wù wə̀ mə zɛmə̀ kə nəniy aghû yìy anə ipfə, də̀ sòʼò wù wə̀ ù nyiə̀ nəniy aghû yìy nə̀ imuə̀ yìy. Aghû yə̀ ghu bɛmə nəniy â mìə̀, abu ghu tsəb pfə kə ŋwô, ghu nî zɛ̀mə̀ dzwəŋə bə̀ ŋwò anə ipfə.

²⁶Aghû yə̀ ghu bɛmə nəniy â mìə̀ nə̀ ghu nam də̀ utaw, ghu nî pfə kòʼ dzə̀ wày. Wò bɛmə ŋwô àyiə yə mə dzîy nəniy ə̀?”

²⁷Matà ə bə̀lì kə a we nə, “Ìny, a Mwe ə̀ mbyi, mə bɛmə ŋwô nə̀ wò də̌ wù wə̀ Zə̀kìy sûw kyili na. Wò də̌ Wà Kə̀zə̀, wù wə̀ ù kə kwu nəniy ani bù fə̀ anə mbyi.”

²⁸Yəə Matà dzây mà tsə nəniy ayiə yə, u tsìy nyi yə̀ a ndaw, twoŋə tsə àzə̀ ə we Mə̀li tsoŋ dzày tsə a we nə, “Àtyi dè də̀ fə, ù khu wò.”

²⁹Abù Mə̀li zuw tsə nəniy ayiə yə, ù zə̀àŋì nyəŋ tsìy fyi yə̀ a bee ani zù kòʼ Yesù.

³⁰Anə sòŋə fə ghè fə̀, à kə də̌ nə̀ Yesù kamə bû kwùm dzə̂ anə inaʼ, ù kə nam də̌ anə lòʼo kə Matà kə zû kôʼ nəniy we ate.

³¹Aghee Dzû yə̀ ghu kə də nəniy a ndaw nə̀ Mə̀li, ghu kyimi fòŋə̀ we, ghu kòʼ tsə yəə Mə̀li swây tsìy fyi nəniy uwe wiy abee, ghu dzwùmì tsìy fyi yə̀ we mòʼò kə nə̀ ù zè anə isày ani zù dìy awote.

³²Mə̀li zù kwùm tsə anə lòʼo kə Yesù kə də nəniy ate. Yəə ù kòʼ yə̂ nəniy Yesù ghii, u zù nyaʼa tswi tsə a təŋ ifwe i Yesù, dzày yə̀ a we nə, “A Mwe ə̀ mbyi, abu wò kə də nəniy fə, àzə̀ wam kə dzǐy pfə dzə̀ wày.”

³³Yəə Yesù kòʼ tsə nəniy yə ù dìy nəniy, kòʼ sòʼò àghě Dzû yə̀ ghu kə də fwumi nə̀ we, ghu dîy dzəŋə nə̀ we, fòŋ ə ŋge fyimi we ate anə yiə ghè yə̀.

³⁴Yesù ə bəb tsə a ghu nə, “Ghà ə we kələ na yiə?” Ghu bə̀lì kə a we nə, “A Mwe ə̀ mbyi, bùu kòʼò loʼo kə ghè kələ na nəniy we ate.”

³⁵Yesù ə dìy.

³⁶Aghê ghè yə̀ dzày tsə nə̀, “Ghà kôʼ ndzòʼò ìliə yə ù kə kwu nəniy azoŋə̀ Lazalùs.”

³⁷Aghê Dzû àliy yiy kwuni dzìy nə̀, “À də̌ we ù kə zəŋi nəniy wù ù fɛbə̀ wìy nə̀ u kaʼ ani kòʼ tə̀loʼo, ù kə wày ani zəŋi tsə nə̀ Lazalùs kə pfə dzə̀ ə̀?”

³⁸Yəə fòŋ kàm ŋge fyimi fwuli bə̂ nəniy Yesù, u ŋwò zù anə lòʼo kə isây Lazalùs yìy kə də nəniy ate. Isây i ghè yə̀ kə də̌ kətî ghu kə fê na nəniy idzwə i ghè yə̀ nə̀ ìtay ìnê yìy.

³⁹Yesù ə tsày tsə kəlâŋ a ghu nə, “Byiŋi ŋwò nə̀ itay yə fiiy!” Àzə̀ wù ù pfə̂ wə̀, ghu kə twoŋə nə̀ à də̌ Matà ə kwuni bə̀lì kə a we nə, “A Mwe ə̀ mbyi, zuk kiy ki ŋge fyi, aŋwòə ntsukə miy mə tsìy inkyàʼì anə yiə yə ghu kə kələ nəniy we.”

⁴⁰Yesù ə bəb yə̀ a we nə, “Mə kə kə̀ dzây nəway à ghà nə̀, abu gha bɛmə nəniy â mìə̀ ghà kî kòʼò ŋwò daʼa k-a-zə̀kìy yə̀?”

⁴¹Anə yiə yə ghu byiŋi ŋwô tsə nəniy itay yə, Yesù ə lia kwoʼ kə idoŋ, gwùŋi tsə nə̀, “A Tà, Mə nyiə̀ zoŋə̀ kiə̀, Mə kwu ŋwô nə̀ wò mə zuw igwuŋì yam yiy,

⁴²Mə kwu ŋwô nə̀ wò taw zuw tsə̀ ŋwò igwuŋì yam yiy. Mə kwuni gwùŋə̀ bə̀ nyìə̀ â wò bòʼ àghù yə̀ ghu təmi doʼò nəniy nyiə fə, ani zəŋi tsə nə̀ ghu nə̀ byemə kə nə̀ à twum wô miə.”

⁴³Yəə Yesù dzày mà tsə nəniy ayiə yə, u twoŋə tsə anə dzə̀ ìtaw yìy nə̀, “Lazalùs, ŋwòə fyi bə.”

⁴⁴Wù ù pfə wə̀ ə fyi bə̀ abee, ubə̂d u təndzwu wiy kə nam baŋ dòʼò kə anə uwè u we nə̀ anə awù ə we, bə̂d kə ndzwu kiy də̌ anə utwùmusə u we. Yesù ə dzày yə̀ a ghu nə̀, “Ghà zê ŋwô ùfyiə wiy azoŋə we, tə̀ ù zù a ndaw.”

⁴⁵Ndə̀mə̀ àghê Dzû yə̀ ghu kə bû nəniy ani bù twoŋə zuw Mə̀li, ghu kòʼ tsə ayiə yə Yesù kə zəŋi nəniy, ghu bɛmə kə â we.

⁴⁶Aghê Dzû àliy yiy kwuni fə̀d zù â àghě Falàsî yìy, dzày yə̀ àyiə yə Yesù kə zəŋi nəniy.

⁴⁷Ŋgəd tə aghè àlwaʼa tiy nə̀ àghě Falàsî yìy ə kwi tsə kədzəŋə a ndaw yə ghu kə isaʼa nəniy àyiə yiy ate, bəb tsə nə̀, “Ŋgà ni zəŋi mə̀yə nə̀ wù wə̀ anə mali tə yiə tə ù zəŋə nəniy yə?

⁴⁸Abu ŋgà na tsə kə wù wə̀ nə̀ ù si tsəŋə faʼa kə ndzòʼò àyiə yə, aghê àdzə̀m kî byemə ŋwò â we. Aghee Lûm yìy ki bû byɛbi maʼà ndàw Kə̀zə̀ ə̀ ŋgàŋ, nə̀ inaʼ i ŋgàŋ yìy.”

⁴⁹Wù ùmòʼ anə uzə u ghu, izəd yiy kə də nə̀ à də̀ Kaʼifàs, ù kə də soʼo wù ùlwaʼà ùnè wìy anə ŋə̀m kə ghè kə̀, u ŋwò dzày fyi kə nə̀, “Ghà liʼà ŋwò!

⁵⁰Ghà kwu way nə̀ i dzwàb bə̀ ŋwò â wù ùmòʼ ani pfə anə utuw u ndə̀mə̀ àghù tsìy fyi awò àghè dzə̀m ani pfə mà anə inaʼ ə̀?”

⁵¹Kaʼifàs kə kə̀ dzây dzə̂ àyiə yə anə daʼa kə we. Ù kə àyiə yə̀ dzày aŋwòə ù kə də̀ wù ùlwaʼà ùnè wìy anə ŋə̀m kə ghè kə̀. U dzày na zìì yə̀ nə̀ Yesù nì pfə anə utuw u ghè Dzû àdzə̀m.

⁵²Ù nì kaʼi pfə dzə̀ wày anə utuw ghě Dzù, ù nì pfə sòʼò anə nìy bə̀ àghě Kəzə̀ yə̀ ghu səaŋì doʼò kyabi tsə̂ nəniy, ghu doʼò tsə anə fyiə kəmòʼ.

⁵³Nìy ŋwò tsə a tsuk fə ghè fə̀, aghee Dzû yìy kaʼ tsə ani kaw dzəd yə ghu dziy wiy maʼà Yesù ate.

⁵⁴Yesù ə kàmə̀ bwìy wày anə ndaa anə yiə yə aghê dzə̀mə̀ də nəniy ani kòʼ we ate. U kwuni ŋwò zù anə inaʼ i Eflèm yə̀ i kə kwulì də nəniy akə̀lə̀ mbvə̀nə̀ kə̀sisi. U mùə̀ dòʼò yə̀ awote nə̀ tsə̀təndii tə we tiy.

⁵⁵Anə yiə yə inyi ŋkàmə̀tâzaʼà mìy kpe kioŋə mìà bə̂, ndə̀mə̀ àghě Dzû yə̀ ghu kə muə nəniy anə ukè inaʼ ə ŋwò kwoʼ zù a Yèlusalèm ani zù byay na tsə iwe tə̀ ghu zwu doʼò tsə anə yiə yə biə kə inàʼ kə ghu kiy kə dzîy nəniy.[7]

⁵⁶Ghu kaʼ yə̀ ani kaw kyabi tsə̀ Yesù, abù ghu zû təmi doʼò yə̂ anə be kə ndàw Kə̀zə̀, ghu bəbə anə iwè nə̀, “Ghà moʼò nə̀ ù kì bè kə ŋwò yə̀? Nyîliy, ù də̌ ani bù, nyîliy ù wày dzə ani bù.”

⁵⁷Ŋgəd tə aghè àlwaʼa tiy nə̀ àghě Falàsî yìy tsày tsə kəlâŋ nə̀ abu à də kə ndiə, ù kòʼ nəniy Yesù, u bù dzày bə̀ tə̀ ghu zû kwi we.