Read Isu Dzwan 12 Bible Online

Dzwan 12 - Isu bible

Dzwan 12

¹Ntsukə kə dòʼò səə in ntyìfoŋ ani nyi inyi i ŋkàmə̀tâzaʼà mìy, Yesù ə ŋwò tsə zù a Betanì, zù dòʼò yə̀ a ndàw Lazalùs wə̀ ù kə zɛ̂m ŋwò kə anə ipfə.

²A də̌ nə̀ ghu mə bya tsə̀ ayiə ə̀ nyiə yiy awò Yesù. Matà kaʼ yə̀ ani dzàw ùfànyiə, Lazalùs ə də̀ dzəŋi nə̀ àghû yə̀ ghu kə də̀ nəniy nə̀ Yesù anə ndàŋ ìnyiə̀ yìy.

³Mə̀li nìy kə sòʼò mbvu mə̀ lyimə̀ mìy, ghu kə zəŋi nəniy anə ufyiə ùliy wiy ghu twoŋə nə̀ à də̀ nâd, ivən yiy kə ŋge taw ate, kwe tsə anə awèe Yesù, zə̀d màʼà tsə nə̀ ŋwù t-a-tuw tə we tiy. Zuk kə məbvu kə lyìmì tsìy yə̀ anə ndaw idzə̀m.

⁴Tsə̀ndii Yesù ùlìy wìy ghu kə twoŋə nə̀ à də̀ Dzudàs Ìsə̀kalòt, ù kə bû fê fyi nəniy Yesù ibàm, kə də̀ sòʼò awote. U bəb tsə nə̀,

⁵“À də̌ kiə̀ a mə̀ də wày ani fè mbvu mə anə məmbwàm inti ə? Tə̀ a nîy kə ukhiy u ghè wə̀ a dzâw nyiə̀ awò àghù yə̀ ghu la nəniy yə?”

⁶Ù kə àyiə yə̀ dzày aŋwòə ù kə də̌ wù ù tsoŋə̀ wìy, à wày dzə nə̀ ù kə tòʼò ŋge yèmə̀ ŋwò azoŋə̀ àghè la yiy. Ù kə bà tsə ani nìy fyi kə ukhiy anə mbè kə ukhiy u fàʼ àyiə we ate yəə à kə sî byòʼò tsə̂ nəniy wè mbè kə ukhiy kiy.

⁷Yesù ə kwuni bə̀lì kə a we nə, “Kə̀ we fyimə dzə̀. Ù ghii zəŋi ani byay na ivən yam anə tsuk fə̀ ghu nî kyələ miə ate.

⁸Aghê lay yiy nî mày kòʼ dzə̀ wày anə fwumi kəli, Mə nî kwuni wày fwumi dzə nə̀ ghà anə sòŋə indzə̀m.”

⁹Ndə̀mə̀ aghě Dzû kə zuw tsə nə̀ Yesù də̌ a Betanì, ghu ŋwò kə zù awote. Ghu kə kə̀ kaʼi zû dzə̀ anə yiə yə Yesù kə də nəniy awote, ghu kə zù sòʼò ani zù kòʼ Lazalùs wə̀ Yesù kə zɛmə̀ dzwoŋi bə̂ nəniy anə ipfə.

¹⁰Ŋgəd tə aghè àlwaʼa tiy byay tsə ani wiy màʼà Lazalùs anə yiə yə ghu kə byay na soʼò nəniy ani wiy màʼà Yesù ate.

¹¹Ghu kə liə ani wiy màʼà Lazalùs aŋwòə ndə̀mə̀ àghě Dzû yə̀ kə nìə̀ twe myàʼà kwoʼo bə̀ ayiə ghu, kwunə byɛmə yə̀ awò Yesù, bòʼ àyiə yə Yesù kə zəŋi nəniy nə̀ we.

¹²Tswutswu wə̀, ŋwàâ kə̀ ghu kə̀ kə kə bû nəniy ani nyi inyi i ŋkàmə̀tâzaʼà mìy, ghu zuw tsə nə̀ Yesù kì bè a Yèlusalèm.

¹³Ghu nìy kə ubîy uswam, bənə yə̀ nə̀ ughe wiy ani zù kpe nìy we. Ghu zɛmə yə̀ ayiə nə̀, “Ukali wiy də awò Zə̀kìy! Zə̀kìy lwîy wù wə̀ ù bè nəniy anə izəd i Mwe ə̀ mbyi, Zə̀kìy lwîy dòŋ kə ghè Islàel!”

¹⁴Yesù ə kaw tsə lwəd kə kəndzàkâs, nyi kə ate ighəd anə yiə yə ŋwàʼà k-a-zə̀ kìy dzîy nəniy nə̀,

¹⁵“Aghee inaʼ i Zayòn, ghà kə tsəŋ dzə̀, Dòŋ kəli ki nyiə̀ bè ŋwò, ù nyəŋə bə anə tswaam kə Kəndzàkâs.”

¹⁶Səsə, tsə̀təndii tə Yesù tìy kə kə̀ zuw kəli dzə̂ ayiə yə àdzə̀m. À kə mày kə anə sòŋə fə̀ Zə̀kìy kə zɛmə̀ ŋwò kə nəniy Yesù anə ipfə anə daʼa kə we, ghu dyaŋi myìŋì bə̀ àyiə yə ŋwàʼà k-a-zə̀ kìy dzîy nəniy àdzə̀m kwùmə̀ yə̀ nə̀ we.

¹⁷Aghû yə̀ ghu kə də nəniy nə̀ Yesù anə sòŋə fə ù kə zɛmə̀ kə nəniy Lazalùs anə ipfə, ghu dzày nyə̀ yə̀ ayiə yə Yesù kə zəŋi nəniy awò àghù yìy.

¹⁸À yù də̀ ighe ndə̀mə̀ àghè kə zuw tsə nəniy ayiə yə ù zəŋi nəniy, ghu zù kway yə̀ we.

¹⁹Aghê Falàsî yìy dzày tsə anə iwè nə̀, “Ŋgà mə də̀m kè ani zəŋi iyiə nə̀ wù wə̀. Kòʼo, aghee mbyi dzə̀m nyìə̀ dzwùmə̀ we!”

²⁰Aghê Glîk àliy yiy kə də̀ sòʼò ŋwô anə fwumi kə ghù yə̀ ghu kə zû nəniy a Yèlusalèm ani zù fwùlì Kə̀zə̀ anə sòŋə fə inyi i ŋkàmə̀tâzaʼà mìy.

²¹Ghu zù akə̀lə̀ Filîp wə̀ ù kə fyi nəniy anə inaʼ i Bètsaydà, a mbwòʼ ə̀ Galìlî. Ghu dzày yə̀ a we nə, “A Àmbwê, ghè liə ani kòʼ Yesù.”

²²Filîp ə zù dzày yə̀ àyiə yə awò Andùlù. Filîp we nə̀ Andùlù, ghu zù dzày yə̀ àyiə yə â Yesù.

²³Yesù ə bə̀lì kə a ghu nə, “Soŋə fiy mə kpe nyiə â Zə̀kìy ani dè bə̀ nə̀ Wà Wù də̌ wù ùsòŋə̀ wìy.

²⁴Mə dzîy bə̀ àyiə àsoŋə̀ yìy â ghà nə̀ à mày kə nə̀ wù zu yə̀ ŋwò ìsaŋ yiy ambvə̀d, i pfə tsə, abu à də wày ghii, à kì dyòʼò kə ighe nə̀ noŋə̀ ìghè yiy. Abu i kwuni pfə tsə nəniy, i fyi kə, nɛmə kə, bù nə̀ ndə̀mə̀ àsə àliy yiy.

²⁵Wù wə̀ ù ŋge liə nəniy imùə̀ i we yiy, ù kì nìì myìʼà ŋwò. A kwuni bù wù wə̀ ù bà nəniy imuə̀ i we yiy fə anə mbyi, ù kì kyilə ŋwò imùə̀ itsà yìy.

²⁶Wù wə̀ ù liə nəniy ani doʼò wù kə̀fàʼ wam, ù kwu ani dzwùmì bə̀ mìə̀, tə̀ ù ki də nə̀ mìə̀ anə lòʼo kə mə̀ də nəniy ate. Təli wam kî nyiə̀ mə̀ŋkwiʼi awò wù wə̀ ù fàʼa nəniy awò mìə̀.”

²⁷“Fòŋ fyimə miə nyiə̀, mə kwu way iyiə yə mə də nəniy ani dzày. Mə kwuni wày ani dzày dzə̀ â Təli wam nə̀, ù kə bɛmə dzə̀ nə̀ mə fii nyiə̀ anə sòŋə fə. Mə kə baa bù fə̀ anə mbyi ani bù fii.

²⁸A Təli, zəŋi tsə nə̀, aghê mbyi yiy kəli tsə nə̀ wò də̌ wù ùsòŋə̀ wìy.” Dzə̀ ìlìy yìy fyi tswi bə̀ an-a-vələ, dzày tsə nə̀, “Mə mə bu nə̀ kwuʼi mə̀ sòŋə̀ mìy ate. Mə kî kàmə̀ nìy fwulə bə̀ ŋwò.”

²⁹Aghû yə̀ ghu kə də nəniy awote, ghu zuw tsə dzə̀ ìghè yə̀, aliy yiy dzìy à fə̀nə̀ ìwe, àliy yiy mee “À dzə̀ŋə̀ Tsə̀ndii ə̀ Kə̀zə̀ nə̀ we.”

³⁰Yesù ə dzày yə̀ awò ŋwàâ kə ghù kə̀ a ghu nə, “Dzə̀ ìghè yə̀ foŋ fyi tswi bə̀ ani fày ghà à wày dzə ani fày mìə̀.

³¹Soŋə fiy mə kpe nyiə â Zə̀kìy ani saʼ aghê mbyi yə ate. Zə̀kìy kî dzwùmə̀ ŋwò fyiə wù wə̀ ù saʼa nəniy mbyi nyiə̀.

³²Abu Zə̀kìy nî nìy ŋwò kwoʼ kə nəniy miə idoŋ, mə ni zəŋi tsə nə̀ aghê àdzə̀m bû akə̀lə̀ mìə̀.”

³³Yesù kə àyiə yə̀ dzày na zìì bə̀ ani dè bə̀ ndzòʼò ìpfə yə̀ ù kwu nəniy ani pfə.

³⁴Ŋwàâ kə ghu kə̀ ə bə̀lì kə a we nə, “Ulâŋ ghələ wiy dziy nə, wù wə̀ Zə̀kiy sûw na, ù nì pfə kòʼ dzə̀ wày. Wò də̌ mə̀yə ani dzày nə̀, ‘Wà wù kì zɛ̀mə̀ ŋwò bə̀ ŋwò anə ipfə yə?’ Wà Wù ù ghè wə̀ ba də̀ ndiə?”

³⁵Yesù ə bə̀lì kə a ghu nə, “Kaʼì tìy kî dzə̀ dyoʼò kioŋə yə̀ nə̀ ghà. Ghà ki bwiiy yə kə ŋwô yəə ghà nam də nəniy nə̀ kaʼì tìy, ləm kiy fə̀ nə kway gha, aŋwòə wù wə̀ ù bwìy nəniy a təŋə kələm, ù kwu dzə̀ way loʼo kə ù zè nəniy ate.

³⁶Ghà bɛmə kə â wù wə̀ ù zəŋə nəniy nə̀ kaʼì tìy ki mwaa, ani zəŋi tsə nə̀ ghà ə doʼò tsə aghû yə̀ ghu muə nəniy anə asə ə zwe yiy.” Abù Yesù dzày mà tsə nəniy ayiə yə, u ŋwò yə̀ zù nùw dòʼò yə̀ nə̀ ghu kə kôʼ dzə̀ ighe.

³⁷Yəə Yesù kə boʼò zəŋi tsə kə ndə̀mə̀ mali tə yiə tiy anə fwumi kə ghu, ghu kə̀ nam bɛmə dzə̂ â we.

³⁸Ayiə yə̀ kə fyi ani zəŋi tsə nə̀, ayiə yə Ìzayà, wè ntwùm ə̀ Kə̀zə̀ kə dzây na nəniy, a bû fyi kə àsoŋə̀ yìy. Ayiə ghè yə̀ kə də̀ nə̀, “A Mwe ə̀ mbyi, à bɛmə dzə̀ ndìə̀ ntwum yə ghè niʼà nəniy yə? Zə̀kìy kə dè daʼa kə we â nə̀ ndìə̀?”

³⁹Aghee ghè yə̀ kə wày dzə ani bɛmə awò Yesù aŋwòə Ìzayà kə dzày tsə sòʼò nə̀,

⁴⁰“Zə̀kìy mə fɛ̀b màʼà na asə ə ghu yiy, fè na kə sòʼò fòŋ tə ghu, nə̀ ghu kə kôʼ dzə̀ asə yiy, ghu kə zuw kəli sòʼò anə fòŋ tə ghu ghu kə wày ani bù akə̀lə̀ mìə̀, nə̀ mə zəŋi taw kə ghu.”

⁴¹Ìzayà kə dzày àyiə yə̀ ghi aŋwòə ù kə kòʼ na zìì yə̀ ŋwò ŋkwiʼi mə̀ sòŋə̀ mə̀ Yesù kə kwu nəniy. U dzày ayiə kùmə̀ yə̀ sòʼò nə̀ Yesù.

⁴²Anə sòŋə fə ghè fə̀, à kə də̌ nə̀ ŋgəd tə ghě Dzû tə̀liy tiy mə bɛmə awò Yesù. Ghu kə kə̀ kwuni zəŋi dzə̂ nə̀ aghê kəli aŋwòə ghu kə tsəŋə àghě Falàsî nə̀ ghu nì dzwùmə̀ fyiə ghu anə ndàw kə̀dzəŋə.

⁴³Ghu kə ŋge liə nə̀ aghê ki nyiə̀ ghu nə̀ ŋkwiʼi miy, tsìy fyi ani kəli ŋkwiʼi mə Zə̀kìy nyiə̀ nəniy.

⁴⁴Yesù kə dzày tsə anə dzə̀ ìtaw yìy nə̀, “Aghû yə̀ àdzə̀m ghu bɛmə nəniy â mìə̀, ghu kə̀ kaʼi bɛmə dzə̂ nəway à mìə̀, ghu bɛmə sòʼò awò wù wə̀ ù twum nəniy miə.

⁴⁵Wù wə̀ ù kòʼ dzə̂ miə, ù ghii kòʼ dzə̀ wù wə̀ ù twum nəniy miə.

⁴⁶Mə bû fə̀ anə mbyi yəə à də̀ tə kaʼì, tə aghû yə̀ àdzə̀m ghu bɛmə nəniy awò mìə̀, nə̀ ghu kə doʼò təŋ dzə̀ an-a-ləm

⁴⁷Aghû yə̀ ghu zuw nəniy ntwum yə mə niʼà nəniy kə̀ kwuni fâʼ nəway ayiə yə ntwùm ə̀ ìghè yə̀ dzìy nəniy, mə kî saʼ dzə̀ wày ghu. Mə bû ani bù bii fyi aghû, mə kə̀ bû dzə̂ ani bù saʼ aghû.

⁴⁸Wù wə̀ ù saʼà wìy nəniy aghê də̀ ŋwô ù kì saʼa nəniy aghû yə̀ ghu twe maʼà nəniy miə, twe sòʼò ani zuw ayiə yə mə niʼà nəniy. Ayiə yə mə niʼà nəniy, à də̀ a ghe Zə̀kìy nî saʼa wiy nəniy ghu ate anə tsuk fə isaʼ.

⁴⁹Ayiə yə mə dzîy nəniy, mə dzîy dzə̀ wày anə daʼa kam, Mə dzîy kə àyiə yə Təli wə ù twum bə̂ nəniy miə ù dzày nəniy nə̀ mə bù dzây â ghà.

⁵⁰Mə kwu ŋwô nə̀ ayiə yə ù dzày na nəniy a bê nə̀ ìmùə̀ itsà yìy. Ayiə yə mə dzîy nəniy, à də̀ ayiə yə Təli dzày nəniy â mìə̀ nə̀ mə dzây.”