Read Isu Dzwan 14 Bible Online

Dzwan 14 - Isu bible

Dzwan 14

¹Yesù kə dzày â tsə̀təndii tə we tiy a ghu nə, “Kəə i nə̀ fyimə dzə̂ gha anə fôŋ! Ghà kəli tsə kə ìbɛmə awò Zə̀kìy, ghà kəli tsə sòʼò ìbɛmə â mìə̀.

²Ndàw təli wam kwu ndə̀mə̀ à dzwə. Mə zê ani zù byay na tsə kəloʼo awò ghà. Mə mə̀ dzìy dzîy dzə̀ wày ayiə yə â ghà bəə à mə̀ də wày ayiə àsoŋə̀ yìy.

³Abu mə zû byay na tsə dzə̂ loʼo tiy awò ghà, mə ki bû dzwoŋi mə bû nîy ghà, tə̀ ghà bû dòʼò nə̀ mìə̀. Ghà ki də a lòʼo kə mə də nəniy ate.

⁴Ghà kwu ŋwǒ dzəd yə ì zè nəniy a lòʼo kə mə zê nəniy ate.”

⁵Tomàs mee a we nə, “A Mwe ə̀ Mbyi, ghè kwu dzə̀ way loʼo kə wò zè nəniy ate, ghè də ani kəli mə̀yə dzəd ani zù awote ə?”

⁶Yesù ə bə̀lì kə a we nə, “Mə də dzəd ì ghà yə̀, mə də sòʼò iyiə ìsoŋə̀ yìy, də̀ sòʼo imuə̀. Wù lìy wày dzə ani zù akə̀lə̀ Tà, àmày kə abidzəmə̀ mìə̀.”

⁷Yesù mee a ghu nə, “Bəə ghǎ mə̀ fə̀ ndzə̀m kwu ŋwô miə, ghǎ mə̀ dziy kyilə ŋwǒ təli wam soʼo. Ani kaʼ tsə nyiə, ghà kwu ŋwǒ we. Ghà mə kòʼ sòʼò we.”

⁸Filîp mee a we nə, “A Mwe ə̀ Mbyi, dě bə Tà awò ghə̀d. À mày dzə̀ ì yiy ghè liə nəniy ani kəli.”

⁹Yesù ə bə̀li kə nə̀, “A Filîp, anə ndaŋ k-a-ghab kə mə doʼò fyi nəniy nə̀ ghà. Wò kwu way wù wə̀ mə də nəniy we ə̀? Wù wə̀ ù kòʼ dzə̂ nəniy miə, ù mə̂ Tà kôʼ. Wò də̌ mə̀yə ani kàm dzày nə̀, ‘Dě bə Tà â mìə̀ ə?’

¹⁰Wò kwu way ibɛmə yiy nə̀ mə də fyiə kə mòʼ nə̀ Tà, Tà də soʼo fyiə kə mòʼ kìy nə̀ mìə̀? Ayiə yə mə dzây nəniy â ghà mə kə̀ dzây dzə̂ anə daʼa kam. Àyiə yə̀ zəŋi təli wə̀ ù də nəniy fyiə kə mòʼ kìy nə̀ mìə̀.

¹¹Ghà kwu ani kəli tsə nə̀ mə dzîy àyiə àsoŋə̀ yìy anə ayiə yə mə dzîy nəniy nə̀ mə də fyiə kə mòʼ nə̀ Tà, Tà də soʼo fyiə kə mòʼ kìy nə̀ mìə̀ moo ghà də ani kəli tsə nə̀ à də̀ ayiə asoŋə̀ yìy anə tsə̀e kə yiə yə mə zəŋə nəniy.

¹²Mə ndzəmə̀ dzìy bə̀ ŋwò â ghà nə̀, aghû yə̀ ghu bɛmə nəniy â mìə̀, ghu kî fàʼà ndzòʼò fàʼ kə̀ mə faʼà nəniy. Ghu kî bôʼ fâʼ àyiə a tsîy fyi nəniy à yu, aŋwòə mə zê akə̀lə̀ Tà.

¹³Abu à də kə ndzòʼò ìyiə ìghaa yiy, ghà ŋwaa bə̂ nəniy anə izəd yam, mə kî zəŋə ŋwò anə yiə yə aghê də ani kòʼ bə̀ nə̀ Tà də̌ wù ùsòŋə̀ wìy abidzəmə̀ Wa.

¹⁴Abu ghà ŋwaa kə iyiə ìghaa yiy â mìə̀ anə izəd yam mə kî zəŋə ŋwò.”

¹⁵Yesù ə dzày tsə â tsə̀təndii tə we tiy a ghu nə, “Abu ghà liə nəniy miə, ghà ə zuw ayiə yam à dziy yiy.

¹⁶Mə ki dzây yə̂ nə̀ Tà twum bə̀ ghà nə̀ wù lìy wìy ù kì fìì nəniy gha, ù mùə̀ nə̀ ghà anə nsòŋi ndzə̀m.

¹⁷Wù ghè wə̀ də̌ Zwàykə̀zwekiy, ù kì dè bə̀ ghà nə̀ iyiə yə i də nəniy ìsoŋə̀ yìy kùmə̀ yə̀ nə̀ Zə̀kìy. Aghee mbyi yiy way dzə ani ŋgwam na dzə̀ we, aŋwòə ghu way dzə ani kòʼ we moo ani kəli we. Ghà kwuni kwu ŋwô we aŋwòə ù mùə nə̀ ghà, də̀ sòʼò[9]azoŋə̀ ghà.

¹⁸Abu mə ŋwô yə̂ nəniy mə kî màŋ nasə tsə dzə̀ wày gha yəə ghà də awa mfyi, mə kî bè dzwəŋə ŋwò.

¹⁹Anə fəkə̀mə̀ aghee mbyi ki də kàmə̀ kòʼò wày miə, ghà kî kwuni kòʼò ŋwò miə aŋwòə mə kî namə mùə̀ ŋwo, ghà kî muə̀ soʼò.

²⁰Ani bu ntsuk fə ghà fə̀ nì kpe tsə nəniy, ghà ni kəli tsə nə̀ mə də fyiə kəmòʼ nə̀ Tà, ghà də soʼo fyiə kəmòʼ nə̀ mìə̀, anə yiə yə mə də nəniy fyiə kəmòʼ nə̀ ghà.

²¹Wù wə̀ ù liə nəniy miə, à də̌ wù wə̀ ù zəŋə yə̀ àyiə yə mə dzây nəniy. Təli wam kî liə ŋwǒ wù wə̀ ù liə nəniy miə, mə ki liə soʼò we, mə dê yə̂ ndzòʼò wù wə̀ mə də nəniy â we.”

²²Dzudàs ù lìy wə̀ (À wày dzə Dzudàs Ìsə̀kalòt) mee “A Mwe ə̀ Mbyi, à də̌ kìə̀ wò liə nəniy ani dè ùwee niə̀ â ghə̀d, kwuni liə way ani dè awò àghě mbyi ə?”

²³Yesù ə bə̀lì kə a we nə, “Aghû yə̀ ghu liə nəniy miə, ghu zəŋə yə̀ àyiə yə mə tyi dê nəniy. Təli wam ki liə soʼò ghu. Təli wam nə̀ mìə̀, ghè ki bû doʼò nə̀ ghu, ghě muə̀ nə̀ ghu.

²⁴Aghû yə̀ ghu də liə way miə, ghu zəŋə dzə̀ wày ayiə yə mə tyi dê nəniy. Ayiə yə mə tyi dê nəniy â ghà, à wày dzə ayiə unìə̀ wam, à də̀ ayiə Tà wə̀ ù twum nəniy miə.

²⁵Mə maa dzày àyiə yə awò ghà nə̀ mə nam də̌ nə̀ ghà.

²⁶Wù wə̀ ù kì fìì nəniy gha, tyoŋə Zwàykə̀zwekiy, Tà kì twumə bə̀ we anə izəd yam, ù kî tyi dè mà bə̀ àyiə adzə̀m â ghà, ù zəŋi sòʼò nə̀ ghà kə nîyzə̀ dzə̀ ayiə yə àdzə̀m mə dzây nəniy â ghà.

²⁷À də̀ ibvay mə nyiə̀ â ghà, mə nyiə̀ ghà nə̀ ìbvay yam yiy. Ibvay i ghà yə̀ wày dzə ndzòʼò ì yu mbyi də ani nyə̀. Kəə ghǎ nə̀ fyimə iwee nəli yiy, kəə ghǎ nə̀ tsəŋə sòʼò.

²⁸Ghà mə zuw yəə mə dzây nəniy â ghà nə̀, ‘Mə nyiə̀ ŋwòə̀ ŋwò, mə kî kàmə bè dzwəŋə ŋwò.’ Bəə ghà liə nəniy miə, ghà kwu ani dyoʼo yəə mə dziy zû akə̀lə̀ Tà, aŋwòə ù mə tsìy fyi miə.

²⁹Mə dzây na zìì bə̀ àyiə yə à ghà nə̀ a kamə fyi nəway, tə̀ a ki buu a fyi kə nəniy, ghà ki kəli ibɛmə azoŋə̀ mìə̀.

³⁰Mə kî kàm dzə̀ŋì wày nə̀ ghà anə ndaŋ k-a-ghab, aŋwòə ambvə̂ntsə, wù wə̀ ù saʼa nəniy mbyi yə, ù nyə̀ bê ŋwò. Ù kwu dzə̀ way daʼa kiy azoŋə̀ mìə̀,

³¹ù bè ani zəŋi tsə tə̀ aghee mbyi yiy kəli tsə nə̀ mə liə ŋwǒ Tà, à də̀ ighe mə zəŋə ayiə adzə̀m anə ayiə yə ù dzày nəniy â mìə̀. Bù nənìy a ŋwô fə̀ anə lòʼo kə.”