Read Isu Dzwan 15 Bible Online

Dzwan 15 - Isu bible

Dzwan 15

¹Mə ndzə̂m də̀ kâʼ fə utam, Təli wam də mwe ə̀ ùswum.

²Abu ŋkwè kìy də nəniy azoŋə̀ mìə̀ nə̀ kə muə way utam wiy Təli wam khìy màʼà, u zwùbə̀ myàʼà sòʼò ùŋkwè wə̀ u muə nəniy utam wiy nə̀ u si zwe, muə sòʼò ndə̀mə̀ ùtam.

³Ayiə yə mə kə tyi dê tsə̂ nəniy awò ghà a mə zəŋi ghà mə zwu dòʼò.

⁴Ghà doʼò tsə kə anə fyiə kə mòʼ nə̀ mìə̀, mə ki doʼò tsə soʼò anə fyiə kə mòʼ nə̀ ghà. Ŋkwè kə fəkàʼ kìy way dzə ani mu ùtam nə̀ noŋə̀ ghe kiy, kə də kə ani mu utam abu kə zôŋ doʼò nəniy anə fəkàʼ. À də̀ sòʼò ighəd, ghà way dzə ani mu utam, à mày kə nə̀ ghà təm dòʼò dzəŋi anə fyiə kə mòʼ nə̀ mìə̀.

⁵Mə də kâʼ fə utam, ghà də təŋkwè. Aghû yə̀ ghu təm doʼò dzəŋi anə fyiə kə mòʼ nə̀ mìə̀, mə də soʼo nəniy anə fyiə kə mòʼ nə̀ ghu, ghu ki mu ndə̀mə̀ ùtam. Ghà kwuni wày dzə ani zəŋi iyiə ì liy yiy abu mə də wày anə fyiə kə mòʼ nə̀ ghà.

⁶Abu wù də wày anə fyiə kə mòʼ nə̀ mìə̀, ghu ki nîy maʼà fyi yə̂ we yəə à də̌ ŋkwè kə fə kàʼ kə̀ ghu khîy màʼà nəniy, kə zwum tsə, ghu pyə̀ màʼà yə̀ ndzòʼò ŋkwè kə fəkàʼ kə ghè kə̀ anə uvə̀lə̀.

⁷Abu ghà təm doʼò nəniy anə fyiə kə mòʼ nə̀ mìə̀, fàʼà yə̀ àyiə yə mə tyi dê nəniy â ghà, abu ghà ŋwaa bə̂ fyiə kə ghà liə nəniy, Zə̀kìy kî nyə̀ bə̀ â ghà.

⁸Abu ghà fâʼ dzwàb tsə nəniy, dè bə̀ nə̀ ghà də tsə̀təndii tam, a ki də nə̀ ghà ghii dè yə̀ awò aghè nə̀ Təli wam də wù ùsòŋə̀ wìy.

⁹Mə liə gha anə yiə yə Tà liə nəniy miə ate. Ghà kwu ani də kə anə fyiə kə mòʼ nə̀ mìə̀, tə̀ ghà ki tsəŋə kwu kə ŋwô nə̀ mə liə ŋwô gha.

¹⁰Abu ghà zuw nəniy â mìə̀, mə ki tsəŋə liə kə gha anə yiə yə Təli wam tsəŋə̀ liə kə nəniy miə ate, aŋwòə mə zuw ŋwò â we.

¹¹Mə ghii àyiə yə̀ dzày bə̀ â ghà ani zəŋi tsə nə̀ ghà kəli tsə ndzòʼò dzwiʼi kə mə kwu nəniy, tə̀ ghà ki kwu idwiʼi yiy naʼ ìdzə̀m.

¹²Iyiə yə mə dzîy â ghà i də nə̀, “Ghà si liə tyili yə iwee nəli yiy anə yiə yə mə liə nəniy gha ate.”

¹³Dzə̀d ì sòŋə̀ yə̀ wù də ani dè ìliə ate awò àfələ we yiy à də̀ â we ani pfə anə utuw u ghu.

¹⁴Ghà də afwu yam abu ghà zəŋə yə̂ ayiə yə mə dzîy nə̀ ghà zəŋi.

¹⁵Aghee kəfàʼ yìy kwu tsə̀ dzə̀ way ayiə yə mwe ə̀ kə̀fàʼ zəŋə tsə̂. À də̀ ighe mə də dzə̀ŋə̀ dzə̀ way nə̀ ghà yəə ghà də aghee kəfàʼ yam. Mə tyoŋə gha nə̀ à də̀ afwu yam, aŋwòə Mə mə dzày mà ayiə adzə̀m yə̀ mə kə zuw nəniy â Təli wam.

¹⁶Ghà kə kə̀ sây dzə̂ miə. À kə sày mìə̀ gha, twum fyi sòʼò ghà nə̀ ghà zû mu utam, ndzòʼò ùtam wə u doʼò təŋ nəniy ani zəŋi tsə nə̀ abu ghà ŋwaa kə kiə̀ awò Tà anə izəd yam ù kì nyìə̀ ŋwò awò ghà.

¹⁷Mə dzîy bə̀ â ghà nə̀ ghà si liə tyili yə iwee nəli yiy.

¹⁸“Abu aghee mbyi dzwəə nə̀ ghà, ghà kəli tsə nə̀ ghu kə dzwəə nə̀ mìə̀ isəə.

¹⁹Abu ghà də soʼo yəə à də̀ aghee mbyi, aghee mbyi yiy ki liə gha. Ghà kwuni wày dzə yəə aghee mbyi. Mə mə sày fyi ŋwò bə̀ gha anə fwumə kə aghě mbyi ghà kâm wày dzə aghee mbyi. À də̀ ighe aghee mbyi yiy dzwəə nəniy nə̀ ghà.

²⁰Ghà ki myiŋə tsə ayiə yə mə kə dzây nəniy â ghà nə̀, ‘Aghee kəfàʼ yǐy kə̀ tsîy fyi dzə̂ nəway Mwe ə̀ kə̀fàʼ.’ Abu aghê kə nyiə̀ miə nə̀ ùtswə̀d wìy, ghu kî nyə̀ sòʼò ŋwò gha nə̀ ùtswə̀d wìy. Bəə ghu kə zəŋə nəniy ayiə yə mə kə dzây nəniy â ghu, ghu kî zəŋə sòʼò ŋwò àyiə yə ghà kî dzîy nəniy â ghu.

²¹Aghê kî bvamə zəŋə gha nə̀ ndzòʼò àyiə yə ghu kə zəŋi nə̀ mìə̀. Ghu kî zəŋə aŋwòə ghà də aghû yam aŋwòə ghu kwu dzə̀ way wù wə̀ ù kə twum nəniy miə.

²²Abu mə kə də kə̀ bû naʼà nəway ntwum yə â ghu, ghu kə də kə̀ kəli dzə̂ nə̀ ghu mə zəŋi iyiə ìbɛbə ìliy yiy. Ghu way ani dzày dzə̀ nyìə̀ nə̀ ‘Ghè kamə kə̀ zəŋi dzə̂ iyiə ìbɛbə ìliy yiy.’

²³Wù wə̀ ù dzwə nəniy nə̀ mìə̀, ù ghii dzwəə sòʼò nə̀ Təli wam.

²⁴Mə mə zəŋi ndə̀mə̀ àyiə nə̀ wù lìy wìy kamə bôʼ zəŋi kôʼ kôʼ. Bəə ghu kə də kə̀ kôʼ ayiə yə mə kə zəŋi, ghu kə də wày dzə ani kəli nə̀ ghu mə zəŋi iyiə ìbɛbə yiy. Ghu maa kòʼ àyiə yə mə kə zəŋi nəniy, ghu namə dzwə kə nə̀ mìə̀, dzwə sòʼò nə̀ Təli wam.

²⁵Ayiə yə̀ kə fyi ani zəŋi tsə nə̀ ayiə yə a twâ dòʼò nəniy anə ŋwàʼà k-a-zə̀ nə̀, ‘Ghu kə dzwə nə̀ mìə̀ kə̀ ŋwô ŋwò.’ Nə̀ a bû fyi kə àsoŋə̀ yìy.

²⁶Mə kî zəŋə tsə ŋwò nə̀ wù wə̀ ù dziy fây ghà, tyoŋə Zwàykə̀zwekiy, nə̀ ù ŋwò bə̀ awò Təli wam ù bù azoŋə̀ ghà, ù bù dè fyi bə̀ ayiə yə a də nəniy àsoŋə̀ yìy. Ù kì dzìy bə̀ àyiə â ghà kwùmə̀ bə̀ nə̀ mìə̀.

²⁷Ghà soʼo ghà ki dzây yə̂ soʼò àyiə â ghè liy yiy kwùmə̀ bə̀ nə̀ mìə̀, aŋwòə ghà kə də̌ nə̀ mìə̀ anə sòŋə fə mə kə kaʼ nəniy fàʼ kìy ate.”