Read Isu Dzwan 17 Bible Online

Dzwan 17 - Isu bible

Dzwan 17

¹Abù Yesù dzày mà tsə nəniy ayiə yə, u lia kwoʼ kə idoŋ, gwùŋì tsə nə̀, “A Tà soŋə fə ghè fə̀ mə kpe â wò ani zəŋi nə̀ aghee mbyi yiy kəli tsə nə̀ Wa niə̀ də̌ wù ùsòŋə̀ wìy, tə̀ Wa niə̀ də ani zəŋi tsə nə̀ aghee mbyi yiy kəli tsə nə̀ wò də̌ wù ùsòŋə̀ wìy.

²Wò mə nyə̀ ə we nə̀ daʼa kiy azoŋə̀ àghè dzə̀m, tə̀ ù nə̀ də ani nyə̀ ì mùə̀ itsà awò àghè adzə̀m, wò nyə̀ na nəniy â we.

³Imuə itsà yìy də nə̀ wù kəli tsə nə̀ à mày kə wô ə Zə̀ kə̀ soŋə̀ kìy, ù kəli tsə sòʼò Yesù Kə̀litò wù wə̀ wò kə twum bə̂.

⁴Mə mə zəŋi nə̀ aghee mbyi yiy kəli tsə nə̀ wò də̌ wù sòŋə̀ wìy, Mə mə mày sòʼo fàʼ kə̀ wò kə nyiə̀ nə̀ mə fâʼ.

⁵A Tà zəŋi tsə a lòʼo kə wò də nəniy nyiə ate nə̀ mə kəli tsə ndzòʼò ŋkwiʼi mə mə kə bôʼ kwu tsə nəniy nə̀ wò â wò ani bwam mbyi.

⁶Aghû yə̀ wò kə sây fyi bə̂ fə anə mbyi nyə̀ bə̀ â mìə̀, mə mə zəŋi nə̀ ghu kəli tsə wù wə̀ wò də nəniy we. Ghu də̀ aghû yiə̀. Ghu mə zuw sòʼo dzə̀ yiə̀.

⁷Ghu kwu ŋwô nyiə nə̀ ayiə adzə̀m wò nyə̀ nəniy â mìə̀, a ŋwô bə̀ â wò.

⁸Ntwum yə wò kə nyiə̀ nəniy â mìə̀, nə̀ mə nàʼà â ghu. Ghu mə bɛmə̀ ntwùm ìghè yə̀. Ghu kwu ŋwô nə̀ à də̌ ìsoŋə̀ yìy nə̀ mə ŋwô bə̀ akə̀lə̀ wò. Ghu mə bɛmə sòʼò nə̀ à mìə̀ twum bə̀ wò.

⁹Mə gwuŋə̀ anə utuw ghu. Mə gwuŋə̀ dzə̀ wày anə utuw aghě mbyi. Mə kwuni gwùŋə̀ anə utuw aghù yə̀ wò sày nyə̀ nəniy â mìə̀, ghu də nəniy aghû yiə̀ yìy.

¹⁰Ufyiə wə mə kwu nəniy ùdzə̀m, à də̀ ufyiə yiə̀. Ufyiə wə wò kwu nəniy ùdzə̀m à də̀ u wam wiy. Ufyiə wə̀ dè bə̀ ndzòʼò ŋkwiʼi mə mə kwu nəniy.

¹¹A Təli wam ù zwê wìy, mə nyiə̀ bè akə̀lə̀ wò, mə kâm wày dzə anə mbyi. Ghu kwuni nam də̀ anə mbyi. Kwi kəli tsə ghu anə daʼa kə kə də nəniy anə izəd yə, wò kə nyiə̀ nəniy â mìə̀ tə̀ ghu doʼò tsə anə fyiə kəmòʼ, yəə ŋgà də nəniy anə fyiə kəmòʼ.

¹²Yəə mə kə nam də nəniy nə̀ ghu, mə kə kwi kəli ghu anə daʼa kə izəd yiə̀, izəd yə wò kə nyiə̀ nəniy â mìə̀. Mə kə yèmə̀ azoŋə̀ ghu, wù ùmòʼ kə kə̀ nây fyi dzə̂ anə uzəə u ghu. À kə nây fyi yə̀ kə wù wə̀ ù kə kwu nəniy ani nây ani zəŋi tsə nə̀, ayiə yə a twâ dòʼò nəniy anə ŋwàʼà k-a-zə̀ a bû fyi ìsoŋə̀ yìy.

¹³Mə nyiə̀ bè akə̀lə̀ wò. Mə ayiə yə̀ nyə̀ dzìy nə̀ mə nam də̀ anə mbyi tə̀ ghu nì də ani kəli kədwiʼi naʼ ìdzə̀m anə fòŋ tə ghu.

¹⁴Mə maa nàʼa ntwum yiə̀ â ghu, aghee mbyi yiy kwuni bà ghu aŋwòə ghu way dzəŋi dzə anə fyiə kəmòʼ nə aghě mbyi yiy, ighəd yiə mə də way dzəŋi dzə anə fyiə kəmòʼ nə̀ àghě mbyi yiy.

¹⁵Mə dzîy dzə̀ wày nə̀ wò nîy ŋwô fyi ghu anə mbyi. Mə kwuni bwoʼo kə̀wo nə̀ wò kwiy kəli tsə ghu kəə ghu nə̀ zê anə wokə wù ù Bɛbə̀ wə ù də nəniy anə mbyi.

¹⁶Anə yiə yə mə də way dzəŋi dzə anə fyiə kəmòʼ nə̀ aghě mbyi yiy, à də̀ sòʼò ighed nə̀ ghu, ghu way dzəŋi dzə anə fyiə kəmòʼ nə̀ aghě mbyi yiy.

¹⁷Dzə̀ yiə̀ də̌ ìsoŋə̀ yìy, zəŋi tsə ghu nə̀ ghu ndzə̂m doʼò tsə aghû yiə̀.

¹⁸Mə twumə yə̀ ghu anə mbyi, ighed yiə yə wò kə twum nəniy miə anə mbyi.

¹⁹Mə nyiə̀ bə̀ ùwe nam â wò, bòʼ ghu ani zəŋi tsə nə̀ ghu ndzə̂m nyiə̀ bə̂ soʼò ìwee ighu â wò.

²⁰Mə kaʼi gwùŋə̀ təŋə dzə̀ wày anə utuw ghu, mə gwuŋə̀ sòʼò anə utuw u aghù yə̀ ghu bɛmə â mìə̀ bòʼ ntwum yə ghu niʼàʼ nəniy.

²¹A Tà, mə gwuŋə̀ nə̀ ghu doʼò anə fyiə kəmòʼ. Mə gwuŋə̀ sòʼò nə̀ ghu dòʼò nə̀ ŋgàŋ ighəd anə yiə yə wò də nəniy nə̀ mìə̀, mə də soʼo nə̀ wò. Mə gwuŋə̀ nə̀ ghu doʼò anə fyiə kəmòʼ nə̀ ŋgàŋ tə̀ aghee mbyi ə nə̀ də ani bɛmə kə nə̀ à kə twum bə̀ wò miə fə anə mbyi.

²²Mə kə zəŋi tsə ghu nə̀ ghu doʼò tsə aghê soŋə̀ yìy anə yiə yə wò kə zəŋi tsə nəniy nə̀ mə doʼò wù ù sòŋə̀ wìy ani zəŋi tsə nə̀ ghu doʼò tsə anə fyiə kəmòʼ, ighəd soʼo anə yiə yə ŋgà də nəniy anə fyiə kə mòʼ.

²³Mə də anə fyiə kəmòʼ nə̀ ghu, wò də soʼo nəniy anə fyiə kəmòʼ nə̀ mìə̀. Ani zəŋi tsə nə̀ aghee mbyi kəli tsə nə̀ à kə twum wô miə. Ghu kəli tsə sòʼò nə̀ wò liə ŋwǒ ghu anə yiə yə wò liə nəniy miə ate.

²⁴A Tà, mə liə nə̀ aghû yə̀ àdzə̀m wò nyə̀ nəniy â mìə̀, nə̀ ghu doʼò a loʼo kə mə də nəniy ate, tə̀ ghu kôʼ ŋkwiʼi mam, ŋkwiʼi mə wò kə nyiə̀ nəniy â mìə̀ aŋwòə wò kə liə miə nə̀ wò kamə bwam nəway mbyi.

²⁵Təli wam wô wə̀ wò zəŋə nəniy ayiə yə a də nəniy tsitsi! Aghee mbyi yə̀ kwu dzə̀ way wô, mə kwuni kwu ŋwǒ wô. Tsə̀təndii tam tiy kwu soʼo ŋwô nə̀ à mìə̀ twum bə̀ wò.

²⁶Mə mə zəŋi nə̀ ghu kəli tsə wù wə̀ wò də nəniy we, mə kî zè kə nə̀ səkiy ani zəŋi nə̀ ghu ndəŋ kəli dzwâb tsə wù wə̀ wò də nəniy we, tə̀ wò ki liə ghu anə yiə yə wò liə nəniy miə ate. Mə ki də soʼo anə fyiə kəmòʼ nə̀ ghu.”