Read Isu Dzwan 19 Bible Online

Dzwan 19 - Isu bible

Dzwan 19

¹Paylèt kə tsày tsə kəlâŋ nə̀ ghu bwad Yesù nə̀ mbàŋ fìy.

²Sǔgôʼ tìy təm tsə kə ntyàŋì k-a-dòŋ anə təfàb, zəki nyi tsə anə tuw kə Yesù. Ghu nìy kə ndzòʼò sàŋ ìbàŋə̀ yə̀ ùdòŋ wìy dzəŋə̀ nəniy, nìy dzə̀ŋì na tsə azoŋə̀ we.

³Ghu bu akə̀lə̀ we, bwalə we nə̀ ùsali wiy anə utwùmusə, dzìy tsə a we nə, “A dòŋ kə aghee Dzû kìy, ghè nyiə̀ wò nə̀ ŋkwiʼi miy.”

⁴Paylèt ə kàm tsìy fyi bə̀ a bee, dzày yə̀ awò ŋwàâ kə ghù kə̀ aghu nə, “Mə nîy fyiə bə̀ we fə anə sə kəli ani dè bə̀ awò ghà nə̀ mə̀ kə̀ kôʼ dzə̂ iyiə ìliy yiy wù wə̀ zəŋi bɛb nəniy yəə mə nə saʼ wiy we.”

⁵Yesù ə tsìy fyi bə̀ a bee nə̀ ù mə dzə̀ŋi kəli ntyàŋì kə təfàb kìy nə̀ ndzòʼò sàŋ ìbaŋə̀ yə̀ ùdòŋ wìy kə dzəŋə̀ tsə̂. Paylèt ə dzày yə̀ a ghu nə, “Wù ù ghè wə̀.”

⁶Abù ŋgəd tə aghè àlwaʼa tiy kôʼ tsə nəniy we, nə̀ àghù yə̀ ghu kə kyìŋə̀ nəniy ndàw Kə̀zə̀, ghu bwoʼ fyi kə məmbòŋ idoŋ nə̀, “Ba wiy màʼà nə we anə kàʼ fə təzəd! Ba wiy màʼà nə we anə kàʼ fə təzəd!” Paylèt ə kwuni dzày dzwoŋi yə̀ a ghu nə, “Ghà nîy we, ghà zû ba wiy maʼà we anə kàʼ fə təzəd nə̀ noŋə̀ ghà. Mə kə̀ kwuni kôʼ dzə̂ iyiə ìliy yiy ù zəŋi nəniy yəə a ni saʼ wiy we.”

⁷Ŋgəd tə aghee Dzû tə̀ ə bə̀lì dzwoŋi yə̀ nə̀, “Ghè kwu kəlâŋ kə dzîy nəniy nə̀ wù wə̀ kwu ani pfə, aŋwòə ù kwoʼo uwee nə̀ ghe de Wà Kə̀zə̀.”

⁸Abù Paylèt zuw tsə nəniy ayiə yə, u kàm ŋge tsəŋ.

⁹Paylèt ə zù dzwoŋi anə ntoʼ, bəb fəli tsə â Yesù a we nə, “Wò ŋwò bə̀ yiə̀?” Yesù ə kə̀ kwuni bə̀lì dzə̂ nəway we.

¹⁰Paylèt ə bəb yə̀ â Yesù a we nə, “Wò twe ani dzə̀ŋì nə̀ mìə̀ ə̀? Wò kwu way nə̀ mə̀ kwu ŋwô daʼa kiy ani dzày nə̀ ghu nyəli maʼà wò, kwu sòʼò kədaʼa ani dzày nə̀ ghu ba wiy maʼà soʼò wò?”

¹¹Yesù ə bə̀lì kə a we nə, “Abu Zə̀kìy kə də kə̀ nyiə̀ nəway wô nə̀ daʼa kiy, wò wày dzə ani zəŋi iyiə ìliy yiy azoŋə̀ mìə̀. A kwuni bû nəniy wù wò ù nyə̀ tsîy bə̂ nəniy mìə̀ awò ghà, ù mə zəŋi bɛ̀bə̀bɛ̀b kə iyiə kiy tsìy fyi wô.”

¹²Yəə Paylèt zuw tsə nəniy ayiə yə, u kaʼ ani kaw dzəd ani zəŋi tsə ghu nyəli maʼà Yesù. Ŋwàâ kə ghu kə̀ ə bvwiʼi fyi kə məmbòŋ idoŋ, dzìy nə̀, “Abu wò nyəli tsə nəniy wù wə̀, à ki də nə̀ wò kàm wày dzə fə̀lə̀ Kaʼisà. Wù wə̀ ù dzìy nəniy nə̀ ghe də̀ kədòŋ, i dê tsə nə̀ ù dzwə nə̀ Kaʼisà.”

¹³Abù Paylèt zuw tsə nəniy ayiə yə, u nìy fyi bə̀ Yesù a bee, doʼò tswi tsə anə kwe kə̀ saʼa kiy anə lòʼo kə isaʼ, ghu kə biə na tsìy khù yə̂ anə atay. Ghu kə tyoŋə̂ loʼo kə ghè kə̀ nə̀ à də̌ “Gàbatà” anə idzə̀ŋì i Hiblù.

¹⁴À kə də̌ nə̀ inyi yiy tyimə kwoʼo bə̀ tsitsi anə̀ tsuk fə ghu kə byay nia tsə̂ nəniy iwee yiy ate ani nyi inyi ŋkàmə̀tâzaʼà mìy. Paylèt ə dzày yə̀ awò aghù yə̀ a ghu nə, “Dòŋ kəli kə.”

¹⁵Ghu bvwiʼi kə məmbòŋ nə̀, “Wiy màʼà nə we! Wiy màʼà nə we! Ba wiy we anə kàʼ fə təzəd.” Paylèt ə bəb yə̀ a ghu nə, “Ghà liə nə̀ mə ba wiy maʼà dòŋ kəli anə kàʼ fə təzəd ə̀?” Ŋgəd tə aghè àlwaʼa yiy bə̀lì kə a we nə, “Ghě kwu dzə̀ way Dòŋ kə̀liy kiy à mày kə Kaʼisà.”

¹⁶Paylèt ə dyaŋi nìy nyə̀ yə̀ Yesù â ghu nə̀ ghu zû ba wiy maʼà we anə kàʼ fə təzəd.

¹⁷Sǔgôʼ tə̀ ə nìy kə Yesù, ŋwò yə̀ nə̀ we, ghu ŋwò tsìy fyi yə̀ anə inaʼ nə̀ ù bòʼò kəli kâʼ fə təzəd, zù kwùm tsə anə lòʼo kə ghu kə twoŋə nəniy nə̀ à də̀ “Loʼo kə uvəb u kə tuw.” Ghu twoŋə anə idzə̀ŋì i Hiblù nə̀ à də̌ “Golgotà.”

¹⁸Ghu ba wiy tsə Yesù awote anə kàʼ fə təzəd. Ghu kə ba wiy sòʼò aghè bè awote anə ŋkàʼ mə̀ tə̀zəd. Umòʼ anə ukwe u Yesù ùnyiə wiy, ùmòʼ anə ukwe ùkwə̂ wìy. Yesù ə dòʼò nyi tsə anə uzə u ghu.

¹⁹Paylèt ə tsày tsə kəlâŋ nə̀ ghu twâ tsə ayiə ghu ba na tsîy kwoʼ yə̂ tuw kə Yesù anə kàʼ fə təzəd, ghu ba na kwoʼ yə̂ anə kàʼ fə təzəd, dòʼò tsìy kwoʼ yə̀ tuw kə Yesù. Ghu twà tsə nə̀, “Yesù, wè Nazalèt, dòŋ kə aghee Dzû.”

²⁰Ndə̀mə̀ àghě Dzû yìy maa twoŋə kòʼ ayiə ghè yə̀ aŋwòə loʼo kə ghu kə ba wiy nəniy Yesù ate kə kə kwùlì də̀ kə akə̀lə̀ ìnaʼ. Ghu kə twà na ayiə ghè yə̀ anə idzə̀ŋì Hiblù, nə̀ ìdzə̀ŋi Latə̀n yìy, nə̀ anə idzə̀ŋi Glîk.

²¹Ŋgəd tə aghè àlwaʼa yiy zù â Paylèt, dzày yə̀ a we nə, “Wò mə̀ kwu dzə̀ way ani twà nə̀ à də̌ ‘Dòŋ kə aghee Dzû.’ Wò mə̀ kwuni kwu ani dzày tsə nə̀ ù kə kwoʼo ùwe nə̀ ghe də dòŋ kə aghee Dzû.”

²²Paylèt ə bə̀lì kə a ghu nə, “Mə kwunə dzə̀ wày fyiə kə kə twâ doʼò nəniy.”

²³Yəə sǔgôʼ tə̀ ba na kə dzə̂ nəniy Yesù anə kàʼ fə təzəd, ghu nìy kə ndzwu tə we, byèlì tsə anə ubə̀d ùkyàʼì, dzàw tsìy yə̀ anə utuw u ghu. Ghu nìy ŋwò kə sòʼò ndzù tə we tə ù kə dzəŋì kəli nəniy anə fôŋ, ghu kə zəŋi nəniy anə bə̀d kə ndzwu kəmòʼ. Ghu kə kə̀ zəŋi dzə̂ anə lelê tə ubə̀d u təndzwu.

²⁴Sǔgôʼ tə̀ ə səay tsə anə iwè nə̀, “Ŋgà kə byelì dzə̌ ndzwu yə, a təm tsə ufyiə nə̀ a kôʼ wù wə̀ u kî byemə nə̀ ù kəli ŋwò ndzwu tə.” Ayiə yə̀ kə fyi ani zəŋi tsə nə̀ ayiə ŋwàʼà k-a-zə̀ kìy kə dzây nə̀ a bû fyi kə ìsoŋə̀ yìy. Kə kə dzày nə̀, “Ghu byèlì tsə sàŋ yam, dzàw tsə anə iwè Ghu nìy kə sòʼò ndzwu tam, təm tsə ufyiə ani kòʼ wù wə̀ u kî byemə nə̀ ù kəli ŋwò ndzwu tam.” À yù də̀ ayiə yə sǔgôʼ tìy kə zəŋi nəniy.

²⁵Zə̂ Yesù kə təmi dòʼò akə̀lə̀ kàʼ fə təzəd fə ghu kə ba na nəniy Yesù ate nə̀ azə̀ ə̀ zə̂ Yesù, nə̀ Mə̀li wə̀ ù kə nîy nəniy Klopàs, nə̀ Mə̀li wə̀ ù kə fyi nəniy a Magdalà.

²⁶Abù Yesù kòʼ tsə nəniy zə̂ ə we nə̀ tsə̀ndii ə̀ we wə ù kə ŋge liə nəniy, ghu təmi doʼò nəniy akə̀lə̀ zə̂, ù dzày tsə â zə̂ a we nə̀, “A wìyəŋi, wa niə̀ wə̀ fə.”

²⁷U dzày yə̀ awò tsə̀ndii yə a we nə, “Wìyəŋi wə̀ nyə̀ də̀ zə̂ yiə̀.” Ani kaʼ tsə anə sòŋə fə ghè fə̀, tsə̀ndii yə nìy zù mùə̀ dòʼò yə̀ nə zə̂ Yesù a ndàw we.

²⁸Yesu kə kwu ŋwô nə̀ ghe mə fàʼ mà ayiə yə ghe kə kwu nəniy ani fàʼ. Ani zəŋi tsə sòʼò nə̀ ayiə yə a twâ doʼò nəniy anə ŋwàʼà k-a-zə̀ a doʼò tsə àsoŋə̀ yìy, Yesù ə dzày tsə nə̀, “Fòŋ swəə miə.”

²⁹Tsəd kə nlwù mə̀ ìvən ìbvay yiy kə tiy awote, wù lìy nìy kə usâ, fwò tsə anə mənlwù, tsukə anə mbàŋ ə̀ kàʼ fə̀ ghu kə tyoŋə nəniy nə̀ à də haysùp, dè kwoʼ yə̀ anə idzwə i Yesù.

³⁰Yesù ə swe mu kə nlwù mə̀, dzày tsə nə̀, “I mə mày.” U kwum tswi tsə tuw kə we, dyaŋi pfə.

³¹Tswutswu wə̀ kə də̀ tsuk fə zwaa fiy, də̀ sòʼò tsuk fə inyi i ŋkàmə̀tâzaʼà mìy.Utsuk u ghè wə̀ kə də̀ utsuk ùsoŋə̀ wìy. Ŋgəd tə aghee Dzû tìy kə liə dzə̀ wày nə̀ avəən ə ghè si də kə anə ŋkàʼ mə̀ təzəd anə ndzòʼò tsuk fə. Ghu zù bwoʼ yə̀ kə̀wo â Paylèt a we nə, ù dzày nə̀ sǔgôʼ tìy zû kyemi maʼà tsə ifwe i ghè pfə yə, ghu nîy ŋwô tswi bə̂ soʼò avəən ə ghu anə ŋkàʼ mə̀ tə̀zəd.

³²Sǔgôʼ tìy zù kyemi màʼà tsə ifwe i aghù yə̀ àbè ghu kə ba dzəŋi nəniy ghu nə̀ Yesù.

³³Abù ghu kwuni bû nəniy akə̀lə̀ Yesù, ghu kòʼ tsə nə̀ ù mə pfə, ghu də̀ kə̀ kyemi nəway ifwe i we yiy.

³⁴Sǔgôʼ ìmòʼ ate anə təsǔgôʼ tə̀ ə tsuk kwoʼ kə Yesù nə̀ ìwuŋ yiy anə ityiə ibvù, kâŋ tìy fyi bə̀ ate nə̀ mwi

³⁵Tsə̀ndii wə ù kə kôʼ nəniy yəə ayiə yə̀ fyi nəniy ate, u mə dzày ayiə ghè yə̀ ani zəŋi tsə nə̀ ghà bɛmə kə sòʼò. Ayiə yə ù dzày nəniy à də̀ ayiə àsoŋə̀ yìy. Ù kwu ŋwô nə̀ ghe dzîy àyiə àsoŋə̀ yìy.

³⁶Ayiə yə ghii àdzə̀m kə fyi ani zəŋi tsə nə̀ ayiə yə a twâ doʼò nəniy anə ŋwàʼà k-a-zə̀ a bû fyi àsoŋə̀ yìy anə lòʼo kə kə dzîy nəniy nə̀, “Vəb kə we kə̀liy kiy nî kɛmə dzə̀ wày.”

³⁷I nam twà dòʼò sòʼò anə lòʼo kə̀liy kiy anə ŋwàʼà k-a-zə̀ nə̀, “Ghu nî kòʼò yə̀ ŋwǒ wù wə̀ ghu kə tsuk nəniy we nə̀ ìwuŋ yiy anə ityiə i bvù.”

³⁸Yəə ayiə yə̀ tsìy ŋwò tsə nəniy, Yùsə̂f wə̀ ù kə də nəniy wè ìnaʼ i Àlimàtiyà, ù kə də̀ tsə̀ sòʼò tsə̀ndii ə Yesù. U kə̀ kwuni zəŋi dzə̂ nə̀ aghê kəli nə̀ ghe mə bɛmə â Yesù, aŋwòə ù kə tsəŋə ŋgəd tə aghě Dzû. U zù ŋwa yə̀ ivən i Yesù â Paylèt. Paylèt ə bɛmə kə nə̀ ù zù nìy ŋwò ìvən i ghè yə̀. Yùsə̂f ə zù nìy ŋwò kə sòʼò ivən i ghè yə̀.

³⁹Nikə̀dəmə̀ kə də̌ wù wə̀ ù kə zû twoŋə zuw nəniy Yesù nə̀ ntsukə tiy. U zù fwumi nə̀ Yùsə̂f, nə̀ ù mə bòʼò kəli kə ufyiə ùlyimə wə ghu kəbə̀ nia nəniy wù ù pfə wìy ate. Ufyiə wə̀ kə də̀lə̀ ŋwò yəə à də̀ u mbe u mə̀ntsòʼ ù bè.

⁴⁰Yùsə̂f nə̀ Nikə̀dəmə̀, ghu nìy kə ubə̂d u təndzwu, baŋ kə ivən i Yesù ate. Ghu baŋ mwòʼ kə nə̀ ùfyiə ùlyimə wiy. À kə də̀ dzəd yə aghee Dzû yìy kə kyələ tsə̂ nəniy aghê ghu yiy ate.

⁴¹Loʼo kə ghu kə ba wiy maʼà nəniy Yesù ate, uswum wiy kə də̌ awote, isây ìliy yiy də̌ anə uswum u ghè wə̀ nə̀ ghu kə kamə kələ kôʼ nəway wè lìy ate.

⁴²Yəə à kə də nə̀ tsukə fə zwaa fiy də tswutswu wə, isây i ghè yə̀ ə kwùlì də̀ sòʼo, ghu zə̀àŋì nə̀ŋì na nyi yə̀ Yesù awote.[10]