Read Isu Dzwan 20 Bible Online

Dzwan 20 - Isu bible

Dzwan 20

¹Anə tsuk fə səsə fiy, anə ivən nə̀ zwù kə utsuk kiy, Mə̀li wə̀ ù kə ŋwô bə̂ nəniy a Magdalà ə zù akə̀lə̀ ìsày, u zù kòʼ tsə nə̀ ghu mə byiŋi ŋwò ìtay yə ghu kə fê na nəniy idzwə isày yìy ate.

²U ŋwò tsə nə̀ ìnyəŋ yiy zù akə̀lə̀ Simùn Pità nə̀ tsə̀ndii ìlìy yə̀ Yesù kə ŋge liə nəniy, dzày yə̀ a ghu nə, “Ghu mə nìy ŋwò ivən i Mwe ə̀ mbyi yiy anə isày. Ghè kwu way loʼo kə ghu na nəniy ate.”

³Pità nə̀ tsə̀ndii ìlìy yə̀ ə ŋwò zù awote akə̀lə̀ ìsày.

⁴Ghu kə dzəŋə nyəŋə yə̀ ŋwò. Tsə̀ndii ìlìy yə̀ ə kwuni nyəŋ tsìy fyi tsə Pità, u zù kwùm yə̀ akə̀lə̀ ìsày isə.

⁵U zù zòʼ tsə, lia nyi yə̀ ìsày kòʼ tsə ubə̂d u təndzwu wə ghu kə kələ nəniy Yesù ate u zî doʼò. U kə̀ kwuni tsîy nyi dzə̂ awote anə isày.

⁶Abù Simùn Pità bù nəniy, u tsìy nyi dyaŋi yə̀ anə isày, zù kòʼ tsə ubə̂d u təndzwu wə̀ u zî doʼò nəniy awote anə isày.

⁷U kòʼ tsə sòʼò bə̀d kə ndzwu kə ghu kə kəd na nəniy utwumusə u Yesù wìy ate nə̀ kə way fwumi dzə nə̀ ndzwu tə̀liy tə, kə mə gyɛli dòʼò kwoʼ bə̀ nə̀ noŋə̀ ghe kiy.

⁸Tsə̀ndii wə̀ ù kə zû kwùm tsə nəniy isə akə̀lə̀ isày, u tsìy nyi yə̀ sòʼò. Abù ù zù kòʼ tsə nəniy ayiə yə ghii, u bɛmə nə̀ Yesù mə zɛ̀mə̀ dzwoŋi anə ipfə.

⁹Ghu kə̀ nam zuw kəli dzə̂ nə̀ ŋwàʼà k-a-zə̀ kìy kə dzìy nə̀ Yesù kə kwu ani zɛ̀mə̀ ŋwò dzwəŋə bə̀ anə ipfə.

¹⁰Tsə̀təndii tə dyaŋi dzwoŋi zù a ndaw.

¹¹Mə̀li wə ù kə fyi nəniy a Magdalà, u təmi dòʼò kə akə̀lə̀ ìsày, dìy. U zòʼ tsə ani lia nyi yə̀ isày,

¹²u kòʼ nyi yə̀ tsə̀təndii t-a-zə̀ awote anə isày ìbè, ghu doʼò tswi tsə nəniy anə lòʼo kə ghu kə nəŋì na nəniy ivəən Yesù ate. Tsə̀ndii umòʼ kə də̌ anə lòʼo kə tuw kə Yesù kìy kə də nəniy ate, ùlìy wə̀ də anə lòʼo kə ifwe i Yesù yìy kə də ate.

¹³Tsə̀təndii tə bəb tsə a we nə, “A niə̀ wə̀, wò dìy kiə̀?” U bə̀lì kə a ghu nə, “Ghu mə bòʼò ŋwò ivəən i Mwe ə̀ mbyi wam, mə kwu way loʼo kə ghu na nəniy ate!”

¹⁴Anə yiə yə Mə̀li dzây ma tsə nəniy ghii, u kyemì tsìy yə̀ kòʼ tsə Yesù ù təmi doʼò nəniy awote. U kwuni kwu dzə̀ way nə̀ à də̀ Yesù.

¹⁵Yesù ə bəb yə̀ a we nə, “A niə̀ wə̀, wò dìy kiə̀? Wò khu ndiə?” Mə̀li mòʼò kə nə̀ à də̌ mwe ə̀ ùswum wə̀ isây i Yesù yìy kə də nəniy ate. U dzày tsə nə̀, “A mwe abu à də nə̀ wò mə bòʼò ŋwò ivəən i we yiy, kə̀lə̀ â wò dzày bə lòʼò kə wò na nəniy we ate, mə zû bòʼò ŋwô we.”

¹⁶Yesù ə twoŋə tsə we anə izəd nə̀, “A Mə̀li.” U bə̀lì kə a we anə idzə̀ŋì Hiblù nə̀, “Làbonî!” I myiŋə̀ nəniy nə̀, “Àtyi dè.”

¹⁷Yesù dzày yə̀ a we nə, “Kə̀ mwâm dzə̀ miə, aŋwòə mə kamə zû dzwoŋi dzə̂ akə̀lə̀ Təli. Zù akə̀lə̀ àwizə̂ yamə, wò dzây yə̂ a ghu nə mə nyiə̀ zè dzwəŋə akə̀lə̀ wù wə̀ ù də nəniy Təli wam, də̀ sòʼo Tè ghu. Ù də̌ Zə̀ kam, də̀ sòʼò Zə̀ kə ghu.”

¹⁸Mə̀li wə̀ ù kə fyi nəniy a Magdalà u zù dzày yə̀ awò tsə̀təndii tə Yesù tìy nə̀ ghè mə kòʼ Mwe ə̀ mbyi, dzày yə̀ sòʼò àyiə yə Yesù kə dzây nə̀ ù zù dzày yə̀ awò ghu.

¹⁹Nə̀ ìnyi kwubì tìy anə tsuk fə səsə fiy anə ivən, tsə̀təndii tə Yesù tìy dzəŋə dòʼò a ndaw, fè na kə fə̀b mə̀ ndaw aŋwòə ghu kə tsəŋə ŋgəd tə aghě Dzû. Yesù màŋ fyi kə anə fwumi kə ghu, dzày tsə a ghu nə. “Mə tyoŋə zuw bə̀ ghà.”

²⁰Abù ù twoŋə zuw tsə nəniy ghu, u dè yə̀ àwo we â ghu nə̀ ìtyiə ibvù i we yiy. Tsə̀təndii tə we tiy kə ŋge dyoʼo ŋwò yəə ghu kôʼ nəniy Mwe ə̀ mbyi.

²¹Yesù ə dzày fwuli tsə a ghu nə, “Mə tyoŋə zuw bə̀ ghà.” Mə twumə yə̀ ghà anə ayiə yə Tà kə twum bə̂ soʼò miə.

²²Abù Yesù dzày mà tsə nəniy ayiə yə, u fɛb yə̀ tə̀zuub azoŋə̀ ghu, dzày tsə nə̀, “Zwàykə̀zwekiy mə bù azoŋə̀ ghà.”

²³Abu ghà nîyzə̂ nəniy bɛb tə wû tìy, Zə̀kìy kî nìyzə̀ sòʼò ŋwò bɛb tə ghè tə̀. Abu ghà də̀ kə̀ nîyzə̂ nəway bɛb tə wû tìy, Zə̀kìy kî nìyzə̀ sòʼò wày bɛb tə ghè tə̀.

²⁴Tsə̀ndii ə Yesù ìmòʼ anə tsə̀təndii tə Yesù tə̀ ìvəm nə̀ ghe tiy ibè, toŋə Tomàs, (ghu kə twoŋə soʼò nəniy we nə̀ à də̌ Ŋgòŋ), ù kə wày dzə anə fwumi kə tsə̀təndii tə Yesù anə sòŋə fə Yesù kə bû nəniy akə̀lə̀ ghu.

²⁵Yəə i kə də nəniy ghii, tsə̀təndii tə̀liy tə dzày yə̀ a we nə, “Ghè mə kòʼ Mwe ə̀ mbyi!” Tomàs mee a ghu nə, “Abu mə də kə̀ kôʼ nəway ubwôʼ u təmba wə anə awo we, kwe nyi yə̀ sòʼò wà kə̀wo wam anə ubwòʼ u ghè wə̀, mwàm kòʼ tsə sòʼò ityiə ibvù i we nə̀ wo kam kiy, mə kî bɛmə dzə̀ wày.”

²⁶Ivən yiy mày tsə, tsə̀təndii tə Yesù tìy dzəŋə dòʼò sòʼò a ndàw ì ghè yə, fè na kə mfə̀b mə̀ ndaw. Yesù kwuni màŋ bù fyi kə anə fwumi kə ghu, dzày tsə nə̀, “Mə tyoŋə zuw bə̀ ghà.”

²⁷U dzày yə̀ â Tomàs a we nə, “Kòʼò awo yamə, kwe nyi yə wà kə̀wo yiə̀ anə ubwòʼ wə̀. Kwe nyi yə̀ ukwe yiə̀ wìy anə bwòʼ kə̀ anə ityiə ibvù yam. Kəli tsə ibɛmə ìtaw yiy, kə kâm sè sòʼò ìfwe yiy.”

²⁸Tomàs ə bə̀lì kə a we nə, “Wò də̀ Mwe ə̀ mbyi wam, də̀ sòʼo Zə̀ kam.”

²⁹Yesù ə dzày yə̀ a we nə, “Wò bɛmə kə aŋwòə wò kòʼ tsə nəniy miə. Aghû yə̀ ghu bɛmə nəniy nə̀ ghu kə̀ kôʼ nəway miə, à də̀ aghû yə̀ Zə̀kìy lwîy nəniy ghu.”

³⁰Yesù kə zəŋi mali tə yiə tə̀liy tiy anə səkə tsə̀təndii tə we ghu də kə̀ twâ na dzə̂ fə anə ŋwàʼà kə̀.

³¹Ghu kə kwuni twà na ayiə yə̀ nə̀ ghà nə byemə nəniy nə̀ Yesù də̌ wù wə̀ Zə̀kìy sûw kyili na nəniy, də̀ sòʼò Wà Kə̀zə̀, nə̀ ghà ə nə̀ də ani kyilə imùə̀ itsà abidzəmə̀ ìbɛmə ghii yiy anə izəd i we.