Read Isu Dzwan 21 Bible Online

Dzwan 21 - Isu bible

Dzwan 21

¹Abù ayiə yə̀ tsìy tsə nəniy, ntsukə tsìy tsə kə insə̀ki kə ghii, Yesù kàm zù fyi fwuli kə akə̀lə̀ tsə̀təndii tə we a sə̀ dzwì Tìbeliyà. À yù də̀ yəə ù kə dê nəniy uwe wiy ate

²Simùn Pità, nə̀ Tomàs wə̀ ghu kə tyoŋə we nə̀ à də̌ ŋgòŋ, nə̀ Nàtanèl, wə̀ ù kə fyi nəniy a Kanà a mbwòʼ ə̀ Galìlî, nə̀ àwa Zebedì, nə̀ tsə̀təndii tə̀liy tiy ìbè, ghu kə də̀ fwumi ŋwô.

³Simùn Pità ə dzày tsə awò tsə̀təndii tə̀liy tə a ghu nə, “Mə dziy zû kwi tətsi.” Tsə̀təndii tə̀liy tə dzày yə̀ a we nə̀, “Ghè dzwùmə̀ bə̀ sòʼò ŋwò wô.” Ghu nyi kə an-a-mfə̀n, ani zù kwi tə̀tsi, ghu kə̀ kwuni kwi nəway fyiə kə̀liy kiy nə̀ ntsukə tə ghè tə̀.

⁴Nə̀ zwù kə utsuk kiy, Yesù ə təmi dòʼò anə iŋgwùŋə i dzwî, tsə̀təndii tə we tiy kwu way nə̀ à də̀ Yesù.

⁵U bəb yə̀ a ghu nə, “Anîsə̂ yə! Ghà kamə kə̀ kwiy nəway fyiə kə̀liy kiy ə̀?” Ghu bə̀li kə a we nə, “Hǎy! Ghè kamə kə̀ kwiy dzə̂ fyiə kə̀liy kiy.”

⁶U dzày yə̀ a ghu nə, “Ghà maʼà nyi yə̂ tə̀wee anə bə̀d kə ukwe u kə mfə̀n ù nyiə wiy ghà ki kwi tətsi.” Abù ghu maʼà nyi yə̂ nəniy wee tə ghu tiy anə bə̀d kə ghè kə̀, ghu də̀mə̀ kè ani sè fyi kwoʼ dzwoŋi bə̀ tə̀wee aŋwòə tsi tiy kə də̌ ate anə ndə̀m.

⁷Tsə̀ndii yə Yesù kə liə, u dzày yə̀ â Pità a we nə̀, “À də̀ Mwe ə̀ mbyi.” Anə yiə yə Pità zuw tsə nəniy nə̀ à də̀ Mwe ə̀ mbyi, u nìy dzə̀ŋì tsə sàŋ ə we (aŋwòə ù kə də̀ anə uwè u kəfàʼ), tà nyi yə̀ anə dzwî.

⁸Tsə̀təndii tə̀liy tə dzwùmì bə̀ we anə kəmfə̀n, ghu sè bə̀ wee tə tsi tiy kə lwe doʼò nəniy ate. Ghab kiy kə kàm ŋge wày dzə â ghu ani bù kwùm anə iŋgwùŋə i dzwî. Ghab kə ghè kə̀ kə də̀ ŋwô yəə à də̀ tə ntàm mə̀vəm in tà.

⁹Abù ghu bû kwùm tsə nəniy anə iŋgwùŋə, ghu kòʼ tsə uvələ u byaʼa nəniy anə intsə, tsi tiy gaʼ dòʼò ate nə̀ bakiy.

¹⁰Yesù ə dzày yə̀ a ghu nə, “Ghà bû nə̀ tsi tə̀liy tiy anə tsi tə ghà kwi kə nəniy nyiə.”

¹¹Simùn Pità ə zù nyi kwoʼ dzwoŋi kə anə kəmfə̀n, sè bə̀ wee tə anə iŋgwùŋə i dzwî. Wee tə ghè tə̀ kə kwu tsi tə̀ nê tìy fəbwaam nə̀ vəm miy intà nə̀ tsi tiy iti tə kə lwe doʼò nəniy ate. Yəə tsi tə̀ kə bòʼò dûw kə ŋwô, wee tə də kə̀ sa dzə̂.

¹²Yesù ə dzày yə̀ a ghu nə, “Ghà bû nyi!” Tsə̀ndii imòʼ anə tsə̀təndii tə ghè tə̀ kə kə̀ bəb kê dzə̂ a we nə, “Wò də̌ ndiə?” Aŋwòə ghu kə kwu ŋwô nə̀ à də̀ Mwe ə mbyi.

¹³Yesù ə bù akə̀lə̀ ghu, nìy kə ba kə̀ nyə̀ yə̀ â ghu. U zəŋi sòʼò ighəd nə̀ tsi tə.

¹⁴À kə yìy zəŋə yə̀ nsòŋə inti Yesù bè dê nəniy uwee wiy awò tsə̀təndii tə we tiy anə yiə yə Zə̀kìy kə zɛmə̀ dzwoŋi kə nəniy we anə ipfə.

¹⁵Abù yəə ghu nyi mâ kə nəniy, Yesù ə bəb yə̀ awò Pità a we nə, “A Simùn, wà Dzwan, wò liə ŋwô miə tsìy fyi yəə tsə̀təndii tə̀liy tə̀ liə nəniy miə ate ə̀?” Pità ə bə̀lì kə a we nə, “Ìny a Mwe ə̀ mbyi, wò kwu ŋwô nə̀ mə liə ŋwò wô.” Yesù ə dzày yə̀ a we nə, “Yɛ̀mi anə aghù yam anə yiə yə àbàʼàtə̀ndzù yèmə̀ nəniy anə awi təndzù.”

¹⁶Ani zəŋi yə̀ nsòŋə imbè, Yesù ə nam bəb fəli tsə a we nə, “A Simùn, wà Dzwan, wò liə ŋwô miə tsìy fyi yəə tsə̀təndii tə̀ liy tə̀ liə nəniy miə ate ə̀?” Pità ə bə̀lì kə a we nə, “Ìny a Mwe ə̀ mbyi, wò kwu ŋwô nə̀ mə liə ŋwò wô.” Yesù ə dzày yə̀ a we nə, “Yɛ̀mi anə aghù yam anə yiə yə àbàʼàtə̀ndzù yèmə̀ nəniy anə təndzù.”

¹⁷Ani zəŋi yə̀ nsòŋə inti, Yesù bəb fəli yə̀ â Pità a we nə, “A Simùn, wà Dzwan, wò liə ŋwô miə tsìy fyi yəə tsə̀təndii tə̀ liy tə̀ liə nəniy miə ate ə̀?” Fòŋ ə fyimi yə̀ Pità aŋwòə Yesù mə bəb fyi nsoŋə inti nə̀, “Wò liə ŋwô miə ə̀?” Pità ə dzày yə̀ awe nə, “A Mwe ə̀ mbyi, wò kwu mà ŋwô àyiə adzə̀m, wò kwu ŋwô nə̀ mə liə ŋwô wô.” Yesù ə dzày yə̀ a we nə, “Yɛ̀mi anə aghu yam anə yiə yə àbàʼàtə̀ndzù yèmə̀ nəniy te azoŋə̀ tə̀ ndzù.

¹⁸Mə ndzəmə̀ dzìy bə̀ ŋwò â wò nə̀, yəə wò kə də wà fə̀ghàŋ, wò kə dzə̀ŋə̀ kə ndzwu tiə̀ wò zù anə lòʼo kə wò liə ani zù ate. Abu wò dzə̀ŋi tsə nəniy, wò ki nia fyiə yə ukwe yiə̀ wìy, wè lìy ki dzəŋə nia kə ndzwu tiə̀ tìy, u nìy zù nə̀ wò anə lòʼò kə wò də liə way ani zù ate.”

¹⁹(Yesù kə àyiə yə̀ ghi dzày tsə ani dè tsə ndzòʼò ipfə yə Pità nì kwu ani pfə, ù nìy bə̀ mə̀ŋkwiʼi akə̀lə̀ Kə̀zə̀.) Yesù ə dzày tsə a we nə, “Dzwùmi bə̀ miə!”

²⁰Pità ə kyèmì tsìy yə̀ kòʼ tsə̀ndii yə Yesù kə liə ì dzwùmə̀ yə̂ nəniy ghu. Tsə̀ndii i ghè yə̀ kə nam də̀ kə tsə̀ndii yə ì kə kwulì dòʼò tsə nəniy akə̀lə̀ Yesù anə sòŋə fə iyi i ŋkàmə̀tâzaʼà mìy. Ù kə bəb tsə soʼò nəniy nə̀, “A Mwe ə̀ mbyi, à wò fyiê fyiə ndiə?”

²¹Abù Pità kòʼ tsə nəniy we, u bəb tsə nə̀, “A Mwe ə̀ mbyi, a də ani dzày nə̀ìndiə kùmə̀ yə̀ nə̀ wù wə̀ ə?”

²²Yesù ə bə̀lì kə a we nə, “Abu mə liə nəniy nə̀ ù si muə ani zù kwùm soŋə fə mə kî bè dzwəŋə nəniy ate, i wô lia anə kyiə̀, Wò kwu kə ani dzwùmì bə̀ mìə̀.”

²³À yù də ighe i kə tsîy kpe yə̂ nəniy anə fwumi kə tsə̀təndii tə nə̀, tsə̀ndii ì ghè yə̀ nì pfə dzə̀ wày. Yesù kə kə̀ kwuni dzây dzə̂ nə̀ ù nì pfə dzə̀ wày, ù kə dzày tsə nə̀, “Abu mə liə nəniy nə̀ ù si muə ani zù kwùm soŋə fə mə kî bê dzwəŋə nəniy ate, i wô ate lia anə kìə̀?”

²⁴Tsə̀ndii yə̀ də̌ tsə̀ndii yə ù kə dzây nəniy ayiə yə àdzə̀m, twà na fyi tswi bə̀ sòʼò àyiə ghè yə. Ŋga kwu sòʼò ŋwô nə̀ ayiə yə ù dzày nəniy nə̀ à də̀ ayiə àsoŋə̀ yìy.

²⁵Yesù kə zəŋi sòʼò ndə̀mə̀ tə ayiə tə̀liy tiy. Abu ayiə ghè yə̀ mə̀ twà dyoʼò mià tswi bə̂ anə ule anə yiə yə a kə fyiə nəniy ate, mə kwu nə̀ loʼo kə̀liy kiy mə də wày dzə fə anə mbyi yə ìdzə̀m ani na ŋwàʼà kə ghè kə̀ ate.