Read Isu Dzwan 5 Bible Online

Dzwan 5 - Isu bible

Dzwan 5

¹Abù ighè yə̀ tsìy tsə nəniy, Yesù kwoʼ yə̀ a Yèlusalèm a sòŋə fə aghê Dzû kə nyiə tsə nəniy inyi i ghu yiy ate.

²Anə inaʼ i Yèlusalèm tsâb kə mwi kə̀liy kiy kə də̀ tsə̀ awote a kə̀lə̀ mbà tə̀ndzwù. Aghee Hiblù kə tyoŋə tsə̂ nə̀ à də̌ Bètzadà. Loʼo tiy də̀ awote ìtà ghu kə twoŋə nə̀ à də̌ Pòtikò ghu kə biə na nəniy yəə aghê də ani tsìy ate.

³Ŋwàâ kə aghè dzaŋə yiy kə lwe dòʼò tsìy kyabi yə̀ anə Pòtikò tə ghè tə̀. À yu ghu fɛ̂b dòʼò, nə̀ à yu ghu swəŋə̀ bwîy, nə̀ à yu ghu pfə doʼò bə̂dkə̀bə̂d, ghu lyimə nə̀ tsə̀ndii bû fwùnì kə tsâb kə̀,[4]

⁴aŋwòə tsə̀ndii ə̀ Kə̀zə̀ kə laŋə bè fwùnə̀ kə mwi mə tə̀ abu wù dzaŋə̀ wə̀ ù tà nyi tswi yə̂ isə, nə̀ ù dzàŋə̀ kə ndzòʼò ìdzàŋ ì ghaa yiy i mày.

⁵Wè ùlìy wìy kə də̀ tsə̀ sòʼò awo nə̀ ù mə dzàŋ ntàŋə̀ tə̀ŋə̀mə̀ mə̀vəm inti nə̀ ghe tiy ifamə.

⁶Abù Yesù bù kôʼ tsə wù wə̀ ù nəŋ kə awo, Yesù ə kòʼ kəli tsə nə̀ wù wə̀ mə ndəŋ dzàŋ anə kəghab, u bəb yə̀ a we nə, “Wò liə ŋwò ani taw ə?”

⁷Wù ù dzaŋə wə̀ dzày yə̀ a we nə, “A mwe, mə kwu way wù wə̀ ù də ani tàlì nyi tswi yə̀ nə̀ mìə̀ fiy anə kətsàb, abu mwi fwunì kə nəniy. Abu ghu fwùnì kə nəniy tsâb kə̀, mə sî də̀mə̀ ani nyi tswi tsə awote, wè liy kwuni nyi tswi tsə awo isə azoŋə̀ mìə̀.”

⁸Yesù ə dzày yə̀ a we nə, “Ŋwòə kə idoŋ, wò gyɛli kə ghâm fiə̀ tə̀ wò ŋwô.”

⁹Wù wə̀ dyaŋi taw təŋ kə anə sòŋə fə ghè fə̀. U gyɛli kə ghâm fə we kaʼ yə̀ ani ŋwò, Yesù kə mali kə iyiə kə̀ zəŋi a tsuk ù zwaa wiy.

¹⁰Aghě Dzû yìy ə tsəb kòʼ tsə we, ghu dzày yə̀ awò wù wə̀ a we nə, “À zì də̀ ùtsuk ù zwaa wiy, lâŋ kìy də nə̀ wò way dzə ani bòʼò bwìy kyabi tsə̀ nə̀ ghàm fyiə̀ fìy.”

¹¹Wù wə̀ mee a ghu nə, “À mə̀ dzày wù wə̀ ù zəŋi taw nəniy miə â mìə̀ in gyɛli kə ghàm fam mə ŋwò.”

¹²Ghu mee a we nə, “Nà mə̀ tsəb dzày ndìə̀ ndzòʼò àyiə yəə yi?”

¹³A kwuni də̌ nə̀ wù wə̀ ghu zəŋi taw nəniy we nə̀ ù bòʼò kwu dyaŋi way Yesù, nə̀ Yesù maa nyi saŋ yə̀ anə ŋwaâ kə aghù.

¹⁴Yesù ə kàm kòʼ fwuli tsə we a ndàw Kə̀zə̀, dzày yə̀ a we nə, “Anə yiə yə wò taw dzə̂ nyiə ghi, kəə wò nə̀ kamə̀ zəŋə ibɛb yiy, nə̀ à way ghi, iyiə ì fyai kiy kâm suki tsə azoŋə̀ wò.”

¹⁵Wu wə̀ ə dyaŋi ŋwò zù dzày yə̀ awò ŋgəd tə aghě Dzû yìy a ghu nə, “À mə̀ ghî də Yesù ù zəŋi taw nəniy miə.”

¹⁶Aghě Dzû yìy ə kaʼ kə ani kwà Yesù dzìy nə̀ ù mə byɛbi màʼà lâŋ kə utsuk ù zwaa wiy.

¹⁷Yesù ə kwuni bə̀lì dzwoŋi yə̀ ghu nə, “Təli wam fə tsəŋə faʼà tsə̀ kə ŋwò, mə kwu sòʼo ani tsəŋə faʼa yə soʼo.”

¹⁸Abù Yesù dzày tsə ayiə yə ghi, ŋgəd tə ghě Dzù yə̀ baa kaʼ yə̀ dzəd ə tədzə̀m ani wiy maʼà Yesù ate, aŋwòə ù kə̀ kaʼi zaʼ dzə̂ lâŋ kə utsuk ù zwaa wiy, ghu mee nə̀ ù tsəb twoŋə fyi bə̀ Kə̀zə̀ nà də Tèlì ì ghe, mboŋə byàlə̀ kwoʼə yə̀ nə̀ Zə̀kìy.

¹⁹Yesù ə tyi dzày yə̀ a ghu nə, “Mə ndzəmə̀ dzìy bə̀ ŋwò nə̀ Wà wù wày dzə ani fàʼ fàʼ kə̀liy kiy anə ŋgəŋ ə̀ we. Ù bvwami fàʼà kə fàʼ kə̀ ù kòʼò nəniy təli faʼà. Təli faʼà kə fàʼ kə̀ ghaà kiy, wa kîy fàʼà sòʼò ŋwò fàʼ kə ghè kə̀.

²⁰Təli ŋge liə wa, dè mà tsə sòʼò we nə̀ ayiə àdzəmə dzə̀m ù fàʼà nəniy. Ndzə̀m ndzə̀m təli kîy zəŋə tsə ayiə Wa à zəŋə a kiy tsîy fyi tsə ayiə yə ù zəŋi nəniy. Adzwə kiy zwum nây yə̂ ghà ate.

²¹Yəə Təli zɛmə̀ ŋwò dzwəŋə bə̂ nəniy aghê à pfə yiy, nyə̀ yə̀ ghu nə̀ ìmùə̀ yìy, à də ighəd Wa nyiə̀ soʼò nəniy ìmùə̀ yìy awò àghù yə̀ ù liə nəniy ani nyə̀.

²²Ani kwe fwuli tsə, Təli saʼa dzə̀ wày wù ù lìy wìy, ù baa kwuni fə̀d nyə̀ yə daʼa kə ghè kə̀ awò Wa nə̀ à kwu we ani saʼ aghê.

²³Təli ghî zəŋi tsə nə̀ àghê àdzə̀m kiy nyiə̀ mə̀ŋkwiʼi awò Wa, ighəd yəə ghu nyiə̀ nəniy awò i ghe. Wù wə̀ ù də nyə̀ wày ŋkwiʼi miy awò Wa, i ghi dè tsə nə̀ ù nyə̀ sòʼò wày ŋkwiʼi miy awò təli wə ù twum bə̂ nəniy Wa nə̀.

²⁴Mə ndzəmə̀ dzìy bə̀ ŋwò nə̀ aghû yə̀ ghu zuw nəniy ntwum yə mə niʼà nəniy tu bɛmə nyə̀ yə̀ awò wù wə̀ ù twum bə̂ miə, ghu nî kilə ìmùə̀ i tsà. Ghu nî saʼ wiy dzə̀ wày ghu anə ayiə ghu à bɛb. Ghu mə kwuni tsìy ŋwò loʼo kə ipfə yiy də ate, nyi yə̀ a loʼo kə imuə̀ itsà.

²⁵Mə ndzəmə̀ dzìy bə̀ ŋwò nə̀ soŋə fiy kî kpe tsə ŋwò, fə mə bòʼò kpe nyiə â aghè pfə yiy ani zuw dzə̀ ə̀ Wà Kə̀zə̀. Aghû yə̀ ghu zuw kəli tsə nəniy, ghu ni muə̀ dzwoŋi bə̂.

²⁶Zə̀kìy ndzə̀mə̀ nyìə̀ ŋwò imuə̀ yìy nə̀ ùwee u we wiy, ù nyiə̀ soʼò daʼa kiy nə̀ Wa si nyiə imuə̀ yìy awò àghè.

²⁷Ù mə nyə̀ soʼò Wa nə̀ daʼa kiy ani saʼ wiy aghê àdzə̀m, aŋwòə ù də̌ Wà wù.

²⁸Kəə adzwə nə̀ zwumə gha anə yiə yə mə dzîy nəniy nə̀ soŋə fiy kìy kpe tsə ŋwô aghû yə̀ ghu kə pfə dzə̂ nəniy, ghu nî zuw ŋwòə dzə̀ ə̀ Wà Kə̀zə̀.

²⁹Ani bu ghu zuw tsə nəniy, ghu ni zɛmə̀ dzwoŋi bə̂ anə sày tə ghu àdzə̀m. Aghû yə̀ ghu kə zəŋə tsə̂ ayiə àdzoŋə̀ yìy, ghu ni zɛmə̀ kə ani kəli ìmuə̀ itsà. A kwuni bû àghù yə̀ ghu kə muə təŋ kə ani zəŋi ayiə àbɛbə yiy, ghu ni zɛmə̀ kə tə̀ ghu saʼ wiy ghù.”

³⁰Mə way dzə ani fàʼ ìyiə ìliy yiy anə ŋgəŋ yam. Mə faʼà anə yiə yə Təli wam dzîy bə̂ nəniy â mìə̀. À yù də ighe ayiə yə mə saʼa nəniy mə saʼa tsitsi, aŋwòə mə faʼà anə ayiə yə wù wə̀ ù twum nəniy miə ù liə nəniy, à way dzə ayiə yə mə tsə̂m tsə nəniy.

³¹Abu à mə̀ dzìy təŋə kə miə ayiə uwè nam wiy, ayiə yə mə dzìy nəniy a mə də wày dzə ayiə àsoŋə̀ yìy.

³²Wè lìy wìy də sòʼò ŋwô ù namə dzìy nəniy ayiə yiy kwùmə bə̀ nə̀ miə̀. Ndzə̀m ndzə̀m ayiə yə ù dzìy nəniy kwùmə bə̀ nə̀ mìə̀ a ndzə̂m də̌ àsoŋə̀ yìy.

³³Gha maa ndzə̀m twum aghê yìy nə̀ ghu zû kaw kəli fyi kə awò Dzwan wə ù kə nyiə̀ nəniy mwi m-à-zə̀ mìy, ayiə yə ù kə dzây kwùmə̀ bə̀ nə̀ mìə̀ à kə də ayiə àsoŋə̀ yìy.

³⁴À bòʼò wày dzə wè mbyi ani dzày nyə̀ idzwə yam, mə aghi kwuni dzìy nə̀ ghu nə̀ bii fyiə gha.

³⁵Dzwan kə dəə yəə à dəə təkaʼì tə tuu bə̂ nəniy, gha ə màŋ dwiʼi tsə kə ntwùm ə̀ we anə fəkə̀mə̀ kə.

³⁶Mə kwuni kwu wù lìy ù də ani dzày nyə̀ ìdzwə yam tsìy fyi yəə Dzwan kə dzây. À də̌ fàʼ kə̀ təli wam kə twum bə̂ miə nə̀ mə bû fâʼ mâ kə. Ayiə yə mə faʼà nəniy a dê bə̀ ŋwò nə̀ à də we ù twum nəniy miə.

³⁷Təli wam wə ù twum bə̂ miə ù mə dzày ndzòʼò wù wə̀ mə̀ də we nə̀ ìdzwə i we yiy. Gha kamə zuw kôʼ dzə̂ we, gha kamə kə̀ bôʼ kôʼ kôʼ dzə̂ we nə̀ àsə ghi yiy.

³⁸Ghà kwu dyaŋi dzə̀ way twùmə̀ we anə fòŋ tii, aŋwòə gha kə̀ bɛmə nyiə̀ dzə̂ â mìə̀, wù wə̀ ù twum bə̂ nəniy.

³⁹Ghà tsə̂ŋ zwəʼə kə ŋwàʼà k-a-zə̀ aŋwòə gha ə moʼò nə̀ gha kî kyilə ŋwò imuə̀ itsà yìy ate. Ŋwàʼà k-a-zə̀ kə̀ ghii dzìy sòʼò àyiə kwùmə̀ bə̀ nə̀ mìə̀.

⁴⁰Ghà kwuni twe təŋə bə̀ kə ŋwò ani bù nìy ìmùə̀ itsà awò miə̀.

⁴¹Mə dîy dzə̀ wày aghii nə̀ aghee mbyi kyali bə̂ miə.

⁴²Mə kwuni kwu ŋwô nə̀ ghà liə dzə̀ way Zə̀kìy anə fòŋ təli.

⁴³Mə bû ani bù fàʼ nə̀ ghà anə izəd i Təli wam, ghà miə kə̀ kwuni ŋgwam na nəway, abu aghè àliy yiy kwuni bû ani fàʼ ayiə ŋgəŋ ə ghu, gha ə nìy ŋgwam na dzwàb tsə ghu.

⁴⁴Ghà kî kaʼa tsə mə̀yə ani bɛmə ayiə yə mə dzîy nəniy â ghà, nə̀ ghà liə kə nə̀ aghê liy si nyiə̀ gha nə̀ ŋkwiʼi miy, kwuni khu yə̀ wǎy ŋkwiʼi mə ì ŋwò bə̂ awò Təli wə à də kə nəniy we Zə̀kiy. Ghà kî də̌ mə̀yə ani bɛmə â mìə̀ ə?

⁴⁵Kə̀ nə̀ kwuni mòʼ dzə̀ nə̀ à nì də miə mə nî twaʼa nyiə̀ nəniy gha awò Təli wam. A nì də̀ Musîs wə̀ ghà toʼò gaʼ na fôŋ təli tiy a zoŋə we. À nì də̌ we ù nì twaʼa nyiə̀ nəniy gha awò Təli wam.

⁴⁶Abu gha ə kə də nə̀ ghà mə bɛmə nyiə̀ â Mosis, ghà mə bɛmə nyiə̀ soʼò â miə̀, aŋwòə mə də wù wə̀ ù kə twâ na nəniy ayiə yiy kwùmə̀ yə̀ nə̀ we.

⁴⁷Anə yiə yə ghà kə kwuni twe ani bɛmə ayiə yə ù kə twâ na nəniy, ghà kîy kaʼa tsə mə̀yiə ani bɛmə àyiə yə mə dzîy nəniy ə?