Read Isu Dzwan 6 Bible Online

Dzwan 6 - Isu bible

Dzwan 6

¹Abù iyiə yə̀ tsìy ŋwò tsə nəniy, Yesù ə ŋwò dàŋ fyi yə̀ a ŋgùŋə̀ dzwì Galìlî yə̀ ghu twoŋə soʼò nəniy nə̀ à də iŋwû i Tìbelìyà.

²Ŋwaâ kə ghù kiy ŋwò dzwùmì yə̀ we bòʼ mali tə yiə tə ghu kə kôʼ ù fàʼà nəniy a zoŋə̀ àghè à dzaŋə yiy.

³Yesù ə ŋwò kwoʼ yə̀ anə ukàʼ zù dòʼò tswi tsə nə̀ tsə̀təndii tə we tiy.

⁴À kə də̌ nə̀ inyi i ŋkàmə̀tâzaʼà mə̀ àghee Dzû yìy mə swəd.

⁵Abù Yesù ŋwò kòʼ tsə nəniy ŋwaâ kə aghù kə̀ kə tyiŋə̀ bə̂ nəniy, u bəb yə̀ â Filîp a we nə, “A də ani zwe bə̀ yə̀ ufânyiə wiy â ghù yə̀ ani nyi ə?”

⁶Yesù kə ghi màŋə̀ bəbə ani swìʼì kòʼ Filîp, aŋwòə ù maa myiŋì na iyiə yə ù kì zəŋə nəniy.

⁷Filîp mee a we nə, “Abuu ŋgà tsəm nîy bə̂ kə ukhiy wə wù də ani fàʼ anə təndzoŋə ifamə zwe kə ufânyiə ate, u kî way dzə ani fyi àghè àdzə̀m.”

⁸Tsə̀təndii ə̀ we ìlìy ghu kə tyoŋə nəniy nə̀ à də Andùlù, àzə̀ ə Simùn Pità, u màŋ tswa bə̀lì kə sòʼò a we nə,

⁹“Ànìsə̀ ùlìy ù də̀ fəə nə̀ ghɛbə tə uba tiy ità nə̀ tsi tiy ibè, à yù ndòʼò də ufyânyiə ùliy wiy ani fyi ŋwaâ kə aghù yəə à də à yuu ə̀?”

¹⁰Yesù mee a ghu nə, “Zəŋi tsə nənìy tə̀ aghê doʼò tsə anə uzǔ.” Uzuu wiy kə ndəŋ də̀ ŋwô a lòʼo kə ghà kə̀. Ntàŋə̀ iŋə̀mə̀ yə̀ ghu kə bvuki doʼò nəniy, ì kiy də̀ yəə à də̀ təkaam ità.

¹¹Yesù ə nìy kə ghɛbə tə uba tə̀, nyə̀ tsə kəzòŋə̀ awò Zə̀kìy, nyə̀ yə̀ nə̀ tsə̀təndii tə we tiy dzâw nyiə̀ yə̂ awò àghù yə̀ ghu kə də nəniy awo. U zəŋi sòʼò ìghəd nə̀ tsi tə, aghû yə̀ ə nyi kwu dzwàb tsə.

¹²Abù ghu ndoʼò nyi kwuu dzwâb tsə nəniy, u dzày yə̀ â tsə̀təndii tə we tiy a ghu nə, “Ghà byoŋi bə̂ mbòʼò mə̀ ùba mə nə̀ mbùŋə̀ mə̀ tə̀tsiy mə, tə̀ ŋgà kə nyâb màʼà dzə̀.”

¹³Tsə̀təndii tə byoŋi lwe tsə mbòʼò mə̀ ùba mə aghû yə̀ kə nyi na sə nəniy, in lwe kə anə uŋkhìy ùvəm nə̀ ùghe wiy ubè.

¹⁴Abù aghê kôʼ tsə nəniy mali tə yiə tə Yesù zəŋi nəniy, ghu kaʼ ani dzày nə̀, “À yù nyìə̀ ni ndzəm də wè ntwùm ə̀ Kə̀zə̀ wə̀ ù kwu nəniy ani bù anə mbyi!”

¹⁵Abù Yesù kòʼ kəli tsə nə̀ ghu kî kwi kə we ghu zəŋi tsə nə̀ ghe doʼò dòŋ kə ghu, u ŋwò kwoʼ yə̀ anə ukàʼ ùliy wiy, zù dòʼò yə̀ awote nə̀ noŋə̀ we.

¹⁶Abù nə̀ nyiŋkwubìtìy, tsə̀təndii tə Yesù tìy ə ŋwò tswi yə̀ a kə̀lə̀ ìŋwù,

¹⁷ghu zù nyi kə anə kəmfə̀n, ŋwò dàŋ fyi yə̀ a Kàpanùm. Utsuk wiy dzəə bə̀ nə̀ Yesù kamə kə̀ bû kway nəway ghu.

¹⁸Anə sòŋə fə ghà fə̀, zoŋə kaʼ tsə ani tsìy, tyiŋə kwoʼo bə̀ mwi.

¹⁹A də̌ nə̀ tsə̀təndii tə mə ŋwò nyi này yə̀ anə dzwî bənə kwùmə̀ yə̀ kaam tə təntàm ìtà, moo ìntyìfoŋ. Ghu kòʼ Yesù bwìy kyoŋə bə̂ anə tuw kə mwi anə dzwî, bwìy kyoŋə bə̀ a kə̀lə̀ kəmfə̀n, itsəŋ i ŋge nyi ghu anə təfòŋ.

²⁰Yesù ə dzìy a ghu nə, “Ghà kə tsəŋ dzə̀, à də̀ miə!”

²¹Ghu kə ŋge dyoʼo ŋwò ani nìy nyi kwoʼ yə̀ we anə kəmfə̀n, mfə̀n kìy ə dyaŋi kwùm yə̀ anə iŋgùŋə anə lòʼo kə ghu kə zê nəniy.

²²Abù tsutsu wə, aghû yə̀ ghu kə doʼò sə nəniy a ŋgùŋ ìlìy yə̀ ghu kəli tsə nə̀ à kə mày kə mfə̀n kə ghà kə̀ kə̀mòʼ. Ghu mòʼò kə nə̀ Yesù kə kə̀ ŋwô dzə̂ nə̀ tsə̀təndii tə we tiy, ghu kə kwu kə nə̀ ghu mə ŋwò na sə Yesù.

²³Ghu bàŋ bə̀ ùmfə̀n ùliy wiy u kə ŋwô bə̂ nəniy a Tìbelìyà, ghu bù təmi na bə̀ a lòʼo kə ŋwàâ kə ghù kə̀ kə nyiə nəniy ba kə Mwe ə̀ Mbyi kə nyiə̀ nəniy zòŋə̀ k-a-zə̀ kìy ate.

²⁴Abù ŋwaâ kə̀ kòʼ tsə nəniy nə̀ Yesù kàm way awote nə̀ tsə̀təndii tə we tiy, ghu nìy kə sòʼò kə̀mfə̀n, dàŋ fyi yə̀ anə inaʼ i Kàpanùm, ghu khu tsə̂ nəniy we.

²⁵Abù ŋwàâ kə̀ zù kòʼ tsə nəniy Yesù a ŋgwùŋ ìŋwù ìlìy yə̀, ghu mee a we nə, “A àtyi dè, wò dàŋ zəŋi fə ŋgwùŋ ə?”

²⁶Yesù mee a ghu nə, “Mə ndzəmə̀ dzìy bə̀ ŋwò â ghà nə̀, ghà miə ghii khu bə̀ kə anə yiə yə ghà kə̀ nyi kwu tsə nəniy ufânyiə wiy, à wày dzə̀ nə̀ ghà kə kòʼ kəli ŋwô ayiə yə mali tə yiə tə̀ kə myiŋə̀ nəniy.

²⁷Ghà kə nyəŋ dzə̀ adzəmə̀ ùfànyiə wə̀ u də nəniy ani mbab bɛb, ghà kwuni kwu ani ndəmi tsə iwee anə ufànyiə wə u nyiə̂ nəniy imuə̀ itsà yìy. À də̌ ndzòʼò ufànyiə̀ wə Wà Wù nyiə̀ nəniy, aŋwòə Təli Kəzə̀ mə bɛmə na we nə̀ ù fàʼ aghii.”

²⁸Ghu bəb yə̀ a we nə, “Ghè nə zəŋi mə̀yiə tə̀ ghè si faʼa yə ayiə yə Zə̀kìy liə nəniy nə̀ ghè faʼ ə?”

²⁹Yesù ə bə̀lì yə̀ a ghu nə̀, “Zə̀kìy liə nə̀ ghà kəli tsə ibɛmə azoŋə̀ wu wə̀ ù twum bə̂ nəniy.”

³⁰Ghu mee a we nə, “Wò kì zəŋə tsə mali kə iyiə kə̀ ghaa kiy, tə̀ ghè ə də ani kəli tsə ibɛmə a zoŋə̀ wò ə? Wò kì zəŋə tsə kyə̀?

³¹Nə̀ təli ŋgàŋ a səsə yiy kə nyiə ufânyiə wə ghu tyoŋə nə̀ à də Manà a mbvən ə̀ kə̀sisi. Ighəd yəə i twâ dòʼò anə ŋwàʼa k-a-zə̀ nə̀, ‘Zə̀kìy kə nyə̀ fyi tswi bə̀ ghu nə̀ ùfànyiə wiy anə Kəvələ â ghu ani nyi.’ ”

³²Yesù ə dzày yə̀ a ghu nə, “Mə ndzəmə̀ dzìy bə̀ ŋwò awò ghà nə̀ à kə wày dzə Musîs ù kə nyiə̀ gha nə̀ ùba wə u ŋwô bə̂ nəniy anə kəvələ, à kə kwuni də Təli wam wə̀ ù də̀ nəniy an-a-vələ ù baa nyiə̀ tsə̂ nəniy gha nə̀ ndzə̀m ndzə̀m kə ufànyiə kiy.

³³Ufânyiə wə Zə̀kìy nyiə̀ nəniy à də wù wə̀ Zə̀kìy twum bə̂ nəniy ù ŋwò bə̀ nəniy an-a-vələ, ani bù nyə̀ sòʼò ìmwùə̀ awò àghě mbyi yiy.”

³⁴Ghu mee a we nə, “A Mwe, i tsəŋə nyiə bə kə ghəd nə̀ ba kiy nsòŋ indzə̀m.”

³⁵Yesù mee a ghu nə, “Mə də ba kə imuə̀, aghû yə̀ ghu bû nəniy akə̀lə̀ mìə̀ dzoŋ way ani kàm zab kòʼ ghu, aghû yə̀ ghu bɛmə kə awò mìə̀, fòŋ kì kàm swə kòʼ way ghu.

³⁶Mə mâ dzày awò ghà nə̀ ghà mə mìə̀ kôʼ, ghà kwuni liə way ani bɛmə kə awò mìə̀.

³⁷Wù wə̀ təli wam nyiə̀ bə̂ dzə we awò mìə̀, ù kì bè ŋwò a kə̀lə̀ mìə̀. Mə kî dzwùm sòʼò way wù wə̀ ù bù dzə̂ akə̀lə̀ mìə̀.

³⁸Aŋwòə mə kə̀ ŋwô tswi bə̂ dzə̂ an-a-vələ ani bù fàʼ ayiə ŋgəŋ yam, mə kwuni bù ani bù fàʼ ayiə wû wə̀ ù twum nəniy miə.

³⁹Wù wə̀ ù twum bə̂ nəniy miə, ù liə nə̀ mə kə nây maʼa dzə̌ wù ùmòʼ anə aghù yə̀ ù nyə̀ na nəniy awò mìə̀, ù kwuni liə nə̀ mə zɛmə̀ dzwoŋi bə̂ ghu dzə̀m tə̀ ghu ni kəli tsə imuə̀ anə tsuk fə saʼa fìy.

⁴⁰Təli wam liə nə̀ aghê yə̀ àdzə̀m ghu kôʼ nəniy miə, bɛmə kə sòʼò awò mìə̀ nə̀ ghu kəli tsə imuə̀ itsà. A ni bû tsuk fə isaʼ fìy kpe tsə̀ nəniy mə ni zɛmə̀ kə̀ ghu tə̀ ghu kəli tsə imuə̀.”

⁴¹Aghê ghà yə̀ ə kaʼ yə̀ ani ŋwuŋi dzə̀ŋì kùmə̀ yə̀ nə̀ we, aŋwòə Yesù dzày tsə nə, “Mə də ba kə kə ŋwô tswi bə̂ an-a-vələ.”

⁴²Ghu bəbə anə iwè nə̀, “À yù wày Yesù ə̀, wa Yùsə̂f ə? Ŋgà kwu ŋwô təli nə̀ zə̂. Ù sì dzìy mə̀yiə nə̀ ghe tswi bə̀ an-a-vələ ə?”

⁴³Yesù ə dzày yə̀ a ghu nə, “Ghà bwi na ayiə yiy ghà ŋwuŋə dzəŋə̀ anə iwe.

⁴⁴Wù lìy wày dzə ani bù akə̀lə̀ mìə̀, à mày kə̀ nə̀ təli wə ù twum bə̂ nəniy miə ù nìy bə̀ we. Mə nî zɛ̀mə̀ dzwoŋi bə̂ sòʼò we a ntsuk fə isaʼ.

⁴⁵Aghě ntwùm ə̀ Kə̀zə̀ kə twà na nə̀, ‘Zə̀kìy nî tyi dè ayiə̀ we awò aghè àdzə̀m.’ Wù wə̀ u zuw dzə̂ nəniy ayiə təli ù ghè wə̀, zwiʼi kəli tsə sòʼò àyiə we ù kì bè ŋwò akə̀lə̀ mìə̀.

⁴⁶Wù lìy kamə kə̀ kôʼ kôʼ dzə̂ Təli wam, à mày kə wù wə̀ ù ŋwò bə̂ nəniy akə̀lə̀ Kə̀zə̀. À mày təŋ kə we ù kòʼ kôʼ dzə̂ nəniy Təli wam.

⁴⁷Mə dziy ndzə̂m dzây bə̂ â ghà nə̀, wù wə̀ ù bɛmə dzə̂ nəniy ù nì kyilə ìmuə̀ itsà.

⁴⁸Mə də ba kə kə nyə̀ nəniy imuə̀ yìy!

⁴⁹Nə̀ təli ghi səsə yə̀ kə nyi ufânyiə ghu tyoŋə nə̀ à də Manà, ghu ŋgoŋə nam pfə.

⁵⁰À yù də̀ ba kə kə fyi tswi bə̂ nəniy an-a-vələ, wù wə̀ ù nyi dzə̂ nəniy ù nì pfə kòʼ wày.

⁵¹À də miə ba kə kə kwu nəniy imuə̀ yìy, kə kə fyi tswi bə̂ nəniy an-a-vələ. Abu wù nyi nəniy ba kə ghà kə̀, u nî mwùə̀ təŋ. Ba kə ghà kə̀ ghî də̀ uwee nam wə mə kî nyiə̀ ŋwô yə̂ nəniy bòʼ imuə̀ i aghè àdzə̀m fə̀ anə mbyi.”

⁵²Aghee Dzû yìy kaʼ kə̀ ani bə̀d ayiə anə iwè nə̀, “Ù kì nyə̀ bə̀ mə̀yə uwe u we wiy awò ŋgàŋ, tə̀ ŋgà nyi yəə à də ufânyiə ə?”

⁵³Yesù mee a ghu nə, Mə ndzəmə̀ dzìy bə̀ ŋwò â ghà nə̀ abu ghà də kə̀ nyi nəway uwee u Wà Wù wìy yəə à də̀ kəba, kə̀ mwu soʼò nəway kâŋ tə we tiy, ghà kî kəli way imuə̀ itsà.

⁵⁴Wù wə ù nyi nəniy uwee nam wiy yəə à də̀ kəba, mwu sòʼò kàŋ tam ù kwu ŋwô imuə̀ itsà yìy, mə ni zɛmə̀ kə soʼò we anə ntsuk fə isaʼ.

⁵⁵Aŋwòə uwee nam wiy ndzə̂m də ba kə ghà kə̀. Kâŋ tam tiy ndzə̂m də fyiə kə wù də nəniy ani mwu.

⁵⁶Wù wə̀ ù nyi dzə̂ nəniy uwee nam wiy, mwu sòʼò kàŋ tam u mə̀ dòʼò fyiə kəmòʼ nə̀ mìə̀, Mə mə dòʼò sòʼò anə fyiə̀ kəmòʼ nə̀ we.

⁵⁷Anə yəə Təli wam wə ù mwuə nəniy, ù twum bə̂ nəniy miə, mə mwuə soʼo bòʼ we, à də̀ sòʼò ighəd wù wə̀ ù nyi nəniy miə, ù kì mwùə̀ soʼò nəniy bòʼ mìə̀.

⁵⁸À yù də ba kə kə kə fyi tswi bə̂ nəniy an-a-vələ. Nə̀ təli ghii yiy səsə yiy maa nyi ufânyiə wə̀ ghu tyoŋə nə̀ à də̀ Manà ù kə ŋwô bə̂ an-a-vələ, ghu nam pfə sòʼò, akwuni bû wù wə̀ ù kì nyiə nəniy ba kə, ù nì pfə kòʼ wày.

⁵⁹Yesù kə ayiə yə̀ dzày a ndàw dzəŋə kə aghě Dzû nə̀ ù tyi dè àyiə a Kàpanùm.

⁶⁰Abù ndə̀mə̀ tsə̀təndii tə Yesù tìy zuw tsə nəniy ayiə yə Yesù tyi dê nəniy, ghu dzày tsə nə̀, “À də̀ ayiə àtaw yiy â wù ani bɛmə.”

⁶¹Yesù kə kwu ŋwô nə̀ tsə̀təndii tə we tiy ŋwunə dzə̀ŋə̀ ŋwò iyiə yə ù dzây tsə nəniy, ù mee a ghu nə, “Fòŋ ŋə̀m ŋwò gha ate ə̀?

⁶²Abu ghà sî baa kôʼ nəniy Wà Wù ù ŋwò kwoʼ dzwoŋi yə̂ nəniy anə lòʼo kə ù kə bôʼ də tsə nəniy ate!

⁶³À də̌ Zwày k-a-zə̀ kə nyiə̀ nəniy imuə̀ yìy. Daʼa kə wù mbyi kiy kwu dzə̀ way fàʼ kə̀liy kiy. Ayiə yə mə dzây nəniy â ghà a bê nə̀ Zwày k-a-zə̀ kə̀ kə nyiə̀ nəniy imuə̀ yìy.

⁶⁴Yəə i də kə ghii, gha àliy kamə kə̀ bɛmə dzə̂.” Yesù maa kəli zì bə̀ aghû yə̀ ghu kə də kamə bɛmə nəway, nə̀ wù wə̀ ù kì fyìè fyiə nəniy we.

⁶⁵U dzày gbaʼa fəli tsə aghu nə̀, “À yù də̀ ighe Mə mə̀ dzìy nəniy â ghà nə̀, wù ùmòʼ ndwàm wày dzə ani bù a sə̀ mìə̀ àmày kə anə daʼa kə təli wam.”

⁶⁶Abù ayiə yə̀ tsìy tsə nəniy, ndə̀mə̀ tsə̀təndii tə we tiy ə tu dzwoŋi kàmə̀ bwìy kyabə tsə̀ wày nə̀ we. Ghu ŋwò zù dzwoŋi anə lòʼo tə ghu kə ŋwô bə̂ nəniy ate.

⁶⁷Yesù ə bəb tsə â tsə̀təndii tə we tə ìvəm nə̀ ighe tiy ibè nə̀, “Ghà liə ani ŋwò sòʼò ə̀?”

⁶⁸Simùn Pità ə bə̀lì kə a we nə, “A Mwe ə̀ mbyi, Ghè kî zè akə̀lə̀ ndìə̀? Wò kwu ayiə yə a nyiə̀ nəniy imuə itsà yìy.

⁶⁹Ghè mə bɛmə, ghè kwu sòʼò ŋwô nə̀ wò də̌ Wù ù Zwe wə̀ ù ŋwò bə̂ nəniy awò Zə̀kìy.”

⁷⁰Yesù ə bə̀lì kə a ghu nə, “Mə kə sày kə u tuw ghii uvəm nə̀ ù ghe wiy ubè, wù lìy wìy ùmòʼ anə uzə ghii kwuni də̌ àmbvə̂ntsə!”

⁷¹Ù kə ghî dzìy Dzudàs, Wà Simùn Ìsə̀kalòt, aŋwòə ù kə kwu ani kàm bù fè fyi we ibàm yəə ù kə mbaŋ də kə tsə̀ndii ə̀ Yesù anə tsə̀təndii tə Yesù tə̀ ìvəm nə̀ ghe tiy ibè.