Read Isu Dzwan 9 Bible Online

Dzwan 9 - Isu bible

Dzwan 9

¹Abù Yesù ŋwò tsə nəniy a ndàw Kə̀zə̀, ù zù kòʼ tsə wè lìy ghu kə byi bə̂ nəniy we nə̀ ù fɛ̀b dòʼò ŋwò.

²Tsə̀təndii tə we tiy bəb yə̀ a we nə, “A àtyi dè, ghu kə wù wə̀ byi bə̀ nə̀ ù fɛ̀b dòʼò iyîkìə̀? À kə də ibɛb yə nə̀ tě we yiy kə zəŋi moo à kə də̀ ibɛb i we ghu byi bə̂ nəniy we nə̀ ù fɛ̀b dòʼò ə?”

³Yesù ə bə̀lì kə a ghu nə̀, “À wày dzə ibɛb i we moo i nə̀ təli we yiy, i zəŋi nəniy nə̀ ù fɛ̀b dòʼò. Ghu kə byi bə̀ we nə̀ ù fɛ̀b dòʼò ŋwò ani zəŋi tsə nə̀ aghee nì də ani kòʼ yəə daʼa k-a-zə̀ kìy faʼà nəniy anə imùə̀ i we.

⁴Anə yiə yə asə namə zwe nəniy, ŋgà kwu ani fàʼ tsə fàʼ kə wû wə̀ ù twum bə̂ nəniy miə, utsuk wiy dzəə bə̀ ŋwò anə yiə yə wè lìy kì də wày dzə ani kàm fàʼ.

⁵Anə yiə yə mə nam də nəniy fə anə mbyi, mə də kaʼì tə ghě mbyi.”

⁶Abù Yesù dzày mâ tsə nəniy ayiə yə, u tsə tswi tsə ntiə a mbvə̀d, ŋwùk fyi kə kə tsaʼ ate kyili kə anə asə ə wû ù ghè wə̀.

⁷U dzày yə̀ â wù ù ghè wə̀ a we nə, “Zù anə bwòʼ kə mwi kə Silwàm, wò sûw maʼà kə utwûmusə yiə̀ awote.” (Silwàm myìŋə̀ “twum.”) Wù ghè wə̀ ə zù sùw màʼà kə utwumusə u we, bù dzwoŋi nə̀ ù nyìə̀ kòʼò tə̀ loʼo.

⁸Abù aghû yə̀ ghu kə kwùlì muə nəniy nə̀ we, nə̀ àghù yə̀ ghu kə koʼò tsə̂ nəniy we ù ŋwa kyabə tsə ùfyiə wiy, ghu kòʼ tsə we, ghu bəbə nə̀, “À yù wǎy wù wə̀ ù kə bê dyòʼò tsə̂ nəniy fəə, ŋwa kyabə tsə̀ ùkhiy ə̀?”

⁹Aghê lìy yiy dzìy nə̀, “À də̌ wù ù ghè wə̀.” Aghê liy yiy kwunə dzìy nə̀, “Hǎy! À wày dzə we, ù màŋə̀ fwunə ŋwò.” Wù ù ghè wə̀ ə ba dzày fyi bə̀ nə̀ ìdzwə iwe yiy nə̀, “Mə də wù ù ghè wə̀.”

¹⁰Ghu bəb yə̀ a we nə, “Wò kaʼ mə̀yə ani kòʼ tə̀ loʼo ə?”

¹¹U bə̀lì kə a ghu nə̀, “Wù wə̀ ghu twoŋə nəniy nə̀ à də̀ Yesù, ù mə̀ ŋwùk kə kətsaʼ, nìy kyili kə anə asə yam, dzày tsə nə̀ mə zû sûw maʼà ùtwùmusə wam anə bwòʼ kə Silwàm. Anə yiə yə mə zû sùw kə nəniy utwûmusə wam wiy awote, mə dyaŋi kaʼ tsə ani kòʼ tə̀loʼo.”

¹²Ghu bəb tsə a we nə̀, “Wù ù ghè wə̀ də̀ yə.” Wù wə̀ ù kə fɛ̂b doʼò nəniy u bə̀lì kə a ghu nə, “Mə kwu way loʼo kə ù də nəniy ate.”

¹³Ghu nìy bù nə̀ wù wə̀ ù kə bôʼ fɛ̀b doʼò nəniy akə̀lə̀ àghě Falàsî.

¹⁴À kə də̌ nə̀ ntsuk fə Yesù kə ŋwùk kə tsaʼ kiy zəŋi taw kə wù wə̀ ate, à kə də̀ a ntsuk fə̀ zwaa fiy.

¹⁵Aghê Falàsî yə̀ ə bəb fwuli tsə awò wù ù ghè wə̀ we nə̀, ù kaʼ mə̀yə ani kòʼ tə̀loʼo. Wù wə̀ ə bə̀lì kə a ghu nə, “Yesù kə kyili kə kətsaʼ anə asə yam, mə zù sùw màʼà kə utwumusə wam, kaʼ yə̀ ani kòʼ tə̀loʼo.”

¹⁶Aghê Falàsî àliy yiy ə dzìy nə̀, “Wù wə̀ ù zəŋi nəniy ayiə yə, ù kə̀ ŋwô bə̂ dzə̂ awò Zə̀kìy, aŋwòə ù nia way lâŋ kə̀ kə dzîy nəniy nə̀ ŋgà kə fâʼ dzə̀ a tsukə ù zwaa wiy.” Aghê liy yiy kwuni bəbə nə̀, “Wù ù bɛbə̀ wìy də̌ mə̀yə ani fàʼ mali tə yiə yəə à də̌ à yu ə?” Ghu dzàw dòʼò yə̀ anə iwè.

¹⁷Aghê Falàsî yə̀ ə nam bəb fwuli yə̀ awò wù wə̀ a we nə, “Ù mə̀ zəŋi taw kə asə yiə̀, wò kaʼ yə̀ nəniy ani kòʼ tə̀loʼo, wò kwu nə̀ìndiə ani dzày kwùmə̀ yə̀ nə̀ we ə?” Wù wə̀ ə bə̀lì kə a ghu nə, “Ù də̌ wè ntwùm ə̀ Kə̀zə̀.”

¹⁸Ghu namə byemə way nə̀ à də wù wə̀ ù kə fɛ̂b dòʼò ŋwò, ù kòʼò nəniy loʼo tiy, zù kwùm anə sòŋə fə ghu kə twoŋə bə̂ nəniy tè wù wə̀ ù kə fɛ̂b doʼò nə̀ zə̂ we.

¹⁹Aghee Falàsî yə̀ ə bəb yə̀ awò nə̀ tè wù wə̀ nə̀ zə̂ we a ghu nə̀, “À wə̀ də̌ wa nəli? À wə̀ də̌ wa nə, ghà dzîy nəniy nə̀ ghà kə byi bə̀ we nə̀ ù fɛ̀b dòʼò ŋwò ə̀? À fyi kìə̀ ù si kòʼò nəniy loʼo tiy nyiə?”

²⁰Tè wù wə̀ we nə̀ zə̂, ghu bə̀lì kə a ghu nə, “Ghè kwu ŋwò nə̀ ù də̌ wa nələ. Ghè kwu sòʼò ŋwô nə̀ ghè kə byi bə̀ we nə̀ ù fɛ̀b dòʼò ŋwò.

²¹Ghè kwuni kwu way fyiə kə kə zəŋi nə̀ ù kaʼ ani kòʼ tə̀loʼo nyiə. Ghè kwu dyaŋi way wù wə̀ ù zəŋi taw nəniy we. Ghà bəb yə̂ â we. Ù mə nɛmə, ù də̀ ŋwô ani bə̀lì nə̀ noŋə̀ we.”

²²Tè wù wə̀ nə̀ zə̂ kə ghii dzìy aŋwòə ghu kə tsəŋə ŋgəd tə ghě Dzû. Ŋgəd tə aghě Dzû tìy maa bɛmə na nə̀, wù wə̀ ù ki kòʼ kəli nəniy Yesù nə̀ à də̌ wù wə̀ Zə̀kìy sûw kyili na, ghu ki dzûm ŋwô fyi we a ndàw dzəŋə kə aghě Dzû.

²³À də̀ i ghe tè wù wə̀ we nə̀ zə̂ ghu kə dzîy nəniy nə̀, “Ù mə nɛmə, ghà ə bəb yə̂ â we.”

²⁴Ani zəŋi yə̀ nsòŋə ìmbè, ghu twoŋə na bə̀ wù wə̀ ghu kə byi bə̂ nəniy we nə̀ ù fɛ̀b dòʼò ŋwò. Ghu dzìy a we nə, “Kǎ kə nə̀ wò kì dzìy ŋwò ayiə àsoŋə̀ yìy â ghə̀d! Ghè kwu nə̀ wù wə̀ ù mə̀ zəŋi taw nəniy wô à də̌ wù ùbɛbə̀ wìy.”

²⁵Wù wə̀ ə bə̀lì kə a ghu nə, “Mə kwu way nə̀ ù də̌ wù ùbɛbə̀ wìy moo ù wày wù ù bɛbə̀ yìy ə. Mə kwu kə nə̀ mə kə fɛ̀b dòʼò ŋwò, mə kwuni kòʼò ŋwò loʼo tiy nyiə̀.”

²⁶Ghu bəb yə̀ a we nə, “Ù kə zəŋi mə̀ yə nə̀ wò ə? Ù zəŋi taw mə̀yə asə yiə̀ yìy ə?”

²⁷Wù wə̀ mee a ghu nə, “Mə mə̀ dzày tsìy dzə̀ awò ghà, ghà də kə̀ zuw nəway, ghà liə nə̀ mə dzây fwuli bə̂ iyîkìə̀? Ghà liə ani dòʼò sòʼò tsə̀təndii tə we ə?”

²⁸Ghu nyàʼì we a we nə, “Wò də̌ tsə̀ndii ə tûw wə̀. Ghè kwuni də̌ tsə̀təndii tə Musîs.

²⁹Ghè kwu nə̀ Zə̀kìy kə dzə̀ŋì bə̀ ŋwò nə̀ Musîs. A kwuni bû tûw wìy, ghè bôʼ kwu way loʼo kə ù ŋwò bə̂ nəniy ate.”

³⁰Wù ù ghè wə̀ ə bə̀lì kə a ghu nə, “Ghà dzîy àyiə àzwumə idzwə yiy! Ghà kwu dzə way loʼo kə ù ŋwò bə̂ nəniy ate, ù mə kwuni zəŋi asə yamə nyiə̀ kòʼò tə̀loʼo.

³¹Ŋgà kwu nə̀ Zə̀kìy nyə̀ dzə̀ wày tswuŋi kiy awò àghè bɛbə yiy. Ù nyə̀ kə̀ tswuŋi awò àghù yə̀ ghu zuw nəniy â we, zəŋə sòʼò àyiə yə ù liə nəniy nə̀ ghu si zəŋə.

³²Ani nìy ŋwò tsə anə yiə yə Zə̀kìy kə zəŋi mbyi, wù lìy kamə zuw kôʼ dzə̂ nə̀ wù lìy mə fwiy kə asə ə wù lìy nə̀ ghu kə byi we nə̀ ù fɛ̀b dòʼò ŋwò.

³³Bəə wù wə̀ mə̀ də kə̀ ŋwô bə̂ nəway awò Zə̀kìy, ù mə̀ wày dzə ani də ani zəŋi dzòʼò ìyiə yəə à də̌ ì yuu.”

³⁴Ghu bə̀lì kə a we nə, “Ghu kə byi bə̀ wò anə ibɛb, wò nɛmə anə ibɛb. Wò də̌ fə̀ ndìə̀ ani bù tyi dè àyiə â ghə̀d ə?” Ghu dzwùm ŋwò fyi we a ndàw dzəŋə kə ghě Dzû.

³⁵Abù Yesù zuw tsə nə̀ aghee Dzû mə dzwùm ŋwò fyi wù wə̀ a ndàw dzəŋə kə ghě Dzû, u zù kòʼ tsə wù wə̀, bəbə a we nə, “Wò bɛmə ŋwô awò Wà Wù ə̀?”

³⁶Wù wə̀ ə bəb yə̀ a we nə, “A mwe, Wà Wù də̌ ndiə, dzay bə â mìə̀ mə nì də ani bɛmə yə̀ â we.”

³⁷Yesù ə dzày yə̀ a we nə, “Wò mə we kôʼ nyiə, ndzə̀m ndzə̀m, à də̌ we ù dzə̀ŋə̀ nəniy nyiə nə̀ wò.”

³⁸Wù wə̀ ə dzày tsə a we nə, “A Mwe ə̀ mbyi, Mə mə bɛmə.” U dyaŋi nyaʼa tswi tsə, anə səkə Yesù, fwùlì tsə we.

³⁹Yesù ə dzày tsə nə̀, “Mə fə anə mbyi bû ani bù saʼ aghû, mə zəŋi tsə nə̀ aghû yə̀ ghu fɛ̂b doʼò nə̀ ghu kôʼ tə̀loʼo. À yuu ghu koʼò nəniy loʼo tiy ghu doʼò àghè à fɛbə yiy.”

⁴⁰Aghee Falàsî àliy ghu kə də nəniy awote, ghu zuw tsə ayiə yə Yesù dzày nəniy, ghu bəb yə̀ a we nə, “Wò myìŋə̀ nə̀ ghè fɛ̂b dòʼò sòʼò ŋwò ə̀?”

⁴¹Yesù ə dzày yə̀ a ghu nə, “Bəə gha a mə̀ fɛ̂b doʼò nəniy, ghǎ mə də wày ani kəli nə̀ ghà mə zəŋi bɛb. Yəə ghà kwuni kwoʼò nəniy iwe yiy nə̀ ghà koʼò ŋwò loʼo tiy, i dê tsə nə̀ ghà kwu ŋwô nə̀ ghà mə zəŋi bɛb.”