Read Isu Kə̀fàʼ 1 Bible Online

Kə̀fàʼ 1 - Isu bible

Kə̀fàʼ 1

¹A Tìyofilùs, wù ù sòŋə̀ wìy, anə ŋwàʼà kə səsə kə mə kə twâ, mə kə twà dzày bə̀ àyiə yə àdzə̀m Yesù kə zəŋi, nə̀ àyiə yə ù kə tyi dê soʼò ani kaʼ ŋwò bə̀ anə sòŋə fə ù kə kaʼ nəniy fàʼ kə we kiy ate,

²zù kwùm a ntsuk fə Zə̀kìy kə nîy kwoʼ kə we idoŋ. Â Zə̀kìy ani nìy kwoʼ kə we, a də̌ nə̀ ù maa tyi dzày na ayiə yə awò àghù yə̀ ù kə sây nəniy anə daʼa kə Zwàykə̀zwekiy nə̀ ghu dòʼò àghě ntwùm ə̀ Yesù.

³Yəə Yesù kə fii nəniy, bù pfə, ù bù dè kə uwee awò àghě ntwùm ə̀ we anə ndə̀mə̀ tə tədzə̀lə nə̀ Zə̀kìy mə zɛ̀mə̀ ŋwò ighe anə ipfə. Ghu kòʼ we anə ntàŋə̀ mə̀ntsukə mə̀vəm inkyàʼì. U tyi dzày yə̀ sòʼò àyiə â ghu kwùmə̀ yə̀ nə̀ àyiə yə Zə̀kìy saʼa nəniy aghee we yiy ate.

⁴Abù asòŋə fə̀liy fiy Yesù ə nyiə nə̀ àghě ntwùm ə̀ we yiy, u tswù tsə ghu, dzìy a ghu nə, “Ghà kə kam ŋwò fyi dzə̀ a Yèlusalèm. Ghà ləmə tsə lwì kə̀ Təli wam kə tɛb na nəniy, lwì kə̀ mə kə dzây nəniy â ghà.

⁵Dzwan kə nyìə̀ mwi m-à-zə̀ anə dzwî, ntsukə miy kamə̀ dùw wày â Zə̀kìy ani kwuni nyə̀ ghà nə̀ Zwàykə̀zwekiy.”

⁶Abù aghee ntwùm ə̀ Yesù yìy bû fyi kpe kə nə̀ Yesù, ghu bəbə a we nə, “A Mwe ə̀ mbyi, wò nyə̀ liə ani zəŋi tsə nə̀ aghee Islàel yìy kâm saʼ dzwoŋi naʼà tə ghu ə̀?”

⁷Yesù mee a ghu nə, “Ghà kwu dzə̀ way ani kəli soŋə fə Zə̀kìy byay na nəniy nə̀ ndzòʼò àyiə yə̀ a dziy fyi, à kwu kə Təli wam yəə ù byay na nəniy, anə daʼa kə ù kwu nəniy.

⁸Ghà kî kwuni kyilə tsə kə̀daʼa a ki bu Zwàykə̀zwekiy bû nəniy azoŋə̀ ghà. Ghà ki naʼà yə̂ ayiə yə ghà kwu nəniy kwùmə̀ bə̀ nə̀ mìə̀ awò àghè dzə̀m anə inaʼ i Yèlusalèm, nə̀ anə mbwòʼ ə̀ Dzùdiyà ìdzə̀m, nə̀ anə mbwòʼ ə̀ Sàmaliyà, nə̀ anə lòʼo tədzə̀m fə anə mbyi.”

⁹Abù ù dzày mà tsə nəniy ayiə yə, Zə̀kiy nìy ŋwò kwoʼ kə we idoŋ nə̀ ghu koʼò yə̀ ŋwò. U ŋwò kwoʼ này yə̀, mbàʼ tìy ə kəd na tsə we, ghu kàmə̀ kòʼò way we.

¹⁰Yəə ù ŋwò này nyi kwoʼ yə̂ ghu kwuni tsə̀ŋ nam fwiy na kə àsə idoŋ. Anə soŋə fə ghà fə̀ kə, aghê àliy yiy àbè ghu kə dzəŋì kəli nəniy ndzwu tə̀ fəmə tiy, ghu màŋ fyi kə akə̀lə̀ aghê ntwùm ə̀ Yesù,

¹¹dzìy a ghu nə, “Aghee Galìlî, ghà tsə̂ŋ tiy kə kìə̀ fə, lia kə idoŋ ə?” Yesù wə̀ Zə̀kìy nîy kwoʼ kə we an-a-vələ ù nì bè dzwəŋə sòʼò anə yiə yə ghǎ mə̀ kòʼ nəniy we ù ŋwò kwoʼ nəniy ate idoŋ.

¹²Aghê ntwumə̀ Yesù yìy dyaŋi ŋwò tsə anə ukàʼ u ŋkàʼ mə̀ ùtam u Olìf zù dzwoŋi a Yèlusalèm. Ghab kə ukâʼ u ghè wə̀ kə doʼò fyi ŋwô yə̀ ate akə̀lə̀ ìnaʼ, à kə də̀ yəə anə fwôʼ fyi yə̂ mbwǎm mə̀ tə̀ntàm ìntà.

¹³Abù ghu bû kwùm tsə nəniy, ghu tsìy nyi kwoʼ dyaŋi yə̀ anə idzwə i ndaw idoŋ yə ghu kə muə nəniy ate. Aghee ntwùm ə̀ Yesù a ghè yə̀ kə də̌ Pità, nə̀ Dzwan, nə̀ Dzɛ̂m, nə̀ Andùlù, nə̀ Filîp, nə̀ Tomàs, nə̀ Bàtùlùmiyà, nə̀ Matìyò nə̀ Dzɛ̂m wà Afayòs nə̀ Simùn wə̀ ù kə kwu nəniy ighaa yiy ani kòʼ tsə nə̀ inaʼ yiy də dzwàb ŋwô, nə̀ Dzudàs, wà Dzɛ̂m.

¹⁴Aghee ntwùm ə̀ Yesù kə də nə̀ iyəŋi àliy yiy nə̀ Mə̀li wə ù kə də nəniy zə̂ Yesù nə̀ àwizə̂ ə Yesù iŋə̀mə̀, ghu kə bà tsə̀ ani təmə dzəŋə loʼo kəmòʼ, ghu gwùŋə̀ anə fòŋ ìmòʼ.

¹⁵Tsuk fə̀liy fiy, aghû yə̀ ghu kə bɛmə nəniy awò Kə̀litò, ghu kwi tsə kədzəŋə, utuw ghu wiy kə də̀ yəə à də̀ aghû fəbwaam nə̀ àghè mə̀vəm imbè, Pità ə təmi kə idoŋ ani dzày yə̀ àyiə â ghu.

¹⁶U dzày tsə aghu nə, “Awizə̂, anə ŋwàʼà k-a-zə̀ Devìd kə dzày tsə iyiə kwùmə̀ yə̀ nə̀ Dzudàs anə daʼa kə Zwàykə̀zwekiy. Ayiə yə ù kə dzây a ma bù fyi ìsoŋə yìy. Dzudàs kə də̀ dzəŋi tsə nə̀ ŋgàŋ, u fàʼ sòʼò nə̀ ŋgàŋ. U kwuni zù nìy bə̀ àghù nə̀ ghu bû kwi Yesù.”

¹⁸(Dzudàs kə nìy kə ukhiy wə ghu kə nyiə̀ nəniy â we anə ayiə àbɛbə yə ù kə zəŋə nəniy zwe kə kəloʼo ate, u pfə tsə awote, nə̀mì kə bwòʼò kə ndzǔ tə we tiy ne fyi bə̀ abee.

¹⁹Aghê dzə̀m ə zuw tsìy kpe yə̀ àyiə ghè yə̀ anə inaʼ i Yèlusalèm ìdzə̀m. À yù də̀ ighe, ghu kə twoŋə naa yə̂ izəd i lòʼo kə ghè kə̀ anə idzə̀ŋì i ghu nə̀ à də̌ “Àkeldamà,” i myìŋə̀ nəniy nə̀ à də̌ “Ibii i təkàŋ.”)

²⁰Pità zù kə nə̀ səkiy ani dzày a ghu nə, “I twâ dòʼò anə ŋwàʼà kə tə ndzàŋə nə̀, ‘Ghà ŋwô fyi a ndàw we, ì dòʼò tsə ìzwumə̀ yìy Wù lìy kə kâm mùə̀ dzə̂ awote.’ I twâ dòʼò sòʼò nə̀ ‘Ghà kaw tsə wè lìy ù bù kaʼ yə̀ ani fàʼ fàʼ kə̀ ù kə̀ faʼà tsə̂.’ ”

²¹“Yəə i də nəniy ghii ŋgà kwu ani sày kə wù ùmòʼ ù də nəniy ani dzày awò àghè liy yiy a ghu nə, ‘Ghe kwu ŋwô nə̀ Mwe ə̀ mbyi, Yesù, maa zɛ̀mə̀ anə ipfə.’ Wù ù ghè wə̀ kwu ani də wù wə̀ ù kə də tsə anə dzəŋə kə ŋgàŋ anə nsoŋə mə ìndzə̀m Mwe ə̀ mbyi, Yesù, kə bwîy tsə̂ nəniy nə̀ ŋgàŋ, ani kaʼ tsə anə sòŋə fə Dzwan kə nyiə̀ nəniy we nə̀ mwi m-à-zə̀ mìy bù kwùm ntsuk fə Zə̀kìy kə nîy kwoʼ kə nəniy we idoŋ.”

²³Ghu sày fyi bə̀ àghè bè, Yùsə̂f wə̀ izəd i we ìliy yiy kə də nə̀ à də̌ Bàsabàs, (ìliy yiy də̀ nə̀ à də̌ Dzustùs.) We nə̀ Màtiyàs.

²⁴Ghu dyaŋi gwùŋì tsə nə̀, “A Mwe ə̀ mbyi, wò kwu mà ŋwô fôŋ tə aghè dzə̀m tìy, dě bə wù wə̀ wò sày na nəniy fə anə aghù yə̀ àbè,

²⁵nə̀ ù dòʼò wè ntwùm ə̀ Yesù anə yiə yə Dzudàs kə̀ də tsə nəniy. Yəə Dzudàs sì ŋwò zù dòʼò dzə̂ anə lòʼo kə ù kə kwu nəniy ani dòʼò ate.”

²⁶Ghu twà tsə azəd ə aghě ghè yə̀ àbè anə mbə̀lə̀ mə̀ ùŋwàʼà, dzày tsə nə̀ a myaʼà fyiə kə idoŋ, izəd i wû wə̀ i kî dè fyiə kə nəniy idoŋ à ki də wù wə̀ Zə̀kìy sây nəniy. Ghu màʼà fyi kə idoŋ, in tswi bvə̀ tsə ambvə̀d, izəd i Màtiyàs yìy dè dòʼò fyi kə idoŋ. Ghu kwe fwumi yə̀ Màtiyàs anə aghě ntwùm ə̀ Yesù yə̀ àvəm nə̀ wù ùmòʼ.