Read Isu Kə̀fàʼ 11 Bible Online

Kə̀fàʼ 11 - Isu bible

Kə̀fàʼ 11

¹Aghee ntwùm ə̀ Yesù nə̀ àghè liy yə ghu kə bɛmə nəniy Zə̀kìy anə mbwòʼ ə̀ Dzùdiyà, ghu zuw tsə nə̀ aghû yə̀ ghu də wày aghee Dzû mə bɛmə sòʼò dzə̀ ə̀ Kə̀zə̀.

²Abù Pità zù nəniy a Yèlusalèm, aghee Dzû yə̀ ghu kə dzîy nəniy nə̀ ghu kwu ani gwùmì dzə̀ àghù yə̀ ghu bɛmə Zə̀kìy nə̀ ghu way aghê Dzû. Ghu twe màʼà àyiə yə Pità kə zəŋi.

³Ghu dzìy tsə nə̀ “Wò kə bwìy zù a ndàw tə ghù yə̀ ghu kə də wày dzə aghê Dzû, nə̀ ghu kamə kə̀ gwumì na nəway ghu, wò ə nyi fwumi soʼò nə̀ ghu!”

⁴Pità ə tyi dzày mà yə̀ àyiə yə̀ a kə fyi nəniy àdzə̀m â ghu. U dzày yə̀ aghu nə.

⁵“Tsuk ùliy mə kə də̀ a Dzopà, gwùŋə̀, Zə̀kìy zəŋi tsə mə kòʼ mbàʼà k-a-fyiə kə̀liy kiy ghu nyili fyi tswi bə̂ an-a-vələ, kə də̀ yəə à də̀ ukwe u ndzwu. Ghu kwi kəli nəniy anə ubə̀d ùkyàʼì, kə tswi zììy dòʼò tsə ambvə̀dintsə akə̀lə̀ mìə̀.

⁶Mə tòʼo fwə̀d nyi tsə, kòʼ tsə nyâm tə̀ ghu nyəli na nəniy nə̀ nyàm tə̀ tə muə ambvən. Mə kòʼ sòʼò nyàm tə̀ tə bwîy nəniy nə̀ nìə̀ mìy, mə kòʼ sòʼò ŋwùni ate.

⁷Mə zuw dzə̀ i dzày bə̂ â miə̀ nə̀, ‘A Pità, ŋwò kə idoŋ wò kwi wiy fwu nyâm tə̀.’

⁸Mə kwuni dzày tsə nə̀, ‘A Mwe ə̀ mbyi! Fyiə kə̀ dzəə kə̀li kiy anə làŋ kə ŋgàŋ, moo fyiə kə kə də kə̀ kpe ani nyi, kə kamə nyi kôʼ dzə̂ anə idzwə yam.’

⁹Dzə̀ i ghè yə̀ ə kàm fyi tswi fwuli bə̀ an-a-vələ â mìə̀ nə̀, ‘Abu Zə̀kìy zəŋi zwu dzə̂ fyiə kiy, kə wò nə̀ dzǐy dzə̂ nə̀ kə dzəə ŋwò.’

¹⁰Ayiə yə̀ kə fyi nsòŋə inti, fyiə kə ghè kə̀ ə ŋwò kwoʼ dzwoŋi yə̀ an-a-vələ.

¹¹Aghê àti dyaŋi təmi bə̀ anə ufə̀b u ndaw yə mə muə nəniy ate nə̀ ghu ŋwò bə̀ a Kàsalìyà, nə̀ à twum bə̀ Kònilìyùs.

¹²Zwàykə̀zwekiy dzày bə̀ nə̀ mə ŋwǒ fwumi yə̂ nə̀ aghù yə̀, mə kə fə̂d dzə̀ ìkwe yiy. Mə zù fwumi nə̀ àghě liy yiy à ntyìfoŋ a Kàsaliyà ghu kə bɛmə nəniy Zə̀kìy nə̀ ghu ŋwò bə̀ a Dzopà ghu bɛmə nəniy Zə̀kìy. Ghè dzəŋi zù a ndàw Kònilìyùs.

¹³Kònilìyùs kə dzày bə̀ â ghə̀d nə̀ tsə̀ndii ə̀ Kə̀zə̀ kə bù akə̀lə̀ ìghe, dzày bə̀ ighe nə, ghe twum zû wù a naʼi Dzopà, ù zù kaw twoŋə bə̀ wù wə̀ ghu twoŋə nəniy nə̀ à də̀ Simùn Pità.

¹⁴Pità kî dzày bə̀ we nə̀ àyiə yə̀ ù kî kyilə nəniy ibii fyi yiy ate nə̀ ìsəd i ndaw i we yiy.

¹⁵Abù mə kaʼ tsə nəniy ani dzə̀ŋì, Zwàykə̀zwekiy bù azoŋə̀ ghu ighəd anə yiə yə kə kə bû sòʼò nəniy ate azoŋə̀ ghə̀d isə.

¹⁶Mə dyaŋi myìŋì bə̀ ayiə yə Mwe ə̀ mbyi kə dzày na nəniy nə̀, ‘Dzwan kə nyiə̀ àghù nə̀ mwi m-à-zə̀ mìy, Zə̀kìy kî ghà kwuni nyìə̀ nə̀ Zwàykə̀zwekiy.’

¹⁷I dê tsə nə̀ Zə̀kìy mə nyiə̀ sòʼò aghû yə̀ ghu də wày aghee Dzû nə̀ Zwàykə̀zwe kə̀ ù kə nyiə̀ nəniy â ghə̀d yəə ghè kə bɛmə kə nəniy â Mwe ə̀ mbyi Yesù Kə̀litò. Mə kə də ndiə ani bwi na Kəzə̀ nə̀ kə kə fâʼ àyiə we yiy?”

¹⁸Abù ghu zuw tsə ayiə Pità dzìy nəniy ghu bwi na yə̀ kaʼ yə̀ ani nyiə̀ ùkali â Zə̀kìy dzìy tsə nə̀, “Zə̀kìy mə̀ nyiə̀ sòʼò aghû yə̀ ghu də way aghee Dzû nə̀ bwòʼ kìy nə̀ ghu kyèmì ŋwò kə anə ibɛb i ghu. Ù mə nyiə̀ sòʼo ghu nə̀ ìmùə̀ itsà yìy.”

¹⁹Aghee liy yiy ghu kə dzwumə̀ nəniy Mwe ə̀ mbyi, ghu sàlì tuu ŋwò zù này a Fònisìyà nə̀ a Sayplùs nə̀ a Antìyòk, bòʼ ùtswə̀d ù fyaa wə̀ u kə fyi kə nəniy anə sòŋə fə ghu kə wiy maʼà nəniy Stifə̀n ate. Ghu nìàʼà yə̀ kə ntwùm ə̀ Kə̀zə̀ yə̀ awò àghě Dzû.

²⁰Aghee Kəzə̀ àliy yiy kwuni ŋwò tsə a Sayplùs nə̀ a Sìlîn zù a Antìyòk zù nàʼà sòʼò ntwùm ə̀ ìdzòŋə̀ yə̀ kwùmə̀ yə̀ nə̀ Mwe ə̀ mbyi Yesù awò àghee Glîk yìy.

²¹Daʼa k-a-zə̀ kìy kə də̌ nə̀ ghu. Ndə̀mə̀ àghù ə bɛmə Kəzə̀ awote, gaʼ na yə̀ sòʼò fòŋ tə ghu azoŋə̀ Mwe ə̀ mbyi.

²²Abù dzəŋə kə aghě Kəzə̀ yə̀ a Yèlusalèm zuw tsə nəniy ayiə yə, ghu twum yə̀ Bànabàs a Antìyòk.

²³Yəə ù zù kwùm tsə, u kòʼ yə Zə̀kìy dê nəniy fòŋə̀ we ìdzòŋə̀ yìy awò àghě ghè yə, u dwiʼi yə̀ ghii. U bwoʼ ghu nə̀ wo kiy nə̀ gu kəli tsə kə ìbɛmə nə̀ ayiə àsoŋə̀ yìy anə fòŋ tə ghu tə̀dzə̀m awò Mwe ə̀ mbyi.

²⁴Bànabàs kə də̌ wù ù dzòŋə̀ wìy. U kwu ibɛmə â Mwe ə̀ mbyi, Zwàykə̀zwekiy də̀ sòʼo azoŋə̀ we. U zəŋi sòʼò ndə̀mə̀ ghu àliy yiy bɛmə kə sòʼò â Mwe ə̀ mbyi.

²⁵Bànabàs ə ŋwò zù a Tasùs ani zù kaw Sôl.

²⁶Abù ù zù kòʼ tsə nəniy Sôl, u nìy zù nə̀ we a Antìyòk, ghu zù dòʼò tsə kəŋə̂m nə̀ aghě Kə̀zə̀ yə̀ ghu kə də nəniy awote. Tsə̀təndii tə Yesù tə ghè tə ìbè ə zè tyi dè àyiə awò ŋwàâ kə ghù kìy a ndàw Kə̀zə̀. Antìyòk kə də̀ loʼo kə səsə kiy ghu kə kaʼ ani twoŋə aghû yə̀ ghu bɛmə Zə̀kìy nə̀ à də̀ “Aghû yə̀ ghu dzwùmə̀ nəniy Kə̀litò.”

²⁷Anə sòŋə fə ghè fə̀, aghě ntwùm ə̀ Kə̀zə̀ àliy yiy ŋwò tsə a Yèlusalèm zù a Antìyòk.

²⁸Wè lìy anə uzə u ghu izəd i we yiy kə də nə̀ à də̌ Àgabùs ə ŋwò təmi kə idoŋ anə daʼa kə Zwàykə̀zwekiy, dzày tsə nə̀ dzoŋ nî ŋge də̀ ŋwô anə lòʼo tədzə̀m anə mbyi. (I maa bù fyi ìsoŋə̀ yìy anə soŋə fə Klòdiyùs kə də nəniy dòŋ kìy.)

²⁹Tsə̀təndii tə Yesù tìy tsə̀m tsə nə̀ wù ùmoʼ umòʼ ki twumə yə ifây yìy anə yiə yə ù kəli kwûm awò àwizə̂ ghu yə ghu muə̀ a mbwòʼ ə̀ Dzùdiyà nə̀ ghu mə bɛmə Zə̀kìy.

³⁰Ghu tsuw tsə ùfyiə, sày kə Bànabàs we nə̀ Sôl twum yə̀ ùfyiə u ghè wə̀ ghu tsuw tsə nəniy nə̀ ghu zû nyiə yə̂ â ŋgəd tə ndàw Kə̀zə̀ yə̀ ghu də nəniy a Yèlusalèm.