Read Isu Kə̀fàʼ 13 Bible Online

Kə̀fàʼ 13 - Isu bible

Kə̀fàʼ 13

¹Aghee ntwùm ə̀ Kə̀zə̀ nə̀ àtyi dè yìy kə də̀ ŋwô a ndàw Kə̀zə̀ a Antìyòk. A zəd ə ghu yiy kə də̌; Bànabàs, Simìyòn wə̀ izəd i we ìliy yiy kə də nə̀ à də̌ (Wù ùləŋə̀ wìy), nə̀ Lusìyùs wə̀ (ù kə ŋwò bə̀ nəniy a Sìlîn), nə̀ Mànèn wə̀ ù kə nɛmə dzəŋi nəniy nə̀ dòŋ kə̀ ghu kə twoŋə nə̀ à də̀ Helòd, nə̀ Sôl.

²Ghu fàʼà yə̀ fàʼ kə Mwe ə̀ mbyi, bamə yə̀ adzwə. Zwàykə̀zwekiy bù dzày tsə aghu nə, “Ghà sây nyiə̀ fyi bə̂ mìə̀ nə̀ Bànabàs we nə̀ Sôl ani fàʼ fàʼ kə̀ mə twoŋə tsə nəniy ghu nə̀ ghu fâʼ.”

³Ghû bam adzwə, gwùŋì sòʼò, ghu gaʼ tsə awo ghu azoŋə̀ Bànabàs we nə̀ Sôl twum ŋwò fyi yə̀ ghu.

⁴Anə yiə yə Zwàykə̀zwekiy twum tsə nəniy Bànabàs we nə̀ Sôl, ghu zù kwùm tsə a Sèlusìyà, nìy kə kəmfə̀n awote dàŋ yə̀ a Sayplùs, inaʼ yə dzwì kə dzɛmə̀ na tsîy nəniy.

⁵Abù ghu zû kwùm tsə nəniy anə inaʼi Sàlamìs, ghu zù dyaŋi a ndàw dzəŋə kə ghee Dzû, nàʼà tsə ntwùm ə̀ Kə̀zə̀ awote. Ghu kə zù dzəŋi nə̀ Dzwan Mâk awote nə̀ ù si fii yə ghu anə fàʼ kə ghu.

⁶Bànabàs, we nə̀ Sôl ə bwìy tsìy yə̀ anə inaʼ ighè yə̀, ghu zù nìy kə kəmfə̀n dàŋ fyi yə̀ a Pafòs. Ghu kway yə̀ wè Dzû ùlìy awote ù kə zuw tsə̀ nəniy ukâŋ wìy, ghu kə twoŋə izəd i we nə̀ à də̌ Bà Yesù, u nɛbə aghu dzìy nə̀ ghe də wè ntwùm ə̀ Kə̀zə̀.

⁷Ù maa fàʼ sòʼò awò dòŋ kə Pafòs kə̀ ghu kə twoŋə nə̀ à də̌ Segìyùs Pawlùs. Pawlùs kə də̌ wù ù twabə̀ wìy, u liə ani zuw ntwùm ə̀ Kə̀zə̀. À də̀ ighe ù kə twum tsə ntwum nə̀ ghu zû twoŋə nyiə̀ bə̀ ìghè nə Bànabàs we nə̀ Sôl.

⁸Bà Yesù wə̀ izəd i we ìliy yiy kə də nə̀ à də̌ Èlimàs, u liə ani twe màʼà nə̀ wù kə̀tuw wə̀ anə mbwòʼ nə̀ ù kə bɛmə dzə̀ awò Mwe ə̀ mbyi.

⁹Zwàykə̀zwekiy kə də̀ azoŋə̀ Sôl wə̀ izəd i we ìliy yiy kə də nə̀ à də̌ Pôl, Sôl lia nyi yə̀ Bà Yesù anə awi sə.

¹⁰U dzày tsə a we nə̀ “Wô wà àmbvə̂ntsə, wò dzwə nə̀ ufyiə wə̀ ùdzə̀m u də nəniy ùdzoŋə̀ wìy. Wò kwu ndə̀mə̀ àyiə bɛbə anə̀ fôŋ yiə̀, taw də̀mə̀ sòʼò ani zəŋi tsə ayiə Mwe ə̀ mbyi yə a də nəniy tsitsi nə̀ à doʼò tsə ayiə guw yiy.

¹¹Mwe ə̀ mbyi kwu ani saʼ wiy wô nyiə. Ù kì zəŋə tsə wô nə̀ wò fɛ̂b doʼò tsə anə kə̀mə̀ fə fəsoŋə.” Ləm kiy dyaŋi bvə̀ bə̀ anə asə ə Èlimàs, u kaʼ ani dzə̀ŋ tsìy, mwàmə̀ tsə̀ tə̀loʼo, bwoʼo kə̀wo nə̀ wù lìy nə̀ də ani bù kwi tsə we anə ukwe ù tàlì yə̀ we.

¹²Abù wù kə̀tuw wə̀ kòʼ tsə nəniy ayiə yə̀ a kə fyi nəniy, u bɛmə kə â Zə̀kìy, aŋwòə idzwə yiy kə ŋge zwum we anə ayiə yə ghu kə tyi dê nəniy â we kwùmə̀ yə̀ nə̀ Mwe ə̀ mbyi.

¹³Pôl nə̀ Bànabàs nə̀ Dzwan Mâk ə ŋwò tsə a Pafòs nìy kə kəmfə̀n, dàŋ nyi yə̀ anə inaʼ i Pelgà a mbwòʼ ə̀ Pàmfilìyà. Dzwan Mâk ə kwuni nasə tsə ghu awote zù dzwoŋi a Yèlusalèm.

¹⁴Bànabàs we nə̀ Pôl ə ŋwò tsə a Pelgà, ghu zù kwùm tsə a Antìyòk anə mbwòʼ ə̀ Pìsidìyà. Abù a tsuk fə̀ aghě Dzû fə̀ zwaa fiy, ghu zù a ndàw dzəŋə kə ghě Dzû zù dòʼò tswi tsə̀.

¹⁵Abù ghu twoŋə mâ kə nəniy ŋwàʼà kə̀ Musîs kə twâ na nəniy nə̀ ùŋwàʼà wə̀ aghê ntwùm ə̀ Kə̀zə̀ yìy kə twâ, ŋgəd təndàw kə̀dzəŋə kə aghě Dzû yǐy twum tsə wè lìy nə̀ ù dzày yə̀ awò Bànabàs we nə̀ Pôl a ghu nə, “Awizə̂, bəə ghà kwu iyiə ìliy yiy i də nəniy ani fày àghù yə̀, ghà bù dzày.”

¹⁶Pôl ə ŋwò təmi dòʼò kə idoŋ fwòʼ tsə anə kəwo nə̀ ghu doʼò tsə moŋ. U dyaŋi kaʼ tsə ani dzày aghu nə̀, “Aghee Dzû nə̀ àghù yə̀ ghu də wày aghee Dzû ghu fwùlə̀ nəniy Zə̀kìy fə̀, ghà zwuli tsə!

¹⁷Zə̀ kə aghè Islàel kìy kə sây kə nə̀ təli ŋgàŋ asəsə yiy, zəŋi tsə sòʼò ghu nə̀ ghu doʼò tsə inaʼ ìsoŋə̀ yìy anə sòŋə fə ghu kə muə nəniy yəə à də̀ aghee kətwum anə inaʼ i Idzìp. Zə̀kìy nìy ŋwò fyi bə̀ ghu awote anə daʼa kə we kə̀ soŋə̀ kìy.

¹⁸U yèmì azoŋə̀ ghu anə mbvə̀nə̀ kə̀sisi anə tə ŋə̀mə̀ mə̀vəm inkyàʼì.

¹⁹U wiy màʼà aghě anə nàʼà tə̀ isèmbe ghu kə muə nəniy a Kanà, nìy nyiə̀ ŋwò yə̀ ìnaʼ i ighè yə̀ awò àghě ŋgàŋ yìy.

²⁰Ghab kə ayiə yə̀ kə fyi nəniy ate àdzə̀m à kə də̌ tə ŋəmə̀ mə̀bwàm inkyàʼì nə̀ ŋə̀mə̀ tìy mə̀vəm intà. Abù ì yû tsìy ŋwò tsə, Zə̀kìy kaw tsə ùdòŋ na tsə nə̀ ghu ki saʼa ghu ani zù kwùm anə soŋə fə wè ntwùm ə̀ Kə̀zə̀, Samwèl.

²¹Ghu ŋwa yə̀ kə̀dòŋ awò Zə̀kìy, Zə̀kìy twuə tsə wà Kis ù kə fyi nəniy anə tuu kə Bendzamèn ghu kə twoŋə nə̀ də̌ Sôl nə̀ ù dòʼò tsə dòŋ kə ghu. Sôl saʼ ghu anə təŋə̀mə̀ mə̀vəm inkyàʼì.

²²Abù Zə̀kìy nîy ŋwô kə nəniy Sôl an-a-dòŋ, tsuk tsə Devìd anə kədòŋ. U dzày tsə ayiə kwùmə̀ yə̀ nə̀ Devìd nə̀, ‘Mə mə kòʼ Devìd, wà Dzesì, ù də̌ ndzòʼò wù wə̀ mə liə. Ù kì zəŋə àyiə yə àdzə̀m mə liə nəniy nə̀ ù zəŋi.’

²³Zə̀kìy kə tɛb na nə̀ wè lìy anə isəd i ndaw i Devìd nì bii fyiə àghè Islàel. Wù ù ghè wə də̀ Yesù.

²⁴Â Yesù ani bù kaʼ fàʼ kə we, à kə də̀ tsə̌ nə̀ Dzwan kə nìʼà tsə̀ awò àghè Islàel yìy a ghu nə̀ ghu kyèmì ŋwò fyi bə̂ anə ayiə àbɛbə yiy, ghu nîy kə soʼò mwi m-à-zə̀.

²⁵Yəə fàʼ kə Dzwan ki kə mîy yə̂ nəniy, u bəb tsə awò àghù yìy a ghu nə̀ ‘Ghà moʼò nə̀ mə də ndiə? Mə way dzə wù wə̀ ghà lyimə nəniy. Mə dziy dzây bə̂ â ghà nə̀ ù bè ibàm, mə kə̀ boʼò kwoʼ kpe dzə̂ ani zè màʼà tsə ubaʼ u təgùw u we anə awù.’

²⁶Aghee Islàel, awi wa Ablàhâm, nə̀ àghù yə̀ ghu bɛmə â Zə̀kìy nə̀ ghu way aghê Dzû yìy àdzə̀m, ghà zwuli tsə! Zə̀kìy twum bə̀ ŋgàŋ nə̀ ntwum yə kwùmə̀ yə̀ nə̀ ayiə yə ù bii fyiə nəniy aghû yìy ate.

²⁷Aghee Yèlusalèm nə̀ ŋgəd tə inaʼ tə ghu tiy kə kə̀ kwuni kôʼ kəli nəway Yesù, nə̀ ù də̌ wù wə̀ ù kì bii fyiə nəniy aghû yìy. Ghu kə̀ zuw kəli soʼò nəway ayiə yə aghee ntwùm ə̀ Kə̀zə̀ yìy kə twâ na nəniy ghu twoŋə zələ anə ntsukə mə̀ zwaa mə̀ ìndzə̀m. Ayiə yə ghu kə zəŋi, a zəŋi tsə nə̀ ayiə yə agheè ntwùm ə̀ Kə̀zə̀ yìy kə twâ na, a bû fyiə àsoŋə̀ yìy, anə ayiə yə ghu kə saʼ wiy Yesù. Ghu dzày yə̀ â Paylèt nə̀ ù wiy màʼà we.

²⁸Ghu dzày yə nə̀ Paylèt nyiə̀ tsə kədaʼa nə̀ ghu wiy maʼà we, yəə ghu kə də bòʼ kwu kə way iyiə ìsoŋə̀ ìliy yiy ani wiy we.

²⁹Abù ghu zəŋi maa tsə dzə̂ ayiə yə àdzə̀m a kə twâ doʼò nəniy anə ŋwàʼà k-a-zə̀ kwùmə̀ yə̀ nə̀ Yesù, ghu nìy ŋwò fyi tswi bə̀ we anə kàʼ fə təzəd, nə̀ŋì na nyi yə̀ we anə isày.

³⁰Zə̀kìy kwuni zɛ̀m ŋwò dzwoŋi kə we anə ipfə.

³¹Yesù ə bù fyi kə akə̀lə̀ àghù yə̀ ghu kə ŋwô tsə nə̀ we a Galìlî zù a Yèlusalèm anə ndə̀mə̀ nsòŋə. Aghû yə̀ kòʼò we. Ghu nyiə̀ dzìy yə̀ ayiə ghè yə̀ ghu kə kôʼ nəniy kwùmə̀ yə̀ nə̀ Yesù awò àghě ŋgàŋə̀.

³²Ghè bû fə̀ ani bù nàʼà bə̀ ntwùm ə̀ ìdzòŋə̀ yə̀ awò ghà, nə̀ fyiə kə Zə̀kìy kə tɛb na awò nə̀ tě ŋgàŋ asə sə yiy nə̀ ghe kî zəŋə ŋwò, ù mə zəŋi nyiə̀ awò ŋgàŋ, ŋgaŋ yə ŋgà də nəniy awiwa ghu yiy. Ù mə zəŋi awò ŋgàŋ anə yiə yə ù kə zɛmə̀ ŋwò dzwoŋi kə Yesù anə ipfə. I bvami twà dòʼò ighəd anə ŋwàʼà kə təndzàŋə nə̀, ‘Wò də̌ Wa nam; aŋwòə Mə mə dòʼo Təli yiə̀ zii.’

³³

³⁴Zə̀kìy kə zɛ̀m ŋwò bə̀ Yesù anə ipfə, nə̀ ù kə̀ na dzə̂ ivən i we yiy nə̀ i fwây. Ibvami də̀ ighəd anə yiə yə Zə̀kìy kə dzây tsə nəniy nə̀, ‘Mə kî nyiə̀ tsə wò nə̀ ndzòʼò ùlwì ù zwe wə mə kə tɛb na nəniy awò Devìd.’

³⁵I twâ dòʼò sòʼò anə ŋwàʼà kə təndzàŋə nə̀, ‘Wò nì na dzə̀ wày wù kə̀fàʼ yiə̀ ù zwe wìy nə̀ ù fwày anə isày.’

³⁶Yəə Devìd kə nam də nəniy utaw, u fàʼà àyiə yə Zə̀kìy liə. Abù ù pfə tsə nəniy ghu kələ tsə we anə isày ì kəbe, ivən i we yiy fwày tswali tswi tsə awote anə isày.

³⁷Zə̀kìy kə kwuni zɛ̀m ŋwò kə Yesù anə ipfə, ivən i we yiy kə kə̀ fwây dzə̂ anə isày.

³⁸Awizə̂, mə liə nə̀ ghà ə kəli tsə nə̀ Zə̀kìy də kə ani nìyzə̀ àyiə ghii àbɛbə yiy abidzɛ̀mə̀ Yesù anə yiə yə ntwum yə̀ dzìy nəniy, à wày dzə anə ulàŋ wə̀ Musîs kə twâ na nəniy. Ghà kwu ani kəli tsə nə̀ abu à də kə ndiə ù kwu dzə nəniy ibɛmə yiy awò Yesù, Zə̀kiy kî nìyzə̀ ŋwò ayiə we àbɛbə yiy ani bòʼò kaʼ bə̀ kə anə à yu ulâŋ u Musîs wìy kə də wày ani zə̀d màʼà.

³⁹

⁴⁰Ghà nîy tsə iyemì nə̀ ayiə yə aghee ntwùm ə̀ Kə̀zə̀ yìy kə dzây na nəniy, a kə fyi dzə̀ nə̀ ghà. Ghu kə dzày tsə nə̀,

⁴¹‘Aghû yə̀ ghu tsoʼo nəniy Zə̀kìy dzîy, adzwə kî zwum ghu anə ayiə yə mə zəŋə, ghu kî pfəə ŋwò. Aŋwòə ayiə yə mə zəŋə nəniy zii, ghà kî bɛmə way. Bəə wè lìy bòʼ dzày bə̂ nəniy awò ghà, ghà kî bɛmə dzə̀ wày.’ ”

⁴²Yəə Bànabàs kə ŋwô fyiə yə̂ nəniy we nə̀ Pôl a ndàw dzəŋə kə aghě Dzû, aghee ghà yə̀ bwoʼ ghu nə̀ wokiy nə̀ ghu ki kâm bû fwuli a tsuk ùzwaa wiy ghu nam dzây fwuli bə̂ àyiə yə.

⁴³Abù ghu salì tsə nəniy, ndə̀mə̀ àghě Dzû nə̀ àghè liy yiy ghu kə bɛmə Zə̀kìy nə̀ ghu wày dzə̀ aghê Dzû, ghu kway yə̀ Bànabàs we nə̀ Pôl, Bànabàs nə̀ Pôl ə bwoʼ tsə ghu nə̀ wokiy, aghu nə kəli tsə kə nənìy ìbɛmə yiy â Zə̀ kə̀ kə dê nəniy ghà nə̀ fòŋə we ìdzoŋə̀ yìy.

⁴⁴Utsuk u aghee Dzû ùzwaa ùliy wə̀ koŋə bə̀ aghee lwe tsə a ndàw Kə̀zə̀ ani bù zuw ntwùm ə̀ Mwe ə̀ mbyi.

⁴⁵Abù aghê Dzû yìy kôʼ tsə nəniy ŋwàâ kə ghù kə̀, ghu kaʼ yə̀ ani ghòʼ, ghu twe myàʼà ayiə yə Pôl kə dzîy nəniy, nyàʼì sòʼò we.

⁴⁶Pôl we nə̀ Bànabàs ə kwuni dzày tsə anə fòŋ tə taw tiy a ghu nə̀, “Ghè mə̀ kwu ani nàʼà bə̀ dzə̀ ntwùm ə̀ Kə̀zə̀ yə̀ isə awò ghà. Yəə ghà kwuni twe maʼà nəniy ntwùm ə̀ ì ghè yə, kòʼ sòʼò ìwe nəli nə̀ ghǎ kə̀ kwoʼ kpe dzə̂ ani kəli imuə itsà, gheè kî nia sə tsə ŋwò gha ghè zû naʼà yə̂ awò àghù yə̀ à də wày aghê Dzû.

⁴⁷Mwe ə̀ mbyi kə dzày na awò ghə̀d nə̀ ‘Mə zəŋi na nə̀ ghà si də kaʼì tìy awò àghù yə̀ ghu də wày aghê Dzû, tə̀ aghê dzə̀m anə mbyi nə̂ kyilə ibii fiy yiy.’ ”

⁴⁸Abù aghû yə̀ ghu də wày aghee Dzû yìy zuw tsə nəniy ayiə yə̀ ghii, fôŋ tə ghu tiy ŋge dzwàb ate, ghu kali sòʼò ntwùm ə̀ Mwe ə̀ mbyi. Aghû yə̀ Zə̀kìy kə sây na nəniy nə̀ ghu kəli imuə̀ itsà, ghu bɛmə kə â Zə̀kìy.

⁴⁹Ntwùmə̀ Mwe ə̀ mbyi tsìy kpe yə̀ mbwòʼ ìghè yə̀ ghii ìdzə̀m.

⁵⁰Aghee Dzû yìy kwuni niɛbə ŋgəd tə inaʼ tiy nə̀ iyəŋi asoŋə̀ yə̀ ghu kə fwùlə̀ nəniy Zə̀kìy nə̀ ghu way aghee Dzû, ghu kaʼ ani kaw Pôl nə̀ ùtswə̀d wìy we nə Bànabàs, dzwùm ŋwò fyi sòʼò ghu anə mbwòʼ ə̀ ìghè yə̀.

⁵¹Bànabàs nə̀ Pôl ə bwoʼ màʼà tsə bvû kə̀ kə kə də nəniy anə awù ə ghu yəə à də kətsəe ani dè tsə nə̀ utswə̂d wìy kwi ghu anə yiə yə aghû yə̀ twe màʼà ntwùm ə̀ ìdzòŋə̀ yìy. Ghu ŋwò zù dyaŋi anə inaʼi. Ìkonìyùm

⁵²Aghû yə̀ ghu kə bɛmə nəniy Zə̀kìy a Antìyòk, ghu ŋge dyoʼo, Zwàykə̀zwekiy də̀ sòʼò azoŋə̀ ghu.