Read Isu Kə̀fàʼ 14 Bible Online

Kə̀fàʼ 14 - Isu bible

Kə̀fàʼ 14

¹Pôl we nə̀ Bànabàs kə nàʼà ntwùm ə̀ Kə̀zə̀ anə ndàw dzəŋə kə ghě Dzû a Ìkonìyùm ighəd anə yiə yə ghu kə naʼà nəniy a Antìyòk. Ndə̀mə̀ àghě Dzû nə̀ àghù yə̀ ghu kə də wày aghee Dzû, ghu bɛmə awò Mwe ə̀ mbyi.

²Aghee Dzû yə̀ ghu kə də kə̀ bɛmə nəway â Mwe ə̀ mbyi, ghu kwuni zəŋi tsə aghû yə̀ ghu də wày aghê Dzû, nə̀ fôŋ tìy ŋə̀m ghu tə̀ ghu kəli tsə imôʼ ìbɛbə yiy kwùmə̀ yə̀ nə̀ àghě Kəzə̀ yìy.

³Bànabàs nə̀ Pôl ghu ndəŋ dòʼò tsə awote tsə̀ŋə nìàʼà yə̀ kə ntwùm ə̀ Mwe ə̀ mbyi nə̀ fòŋ tə̀ taw tiy. Mwe ə̀ mbyi nyiə̀ tsə ghu nə̀ daʼa kiy nə̀ ghu zəŋi mali tə yiə nə̀ kwab tə yiə tiy ani dè tsə nə̀ ntwum yə ghu kə niʼà kwùmə̀ yə̀ nə̀ fòŋə̀ Kə̀zə̀ ìdzòŋə̀ yìy ù dè nəniy à də̌ ìsòŋə̀ yìy.

⁴Aghê Ìkonìyùm yìy kə dzàw dòʼò ŋwò anə iwè i ghu. Àliy yiy taʼa yə̀ nə̀ àghě ntwùm ə̀ Yesù, àliy yiy taʼa yə̀ nə̀ àghě Dzû yə̀ ghu kə də kə̀ bɛmə dzə̂ nəway Zə̀kìy.

⁵Aghê Dzû yə̀ ghu kə̀ də kə̀ bɛmə nəway â Mwe ə̀ mbyi nə̀ aghù yə̀ ghu kə də wày aghee Dzû yìy, nə̀ ŋgəd tə inaʼ yiy ə səay tsə nə̀ ghu kaw bə̂ Bànabàs nə̀ utswə̀d wìy we nə̀ Pôl, ghu tyimi wiy maʼà soʼò ghu nə̀ atay yiy.

⁶Abù aghee ntwùm ə̀ Yesù yìy bû kaw kəli fyi kə nəniy ayiə yə aghû yə̀ moʼò nəniy anə fòŋ tə ghu, ghu tuu zù anə inaʼi Listlà nə̀ anə inaʼi Debè anə mbwòʼ ə̀ Lìkonìyà nə̀ anə nàʼà tə̀ tə kə kwùlì də awote.

⁷Ghu nàʼà ntwùm ə̀ ìdzòŋə̀ yìy awote.

⁸Wè lìy kə də̌ a Listlà ghu kə byi bə̂ nəniy we nə̀ ù pfə dòʼò nə̀ ìfwe yiy, u də̌ ghii nə̀ ù kamə bwîy kôʼ fyi yə̂ dzə̀.

⁹U dòʼò tsə awote, zwuli kə yə Pôl nìàʼà nəniy ntwùm ə̀ Kə̀zə̀ ate. Pôl ə fwə̀d nyi yə̀ àwisə ə we, kòʼ kəli tsə nə̀ ù kwu ibɛmə nə̀ Zə̀kìy də ŋwò ani zəŋi taw kə we.

¹⁰Pôl ə dzày tsə anə dzə̀ ìtaw yìy a we nə̀, “Ŋwòə kə idoŋ!” Wù ù ghè wə̀ ə tà fyi kə idoŋ kaʼ yə̀ ani bwìy tsìy kyabi.

¹¹Abù ŋwàâ kə̀ kòʼ tsə nəniy ayiə yə Pôl kə zəŋi nəniy, ghu bvoʼə mə̀mbòŋ anə idzə̀ŋì Lìkonìyà dzìy tsə nə̀, “Ùzə̀ wìy mə fə̀d kə anə aghù fyi tswi bə̀ akə̀lə̀ ŋgàŋ ani bù fày ŋgàŋ.”

¹²Aghê ghè yə̀ ə kwe tsə izəd i Bànabàs nə̀ à də̌. “Zeyùs.”[9] Ghu kwe tsə izəd i Pôl nə̀ də̌, “Helmès” [10] aŋwòə ù kə də̌ wù wə̀ ù kə dzîy nəniy ayiə yiy.

¹³Ndàw zə̀ kə Zeyùs kìy kə dòʼò fyi yə̀ anə ukè akə̀lə̀ dzəd yə ì nyiə bə̂ anə inaʼ. Wù ù lwaʼà ù zə̀ kə Zeyùs nə̀ ŋwàâ kə ghù kìy ə zù bù anə ufə̀b u mbà inaʼ yiy, nə̀ ùtswam u təmbòŋ nə̀ ùzuu ù lyimə wiy ani bù sà nyiə awò Pôl nə̀ Bànabàs.

¹⁴Abù Bànabàs nə̀ Pôl zuw tsə nəniy ayiə yə ghii, ani dè tsə nə̀ iyiə ighà yə̀ fyimə ŋwo ghu anə foŋ, ghu sa màʼà tsə ndzwu tə ghu anə iwè, dyaŋi nyəŋ nyi yə̀ anə uzə u ŋwàâ kə ghù kə̀ bvoʼə yə̀ mə̀mbòŋ dzìy tsə nə̀,

¹⁵“À də̌ kyiə̀ ghà zəŋə nəniy ndzòʼò àyiə ghi? Ghè də aghû soʼò yəə à də̀ gha. Ghè fə̂ bû ani bù nàʼà bə̀ ntwùm ə̀ ìdzòŋə̀ yìy awò ghà ani zəŋi tsə nə̀ ghà nyəli maʼà ayiə yə a də kwu way fàʼ kìy, ghà kyemì bə̂ fòŋ təli awò Zə̀ kə̀ kə muə nəniy, ù kə bwam byiwuŋ kiy nə̀ mbvə̀dintsə kiy, zəŋi sòʼò dzwì ìnè yìy nə̀ ùfyiə wə u də anə kə byiwuŋ nə̀ a mbvə̀dintsə.

¹⁶Səsə, Zə̀kìy kə na tsə aghê nàʼà tə̀dzə̀m nə̀ ghu zəŋi ayiə yə ghu liə.

¹⁷Zəkìy dê bə̀ nə̀ ghe də ŋwô anə ayiə àdzoŋə̀ yə̀ ù kə zəŋə nəniy. Ù twumə tswi bə̀ ìwe an-a-vələ i nìàʼà ani zəŋi tsə nə̀ ufyiə ghi wiy si niɛmə. U nyiə̀ ghà nə̀ ùfànyiə wiy zəŋə sòʼò nə̀ ghà ki dyoʼo anə təfòŋ.”

¹⁸Yəə aghee ntwùm ə̀ Yesù yìy kə boʼò dzày tsə kə ayiə yə ghi, ghu nam də̀m kè ani twe nə̀ aghû yə̀ kə sâ nyiə̀ dzə̀ fyiə kiy â ghu.

¹⁹Ŋgəd tə aghě Dzû tə̀liy tiy ŋwò bə̀ a Antìyòk, a mbwòʼ ə̀ Pìsidìyà, nə̀ àghě Ìkonìyùm ghu zù bù zəŋi tsə ŋwàâ kə ghù kə̀ ghu kàm kaʼ yə̀ ani taʼ nə̀ ghu. Ghu tyimi Pôl nə̀ àtay yiy, sè kyabi tsə we ambvə̀dintsə, fyi ŋwò yə̀ anə inaʼ, màʼà na yə̀ we awote, mòʼò kə nə̀ ù mə pfə.

²⁰Abù aghê liy yə ghu bɛmə nəniy awò Zə̀kìy bû dzɛ̀mì dòʼò tsìy yə̂ nəniy akə̀lə̀ Pôl, u ŋwò kə idoŋ dzwoŋi zù anə inaʼ. Tswutswu wə, Pôl ŋwò zù a Debè we nə̀ Bànabàs.

²¹Pôl nə̀ Bànabàs ghu nàʼà tsə ntwùm ə̀ ìdzòŋə̀ yìy awote anə inaʼ i Debè, ndə̀mə̀ àghù ə zuw tsə, bɛmə kə sòʼò â Yesù. Ghu ŋwò zù dzwoŋi a Listlà nə̀ a Ìkonìyùm nə̀ a Antìyòk anə mbwòʼ ə̀ Pìsidìyà.

²²Ghu ŋwùmì kə aghû yə̀ ghu kə bɛmə kə nəniy Zə̀kìy awote, fày kə sòʼò ghu ani zəŋi tsə nə̀ ghu təmi taw tsə kə anə ibɛmə i ghu. Pôl nə̀ Bànabàs ə tyi dzày yə̀ a ghu nə, “Ŋgà nî kwu ani ŋge fii dzə̀ awò ŋgàŋ ani bù kəli kədwiʼi anə sòŋə fə Zə̀kìy nî saʼa nəniy ŋgaŋ.”

²³Pôl nə̀ Bànabàs ə sày kə ŋgəd tə̀liy tiy anə udzəŋə ndàw Kə̀zə̀. Ghu bam tsə adzwə, gwùŋì tsə nə̀ Mwe ə mbyi wə ghu gaʼ na nəniy fòŋ tìy azoŋə̀ we, nə̀ ù toʼò yèmì tsə azoŋə̀ ŋgəd tə ghè tə̀.

²⁴Pôl nə̀ Bànabàs ə tsìy yə̀ dzəd a Pìsidìyà zù a Pàmfilìyà.

²⁵Ghu zù nàʼà tsə ntwùm ìdzòŋə̀ yə̀ awote anə inaʼ i Pelgà, dyaŋi ŋwò tswi yə̀ a Àtalìyà.

²⁶Ghu nìy kə kəmfə̀n a Àtàlìyà, dàŋ yə̀ a Antìyòk anə mbwòʼ ə̀ Silìyà, a lòʼo kə ghu kə kwe yə̀ nəniy ghu anə wo k-a-zə̀ nə̀ Zə̀kìy yɛmì azoŋə ghu anə fòŋ we ìdzòŋə̀ yìy anə fàʼ kə̀ ghu kə fâʼ mà kə nəniy.

²⁷Yəə ghu zû kwûm tsə nəniy a Antìyòk, ghu twoŋə dzəŋə na bə̀ àghě ndàw Kəzə̀ yə̀ a dzə̀m dè yə̀ ayiə yə̀ àdzə̀m Zə̀kiy zəŋi nəniy nə̀ ghu. Ghu dè sòʼò yəə Zə̀kìy zəŋi tsə nə̀ aghû yə̀ ghu də wày aghê Dzû, ghu bɛmə kə nəniy Zə̀kìy.

²⁸Ghu dòʼò sòʼò ndaŋ k-a-ghab awote nə̀ àghù yə̀ ghu kə bɛmə nəniy Zə̀kìy.