Read Isu Kə̀fàʼ 15 Bible Online

Kə̀fàʼ 15 - Isu bible

Kə̀fàʼ 15

¹Aghê liy kə ŋwò bə̀ a mbwòʼ ə̀ Dzùdiyà zù anə inaʼ i Antìyòk, zù kaʼ yə̀ ani tyi dè àyiə awote awò àghù yə̀ ghu bɛmə nəniy Zə̀kìy. Ghu dzìy tsə nə̀, “Zə̀kìy nî bii fyi dzə̀ wày gha àmày kə nə̀ ghu gwùmì ghà anə yiə yə ulâŋ u Musîs wìy dzîy nəniy.”

²Iyiə i ghè yə̀ ə zəŋi tsə Pôl we nə̀ Bànabàs ghu kaʼ nyi yə̀ ani bə̀d àyiə nə̀ ghu. Ghu səay tsə dzìy Pôl nə̀ Bànabàs nə̀ àghě ndàw Kə̀zə̀ àliy yiy a Antìyòk, ghu zû a Yèlusalèm ghu zû kôʼ yə̂ àghě ntwùm ə̀ Yesù nə̀ ŋgəd tə̀liy tiy, ghu dzây yə̂ àyiə ghè yə̀ â ghu.

³Aghû yə̀ dzəŋə kə ndàw Kə̀zə̀ kìy kə twum nəniy ghu, ghu kə tsìy yə̀ dzəd a mbwòʼ ə̀ Fònisìyà nə̀ a mbwòʼ ə̀ Sàmaliyà, nìàʼà yə̀ nə̀, aghû yə̀ ghu də wày aghê Dzû, ghu mə bɛmə Zə̀kìy. Ntwum yə zəŋi tsə nə̀ aghû yə̀ ghu bɛmə nəniy awò Zə̀kìy, ghu si ŋge dyoʼo.

⁴Abù Bànabàs nə̀ Pôl bù kwùm tsə a Yèlusalèm, aghee Kə̀zə̀ nə̀ àghě ntwùm ə̀ Yesù yìy, nə̀ ŋgəd tiy ŋgwam na tsə ghu. Ghu dzày yə̀ ayiə yə àdzə̀m Zə̀kìy fày nəniy ghu nə̀ ghu zəŋi.

⁵Aghê Falàsî àliy, ghu kə bɛmə nəniy Zə̀kìy, kwuni namə nyiə̀ fwumə kə nə̀ Falàsî tìy anə fəndzə̀ŋ, ghu ŋwò təmi kə idoŋ, dzày tsə nə̀, “Aghû yə̀ ghu də wày aghee Dzû, a kwu ani gwùmì tsə ghu abu ghu bɛmə kə nəniy awò Zə̀kìy, ghu kwu sòʼo ani na ulâŋ u Musîs.”

⁶Aghee ntwùm ə̀ Yesù nə̀ ŋgəd tə ndàw Kə̀zə̀ tìy ə kwi tsə kədzəŋə ani byay tsə ayiə ghè yə̀.

⁷Abù ghu tsə̀ŋə̀ dzə̀ŋə̀ yə̂ kə ŋwô, Pità ə təmi kə idoŋ dzày tsə a ghu nə, “Awizə̂, ghà kwu təŋ ŋwò nə̀ Zə̀kìy kə kwu sày kə miə anə uzə ghii nə̀ mə zû naʼà ntwùm ə̀ ì dzòŋə̀ yìy awò àghû yə̀ ghu də wày aghê Dzû tə̀ ghu nə̀ zuw tsə ghu mboŋ bɛmə kə sòʼò Kəzə̀.

⁸Zə̀kə̀ kə kwu nəniy fôŋ tə aghè dzə̀m tìy, u dè tsə sòʼò nə̀ ghe mə sày sòʼò aghû yə̀ ghu də wày aghê Dzû yìy, anə yiə ù nyiə̀ soʼò nəniy ghu nə̀ Zwàykə̀zwekiy, ighəd yiə ù kə nyiə̀ soʼò awò ghə̀d.

⁹Zə̀kìy kə fàʼ nə̀ ghu anə yiə yə ù kə fâʼ soʼò nəniy ate nə̀ ghə̀d. Ghu kə gaʼ na yə̀ fòŋ tə ghu azoŋə̀ we, u sùw zwu na tsə sòʼò fôŋ tə ghu.

¹⁰À də̌ kiə̀ ghà ə mwâmə̀ kòʼò nəniy Zə̀kìy? Anə yiə ghà nîy kə ufyiə ùdələ wiy, nə̀ təli ŋgàŋ asəsə yiy kə də kamə kə̀ boʼò kôʼ moo ŋgà kə də wày ani bòʼò, kwe yə̀ anə utuw u ghù yə̀ ghu də wày aghee Dzû nə̀ ghu mə bɛmə Zə̀kìy.

¹¹Ŋgà bɛmə ŋwô nə̀ Zə̀kìy bii fyi ŋgaŋ bòʼ fòŋə̀ ìdzòŋə̀ yə̀ Mwe ə̀ mbyi Yesù dè nəniy awò ŋgàŋ, ighəd anə yiə yə ù dè soʼò nəniy awò ghu.”

¹²Aghê dzə̀m ə dòʼò tsə moŋ ani zwuli ayiə yə Bànabàs we nə̀ a Pôl dzîy nəniy â ghu, yəə Zə̀kìy nyiə̀ nəniy ghu ate nə̀ daʼa kiy ani fàʼ mali tə yiə nə̀ kwab tə yiə tiy anə fwumi kə ghù yə̀ ghu də wày dzə aghee Dzû.

¹³Abù ghu dzây mâ tsə nəniy, Dzɛ̂m ə ŋwò dzày fyi kə nə̀, “Awizə̂, ghà zwuli tsə â mìə̀!

¹⁴Simùn Pità mə tyi dzày mà awò ŋgàŋ yə Zə̀kìy kə bû dè bə̂ nəniy nə̀ ghe kî dè yə̀ fòŋə̀ ìghe ìdzòŋə̀ yə̀ isə awò àghù yə̀ ghu də wày aghee Dzû. Ghe mə sày na sòʼò aghê liy yiy anə fwumi kə ghu nə̀ ghu doʼò tsə aghee ighe.

¹⁵I bvami də̀ ighəd anə yiə yə aghee ntwùm ə̀ Kə̀zə̀ yìy kə twâ na nəniy nə̀,

¹⁶Abu ayiə yə̀ tsìy ŋwò tsə, ‘Miə Mwe ə̀ mbyi, mə kî bè dzwəŋə ŋwò, mə bû biə dzwoŋi kə ndàw Devìd yə̀. Mə ki zəŋi na tsə ì si toʼo taw dzwabə.

¹⁷Miə, Mwe ə̀ mbyi, mə dzîy nə̀ aghee nàʼa tə̀liy tiy àdzə̀m ki kyemì bə̂ fòŋ tə ghu â mìə̀, zù dyaŋi kə nə̀ aghù yə ghu də wày aghee Dzû mə sây na nə̀ ghu doʼò àghù yam.

¹⁸Mə maa kwu tɛb na ayiə ghè yə̀.’ ”

¹⁹Dzɛ̂m ə zù kə nə̀ səə kiy dzìy nə̀, “I dzwâb bə̀ dzə̀ wày nə̀ ŋgà fyimi aghù yə̀ ghu də wày aghee Dzû anə yiə yə ghu kyemə̀ yə̂ nəniy fôŋ tə ghu tiy â Zə̀kiy.

²⁰Ŋgà kwuni twâ dzày yə̂ kə a ghu nə̀ ghu kə nyi dzə̀ ufànyiə wə ghu sâ nyiə̀ dzə̂ awò mwòʼo miy. Ghu kə lyaŋi dzə̀. Ghu kə fwu dzə̀ nyàm yə̀ ghu wiy nəniy nə̀ ghu səŋə̀ ŋwò moo nyàm yə̀ kâŋ tìy nam də ate.

²¹Ŋgà kwu ani kəli tsə nə̀ ghu mə ùlàŋ u Musîs wìy naʼà kyabi anə ndaw tə udzəŋə tədzə̀m anə ndə̀mə̀ tə̀ŋə̀mə̀. Ghu namə twoŋə kə ŋwò nyiə̀ anə ntsukə mə̀ zwaa mìy anə ndaw tə udzəŋə tə ghě Dzû.”

²²Aghee ntwùm ə̀ Yesù nə̀ ŋgəd tə ndàw Kə̀zə̀ tìy nə̀ àghě Kəzə̀ àdzə̀m, ghu səay tsə nə̀ ghu sây kə aghê liy yiy anə dzəŋə k-a-zə̀, ghu twum yə̂ ghu a Antìyòk tə̀ ghu zû dzəŋi nə̀ Pôl we nə̀ Bànabàs. Ghu sày kə Dzudàs, ghu kə tyoŋə nəniy izəd i we ìliy yiy nə̀ à dəə Bàsabàs we nə̀ Silàs, ghu kə də nəniy ŋgəd tiy a ndàw Kə̀zə̀ twum yə̀ ghu.

²³Ghu twum tsə ŋwàʼà kə ghè kə̀ awò ghu nə̀ ghu nîy zû a Antìyòk. Ŋwàʼà kə ghè kə̀ kə dzìy tsə nə̀, “À ŋwàʼà kə̀ nyiə̀ bə̀ ghə̀d, aghee ntwùm ə̀ Yesù nə̀ ŋgəd tə dzəŋə kə ndàw Kə̀zə̀ kìy, ghe də àwizə̂ ghii. Ghè twoŋə zuw bə̀ àwizə̂ yə̀ ghu də wày aghee Dzû yìy ghu muə a Antìyòk nə̀ a mbwòʼ ə̀ Silàs nə̀ a mbwòʼ ə̀ Sìlisìyà.

²⁴Ghè zuw nə̀ aghê liy yiy ŋwò tsə fə anə dzəŋə kələ, bû kaʼ ani fwəd gha, anə ayiə yə ghu kə tyi dê. Ghè kwuni liə nə̀ ghà kəli tsə nə̀ ghu kə kə̀ nîy dzə̂ daʼa kiy awò ghə̀d.

²⁵Ghè kwi tsə nəniy dzəŋə kiy, sày kə aghee bè, twum dzəŋi bə̀ ghu nə̀ àwizə̂ ŋgàŋ àsoŋə̀ yìy, Pôl we nə̀ Bànabàs.

²⁶Aghû yə̀ mə mfyǎy miy kôʼ anə mùə̀ tə ghu bòʼ Mwe ə̀ mbyi ə ŋgàŋ Yesù Kə̀litò.

²⁷À yù də ighe ghè twumə bə̂ nəniy Dzudàs nə̀ Silàs, ghu kî bè dzìy fwulə bə̂ àyiə yə ghè twà na anə ŋwàʼà, kə̀ anə idzwə, ghà ki zuw yə̂ nə̀ ùtswuŋi ghi wiy.

²⁸Zwàykə̀zwekiy mə dè â ghə̀d nə̀ ghè kə kâm fyimi dzə̀ gha. Ayiə yə ghà kwu ani mùə̀ ate a də nə̀,

²⁹Ghà kə nyi dzə̀ ufânyiə wə ghu sâ nyə̀ dzə̂ nəniy â mwòʼo miy, ghà kə fwu dzə̀ nyàm nə̀ kâŋ tìy nam də̀ kə ate. Ghà kə fwu dzə nyàm yə̀ ghu wiy nə̀ ghu səŋə̀ ŋwò, ghà kə lyiaŋi dzə̀. Abu ghà də ani nìy ŋwò fyi kə awo ghii anə ayiə àdzəə yə, ghà kî fàʼà dzwàbə̀ ŋwò. Ghà doʼò kədzôŋ.”

³⁰Aghû yə̀ ŋwò tsə zù anə inaʼi Antìyòk, zù twoŋə na bə̀ dzəŋə aghě Kə̀zə̀ yə̀ awote nìy kə ŋwàʼà kə̀ nyiə̀ yə̀ awò ghu.

³¹Abù aghee Kəzə̀ yə̀ twoŋə kə nəniy ŋwàʼà kə ghè kə̀, ghu dwiʼi yə̀ ghi àdzə̀m anə ayiə ghè yə̀ ate anə kəŋwàʼà, aŋwòə a kə kwe fôŋ tə ghu.

³²Dzudàs nə̀ Silàs, ghu kə də nəniy aghee ntwumə Kə̀zə̀, ghu dzə̀ŋì nə̀ àghě Kəzə̀ yə̀ anə ndaŋ k-a-ghab. Ayiə yə aghû yə̀ kə dzîy nəniy awò ghu, a kə də̌ ani ŋwùmì fyi kə ghu, nə̀ ani fày ghu nə̀ ghu təmi taw tsə anə ibɛmə i ghu.

³³Abù ghu dzə̂ dòʼò tsə nəniy awote, ghu ŋwò zù dzwoŋi akə̀lə̀ aghù yə̀ ghu kə twum nəniy ghu. Aghee Kəzə̀ yə̀ ghu kə də nəniy anə inaʼ i Antìyòk ghu mee aghu nə, ghà zû dzwoŋi anə ibvay.

³⁴Silàs ə kwuni dòʼò səə tsə awote. [11]

³⁵Pôl nə̀ Bànabàs ə kwuni dòʼò səə tsə anə inaʼ i Antìyòk. Ghu nə̀ àghě Kəzə̀ àliy yiy nìàʼà yə̀ ntwùm ə̀ Mwe ə̀ mbyi, tyiə dè yə̀ sòʼò àyiə awote aghù.

³⁶Abù kə anə sòŋə fə̀liy fiy, Pôl ə dzày yə̀ awò Bànabàs a we nə, “Bù tə ŋgà ə dzwoŋi zû bwîy twoŋə zuw yə̂ àghě Kəzə̀ anə lòʼo tə ŋgà kə naʼà nəniy ntwùm ə̀ Mwe ə̀ mbyi ate, Ŋgà ki kəli tsə soʼò yəə ibɛmə i ghu yiy də nəniy ate.”

³⁷Bànabàs kə liə nə̀ ghu mə nîy gbaʼa kə Dzwan Mâk, ghu zû dzəŋi nə̀ we.

³⁸Pôl ə kwuni liə way nə̀ ghu mə nî gbaʼa kə we, aŋwòə ù ma na sə ghu a Pàmfilìyà, zù dzwoŋi a Yèlusalèm dòʼò yə̀ sòʼò kàmə̀ fàʼà wày nə̀ ghu.

³⁹Pôl nə̀ Bànabàs ə kə̀ bɛmə fwumə nəway anə iyiə ighè yə̀, ghu sàlì tsə, Bànabàs ə nìy kə Dzwan Mâk, ŋwò fwumi yə̀ nə̀ Dzwan Mâk. Ghu nìy kə kəmfə̀n, dàŋ nyi yə̀ a Sayplùs.

⁴⁰Pôl ə kwuni nìy kə Silàs, ŋwò yə̀ nə̀ we nə̀ aghee Kəzə̀ mə gwùŋi kwe yə̀ ghu anə wo k-a-zə̀.

⁴¹Ghu tsìy yə̀ dzəd a mbwòʼ ə̀ Silìyà nə̀ mbwòʼ ə̀ Sìlisikà, tswùə̀ yə̀ àghě Kəzə̀ nə̀ ghu təmi taw tsə anə ibɛmə i ghu.