Read Isu Kə̀fàʼ 16 Bible Online

Kə̀fàʼ 16 - Isu bible

Kə̀fàʼ 16

¹Pôl kə zù anə inaʼ i Debè nə̀ anə ìnaʼ i Listlà. Wà fə̀ghàŋ ùlìy ghu kə twoŋə nəniy izəd i we yiy nə̀ à də̌ Timotì ə də̌ awote nə̀ ù mə Zə̀kìy bɛmə. Zə̂ ə we kə də̌ yəŋə̀ Dzû, nə̀ ù mə bɛmə sòʼo Zə̀kìy. Tè we kwuni də̌ wè Glîk.

²Aghû yə̀ ghu kə bɛmə Zə̀kìy àdzə̀m a naʼ i Listlà nə̀ à yu sòʼo inaʼ i Ìkonìyùm, ghu dzìy təŋə kə à yiə dzoŋə̀ yìy azoŋə̀ Timotì.

³Pôl kə liə nə̀ Timotì dzwùmì bə̀ ghu. Yəə i kə də nəniy ghii, u gwùmì tsə dzə̀ we aŋwòə ù kə kwu ŋwô nə̀ aghê Dzû yə̀ ghu kə muə nəniy awote, ghu kə kwu ŋwô nə̀ tè Timotì kə də̌ wè Glîk.

⁴Yəə ghu bwì tsìy kyabə tsə̂ nəniy naʼà tə̀naʼà, ghu dzìy yə̀ àyiə yə aghee ntwùm ə̀ Yesù nə̀ ŋgəd tə inaʼ tiy kə səay a Yèlusalèm. Ghu dzìy yə̀ awò àghù yə̀ ghu bɛmə nəniy Zə̀kìy nə̀ ghu ki zəŋə yə ayiə ghè yə̀.

⁵Ayiə yə zəŋi tsə nə̀ ibɛmə ghè ndàw Kə̀zə̀ yìy taw dzwâb tsə, ghu dùw fyiə yə̀ sòʼò ntsukə indzə̀m anə taŋ.

⁶Pôl kə tsìy yə̀ dzəd anə inaʼ i Fligìyà nə̀ anə inaʼ i Gàlatìyà, we nə̀ àghù yə̀ ù kə bwîy dzəŋə nə̀ ghu aŋwòə Zwàykə̀zwekiy kə kə̀ bɛmə dzə̂ nə̀ ghu naʼà ntwùm ə̀ Kə̀zə̀ a mbwòʼ ə̀ Esìyà.

⁷Abù ghu zù kwùm tsə nəniy a Misìyà, ghu liə ani zù a mbwòʼ ə̀ Bìtinìyà, Zwày Yesù kìy ə kə̀ kwuni bɛmə dzə̂ nə̀ ghu zû awote.

⁸Ghu ə bwìy tsìy yə̀ dzəd anə inaʼ i Misìyà zù dyaŋi anə inaʼ i Toyàs.

⁹Nə̀ ntsukə tə ghè tə̀, Zə̀kìy dè àyiə awote â Pôl. U kòʼ yə̀ wè ìnaʼ i Mèsèdonìyà, ù təmi doʼò nəniy, bwoʼo we nə̀ wo kiy dzìy tsə nə̀, “Dàŋ ə bù fày ghəd fə a Mèsèdonìyà.”

¹⁰Yəə Zə̀kìy dê tsə nəniy ayiə yə awò Pôl, ghě dyaŋi byay tsə iwe, ŋwò zù a Mèsèdonìyà. Ghè kə kwu təŋ ŋwô nə̀ Zə̀kìy mə twoŋə ghəd awote nə̀ ghè ə zû naʼà yə̂ ntwùm ə̀ ìdzòŋə̀ yìy awò àghě Mèsèdonìyà.

¹¹Ghè kə nìy kə kəmfə̀n a Toyàs ŋwò zù dyaŋi tsitsi a Sàmotès. Tswutswu wə, ghè nyi yə̀ anə inaʼ i Nèyapolìs.

¹²Ghè ə ŋwò tsə awote, zù anə inaʼ i Filìpî, inaʼ yə aghee Lûm yìy kə saʼa nəniy. À kə də nəniy inaʼ ìsoŋə̀ yìy a mbòʼò Mèsèdonìyà.[12] Ghè dòʼò tsə awote ndə̀mə̀ ntsukə.

¹³A tsuk fə̀ zwaa fiy, ghè ə fyi ŋwò tsə anə inaʼ zù ani ŋgwùŋə i dzwî, ghè kə mòʼò kə nə̀ dzəŋə kə̀ gwùŋə kə ghě Dzû kìy kî də̀ ŋwô awote. Ghè ə dòʼò tswi tsə awote, dzə̀ŋì nə̀ iyəŋi yə ghu kə lwee doʼò nəniy awote.

¹⁴Wìyəŋi ulìy wìy awote, ghu kə twoŋə izəd yiy nə̀ à də̀ Lidìyà, Ù kə fwùlə̀ tsə̀ Kə̀zə̀. Ù kə ŋwô bə̀ anə inaʼ i Tàytilà, ù kə fyiè tsə̀ ndzwu tə̀ bàŋə̀ ləŋə tiy.[13] Mwe ə̀ mbyi fwiy kə fòŋə̀ we u bɛmə kə ntwum yə Pôl kə niʼà nəniy.

¹⁵Yəə ù nìy kə mwi m-à-zə̀ mìy nə̀ isəd i ndaw i we yiy, u nàm tsə ghəd a ndàw we dzày tsə nə̀, “Abu ghà kwu nəniy nə̀ Mə mə ndzə̀m bɛmə â Mwe ə̀ mbyi, ghà ə bù mùə̀ a ndaw yam.” U kpàʼ kə ghəd ghii, ghè bɛmə kə ani zù a ndàw we.

¹⁶Abù kə a tsuk ùliy wiy, ghè ŋwò tsə zè anə loʼo kə̀ gwuŋə kiy, ghè zù kpe yə̀ nə̀ wà ùyəŋi ùlìy wìy, ù kə də nəniy kwə̂d kìy, u kwu nsìy mə̀bɛbə̀ mìy anə uwe in zəŋə we u dzìy fə̀nyaʼ. U fàʼà ndə̀mə̀ tə ukhiy ate nyiə̀ yə awò nə̀ mwe a we yiy.

¹⁷U ŋwò dzwùmì bə̀ Pôl nə̀ ghə̀d bvoʼə bə̀ mə̀mbòŋ abidzəmə̀ ghə̀d nə̀ Pôl, dzìy tsə nə̀, “Aghû yə̀ də̀ aghê kəfàʼ ə Zə̀ kə̀ kə tsîy fyi nəniy uzə̀ ùdzə̀m ghu dzîy bə̂ nəniy ayiə yə a kî kyilə nəniy ibii fyi yiy ate.”

¹⁸U dzày àyiə yə anə ndə̀mə̀ ntsukə. Uwee u ŋwò twùlì Pôl bə̀ ate anə ayiə ghè yə̀. Fòŋ ə ŋə̀m we. U kyèmì tsìy yə̀, tsày tsə kəlâŋ awò nsìy mə̀bɛbə̀ mə̀ nə̀, “Mə tsâ bə̀ kə̀làŋ nə̀ wò ŋwô fyi azoŋə̀ we anə izəd i Yesù Kə̀litò.” Usîy u ghè wə̀ fyi ŋwò azoŋə̀ we nə̀ u kə̀ ndwâm fə̂d nəway ikwe yiy.

¹⁹Abù aghû yə̀ ghu kə zwe na nəniy wà ùyəŋi wə̀ ghu kôʼ tsə nə̀ ghu kâm kwu way dzəd ani kəli ndə̀mə̀ tə ukhiy, ghu kwi kə Pôl we nə̀ Silàs nìy zù nə̀ ghu akə̀lə̀ ŋgəd tə inaʼ tiy anə lòʼo tə ghu kə saʼa nəniy aghû yìy ate an-a-ne.

²⁰Ghu nìy bù nə̀ ghu akə̀lə̀ àghě ulàŋ a Lûm dzày yə̀ a ghu nə, “Aghû yə̀ də̀ aghê Dzû. Ghu khu kyabə tsə̀ ùtswə̀d fə anə ìnaʼ i ŋgàŋ.

²¹Ghu dzîy nə̀ ghè zəŋi ayiə yə lâŋ kə ŋgàŋ kìy twe nə̀ ghè kə zəŋi dzə̀. Ghè də aghee Lûm, ghè way dzə ani zəŋə ayiə yə ghu dzîy nəniy nə̀ ghè zəŋi.”

²²Ŋwàâ kə ghè kə̀ təm dzəŋi yə̀ nə̀ ghu ani bwad Pôl we nə̀ Silàs. Aghee ulàŋ wìy saa màʼà kyabi tsə̀ təndzwu azoŋə̀ Pôl we nə̀ Silàs. Ghu dzày nə̀ aghê bwad ghu nə̀ mbàŋ tìy.

²³Abù aghê bwad dzwâb tsə dzə̀ ghu, ghu nìy fè na yə̀ ghu a ndàw ntsaʼ, dzìy nə̀ wù ù kyiŋə wìy si kyiŋə tsə ghu, kəə ghu nì tee fyiə nəniy.

²⁴Wù ù kyiŋə̀ wə̀ ə fàʼ anə yiə yə ghu kə dzây nəniy â we, u fê na nyi yə̀ ghu anə idzwə i ndaw i fôŋ yìy, i kə doʼò nyi này yə̂ nəniy. U kwù maŋ na nyi fwumi yə̀ àwee ghu anə ukə̀m uŋkàʼ ùdələ ùnê wìy.

²⁵Nə̀ fòŋə̀ tsukə tiy kpe tsə, Pôl we nə̀ Silàs ə gwùŋə̀ zɛmə tə̀ndzàŋə â Zə̀kìy, aghê a ndaw ntsaʼ àliy yə zwulə kə ŋwò.

²⁶Mbvə̀dintsə kiy dyaŋi ŋwò sə̀k tsə ndàw ntsaʼ nə̀ daʼa kiy, tswi kwùm tsə anə kətsə. Mfə̀b mə ndàw ntsaʼ miy fwiy tsə, ntsaʼ tiy zè ŋwò fyi a zoŋə̀ àghě ndàw ntsaʼ àdzə̀m.

²⁷Abù wù ù kyiŋə̀ wò zɛ̀mə̀ kə nəniy anə təmbwuni, u kòʼ tsə nə̀ mfə̀b mə̀ tə̀ ndaw miy də tuu, u mòʼò kə̀ nə̀ aghê mə tu ŋwò fyi a ndàw ntsaʼ, u sè fyi kə kwàb ə̀ we ani wiy màʼà ùwe u we ate.

²⁸Pôl ə kwuni ke fyi kə kəbôŋ nə̀ ùtaw wiy nə̀ “Kə̀ ùwe niə̂ wìy wiy màʼà dzə̀, wù umòʼ kamə tu fyi dzə̂.”

²⁹U ŋwa kə təkaʼì tsìy nyi yə̀ awote anə idzwə i ndàw ntsaʼ bvə̀ tswi tsə nə̀ ù tsəəŋə awò ìtsəŋ yiy akə̀lə̀ Pôl we nə̀ Silàs.

³⁰U nìy fyi bə̀ ghu bəbə a ghu nə, “A nə̀ Mwe yamə, mə kwu ani zəŋi mə̀yiə ani kəli ibii fyi ə?”

³¹Ghu dzày yə̀ a we nə, “Bɛmə kə awo Mwe ə̀ mbyi Yesù, wò kî kəli ibii fyi! Ù kì bii fyiə sòʼò ŋwò ìsəd i ndaw yiə̀ yìy abu ghu bɛmə soʼò.”

³²Pôl nə̀ Silàs ə dyaŋi nàʼà tsə ntwùm ə̀ Yesù awò àghù yə̀ àdzə̀m ghu kə də nəniy awote a ndaw nə̀ ghu.

³³Wù ù kyiŋə wə̀ nìy zù sùw màʼa tsə afoŋ yə a kə də azoŋə̀ ghu nə̀ ntsukə tə ghè tə̀. U nìy kə sòʼò mwi m-à-zə̀ nə̀ ìsəd i ndaw i we yiy anə sòŋə fə ghè fə̀.

³⁴U nìy zù Pôl we nə̀ Silàs a ndàw we, nyiə̀ ghu nə̀ ùfànyiə wiy, aghê adzə̀m a ndaw we, ghu dwiʼi này yə̀ ghi yə ghu bɛmə kə dzə̂ nəniy â Zə̀kìy.

³⁵Nə̀ bələ̀bə̀lə̀ tə ghè tə̀, ŋgəd tə ghě Lûm tìy twum bə̀ àghě ulàŋ nə̀ ghu bû dzây bə̂ awò wù ù kyiŋə wə̀ a we nə, “Nyəli màʼa fyi aghû yìy ghu ŋwô.”

³⁶Wù ù kyiŋə̀ wə̀ dzày yə̀ awò Pôl a we nə̀, “Aghee ulàŋ wìy dziy mə dzwû maʼà ghà, tə̀ ghà zû anə ibvay.”

³⁷Pôl ə kwuni dzày yə̀ awò wù kə̀làŋ wə̀ a we nə, “Ghè də aghê Lûm, sǔgôʼ tìy mə bwad ghəd anə kəne nə̀ ghu kə̀ saʼ nəway ghəd, nìy ghə̀d fè na a ndàw ntsaʼ. Ghà moʼò nə̀ ghu də ŋwô ani nyad twum fyi ŋwò yə̀ ghə̀d fə ə̀? Hǎy, ghu way ani zəŋi dzə̀ ghii! Ghu bû fə̀ nə̀ ìwe i ghu yiy, ghu bû dzwû maʼà tsə ghəd.”

³⁸Abù wù kə̀làŋ wə̀ zù dzày yə̂ nəniy ayiə yə awò ŋgəd tə aghě Lûm tìy, ghu zuw tsə ayiə yə Pôl dzày nəniy we nə Silàs, nə̀ ghu də aghee Lûm, ghu tsəŋ.

³⁹Ghu zù bù, bwoʼ kəwo â Pôl we nə̀ Silàs a ghu nə ghè mə zəŋi bɛb. Ghu dzwù màʼà fyi bə̀ ghu awote ndàw ntsaʼ. Ghu bwoʼ sòʼò ghu nə̀ wo kiy nə̀ ghu ŋwò fyi yə awote anə inaʼ.

⁴⁰Pôl nə̀ Silàs ə ŋwò tsə zù dyaŋi kə a ndaw Lidìyà. Ghu zù kway yə̀ àghù yə̀ ghu bɛmə Zə̀kìy awote, ghu kwe tsə sòʼò fòŋ tə ghu, ŋwò dyaŋi yə̀ i ghu yiy.