Read Isu Kə̀fàʼ 18 Bible Online

Kə̀fàʼ 18 - Isu bible

Kə̀fàʼ 18

¹Pôl kə ŋwò tsə anə inaʼ i Atèns zù a inaʼ i Kolìn.

²U zù kway yə̀ wê Dzû ùlìy wìy awote ghu kə twoŋə nə a də̀ Àkwilà, u kə fyi nəniy a mbwòʼ ə̀ Pontùs nə̀ ù bvwami kwùlì ŋwò bə̀ kə a inaʼi Italì, nə̀ wiy we izəd i kə də nə̀ à də̌ Plìsilìyà. I kə də̀ ghi aŋwòə Klòdiyùs, dòŋ kə Lûm kìy kə tsày lâŋkìy nə̀ aghê Dzû àdzə̀m ŋwô fyi a Lûm. Pôl ŋwò tsə ani zù kòʼ ghu.

³Pôl ə dòʼò awote fàʼà fwumə nə̀ ghu aŋwòə u kə də̀ wù wə̀ ù kə bwukə tsə̂ nəniy ùmfwùə[16] wiy, kyilə ùkhiy ate ani zwe ufânyiə wiy ighəd anə yiə yə Àkwilà kə faʼà nəniy we nə̀ Plìsilìyà.

⁴Ntsukə mə̀ zwaa mìy ìndzə̀m, Pôl kə zè tsə̀ a ndàw kə̀dzəŋə. U zè tyi dziy ayiə â àghě Dzû nə̀ àghù yə̀ ghu də wày aghee Dzû, ani zəŋi tsə nə̀ ghu bɛmə kə â Zə̀kìy.

⁵Abù Silàs ŋwò tsə nəniy a Mèsèdonìyà nə̀ Timotì bù kwùm tsə a Kolìn bù kway bə̀ Pôl, Pôl nìy kə soŋə fə we ani nàʼà ntwùm idzoŋə yìy awò àghě Dzû, tyi dzìy yə̀ sòʼò a ghu nə̀ Yesù də̀ wù wə̀ Zə̀kìy sûw kyili na nə̀ ù dòʼò kə̀dòŋ.

⁶Abù ghu kwuni twe màʼà ayiə we à dziy yiy, dzày sòʼò ayiə àbɛbə azòŋə we, u bwoʼ màʼà tsə̀ bvû kə̀ kə kə də anə ndzwu tə we awote anə inaʼ, ani dè tsə awò ghu nə̀ mfə̀m ə̀ Kə̀zə̀ yìy limə ghu. U dzày tsə a ghu nə̀, “Abu Zə̀kìy nyiə̀ gha nə̀ mfəm, wo kam kiy way ate. Mə ŋwô tsə nyiə mə zû akə̀lə̀ àghù yə̀ ghu də wày dzə aghee Dzû.”

⁷Yəə Pôl dzày mâ tsə nəniy ayiə yə, u dyaŋi ŋwò zù a ndàw wù wə̀ izəd yiy kə də nə̀ à də̌ Taytùs Dzustùs wə̀ ù kə fwùlə̀ tsə nəniy iwe yiy nə̀ Zə̀kìy. Ndàw we kə kwùlì də̀ kə akə̀lə̀ ndàw dzəŋə kə ghee Dzû.

⁸Klipòs, ù kə də̀ nəniy tuw kiy a ndàw dzəŋə kə ghě Dzû, u zuw tsə ayiə yə Pôl niʼà nəniy, u bɛmə kə Kəzə̀ nə̀ isəd i ndaw i we yiy. Ndə̀mə̀ àghù a Kolìn ə zuw tsə sòʼò ntwùm ə̀ Kə̀zə̀ yə̀ Pôl niʼà nəniy, ghu bɛmə â Zə̀kìy, nìy kə mwi m-à-zə̀.

⁹Nə̀ ntsukə tə̀liy tiy, Mwe ə̀ mbyi ə dzə̀ŋì yə̀ nə̀ Pôl anə udzɛ̀mə̀ dzày yə̀ awe nə̀, “Kəə wò nə̀ tsəŋə, i niʼa yə ntwum yə, kə̀ doʼò dzə̀ moŋ,

¹⁰aŋwòə mə də nə̀ wò. Wè lìy kì mwàm dzə̀ wày wô, ù zəŋi wô nə̀ ìyiə ibɛb ìliy yiy. Ndə̀mə̀ àghù fə anə inaʼ yə̀ də̀ aghû yam.”

¹¹Pôl dòʼò kə̀ŋə̀m nə̀ boʼ kiy a Kolìn nə̀ ù tyiə dè kə ntwùm ə̀ Kə̀zə̀ awò àghě ghè yə̀.

¹²Abù Galìyò kwoʼ kə anə ndàŋə̀ kə̀dòŋ a mbwòʼ ə̀ Àkayà, ŋgəd tə aghě Dzû yə̀ ghu kə də nəniy awote a Kolìn ə bù kwi kə Pôl nìy zù nə̀ we a ndàw ìsaʼà yìy ani zù saʼ we.

¹³Ghu dzày tsə nə̀, “Wù wə̀ zəŋə nə̀ aghê si fwulə Zə̀kìy anə ayiə ŋwò yiy nə̀ àwày dzə ani yiə yə ulàŋ u ŋgàŋ wìy dzîy nəniy.”

¹⁴Yəə Pôl dziy bvwami dzə̀ŋi fyi bə̂, Galìyò ə dzày yə̀ â aghê Dzû yìy a ghu nə, “Abu ghǎ mə̀ fə̀ dzìy nə̀ wù zə̀ zəŋi iyiə ìliy moo nə̀ ù zəŋi iyiə ìbɛbə yiy anə làŋ kə ŋgàŋ, Mə mə̀ zuw kəli bə̀ ghà.

¹⁵Yəə ghà kwuni mâŋ bə̀d nəniy ayiə yiy, nə̀ àzəd yiy, nə̀ àyiə ulàŋ ghii wiy, byay yə̀ nənìy nə noŋə̀ ghà. Mə saʼa dzə̀ wày ndzoʼò iyiə yiy yəə à də̌ ìyiy.”

¹⁶Abù ù dzày mâ tsə nəniy ayiə yə, u dzwùm ŋwò fyi ghu a ndàw ìsaʼ i ghè yə̀.

¹⁷Ghu dzə̀m ə kwi tsə ŋgə̀d ə̀ ndàw dzəŋə kə ghě Dzû ù lìy wìy, ghu kə twoŋə nə̀ à də̀ Sòstên, bwad we, anə sə kə ndàw ìsaʼ yə̀. Galìyò ə kə̀ kwuni dzây nəway iyiə yiy ate.

¹⁸Pôl dòʼò ndə̀mə̀ ntsukə nə̀ àghě Kə̀zə̀ yìy a Kolìn. U dzày tsə â ghu nə̀ ghu dòʼò kədzôŋ, dyaŋi nìy kə kəmfə̀n ŋwò dàŋ fyi yə̀ a mbwòʼ ə̀ Silìyà, we nə̀ Àkwilà nə̀ Plìsilìyà. Â we ani ŋwò tsə a Sìŋkliyèl, ù kə kwam tsə dzə̀ kə̀tuw aŋwòə ù kə tɛb na â Zə̀kìy nə̀ ghe nî zəŋə ghii.

¹⁹Ghu zù kwùm tsə a Efesùs, Pôl na səə tsə Plìsilìyà awote nə̀ Àkwilà, dyaŋi zù tsìy nyi yə̀ a ndàw dzəŋə kə ghě Dzû, tyi dzày ayiə awote awò aghě Dzû.

²⁰Aghee ghà yə̀ mee a we nə̀ ù dzə̀ dòʼò tsə nə̀ ghu, u kwùni twe yə̀ â ghu.

²¹U dzày tsə a ghu nə̀ “Ghà doʼò kədzôŋ, abu Zə̀kìy bɛmə nə̀ mə bû dzwoŋi, mə kî kàmə̀ bè ŋwò.” U dyaŋi nìy kə kəmfə̀n ŋwò dàŋ yə̀ a Efesùs.

²²Abù ù zù kwùm tsə a Kàsalìyà, u zù dyaŋi a Yèlusalèm, twoŋə zuw yə̀ àghê ndàw Kə̀zə̀ yə̀ awote, tsiy zù dyaŋi a Antìyòk.

²³Anə yiə yə̀ Pôl dòʼò tsə nəniy ndə̀mə̀ ntsukə awote, u ŋwò tsə zù a mbwòʼ ə̀ Gàlatìyà nə̀ a mbwòʼ ə̀ Fligìyà, bwìy twoŋə zuw yə̀ aghû yə̀ tsə̀təndii tə Yesù awote anə ndə̀mə̀ tə̀lòʼo, fày kə sòʼò ghu nə̀ ghu kəli tsə ibɛmə ìtaw yiy.

²⁴Wè Dzû ùlìy wìy kə də̀ awote a Efesùs ghu kə twoŋə izəd yiy nə̀ a də̀ Àpolòs, ù kə fyi anə inaʼi Àlèzandà. U kwu dzwàb ani dzày ayiə. U də̌ nə̀ ù mə ŋge zwiʼi ŋwàʼà k-a-zə̀ kìy.

²⁵Ù maa ŋge zwiʼi kəli dzələ tə Mwe ə̀ mbyi tiy. U dzìy ayiə nə̀ fòŋə̀ we idzə̀m. Ayiə yə̀ ù kə dzîy nəniy kwùmə̀ yə̀ nə̀ Yesù, a kə də̀ tsitsi. Ù kə kwuni bvwami kwu kə ntwùm ə̀ Dzwan kə niʼà nəniy kwùmə̀ yə̀ nə̀ ìnìy i mwi m-à-zə̀ mìy.

²⁶Àpolòs kə dzìy ayiə a ndàw dzəŋə kə aghě Dzû anə fòŋ ìtaw yìy. Abù Àkwilà we nə̀ Plìsilìyà zuw tsə nəniy yə ù tyi dê ayiə yiy ate â àghù yìy, ghu nìy zù nə̀ we a ndaw ghu, tòʼò kàm tyi dê tsə we nə̀ àyiə yə Zə̀kìy liə nə̀ aghee ki zəŋə.

²⁷Àpolòs ə zəŋi kə fòŋə we ani zù a Àkayà. Aghee Kəzə̀ yìy twà yə̀ kə̀ ŋwàʼà awò àghě ndàw Kə̀zə̀ yə̀ a Àkayà dzày tsə ate nə̀ ghu ki ŋgwam na dzwâb tsə we. Abù Àpolòs zù kwùm tsə nəniy, u ŋge fày aghû yə̀ ghu kə bɛmə nəniy Zə̀kìy, aŋwòə Zə̀kìy kə ŋge dè ghu nə̀ fòŋə̀ ìdzòŋə̀ yìy anə yiə yə ghu bɛmə nəniy â Yesù Kə̀litò.

²⁸U ŋge bə̀d àyiə nə̀ àghě Dzû, u dè fyi kə anə ŋwàʼa k-a-zə̀ an-a-ne nə̀ Yesù də̌ wù wə̀ Zə̀kìy sûw kyili na nə̀ ù dòʼò kə̀dòŋ.