Read Isu Kə̀fàʼ 19 Bible Online

Kə̀fàʼ 19 - Isu bible

Kə̀fàʼ 19

¹Anə sòŋə fə Àpolòs kə də nəniy a Kolìn, Pôl tsìy yə̀ dzəd anə fôŋə̀ mbwòʼ ì ghè yə̀ zù fyi kə a Efesùs. U zù kòʼ tsə tsə̀təndii tə Yesù tə liy tiy awote.

²U bəb yə̀ a ghu nə, “Yəə ghà kə bɛmə nəniy Zə̀kìy, Zwàykə̀zwekiy kə bù ŋwò azoŋə̀ ghà yə̀?” Aghû yə̀ ə bə̀lì kə we nə̀, “Ghè kamə kə̀ boʼò zuw kôʼ dzə̂ nə̀ fyiə kə̀liy kiy də ŋwô ghu twoŋə nə̀ à də̌ Zwàykə̀zwekiy.”

³Pôl bəb yə̀ aghu nə, “Ghà kə nìy ndzòʼò mwi m-à-zə̀ mə̀ ghaa mìy?” Ghu bə̀lì kə a we nə, “Ghè kə nìy mwi m-à-zə̀ mə̀ Dzwan kə nyiə̀ nəniy.”

⁴Pôl ə dzày yə̀ aghu nə̀, “Dzwan kə nyiə̀ Mwi m-à-zə̀ awò àghù yə̀ ghu kə kyèmì ŋwò fyi anə ayiə ghu àbɛbə yiy. U dzày sòʼò a ghu nə, Wè lìy kì bè ŋwò ghu kwu ani bɛmə sòʼò â we.” Wù wə̀ Dzwan kə dzîy nə̀ ù bè ŋwò adzəmə̀ we, à kə də̀ Yesù.

⁵Abù ghu zuw tsə nəniy ayiə yə, ghu nìy mwi m-à-zə̀ anə izəd i Mwe ə̀ mbyi Yesù.

⁶Abù Pôl gaʼ tsə nəniy awo we yiy azoŋə̀ ghu, Zwàykə̀zwekiy fyi tswi bə̀ azoŋə̀ ghu, ghu kaʼ ani dzə̀ŋì anə dzə̀ŋì tə nàʼà tə̀ ŋwô tìy, nìʼà yə̀ sòʼò ntwùm ə̀ Kə̀zə̀.

⁷À kə dzəŋi də̀ iŋə̀mə̀ àvəm nə̀ iŋə̀mə̀ àbè ghu kə də nəniy awote.

⁸Anə tə ndzoŋə iti, Pôl bà tsə̀ ani zù a ndàw dzəŋə kə ghě Dzû a Efesùs. U nìy kə fəsoŋə ani tyi dè sòʼò àyiə awò ghu nə̀ fòŋə̀ we idzə̀m kwùmə̀ yə̀ nə̀ yiə yə Zə̀kìy saʼa nəniy aghee we yiy ate, khu kə dzəd nə̀ ghu bɛmə kə â Zə̀kìy.

⁹Ghu àliy yiy kə taw nə̀ ùtuw wiy, twe ani bɛmə kə â Zə̀kìy. Ghu dzày sòʼò àyiə àbɛbə kwùmə̀ yə̀ nə̀ dzə̀lə̀ ìmùə̀ yə̀ Mwe ə̀ mbyi dê nəniy anə sə kə ndə̀mə̀ àghù. À yù də̀ ighe Pôl kə ŋwô yə̂ nə̀ tsə̀təndii tə̀, zè nə̀ ghu ntsukə indzə̀m anə samkpà kə Tàylanùs, u tyi dè ghu awote nə̀ àyiə yiy ntsukə indzə̀m.

¹⁰U zəŋi ayiə yə anə təŋə̀mə̀ ìbè ani zəŋi tsə nə̀ aghee Dzû nə̀ àghù yə̀ ghu də wày aghee Dzû anə mbwòʼ ə̀ Esìyà àdzə̀m ghu zuw tsə ntwùm ə̀ Mwe ə̀ mbyi.

¹¹Zə̀kìy kə nyiə̀ Pôl nə̀ daʼa kiy ani zəŋi mali tə ayiə tə̀soŋə̀ tìy.

¹²Aghê kə nìy kə̂ bə̀lə̀ fə ndzwu fə Pôl kə zələ̀ tsə̀ nəniy zwuki kiy ate, nə̀ ùbə̀d u tə ndzwu wə Pôl kə wabə kyilə tsə̀ anə umwìy, ghu nìy zè nə̀ ùghe wìy akə̀lə̀ àghee dzaŋə yiy, mwàm tsə ghu ate, ghu taw dyòʼò bə̀. Aghû yə̀ soʼo ghu kə kwu nəniy nsìy mə̀bɛbə̀ mìy anə iwè, nsìy mə̀ ghè mə̀ ə tuu ŋwò fyi azoŋə̀ ghu.

¹³Aghê Dzû àliy yiy mboŋ ŋwò kə sòʼò bwìy tsìy kyabə tsə dzìy ghu dzwùmə ŋwò fyiə nsìy mə̀bɛbə̀ mìy azoŋə̀ àghè. Ghu dzìy tsə â ùsìy ùbɛbə wiy nə̀, “Mə tsâ bə̀ kə̀làŋ anə izəd i Yesù wə̀ Pôl niʼà nəniy fyi ŋwǒ azoŋə̀ we.”

¹⁴Wè Dzû ùlìy wìy ghu kə twoŋə nə̀ à də̌ Skevà, ù kə də nəniy wù ùlwaʼà ùnè wìy, u kə kwu awa iŋə̀mə̀ àsèmbe ghu kə dzwùmə̀ fyiə tsə̀ nəniy nsìy mə̀bɛbə̀ mìy azoŋə àghù dzìy tsə nə̀, “Mə tsâ bə̀ kə̀làŋ fyi ŋwǒ azoŋə̀ we, anə izəd i Yesù wə̀ Pôl niʼà nəniy.”

¹⁵Tsuk fə̀liy fiy, usîy ùbɛbə wiy kwuni dzày yə̀ aghu nə̀, “Mə kwu ŋwô Yesù, mə kwu sòʼò ŋwô wù wə̀ Pôl də nəniy we. Gha, ghà kwuni də̌ nə̀ ndìə̀?”

¹⁶Wù wə̀ ù kə kwu nəniy usîy ùbɛbə wiy anə uwe u ŋam tsə ghu, nyiə̀ ghu nə̀ ùfə̀n wìy ghii, ghu tuu ŋwò fyi yə̀ a ndàw wù ù ghè wə̀ nə̀ ìwuŋ ìzum yiy nə̀ àfoŋ yiy anə iwè.

¹⁷Yəə aghee Dzû yə̀ ghu kə də nəniy a Efesùs, nə̀ àghě Glîk yə̀ ghu kə muə soʼo awote, zuw tsə ayiə ghè yə̀ ghii, itsəŋ yiy kwi ghu. Ghu ŋge nyiə̀ mə̀ŋkwiʼi anə izəd i Mwe ə̀ mbyi Yesù.

¹⁸Ndə̀mə̀ à ghù yə̀ ghu kə bɛmə nəniy, ghu kaʼ kə ani dzày ŋwò fyi kwoʼ bə̀ ayiə ghu àbɛbə yə ghu kə zəŋə tsə̀ nəniy awò àghè dzə̀m.

¹⁹Ndə̀mə̀ àghù yə̀ ghu kə zuw tsə̂ nəniy nyaʼ fiy, dzìy ùkàŋ, ghu nìy bə̀ ùŋwàʼ u məntyiə u ghu u ghè wə̀ pìə̀ màʼà kə nə̀ndaa. Ukhiy wə̀ ghu kə zwe nəniy ufyiə u ghè wə̀ ate, u kə də̀ yəə à də̀ mbwàm mə̀ ndaŋgàŋ ìmbè.

²⁰Yəə i kə də nəniy ghii, ntwùm ə̀ Mwe ə̀ mbyi zè kə sə kə̀ sə, ibɛmə i ghu yiy niɛmə yə̀ sòʼò.

²¹Abù ayiə yə̀ tsìy ŋwò tsə nəniy, Pôl tsə̀m tsə ani zù a Yèlusalèm, u tsìy yə̀ dzəd a Mèsèdonìyà nə̀ a Àkayà. Yəə ù zù kwùm tsə nəniy, u zəŋi kə fòŋə̀ we, dzày tsə nə̀, “Mə kwu ani zù dyaŋi a Lûm.”

²²U nìy kə aghê àbè, Timotì nə̀ Elastùs, ghu kə faʼà fwumə nəniy nə̀ we. U twum yə̀ ghu a Mèsèdonìyà, u kwuni dòʼò koŋə yə̀ a mbwòʼ ə̀ Esìyà anə ndaŋ k-a-ghab.

²³Utswə̂d ù soŋə̀ wìy fyi kə anə sòŋə̀ fə ghè fə̀ a Efesùs aŋwòə Pôl kə tyi dè ghu nə̀ dzə̀lə̀ ìmùə̀ yə̀ Mwe ə̀ mbyi kə dê nəniy.

²⁴Wè lìy kə də̀ awote ghu kə twoŋə nəniy nə̀ à də̌ Dèmetiyùs.U kə zəŋə tsə̀ ùfyiə anə ufyiə ùtsə ùmwaa wiy, u zəŋi tsə ndaw fə zə̀ kə Lûm kə̀ yəŋi kə ghu kə twoŋə nə̀ à də̀ Atemìs anə ufyiə ùmwa wiy. Aghû yə̀ ghu kə faʼà nəniy a təŋə we, ghu ŋge kyilə ukhiy anə fàʼ kə ghè kə̀.

²⁵Dèmetiyùs ə twoŋə dzəŋə bə̀ àghù yə̀ àdzə̀m ghu kə faʼà nəniy ndzòʼò fàʼ kə we kə, dzày tsə aghu nə̀, “A fwu yamə, ghà kwu ŋwô nə̀ ŋgà ukhiy u ŋgàŋ wìy kyilə təŋə anə fàʼ kə̀,

²⁶ghà zuw yə̀ ŋwò nyiə̀ nə̀ ùtswuŋi ghi wiy, kòʼò sòʼò nə̀ àsə ghi yiy yə Pôl zəŋə nəniy. Ù niɛbə ŋwò àghù a Efesùs nə̀ ndə̀mə̀ àghù a mbwòʼ ə̀ Esìyà ìdzə̀m nə̀ ghu si zuw ayiə we à dziy yiy, dzìy a ghu nə̀ ùzə̀ wə̀ ghu fâʼ tsə nəniy nə̀ àwo yiy, à wày dzə uzə̀ wə̀ ghu kwu nəniy ani fwùlì.

²⁷Iyiə yə i də nəniy nyiə, à də̌ nə̀ aghê kî kaʼa yə̀ ani dzày àyiə bɛbə yiy anə fàʼ kə ŋgàŋ. À kaʼi wày dzə ìyiy, i dê tsə sòʼo nə̀ ndaw fə zə̀ kə Atemìs kə̀ soŋə̀ kə̀ kì kàm wày dzə fyiə kə̀liy kiy kə kwu nəniy ŋkwiʼi miy awò àghě àdzə̀m a mbwòʼ ə̀ Esìyà nə̀ anə mbyi idzə̀m. Ghu ki nîyzə̂ zə̀ kə ŋgàŋ kə̀ soŋə̀ kìy.”

²⁸Abù aghê kə fàʼ kə̀ zuw tsə nəniy ayiə yə, fôŋ tìy ŋə̀m yə̀ ghu ate, ghu kaʼ yə̀ ani bvwiʼi məmbòŋ dzìy tsə nə̀, “Aghee Efesùs yìy kwu zə̀ kə̀ soŋə̀ kìy ghu twoŋə nəniy nə̀ à də̌ Atemìs.”

²⁹Utswə̂d wìy fyi kə awote anə inaʼ ighè yə̀ ìdzə̀m, aghê liy yiy bù kwi kə Gayòs we nə̀ Àlistakùs ghu kə ŋwô bə̂ a Mèsèdonìyà nə̀ Pôl. Aghê dzə̀m anə ŋwàâ kə aghè kə̀ lwe yə̀ anə lòʼo kə aghê inaʼ i ghè yə̀ kə kwi tsə̂ nəniy dzəŋə kiy ate.

³⁰Pôl liə nə̀ ghe mə fyi yə̂ ghe dzəŋì fwumi yə̂ nə̀ aghě ghè yə̀, aghee Kəzə̀ yìy kwuni twe nə̀ ù kə fyi dzə̀.

³¹Aghê utuw àliy yiy anə mbwòʼ ì ghè yə̀ ghu kə də nəniy afələ Pôl yìy, ghu twum yə̀ ntwum â we, bwoʼò yə̀ we nə̀ wokiy nə̀ ù kə zû dzə̀ awote.

³²Aghê liy anə dzəŋə kə ghè kə̀ ə bvoʼə mə̀mbòŋ, dzìy yə̀ ìyiə ìliy yiy. Àliy yiy bvoʼə mə̀mbòŋ, dzìy yə̀ ì ŋwǒ yìy. Ŋwàâ kə ghè kə̀ kə də̌ nə̀ fwəd kiy. Ndə̀mə̀ ghu àliy yiy kə bòʼò kwu dzə̀ way iyiə yə ghu kə zû nəniy i ghè yiy.

³³Ndə̀mə̀ àghè Dzû àliy yiy tyiŋi fyi yə̀ wù lìy anə sə kə ŋwaâ kə ghu kə̀ ghu kə twoŋə nəniy nə̀ à də Àlèzandà, kaʼ yə̀ sòʼò ani dzày nyiə̀ ndzòʼò àyiə yə ù kwu nəniy ani dzày. Àlèzandà fòʼ tsə kəwo anə idzwə nə̀ ghu doʼò tsə moŋ. Ù kə liə ani tyi dzày yə̀ ìyiə ani bii fyi tuw kə ghě Dzû.

³⁴Yəə ŋwàâ kə̀ kòʼ tsə nəniy nə̀ ù də̀ wè Dzû, ghu dzìy yə̀ kə ìyiə ìmoʼo yiy kwùmə̀ yə̀ fwa tə iwùŋ ìbè nə̀, “Atemìs zə̀ kə aghě Efesùs kìy də zə̀ kə̀ soŋə̀ kìy.”

³⁵Wù wə̀ ù kə twâ nia tsə̂ nəniy ayiə yiy abu dzəŋə kə ndàw isaʼ kiy də nəniy, u ŋwò kə idoŋ, dzày tsə nə̀, “Aghee Efesùs yìy! Aghê dzə̀m kwu ŋwô nə̀ inaʼ i ŋgàŋ yìy də loʼo kə̀soŋə̀ kìy ani fwùlì zə̀ kə Atemìs ate. Ghu kwu sòʼò ŋwô nə̀ Itay zwe yə à də nəniy zəəŋi kə we kiy kə tswaʼi fyi tswi bə̀ an-a-vələ, bù dòʼò bə̀ nə̀ ŋgàŋ.

³⁶Wè lìy wày dzə ani twe àyiə ghè yə̀. Ghà kwu ani kwi tsə fôŋ təli, ghà kə zəŋə dzə̀ iyiə ìlyìʼà ìliy yiy.

³⁷Ghà mə nìy bǔ nə̀ àghû yə̀ fə nə̀ ghu kə̀ kwuni tsoŋ dzə̂ fyiə kə̀liy kiy a ndàw zə̀ kə ŋgàŋ. Ghu kə̀ dzây soʼò ìyiə ìbɛbə yiy kwùmə̀ yə̀ nə̀ zə̀ kə ŋgàŋ kìy.

³⁸Bəə Dèmetiyùs nə̀ àghě we yiy kwu nəniy utswə̂d wìy nə̀ àghù yə̀, a kwu ŋwô ndaw tə̀ saʼa tə yiə tiy, kwu aghû ani saʼ ayiə, kwu sòʼo ntsukə mə̀ saʼà mìy. Ghu də ani swamə yə̀ àghù yə̀ awote.

³⁹Bəə iyiə ì liy kwuni nam də fəli nəniy ghà liə, ghà ki nîy kwoʼ bə̂ ìyiə ighè yə̀ a ndàw ìsaʼà àyiə yiy tə̀ ghu saʼ.

⁴⁰Anə iyiə yə i fyi nəniy zii, aghee Lûm yìy də ani nìy zù nə̀ ŋgàŋ anə isaʼ nə̀ ŋgà kaw utswə̂d, loʼo kə̀ tee fyiə kiy ki də wày awò ŋgàŋ. Ŋgà kwu dzə̀ way iyiə ìsoŋə̀ ìliy yiy kwùmə̀ yə̀ nə̀ yiə yə ŋgà bvoʼə nəniy mbòŋ mìy fə ate.”

⁴¹Yəə ù dzày maa tsə nəniy ayiə yə ghii, u sàlì màʼà tsə ŋwàâ kə ghù kə̀.