Read Isu Kə̀fàʼ 21 Bible Online

Kə̀fàʼ 21 - Isu bible

Kə̀fàʼ 21

¹Abù ghè dzây tsə nə̀ ghu doʼò kədzôŋ, ghě nìy kə kəmfə̀n, dyaŋi ŋwò zù fyi kə a Kôs. Tswutswu wə, ghě zù kwùm tsə a Lodès, ghě ŋwò tsə a Lodès zù dyaŋi a Pàtalà.

²Ghè ə kòʼ tsə kəmfə̀n awote kə zê nəniy a mbwòʼ ə̀ Fònisìyà, ghě nyi kə ŋwò bə̀.

³Abù ghè bù kwùm tsə a lòʼo kə̀liy kiy wù də nəniy ani kôʼ yə̀ ìnaʼ i Sayplùs, ghè ə zù tsìy yə̀ Sayplùs a bə̀d kə itəŋ kiy anə kəmfə̀n, ghè zù fyi kə a lòʼo kə mfə̀n kiy zê tyimə ate a Taylè a mbwòʼ ə̀ Silìyà a lòʼo kə nia fyiə kwoʼo ufyiə wiy ate.

⁴Ghè ə kòʼ tsə aghee liy yiy awote ghu kə bɛmə nəniy Zə̀kìy. Ghè ə dòʼò nə̀ ghu mə̀ntsukə ìnsèmbe. Zwàykə̀zwekiy zəŋi tsə nə̀ ghu dzây yə̂ nə̀ Pôl kə zû dzə̀ a Yèlusalèm.

⁵Abù ghè doʼò kpe tsə nə̀ ghu, ghè ə ŋwò dyaŋi yə̀ ighələ yiy. Ghu sə na fyi yə̀ ghə̀d anə inaʼ nə̀ aghiy ghu yiy, nə̀ àwa ghu yiy. Ghu bù kwùm tsə anə iŋgùŋə i dzwî. Ghè ə dzəŋi nyaʼa tswi tsə anə kəsisi, gwùŋì tsə.

⁶Ghè ə dzày yə̀ aghu nə̀ ghu bwîy kədzôŋ, ghu dzày bə̀ sòʼò â ghə̀d nə̀ ghè bwîy kədzôŋ. Ghè ə zù nyi kə anə kəmfə̀n, ghu ŋwò zù dzwoŋi a ndaw tə ghu.

⁷Yəə ghè ŋwô tsə a Taylè ghè ə ŋwò yə̀ kə nə̀ ìbwìy ghələ yiy an-a-mfə̀n, zù fyi kə a Tolemès, twoŋə zuw tsə aghû yə̀ ghu kə bɛmə Zə̀kìy awote, dòʼò tsə sòʼò tsuk fə mòʼ nə̀ ghu.

⁸Abù utsuk u zwu tsə, ghè ə ŋwò zù a Kàsalìyà, zù dòʼò yə̀ a ndàw Filîp wə̀ ù niʼà nəniy ntwùm ə̀ Kə̀zə̀. Ù kə də̀ sòʼò anə ghù yə̀ àsèmbe ghu kə sây nə̀ ghu si fii yə aghee ntwùm ə̀ Yesù yìy a Yèlusalèm.

⁹Filîp kə kwu awa iyəŋi àkyàʼì ghu kə də kamə nîy àŋəmə nə̀ ghu kamə nəŋì kôʼ soʼò nə̀ wù lìy. Ghu kə nìʼà ntwum ə̀ Kə̀zə̀.

¹⁰Ghè ə dòʼò awote anə ndə̀mə̀ mə̀ntsukə, wè ntwum ə̀ Kə̀zə̀ ùlìy wìy ghu kə tyoŋə nə̀ à də̌ Àgabùs u bù akə̀lə̀ ghə̀d nə̀ ŋwò bə̀ a mbwòʼ ə̀ Dzùdiyà.

¹¹U bù akə̀lə̀ ghə̀d, nìy kə kwuə̂ fə Pôl, kwù tsə awo ə we nə̀ àwee we yiy, dzày tsə nə̀, “Zwàykə̀zwekiy dzây bə̀ nə̀ ‘Aghee Dzùdiyà yə̀ a Yèlusalèm kì kwè nia wù wə̀ ù kwu nəniy kwuə̂ fə aghii, ghu nyiə̀ yə̂ we â ghù yə̀ ghu də wày aghee Dzû yìy.’ ”

¹²Abù ghè zuw tsə ghii, ghəd nə̀ àghù yə̀ ghu kə də nəniy awote, ghè ə bwoʼ Pôl nə̀ wokiy nə̀ ù kə kâm kwoʼ dzə̀ a Yèlusalèm.

¹³Pôl ə dyaŋi bə̀lì kə a ghu nə̀, “Ghà zəŋə kìə̀ aghii, ghà dîy anə ndzòʼò àyiə yə ghi, pfə myàʼà sòʼò ìfəd yam? Mə mə bɛmə nə̀ ghu kə kaʼi kwù dzə̀ miə a Yèlusalèm, mə bɛmə sòʼò ŋwò ani pfə bòʼ ìzəd i Mwe ə̀ mbyi Yesù.”

¹⁴Yəə ghè kə də wày ani zəŋi nə̀ Pôl kwuni fòŋ ə̀ we, ghè ə nyəli màʼà, gwùŋə̀ kə nə̀, “Iyiə yə Mwe ə̀ mbyi liə nə̀ i doʼò, i doʼò.”

¹⁵Abù ayiə yə̀ tsìy ŋwô yə̂ nəniy, ghè ə nìy kə ufyiə ghələ, ŋwò kwi yə̀ dzə̀d a Yèlusalèm.

¹⁶Aghê liy yiy ghu kə bɛmə â Yesù a Kàsalìyà ə zù dzəŋi nə̀ ghə̀d a Yèlusalèm. Ghu nìy zù nə̀ ghə̀d a ndàw Nasùn, loʼo kə ghè kə kwu ani zù dòʼò ate. Nasùn kə də̌ wè Sayplùs, ù kə kwuu bɛmə nəniy â Yesù.

¹⁷Abù ghè zû kwùm tsə a Yèlusalèm, aghû yə̀ ghu kə bɛmə Zə̀kìy awote, ghu ŋgwam na tsə ghə̀d nə̀ dwiʼi kiy.

¹⁸Abù u tsuk u zwu tsə nəniy, Pôl ə zù nə̀ ghə̀d ani zù kòʼ Dzɛ̂m. Ŋgəd tə ghù yə̀ ghu kə bɛmə â Yesù kə də̌ sòʼo awote ghu dzə̀m.

¹⁹Pôl ə twoŋə zuw tsə ghu, dzày yə̀ sòʼò àyiə dzə̀m â ghu Zə̀kìy fâʼ nəniy abidzəmə̀ we ani fày àghù yə̀ ghu də wày aghee Dzû.

²⁰Abù ghu zuw tsə ayiə yə Pôl dzày nəniy, ghu nyə̀ ùkali â Zə̀kìy. Ghu dzày tsə â Pôl a we nə̀, “Àzə̀ ghələ Pôl, kòʼo kə yəə ndə̀mə̀ kam tə aghě Dzû yìy bɛmə nəniy Yesù ate. Ghu ŋge kwu sòʼò ighaa ani na lâŋ kə Musîs.

²¹Ghu mə zuw nə̀ wò bwìy tyi dè nə̀ aghee Dzû yə̀ ghu muə anə nàʼà tə ghù yə̀ ghu də wày aghee Dzû nə̀ ghu twe maʼà làŋ kə Musîs, dzìy sòʼo nə̀ ghu kə gwumì dzə̀ utu u wa ghu yiy, moo dzwùmì byiə kə aghě Dzû kìy.

²²Ŋgà zəŋə yə̀ mə̀yə nyiə ə? Ghu kî zuw ŋwò nə̀ wò mə bù,

²³wò kwu ani bvami zəŋə yə̀ ayiə yə ghè dzîy bə̂ â wò. Iŋə̀mə̀ liy yiy də fə àkyàʼì nə̀ ghu mə nyi na ŋkà mìy nə̀ Zə̀kìy.

²⁴Zǔ dzəŋi nə̀ ghu, tə̀ ghà zû zəŋi tsə iwe nəli yiy zwu doʼò tsə anə sə k-a-zə̀. Wò kî tsə nyə̀ yə̀ ùkhiy wə̀ ghu kî kwu ani kwam utuw ghu ate. Tə̀ aghê dzə̀m ki kwu kə nə̀ ayiə yə ghu kə dzây â ghu kwùmə̀ yə̀ nə̀ wò, a way dzə àsoŋə̀ yìy. Ghu ki kwu nə̀ wò nia ŋwò lâŋ kə Musîs kìy.

²⁵Ghè mə twà nyə̀ ŋwàʼà kìy â àghù yə̀ ghu bɛmə nəniy â Yesù nə̀ ghu way dzə aghe ə Dzû, dzày yə̀ aghu nə, ‘Ghè səay na nə̀ kəə ghu nì nyiə dzə̂ ufânyiə wə ghu sâ nyə̀ dzə̂ nəniy â mwòʼo miy, moo nyàm yə̀ kâŋ tìy nam də nəniy ate, moo nyàm yə̀ ghu wiy nəniy nə̀ ghu səŋə̀ ŋwò, nə̀ kəə ghu nì lyaŋə soʼò.’ ”

²⁶Abù utsuk wiy zwu tsə nəniy, Pôl ə zù sòʼò nə ghù yə̀ àkyàʼì, ghu zù zəŋi tsə iwe ighu yiy zwu dòʼò tsə anə sə k-a-zə̀. U dyaŋi zù tsìy nyi yə̀ a ndàw Kə̀zə̀ zù dzày yə̀ ntàŋə̀ tsukə mə ghu kwu ani dòʼò tə̀ iwe ighu yiy zwu, nə̀ soŋə fə ghu kî wiy nyiə̀ nəniy nyàm ə̀ wù moʼ umòʼ â Zə̀kìy.

²⁷Abù ntsukə mə ìnsèmbe bê ani bù mày, aghee Dzû àliy yiy ghu kə ŋwô bə̂ nəniy a mbwòʼ ə̀ Esìyà, ghu kòʼ tsə Pôl a ndàw Kə̀zə̀. Ghu tyebi yə̀ ŋwàâ kə ghù kə̀, ghu kwi kə Pôl.

²⁸Ghu bvoʼə mə̀ mbòŋ nə̀, “Aghee Islàel fày nə ghə̀d! À yù də̌ wù wə̀ ù bwìy loʼo tədzə̀m dzìy àyiə bɛbə yiy kwùmə̀ yə̀ nə̀ inaʼ i ŋgàŋ yìy, kwùmə̀ yə̀ sòʼò nə̀ làŋ kə Musis kìy, kwùmə̀ yə̀ sòʼò nə̀ ndàw Kə̀zə̀ ə̀ ŋgàŋ. Ù mə nam nìy nyi bə̀ aghû yə̀ ghu də wày aghee Dzû a ndàw Kə̀zə̀ ani dzəli màʼà loʼo kə̀ zwe kə.”

²⁹(Ghu kə ghî dzìy aŋwòə ghu kə kòʼ tsə Pôl we nə̀ Tòfimùs wè Efesùs anə inaʼ nə̀ Pôl. Ghu mòʼò kə nə̀ Pôl mə nìy bù nə̀ we a ndàw Kə̀zə̀.)

³⁰Aghee màŋə̀ bvoʼə tsə̀ mə̀bòŋ anə inaʼ idzə̀m. Ghu nyəŋ dzəŋə bə̀ ghu dzə̀m, bù kwi kə Pôl, sè ŋwò fyi yə̀ nə̀ we a ndàw Kə̀zə̀, fè na fyi dyaŋi bə̀ udzwəə u bà ndàw Kə̀zə̀.

³¹Ghu liə ani wiy Pôl, Wù ùnè ə̀ tə̀ sǔgôʼ tə Lûm tìy zuw tsə nə̀ utswə̂d wìy də a Yèlusalèm.

³²Wù ùnè tə̀sǔgôʼ wə̀ ə dyaŋi nìy aghê ànê àliy yiy nə̀ sǔgôʼ tìy. Ghu nyəŋ tsiy yə̀ a lòʼo kə ŋwàâ kə̀ kə lwe doʼo ate. Abù ŋwàâ kə̀ kôʼ wù ùnè wə̀ bè nəniy nə̀ sǔgôʼ tìy, ghu dòʼò yə̀ kàmə̀ bwalə way Pôl.

³³Wù ùnè wə̀ ə zù kwi kə Pôl, dzìy nə̀ ghu kwû tsə we anə təntsaʼ ibè. U dyaŋi bəb tsə nə̀, “Wù wə̀ də̌ ndiə, ù byɛbi kìə̀?”

³⁴Aghê liy yiy anə ŋwàâ kə ghù kə̀ ə bvoʼə yə̀ mə̀mbòŋ, dzìy yə̀ ìyiə imòʼ àliy yiy bvoʼə mə̀mbòŋ dzìy yə̀ sòʼò iyiə ìŋwô yìy. Abù wù ùnè wə̀ də wày ani kəli fyi kə iyiə ìsoŋì bòʼ mbòŋ mə̀, u nyiə̀ tsə kə lâŋ nə̀ ghu nîy zû nə̀ Pôl anə bali kə ghu.

³⁵Abù Pôl təmi fyi kwoʼ yə̂ anə sə kə ghù, sǔgôʼ tə̀ ə bòʼò kə we aŋwòə ŋwàâ kə̀ kə ŋge ŋə̀mə̀ nə̀ fòŋ.

³⁶Ŋwàâ kə ghù kə̀ ə nyəŋə bə̀ a dzəmə̀ Pôl, bvoʼə bə̀ mə̀mbòŋ nə̀ “Wiy màʼa we! Wiy màʼa we!”

³⁷Abù sǔgôʼ tə̀ nyiə kwoʼə yə̂ nə̀ Pôl anə bali kə ghu, Pôl bəb yə̀ a wù ùnè wə̀ a we nə, “Mə də ŋwô ani dzày bə̀ iyiə ìliy yiy â wò ə̀?” Wù ùnè wə̀ ə bəb tsə a we nə, “Wò fə̀ dzə̀ŋə̀ ìdzə̀ŋi Glîk ə̀?

³⁸I dê tsə nə̀ wò way dzə wè Idzìp wə̀ ù kə bû nəniy fə a sòŋə fə̀liy fiy bù zəŋi tsə aghee kaʼ tsə kəŋgə̀d. U nìy zù nə̀ sǔgôʼ tə wetiy təkam ikyàʼì nə̀ ùfyiə utsaam wiy anə bvə̀n ə̀ kə̀sisi, ghu liə ani wiy màʼà sǔgôʼ tə Lûm.”

³⁹Pôl bə̀lì kə nə̀, “Mə də wè Dzû, ghu kə byi miə a Tasùs a mbwòʼ ə̀ Sìlisìyà, mə də wè inaʼ ìsoŋə̀ yìy. Kə̀lə̀ â wò, mə liə ani dzə̀ŋì yə̀ nə̀ à ghù yə̀.”

⁴⁰Wù ùnè wə̀ ə nyə̀ tsə we nə̀ bwòʼkìy. Pôl ə təmi dòʼò tsə anə səə kə ghù yə̀, fòʼ tsə kəwo nə̀ ghu dòʼò tsə moŋ. Abù ghu doʼò tsə nəniy moŋ, Pôl ə dzə̀ŋì yə̀ nə̀ ghu anə idzə̀ŋi Hiblù.